╠░►♥ سنة أولى طب ♥◄░╣

[Mohamed Al Sheaibi]

المشاركة الأصلية كتبت بواسطة davy jones

يلريت تنزلوا حاجة عن التشريح لانى حاسس انى حيغمى عليه اما اروح المشرحة

لا ماتخفش كل حاجة جايه بعدين

ايه هي بقى المشرحه؟!

المشرحه دي من اكتر الحاجات اللي في كليه الطب اللي بتثار حولها الخرافات و الخزعبلات , و لازم تكون متوقع انك ان شاء الله اول ما هتوصل بيتك بالسلامه من الكليه في اول يوم هتنهال عليك الاسئله حول هذا المكان العجيب من كل اللي تعرفهم ... فمثلا حد يقولك"ها قوللي عملت ايه اول مدخلت المشرحه؟! اغما عليك ..ها؟!"
و غيره " هوا فعلا هناك في ميتين ؟!" وغيره كتير اكيد هتكتشفها بنفسك

الموضوع ابسط من كدا بكتير المشرحه دي المكان اللي بنتلقى فيه الدروس العملي لمادة التشريح .. يعني انت قاعد في المحاضرات تسمع عن arteries و veins و غيرها لازم طبعا تعرف الحاجات دي شكله ايه جو الجسم و تعرف كمان الفرق بنها و دا اللي بيوريهولك الدكتور على الجثه في المشرحه
لكن طبعا اكيد برده الموضوع و في اول مره بيبقى غريب شويه لكن بالتكرار الواحد بيتعود و بتصبح المشرحه بالنسبه للطلبه مكان عادي .... يعني عندنا مثلا في القصر العيني الناس بتعتبرها مكان التجمع و تلاقي واحد بيقول لصاحبه قابلني قدام المشرحه .... اهو شفتوا عادي جدا
بس في بعض الحاجات حابه اقولها :اداب التعامل مع المشرحه

1- لازم تحط في بالك ان الميت دا كان في يوم من الايام انسان زيك زيه فلوسمحت التعامل يكون فيه احترام لحرمة الميت
2- طبعا مش محتاجه اقول ان التصوير بالتليفون المحمول دا حرام كبير .. تخيل ان اللي قدامك دا ابوك " الله يديله طولت العمر " هتحب حد يعمل فيه كده ؟!
3- لا تنسى مهمتك الاساسيه و هي انك بتتعلم مش جاي تلعب بناس ظروفهم هي اللي وضعتهم في هذا المكان و ان شاء الله يكون لهم ثواب الصدقه الجاريه
4- احذر ان تتهاون بكسر شيء في جسم الجثه او قطع شيء فيها حرام ..حرام ,ده غير انك هتضر نفسك و غيرك
5- ياريت تخلي دخولك المشرحه عظه ليك و تذكير بلاخره و انك ميت ميت و متنساش الدعاء للميت ده ,و متبخلش علي الناس التانيه بالنصح لو لقيتهم بيعملوا حاجه غلط
ايه الادوات اللي هحتاجها في مادة التشريح ؟
1- اكيد البالطو الابيض
2- جوانتيات بلاستيكيه او مطاط
3- فورسبس (ملقط)
4- ممكن تحتاج عده تشريح بس هي مش مهمه و على العموم متستغلاش اخرك 8 جنيه
وكل ده على حسب الكلية والدكتور
بعد ملا اتكلمت عن الادوات اللي ممكن نحتاجها اكيد كل واحد دلوقتي بيقول هذاكر ازاي و منين ؟
مقدرش اقول لاي حد يذاكر ازاي لان كل واحد له الطريقه اللي بيستوعب بيها و الانسب له لكن ممكن اقولك في التشريح تركز على ايه في المذاكرة و لو ان كله مهم
1- بالنسبه للعظم مهم جدا تكون عارف ايه الحاجات اللي ماسكه في العظمه دي لان دا هيسهللك كتير كذاكرة العضلات و كمان مهم في الامتحان الشفوي و العملي(spotting)
2-اما الشريين مهم جدا تعرف التفرعات (branches) و الشبكات اللي بيشارك في صنعها (anastomosis)
3- الاعصاب بقي تركز علي العضلات اللي بيغذيها العصب و ال branches و كمان مهم جدا جدا التشوه الناتج عن اصابه العصب nerve injury
4-في حاجه كمان اسمها spaces او regions زي ما هتعرفوا بعد كده مثل cubital fossa ,femoral triangle لانها ممكن تيجي سؤال كامل

