ممكن تساعدونى

[واحـد من النــاس]

لا انتي لازم تكملي علمي وان شاء الله تبقي حاسبات معانا :D

انتي بس شدي حيلك وحطي في دماغك ما تقليش عن 100% وان شاء الله تطلعي الأولى ع المدرسة

وعلى فكرة حاسبات حلوة جدا ولذيذة بس انا ما كنتش حاططها في دماغي في الاول كنت فاكرها مهتمة بالهارد وير مش السوفت وير

وخلي بالك انتي ممكن تدخلي آداب قسم إعلام من علمي بردو بس لازم تجيبي مش اقل من 48 في الإنجليزي للسنتين
فانصحك تكملي علمي وشدي حيلك وافتكري يوم النتيجة ــ مش بتاع السنة دي ــ وافتكري انك ان شاء الله هاتحققي حلمك واتعبي سنة واحدة وبإذن الله تستريحي وتستقري بقية عمرك

وربنا يوفقك يا باشمهندسة

[طالبة 2 ثانوى]

واحـد من النــاس شكرا على ردك
والله انا نفسى ادخل حاسبات
بس علشان اللى جرى لى كرهتها وكرهت العلمى وكرهت نفسى
وبعدين انا عارفة نفسى يعنى اقصى مجموع ممكن اجيبه هو 95 % ده اذا عرفت اتعامل مع الفزياء
والمشكلة ان المستوى الرفيع رياضة وانا كل ما اقول لحد يقولى ده انا قريبى دخل مستوى رفيع رياضى ومجبش فيه حاجة
انا خايفة ادخل علمى و اتعب وبعدين يجى التنسيق يعلى
ولا تفرق معايا حاسبات اعلى درجة ولا اتنين
ساعتها ممكن تجرى لى حاجة والله
انا كنت بقول فى الاول انى حتى لو لا قدر الله مدخلتش حاسبات ممكن ادخل علوم رياضة وفى سنة تانية لو جبت تقدير اخد فى تالتة ورابعة كمبيوتر
بس بعد كده فكرت فى ازاى ارتاح ومتعبش نفسى لانى مش هشتغل اصلا
اخويا بيقولى انتى متقدريش تشتغلى دكتورة الا لو اتخرجتى من طب ومتقدريش تشتغلى محامية الا لو اتخرجتى من حقوق لكن تقدرى تشتغلى فى الكمبيوتر من غير ما تتخرجى من كلية حاسبات ومعلومات
بيقولى تاخدى لك كورس فى اى مكان و خلاص

[واحـد من النــاس]

بصي انتي اعملي اللي عليكي وسيبي النتيجة لقدر ربنا بس عشان ما ترجعيش تندمي وتقولي يا ريتني كنت كملت وذاكرت

ولو ممكن تشتغلي بكورسات من غير كلية يبقى 4 سنين مالهمش لازمة !!!!!!

وعلى فكرة الكلية تعتبر كورسات بردو بس ارخص

وخريج السن انجليزي احسن من اللي واخد كورسات انجليزي

وبعدين الكمبيوتر مجالاته كتير يعني انتي عايزة تشتغلي ايه في الكمبيوتر وتاخدي كورسات ايه

[Rien]

بجد انا عايزة اساعدك بس مش عارفة ازاى
ومش عارفة اقول ايه !!
ده افضل حل

المشاركة الأصلية كتبت بواسطة dr.zomba

الحل الجميل اوي ليكي انك تصلي استخاره وصدقيني هترتاحي

ومن وجهة نظرى
لو حطيت نفسى مكانك
بجد عمرى ما هافكر اكمل علمى
لو واثقة من نفسك اوى .. كملى
لكن لازم تعرفى
الموضوع مش سهل
ولازم تتعبى اوى عشان تحققى هدفك
ربنا معاكى ويهديكى للاختيار الصح
ويوفقك ف المجال اللى هاتكملى فيه

[طالبة 2 ثانوى]

واحـد من النــاس
ما هو انا بقولك ان فكرة الشغل مش موجودة بشكل اساسى عندى يعنى الاحتمال الاكبر انى مش هشتغل
انا عامة اللى بحبه فى الكمبيوتر واللى اتعلمت حاجات فيه هو تصميم المواقع والمنتديات اعرف استخدم لغة html واتعلمت شوية فتوشوب

--------------------------------------------------------------------------------------------------------------------------------------------
!! who cares !!
تسلمى يا قمر على ردك
انا ان شاء الله هصلى صلاة الاستخارة وربنا يهدينى ان شاء الله للاختيار الصح
بصراحة انا بعد اللى جرالى السنة اللى فاتت تعبت قوى مش تعبت من المذاكرة لا اعصابى تعبت
انا لو هحول ادبى هحول علشان ارتاح

[طالبة 2 ثانوى]

