أمّة فقدت رونقها

[222ahmed222]

أمة فقدت رونق اخلاقها
النهارده وانا راجع من الكليه
السواق بتاع العربيه اللي راكبها كان مشغل برنامج اذاعي بتاع انا والنجوم وهواك لأسامه منير أكيد كلنا عارفينه
المهم كان بيكلم بنت بتقول
انا عندي 22 سنه مكتوب كتابي بس لسه ماتعملش الفرح
وبعد ما اتكتب كتابي حبيت واحد وبقى هو كل حياتي
وكل شويه بقوله تعالى اتقدملي ممكن اهلي يرضوا يطلقوني من الشخص الل انا متجوزاه
يقولي طب استني افكر
بكرا ارد عليكي
ومش عمل حاجه
انا بس عايزه اقوله من خلالك يا اسامه اني بحبه اوووووي
ومستعده اضحي بكل حاجه عشانه
انا ضحيت بأهلي وبكل الناس عشانه هو بس وهو مش راضي ماعرفش ليه
المهم وقعدت تسرد قصتها بقى وهي بتعيط
انا كان نفسي اكون مكان اسامه منير وقتها واشتمها
واستنيت لما هو رد عليها
رده كان كويس بس اقل من المطلوب
قالها
اولاً انك تكلمي واحد وانتي مكتوب كتابك فدا اول شيء غلط
لأنّك مقدرتيش نفسك وآدميتك ولا الانسان اللي متعلق بيكي واسمك ارتبط باسمه وبقيتي مراته
هو مخسرش حاجه بس انتي خسرتي كل حاجه خسرتي اهلك واخلاقك وكل شيء
كل اللي عايز اقولهولك كفاياكي كدا ومتبهدليش نفسك اكتر من كدا وتبهدلي الانسان اللي انتي على ذمته
............................
كل اللي عايز اقوله
لو الحب وصل انه يبقى كدا
فلتذهب الى الجحيم ايها القسيس فلانتاين
ومعنديش تعليق اكتر من كدا على أمّه فقدت اخلاقها ومعايير القيم بتاعتها
انا اول ما روحت البيت لقيت مسلسل يوميات ونيس ف احد اجزائه الحلقه الاخيره شغاله على نايل كوميدي
قعدت اتفرج عليه وأولاده بيرددوا الحكم والمواعظ والعبر الي علمهالهم
والله جسمي قشعر وكنت هعيط ع اننا نسينا العبر دي وكأنّنا مش عارفين ايه فايدة المسلسلات النضيفه دي اللي كنا بنتفرج عليها
عسى أن نعرف الرجوع
ولا حول ولا قوة إلا بالله العلي العظيم