ييجي بعد كده سؤال طب هذاكر منين ؟
لازم تبقي عارف ان النظام في الكليه غير المدرسه يعني عندك الحريه انك تذاكر من المصدر اللي يريحك
اما كتاب القسم و اللي يفضل انه يكون عندك و تهتم بيه لان غالبا رئيس القسم هو اللي بيحط الامتحان , هتلاقي كمان دكاتره منزله كتب خاصه بيها ممكن لو حابب تشتريها في كمان مذكرات الدروس الخصوصيه ممكن الاستعانه بها لان غالبا الدكتور بتاع الدرس بيكون مجمع فيها اهم الحاجات و الاسئله اللي ممكن تتسئل في الشفوي و مهم جدا يكون عندك اطلس كويس لان الرسومات بتساعد جدا في فهم الanatomy

كمان المحاضرات مهمه جدا و السكاشن مهمه جدا جدا حاول على قد ما تقدر تكتب كل اللي بيتقال او ممكن كمان تسجل دي طريقه كويسه قوي

طب ايه بقى يا تري حكايه الدروس الخصوصيه دي ؟
الدروس فعلا منتشرة جدا في كليتنا و حوالي 75% من الطلبه بياخد دروس و لكن انا مبنصحش اي حد بيها و عن تجربه شخصيه مدام انت بتحضر محاضرات و سكاشن و بتذاكر اول باول مش هتحتاج الدروس و صدقوني


اكيد بعد ما عرفنا تقريبا كل حاجه عن الanatomy عايزين نعرف ايه نظام الامتحان ؟
الامتحانات في الكليه تنقسم الي نظري (written و MCQ) و عملي و شفوي
1- الامتحان النظري :
بيكون في نص السنه (اعمال سنه) و اخرها
و علشان ان شاء الله تجاوب كويس لازم تكون طبعا مذاكر كويس غير كده لازم تكون مدرب على اسئلة الMCQ (او الاختيار من متعدد) لان النوع ده من الاسئله مهم جدا في كليتنا , كمان لازم تكون و انت بتذاكر متعود ترتب افكارك و تركز علي العناوين الرئيسيه اللي لو جالك سؤال في الجزء ده هتتكلم فيها .. و صدقوني مهم جدا تكون عارف النقط و العناوين الاساسيه لكل موضوع لان غالبا وقت الامتحان لايكفي لذكر كل التفاصيل , كمان في ال anatomy بالذات الرسومات لها و قع السحر على المصحح فحاول من اول السنه تتدرب عليها و مش لازم يا اخي يكون رسمك حلو انت مش بيكاسو بس على الاقل يكون واضح و معبر

2- الامتحان العملي : عملي ال anatomy بنقول عليه spotting في الامتحان بيجيلك حاجه معينه متحدده بعلامه و المطلوب تقول ايه الحاجه دي و ممكن يسألك سؤال بسيط عليها
لو انت ملتزم بحضور السكاشن فالامتحان ده هيكون بالنسبه لك سهل ان شاء الله