طب يا جماعة حد يعرف ايه شروط دخول اداب اعلام من ادبى ؟؟؟؟؟؟؟؟؟؟؟؟؟

[Rien]

المشاركة الأصلية كتبت بواسطة طالبة 2 ثانوى

طب يا جماعة حد يعرف ايه شروط دخول اداب اعلام من ادبى ؟؟؟؟؟؟؟؟؟؟؟؟؟

انا ماعرفش حاجة
بس ده كلام بلال عن اداب قسم اعلام

المشاركة الأصلية كتبت بواسطة واحـد من النــاس

وخلي بالك انتي ممكن تدخلي آداب قسم إعلام من علمي بردو بس لازم تجيبي مش اقل من 48 في الإنجليزي للسنتين

وهاحاول ادور على معلومات اكتر
لو وصلت لحاجة هاكتبهالك

[bosy .. mostafa]

بسم الله الرحمن الرحيم
انا مش راح اتكلم عن علمي ولا أدبي
بس راح اقولك
ان غلطتك في امتحان الكيميا .. انك مش نمتي كويس
لإن مخك مش أخد قسط كافي من الراحه .. فمش قدر يفتكر اي حاجه
يابنتي الراحه ليلة الإمتحان اهم بكتير
دي اول غلطه ليكِ
==
أتكلم بقى عن علمي ولا أدبي
بصي انا مش أقدر اتوقع لك اذا كان التنسيق راح يفضل زي ما هو ولا راح ينزل ..
بس اللي اقوله ليكِ إني شايفه ان ادبي أحسن .. ده لو انتِ بتحبي الحفظ
لو مش بتحبي الحفظ كملي علمي رياضه و ممكن تزيدي
معظم الناس بيزيدوا في سنه تالته
و الأحسن تصلي استخاره زي ما واحد من الناس قالك
واللي فيه الخير يقدمه ربنا

و ربنا يوفقك و يسهل لك الطريق

[د/ ماجدولين]

بصى يا قمر
مش عارفة أذا كنتى خدتى قرارك ولا لأ
بس استحملى غلاستى بقى:D:D
نبدأ واحدة واحدة

انا منمتش يومين قبل امتحان الكيمياء علشان كنت بذاكر ومسبتش كلمة غير لما ذاكرتها وانا كنت شاطرة فيها طول السنة الحمد لله وباخد مع مدرس ممتاز
روحت اللجنة من غير ما انام خالص
الامتحان كان سهل قوى
بس انا نسيت
كل ما اشوف سؤال اكون عارفاه بس مش قادرة افتكر الاجابة
مكنتش قادرة اركز خالص

انا بقول يمكن ده حصل علشان ربنا كاتب لى حاجة احسن فى الادبى فى اى كلية تانية

بصى يا قمر
الكلام دة ينفع لو أنتى عملتى كل اللى عليكى
بس أنتى قصرتى فى أنك مش نمتى كفاية
.........طبعا اللى حصل حصل ياعسل
بس دة لازم تتعلمى منة بعدين
عارفة يا قمر
أنا دايما كدة قبل الأمتحانات بتاعة الثانوية العامة
وبالتحديد ليلة الأمتحان
كنت بحس أنى مش فاكرة حاجة خااااااااااااااااالص
فبعبقريتى بقى:D:D
بفكر أن الحل هو أنى أراجع من الأول
ويوم أمتحان الفيزياء مش نمت غير ساعتين
حصلى تقريبا نفس اللى حصلك
بس أنا الحمد لله قدرت أمسك اعصابى شوية
بس تركيزى خانى
قلبت قوانين.........عملت عمليات حسابية غلط ع الألة
لخبطت تعريفات..............يعنى غلطات قلة تركيز
دة غير الغلطات التانية:D:D
وبعد كدة بقى يا سكر عرفت ودة المهم
أن المخ من كتر المذاكرة بيوصل لحالة من التشبع
وبتحسى أنك مش فاكرة حاجة
والحل أنك تكبرى وتهدى
وتخشى اللجنة وتقرى قرآن وتستهدى بالله
وأبدئى.............
والله بتلاقى استجابة رهيبة من المخ
أنا بقول الكلام دة عشان أحذرك
أوعى اوعى اوعى تعملى كدة تانى
حتى لو حسيتى ليلة الأمتحان أنك مش فاكرة حاجة خاااااااااالص
دة بيبقى مجرد احساس مؤقت وخادع نتيجة للقلق ليس أكتر
أوكى
ننقل بقى ع نقطة تانية

