احلى ربطات طرح لاحلى بنات

[egypty3000]

نموذج 5


الربطة دي ممكن البنات تعملها في الجامعة وتستخدم فيها ألوان الموضة.. التركواز مع الأسود.. البني المحروق.. وهي نفس طريقة الربطة السابقة بس بيدخل فيها لونين الأبيض والتركواز بنضيف إيشارب زيادة على الإيشارب الموجود فوق البندانا.. بالإضافة للبندانا اللي هنحط فوقها إيشارب طويل مستطيل ونشبكه معها بدبوس من ورا ونحط فوقه بعد كده إيشارب مربع مطبق على شكل مثلث، وطبعا بلون تاني ونثبته كويس، وبعدين نحط الإيشارب الثالث، ولازم يكون طويل عشان نكمل به الربطة، وتلف بالشكل ده.. ممكن الربطة دي تدخل فيها ألوان جميلة تضيف لمسة جديدة وحلوة لشكل اللبس وتنفع الصبح.



يلا يا جماعه ايه رايكم فى لفه النهارده؟؟؟


يا جماعه انا عايزه اسال سؤال؟؟؟ هو فى حد عرف يعمل اى لفه من دول؟
:D :D :D :D :D
انتظروا اللفه القادمه بكره ان شاء الله

[basmala]

ونموزج خمسه برده جميل جدا

وكمان الايشرب كله حلو

[egypty3000]

فين الرد بقيه الاعضاء

هى مش عجباكم ولا ايه؟

[Flower]

موضوعك جميل

كملي ..

احنا متابعينك...

[أمة الإسلام]

شكرا ياإيجيبتى على اللفات الجميله دى بس الدال على الخير كفاعله والدال على الشر كفاعله بالنسبه للفه الإسبنش وأحنا بنلبس الطرحه علشان لا نظهر أكبر جزء وياأخواتى الطرح الكبيره جميله جدا وبتعطى وقار أنا مجربه

[براءة]

انا عن نفسي عمرى ما خرجت بسبانش بس بعرف ألفهم

ماعدا الاخيرة دى فيها حاجه مش طبيعية بس مش عارفه ايه :D

ما علينا

ايجيبتى لازم تكملى

يلااااااااااااااااااااااااا

وشكرا على اللفات دى وحاولى تقللى من الاسبانش فعلا

[LA STELLA]

هههههههههه
طرح جميلة

اكيد مفيش احسن من الحجاب الاسلامى


بس اهو احنا بنتفرج و نتعلم


مرسى كتييييييييييييييييييييييييير

[smileheart]

جميلة اوى اوى التشكيلات دى


بس ممكن بس اضيف ان الرقبة مش المفروض تظهر

يعنى بلاش الحجاب اللى بتبان فيه الرقبة

بس حلويين حقيقى و فيهم تميز

شكرا ليكى


سلام smileheart

[أسيل رزق]

شكرا شكرا شكرا ليكى يا بسنت

بس عندى تعليق صغير ويا ريت كل البنات اللى فى المنتدى يتكلمو معايا فيه ويسمعوه كويس اوى

انا ضد الطرح اللى بتبين الرقبه او الجزء الاسفل اللودن

لان الرسول قال لنساء المؤمنين ان لايظهر فى جسم المراه الا الوجه والكفين

على فكرا احظرو احظرو لان سمعت ان شيخ من الشيوخ بيقول ان المراه اللى بتبين رقبتها ستذبح منها يوم القيامه لانها تبين جمالها

وبعدين الحجاب ده سواء موضه جديده او قديمه فهوا اصلا مش حجاب

بس بجد موضوع اكتر من رائع ومميز

ربنا معاكى بسنت والى الامام دائما باذن الله

[أسيل رزق]

يا جماعة مش عايزه حد يزعل منى
دى وجهة نظر
وان شاء الله متفقين عليا

[أمة الإسلام]

شكرا لكى أسيل دى فعلا معلومه مهمه ولو سمحتى تأكدى منها وعلى فكره الوجه واليدين فى الصلاه فقط

طبعا فى كثير جدا معترضين معى بس فى شيخ أقنعنى بها قائلا أن وجه المرأة هو موضع الفتنه كلها .

وفعلا ده كلام مقنع فكيف ينظر إليك رجل وأنت تغطى وجهك فغطاء الوجه لتجنب هذه النظره الحرام

وإن شاء الله سوف أفيدكم فى هذا الموضوع من الشيوخ الكبار

محدش يزعل منى

[Flower]

ما شاء الله

جميع البنات تقريبا متمسكين بالحجاب العادي الشرعي وليس الاسبانش الذي يظهر الرقبه..

كملي الموضوع يا ايجيبتي

[egypty3000]

يا جماعه انا فرحانه ان كلكم مبتحبوش الاسبانش

واكيد الحجاب الاسلامى احست كتير بس انا فى نظرى ان المفروض النقاب( تغطيه الوجه والكفين) لاننا الان نعتبر فى زمن الفتنه وامرنا الرسول الكريم عليه الصلاه والسلام انه فرض فى زمن الفتن


شكرا بسمله وفلاور ورحمه وسمايل هارت وهابى ومها على المرور والتعقيب واكيد محدش هيزعل منك مها وامه الاسلام لاننا دى حاجه متفقين عليها جميعا

[egypty3000]

وده نموزج 6

الربطة السعودي وهي بتنفع مع الوجه الصغير.. بتكبره وتخلي الشكل حلو.. نربط الإيشارب الأول بدبوس من عند الرقبة ونحط الإيشارب الثاني عليها.. واحد سادة والتاني منقوش، ويكون واحد تقيل والثاني خفيف.. أهم حاجة تثبيت الدبابيس على الإيشاربين كويس جدا.




ايه رايكم فى اللفه دى؟؟؟ :D :D

انتظروا اللفه القادمه

مستنيه تعليقاتكم الجميله والناقده

[bosy .. mostafa]

لفات جميله اوي يا ايجيبتي
بس انا عجباني اوي اللفه بتاعة النموذج رقم 5 بس طبعاً ماتنفعش دلوقتي
و بخصوص سؤالك انا مابعرفش أعمل غير لفتين بس رقم واحد و تلاته
شكراً يا قمر