3- الشفوي : الامتحان الشفوي بيكون مصدر رعب للطلاب من اول السنه و دا نتيجة الخرافات و الاشاعات اللي سمعوها عنه من اول يوم دراسه .. مثلا حد هيقولك الدكتور فلان ده بيموت الطلبه و في الاخر يديك صفر .. و اللي هيقولك الدكتور فلان اللي عامل نفسه طيب ده بيسأل اسئله مستوى دكتوراه
كل دا كلام فاضي بس خلينا صرحه امتحان الشفوي دا رزق ممكن يكون حظك مع دكتور يقتنع باي اجابه هتقولها و ممكن واحد تاني يكون بيحب الطالب الperfect دا غير طبعا الوسايط اللي بتخش في الموضوع
بس انت اهم حاجه تكون عامل اللي عليك و مذاكر و متوكل على ربنا بالنسبه لل anatomy ركز كويس جدا علي العظم لانه غالبا مفتاح الامتحان
حاجه تانيه في ناس هتقولك لازم تكون لابس formal مش شرط المهم يكون لبسك مهندم و ميستفزش الدكتور

[سارة555]

هو احنا بنختار التخصص اللى احنا عايزين ندخلة بمزاجنا ولا حسب الدرجات
اقصد يعنى التحصصات دى(الباطنة--النسا--انف واذن------

[Mohamed Al Sheaibi]

المشاركة الأصلية كتبت بواسطة سارة555

هو احنا بنختار التخصص اللى احنا عايزين ندخلة بمزاجنا ولا حسب الدرجات
اقصد يعنى التحصصات دى(الباطنة--النسا--انف واذن------

لا طبعا على حسب تقديرك ودرجاتك وبعدين التخصص ده في سنة الامتياز اما في كل سنة بتدرسي مواد معينة زي انف واذن وحنجرة دي مادة بتدريسها في الفرقة الرابعة وانا ان شاء الله هكلم عن المنهج المرة الجاية

[Mohamed Al Sheaibi]

المنهج

هنتكلم المرة دي عن المنهج المقرر في الكلية

ايه المواد اللي عندنا وهندرسها امتى وازاي

الدراسة على مرحلتين

المرحلة الأولى :
العلوم الطبية الأساسية (سنة اولى وتانية وتالتة)

المرحلة التانية:
العلوم الطبية الاكلينيكية (رابعة وخامسة وسادسة)

توزيع المواد على السنوات الدراسية:

الفرقة الأولى :

التشريح الآدمى وعلم الأجنة
الهستولوجي
الفسيولوجي
الكيمياء الحيوية
اللغة الإنجليزية
الحاسب الآلى







الفرقة الثانية

التشريح الآدمى وعلم الأجنة
الهستولوجيا
الفسيولوجيا
الكيمياء الحيوية الطبية
العلوم السلوكية والإنسانية










الفرقة الثالثة

الباثولوجيا
الفارماكولوجيا
الميكروبيولجيا والمناعة الطبية
الطفيليات










الفرقة الرابعة

طب وجراحة العيون
الأنف والأذن والحنجرة
الطب الشرعى والسموم الاكلينيكية
طب المجتمع
حقوق الانسان والمبادئ القانونية العامة







الفرقة الخامسة

الأمراض الباطنة وفروعها
طب الأطفال







الفرقة السادسة

الجراحة وفروعها
أمراض النساء والتوليد


نيجي لمنهج أولى

الجدول الجاي ده بيوضح تقسيمة المنهج وعدد الساعات العملية والنظرية وتوزيعة الدرجات

يعقد الامتحان سنويا على دورين:





الدور الاول في نهاية العام الدراسى فى شهر مايو في جميع المواد





الدور الثاني في شهر سبتمبر للراسبين والمتخلفين – ولا يعوق الرسوب او التخلف فيما لا يزيد عن مادتين من المواد الطبية من انتقال طالب الفرقة الاولى الى الفرقة الثانية بالاضافة الى مادة اللغة الانجليزية والحاسب الالى

[Mohamed Al Sheaibi]

و لله الحمد كله فاهم مفيش ردود ولا استفسار

[سارة555]

اصل في واحدة بتقولى انها لما دخلت سنة رابعة خشت انف واذن والله انا مش فاهمة حاجة ياريت حد يفهمنى

[Dr.Mai]

[dr_asmaa ehab]

يعنى انت كنت فى طب قبل كدة عشان نستفسر منك ولا ايه مش انت زميل وداخل اولى طب زينا امال بتجيب المعلومنات دى منين