المشكلة ان بابا وماما مش قادرين يقتنعوا ان اللى حصل فى الكيمياء ده كان حاجة غصب عنى وانا كنت سهرانة علشان اذاكر مش العب (ما احنا اتفقنا يا سكر أنك تتحملى جزء من المسؤلية)
محسسنى انى فاشلة كل ما يتكلموا معايا يقولوا لى ما انتى مجبتيش مجموع فى تانية
وبيقولوا لى لازم تذاكرى جامد قوى فى تالتة
بيزودوا الضغط العصبى اللى انا فيه وانا بجد مش قادرة استحمل انا محبطة جدا
كل ما يتكلموا معايا يقولوا لى حولى ادبى لانك مش هتجيبى مجموع فى علمى

بصى يا سكر
مش تفكرى فى كلامهم بالطريقة دى
فكرى أنهم خايفين على مصلحتك وبيتمنولك الخير عشان أنتى بنتهم حبيبتهم
يمكن مش بيعبروا عن دة بأسلوب صح..........بس حسن النية وخوفهم عليكى يغفر لهم
أنتى بقى اللى تحاولى تقللى من الضغط العصبى عليكى
بأنك تنسى اللى حصل فى الكيمياء.....
....وتوريهم أنك ناوية أنك مش تتنازلى عن حلمك مهما حصل
هما لما هيشوفوا اصرارك وعزيمتك أكييييييييييييييد هتلاقى منهم كل التشجيع
وأى تجربة وحشة بتعدى عليكى فى حياتك
فكرى أنا استفدت من التجربة دى أية؟؟؟؟؟؟؟
ولكن البكاء على اللبن المسكوب لايفيد

وروحت درس الفيزياء لكن حسيت انى مش قادرة اكمل

بصى يا قمر
أنتى اللى حاطة فى دماغك الأحساس دة
أنتى اللى بتحبطى نفسك بنفسك.....وأنتى مش ناقصة يا عمرى
أدى نفسك دفعة أيجابية للأمام
وافتكرى
أن النجاح والتميز هو قرار شخصى
يعنى أنتى اللى تقدرى تحددى أذا كنتى هتتفوقى ولا لأ
أوكى.......نقطة تانية

ما هو انا بقولك ان فكرة الشغل مش موجودة بشكل اساسى عندى يعنى الاحتمال الاكبر انى مش هشتغل

تميزك وتفوقك وتحقيق حلمك يا حياتى.........لا يكون الدافع لة هو سوق العمل فقط
ولكن لكى تكونى أم مثقفة تستطيع أن تفهم اولادها وتربيهم بطريقة صحيحة
فيكونوا أفراد مؤثرين فى المجتمع......صح يا قلبى
***************************************
بصى بقى يا سكر
أنتى بتقولى أكمل ولا أحول أدبى
أنا رأيى...........طبعا بعد الأستخارة
أنك والله عندك أمل كبييييييييييييييييييير جداااااااااااااااااااااااااااا
مش فى حاسبات بس ....لأ والله وفى هندسة كمان
خصوصا أنك بتقولى أنك متفوقة طول عمرك
يعنى قدراتك العقلية تقدر تخدمك بأذن الله
أنتى حطى عينك ع النهائية فى جميع المواد........بما فيها العربى
وخلى دة هدفك.........وصدقى الهدف دة.......وأوعى تستكترية
واعملى كل اللى عليكى
وأن شاء الله ربنا يكرمك
وهنا بفتكر مثل بيقول
shoot for the moon .even if you miss. you will land among the stars
فاهمانى يا قمر
يعنى لما تيجى تحددى هدفك
حطى عينك على أعلى حاجة ممكن توصليلها
يمكن ربنا يكرمك........ولو لاقدر الله دة مش حصل
فأنتى مش هتنزلى أوى يعنى........أوكى يا ملاكى
وياريت يا حبى أكون قدرت أريحك
وكلمة أخيرة بقى معلش
حاولى على قد ما تقدرى تتقللى الضغط على نفسك
وانسى الكيمياء يا سكر...........البكاء ع اللبن المسكوب لايفيد
واهلا بيكى فى أروع مادة ممكن تذاكريها بأمانة......الفيزياء
أرق وخالص التمنيات بالتوفيق

[Dr|shereen]

ولله اللى حصل لك ده نفس اللى حصل لى فى الانجليزى منمتش كويس ويمكن النوم قبل الامتحان ده اكبر مشكلة عندى ولله الامتحان الوحيد للى نمت قبله امتحان التفاضل والمثلثات ونمت كمان بعد الفجر وباقى الامتحانات منمنتش ولو حتى دقيقة واحدة من الخوف والقلق يعنى الخوف كان بياثر عليا سلبي وده اكبر غلط مش عارفة بقى لو هقدر اتفادى المشكلة دى السنة الجاية ولا يه المهم انتى زى ما دكتورة ماجدولين قالت لك صلى استخارة وربنا خير معين ليكى و صدقينى انا اعرف واحدة صلحبتى و طول عمرها ممتازة ومن الاوائل وجابت نفس مجموعك انا استغربت لكن قلت ده نصيب وعملى استخارة وشوفى حتحسى بيه