[Mohamed Al Sheaibi]

المشاركة الأصلية كتبت بواسطة Dr.Mai

شكرا على المرور

المشاركة الأصلية كتبت بواسطة smasm ehab

يعنى انت كنت فى طب قبل كدة عشان نستفسر منك ولا ايه مش انت زميل وداخل اولى طب زينا امال بتجيب المعلومنات دى منين

على العموم شكرا, لو انت لاحظت في بداية الموضوع هتلاقي الرد-انت مقرأتيش الموضوع كويس- انا اردت الافادة للجميع حد يديني سؤاله اسال عنه واستفيد وافيد انا ليا زملة اعرفهم في طب يعني ممكن اسألهم ومع ذلك لو ليك اي استفسار ان شاء الله نقدر نفيد جربي.....

[dr_asmaa ehab]

ايوة فى ناس بيقولوا ان فى مواد منتهيه بناخدها فى اولى بدلا من اعدادى الكلام ده صحيح ولا لأ ومعلش يبدو ان
انا مقرأتش الموضوع كويس وعلى العموم انا اسفه

[Mohamed Al Sheaibi]

المشاركة الأصلية كتبت بواسطة smasm ehab

ايوة فى ناس بيقولوا ان فى مواد منتهيه بناخدها فى اولى بدلا من اعدادى الكلام ده صحيح ولا لأ ومعلش يبدو ان
انا مقرأتش الموضوع كويس وعلى العموم انا اسفه

لا مفيش حاجة

هو مفيش اعدادي زي صيدلة بس بيكون هناك مواد بتتاخد في كذا سنة زي التشريح ومواد في سنة واحدة زي
انف واذن او جراحة او باطنة ودي المواد في الست سنوات :

الفرقة الأولى :

التشريح الآدمى وعلم الأجنة
الهستولوجي
الفسيولوجي
الكيمياء الحيوية
اللغة الإنجليزية
الحاسب الآلى







الفرقة الثانية

التشريح الآدمى وعلم الأجنة
الهستولوجيا
الفسيولوجيا
الكيمياء الحيوية الطبية
العلوم السلوكية والإنسانية










الفرقة الثالثة

الباثولوجيا
الفارماكولوجيا
الميكروبيولجيا والمناعة الطبية
الطفيليات










الفرقة الرابعة

طب وجراحة العيون
الأنف والأذن والحنجرة
الطب الشرعى والسموم الاكلينيكية
طب المجتمع
حقوق الانسان والمبادئ القانونية العامة







الفرقة الخامسة

الأمراض الباطنة وفروعها
طب الأطفال







الفرقة السادسة

الجراحة وفروعها
أمراض النساء والتوليد

[Mohamed Al Sheaibi]

أول يوم دراسة

اول يوم ده بيكون يوم غريب جدا

بتنزل الكلية مش عارف اي حاجة وحاسس انك غريب

مين الناس دي كلها ؟!! هو فيه ايه؟!!

فين المدرجات ؟ وفين الجدول ؟

مش فاهم اي حاجة في اي حاجة وحدش حواليك فاهم حاجة

متاخدش في بالك خالص

اول ما هتروح هتلاقي في الكلية اجتماعات نشاطات اسرية

يعني ايه؟

الاسر دي مجموعات نشاط طلابية بتقدم خدمات للطلبة ترفيهية واجتماعية ورحلات ومجلات واعمال ادبية واحيانا مذكرات وكده يعني

هتلاقي في الاسر دي الناس الاكبر منك موجودين عشان يساعدوك اول يوم

اي حاجة مش عارفها اسألهم فيها

وهتلاقيهم بيوزعوا الجدول عليك

او هتلاقي الجدول متعلق عند الشئون

الجدول بيبقى صعب قوي تفهمه اول مرة تشوفه عشان كده هاشرح نظامه

دي صورة لجدول السنةقبل اللي فاتت

وجدول السنة اللي فاتت

http://www.mans.eun.eg/FacMed/arabic/tab1.htm

السبت اجازة والدراسة بادئة الأحد

يوم الحد او محاضرة 8 الصبح

انا باين سمعت ان السبت اتلغى في جميع الكليات والجامعات
لوحد عارف حاجة عن الموضوع ده يقول

ماشي كده كل مادة كتوبة ومكتوب ميعاد محاضراتها

لكن ايه الارقام المكتوبة دي؟!! وليه المواد بتكرر كده في اليوم الواحد؟!!

بص يا سيدي

المادة اللي مش مكتوب جنبها رقم دي معناها محاضرة نظري

المادة اللي جنبها رقم تبقى سكشن عملي

والرقم ده هو رقم السكشن

يعني مثلا المجموعة رقم سبعة عندها سيكشن فسيولوجي يوم الاحد الساعة 12-2

وبعده سيكشن كيمياء من 2 لغاية اربعة

وبعده سيكشن هستولوجي من4 لغاية 6 كده يعني

وعرفنا قبل كده ازاي نعرف السيكشن بتاعنا رقمه كام ومكانه فين

اول يوم دراسة مش بيكون فيه سكاشن يعني محاضرات بس

والسكاشن بتبدأ بعده باسبوعين لشهر كده

وكمان قولنا في المحاضرات ان المجموعة هاتتقسم وتعرف مجموعتك ازاي

المهم عملت ده كله والساعة جت 8 ودخلت المحاضرة مستغرب طبعا من البشر دي كلها

اول سؤال جه على بالك هو عدد الدفعة كام؟؟؟؟؟

لغاية الوقتي عدد دفعة 2008-2009 هو 667

وده طبعا بسبب تخفيض عدد اللي داخلين طب السنة دي

السنين اللي قبل كده كانوا بيكونوا حوالي الف

العدد ده ممكن يتغير لسه عشان التحويلات والناس اللي هاتيجي والناس اللي هاتمشي

المهم

الدكتور دخل وبدأ يرحب بيكم وبعد شوية بدأ شرح

لو فاهم

يبقى كويس قوي تابع معاه

مش فاهم عادي خالص ده اللي المفروض يحصل في الشهر او الشهر والنص الاولانيين

انك حاسس انك مش فاهم اي حاجة

على العموم هي فترة بس على ماتاخد على نظام الكلية وتتعود على اللغة وتكسر الحاجز الكبير اللي بين ثانوي وبين الكلية

المهم بس

انك تحاول لما تروح كل يوم تذاكر اللي اخدته النهارده قبل ما تنام ومتأجلش حاجة لتاني يوم

خلص كل حاجة اول باول عشان ترتاح بعد كده وعشان تفهم النظام اسرع

ولو انت مش فاهم انت بتذاكر ايه

ماتيأسش برضه

اقرأ مرة واتنين وتلاتة لغاية ما تفهم

وان شاء الله تاخدوا بسرعة على نظام الكلية وتجيبوا تقديرات كويسة كلكم ان شاء الله

أي استفسار؟
__________________

[dr_asmaa ehab]

خلاص متشكرة

[Mohamed Al Sheaibi]

حمل أطلس جرانتس مجانا

من هذه الموقع تستطيع ان تحمل كتاب جرانتس
وهو عبارة عن اطلس تشريح معتمد عالميا
وليس عليك الا ان تبحث عن برنامج اكروبات
لكى تستطيع تصفح الكتاب على جهازك
بدون ان تضطر الي دفع مبالغ مالية هائلة لشرائه
فتفضل مشكورا بالضغط هنا


http://www.lww.com/static/docs/Grants_Anat...%20anatomy'


*** **** ****

[7med@]

والله العظيم موضوع روعة

وحببني في طب المنصورة اكتر ما كنت حاببها

شكرا ليك يا محمد ولمدير موقع هدف واحد على المجهود الجميل ده

بس ناقصه حاجة واحدة وهي الكتب

انا عايز انزلها قبل الدراسة علشان اذاكرها وابقى داخل فاهم انا باخد ايه مش على عمايا يعني

ياريت حد ينزلها وربنا يجزاه كل خير