موظفين الحكومة حالة خاصة .. حصرى جداً

[أسيل رزق]

السلام عليكم ورحمة الله وبركاته

موضوعنا إنهارده عن موظفين الحكومة العظماء

طبعاً العظماء دى تريقة لإن اللى بيتشاف منهم مش قليل خالص

الموضوع كبير كبير يا جماعة

ندخل فى المفيد

أكيد مش هننكر دور الناس المحترمين
من الموظفين الحكوميين
دول يتشالوا على رموش العين

( طول عمرى شاعرة )

لكن كلامنا على الجزء التانى من موظفين الحكومة

اللى بنشوفهم فى أى مصلحة حكومية

سجل مدنى ، شئون الطلبة سواء فى المدارس أو الجامعات وهكذا..

الغريبة إنهم بيحاولوا يتعبوا الناس على الفاضى ومش متخيلين إنهم بيتعبوا نفسهم قبل كل شىء

الناس دى حقيقى يعنى لما الواحد يكلمهم لازم يكون واخد فرقة مزين قبل ما يروحلهم

هوريلكم كام حوار واقعيين حصلوا معايا ومع أصحابى ..

فى تمام الساعة التاسعة صباحاً توجهت إلى شئون الطلبة لختم ورق البطاقة .. وأخلص بقى

الموظفة (بصوت تعجز الأذن عن سماعه) : انتى يا حلوة منك ليها فى صف ياختى انتى وهى مش ناقصيين قرف على الصبح
( مع العلم إن مفيش غير 3 بنات اللى واقفين بــــــــــس )
الطالبة : لو سمحتى عايزة أختم ورق البطاقة ..
الموظفة : يا حلاوتك ياختى ولسه فاكرة دلوقتى وبعدين مستعجلة على إيه إصبرى لما أخلص الشندوشت بتاعى .. جتكم الهم
الطالبة ( كانت هتطلعلها الماطوة أرن الغزال بس صبرت عليها ) : طيب حضرتك مش هتخسرى حاجة لما تختميها بالختم
الموظفة : انتى بتبجحى فيا ولا إيه ماقلتلك اصبرى .. دول طلبة دول دا إحنا كنا على أيامهم ملايكة لا بنهش ولا بننش
( على أساس إنها بالمنظر ده كانت فى كلية أصلاً .. آخرها مدرسة مجانص الثانوية بنين )

(طبعاً بعد إكتمال الصفوف التى وصلت إلى سور الكلية .. تكرمت الموظفة بعطفها وحنانها إنها .. تفز من على الكرسى وتكلمنا )

الموظفة( سألتنى بصوت مندمج مع مدغ الخيار ) : انتى قسم إيه يا شاطرة ؟؟
الطالبة : علم نفس
الموظفة : انتى شايفة دا شباك كام ؟؟
الطالبة : مفيش أرقام عليه
الموظفة : يعنى مش شباك خمسة
الطالبة : و أنا أعرف منين خمسة ولا ستة أنا عايزة اختم الزفتة اللى فى إيدى دى
الموظفة : وهى تنظر للورقة بحقارة .. روحى دورى على شباك خمسة يا أمورة

( مع العلم إن الشباك ده من يوم واحد كان مخصص لعلم النفس )

::::::::::::

فذهبت أبحث عن شباك قسم علم النفس حتى وجدته

وقفت فى صف حتى جاء دورى

الطالبة : لو سمحت عايزة أختم ورق البطاقة
الموظف : أطرش بعيد عنكم .. شغال يحكى مع الست اللى جامبه و كركر ومرمر
الطالبة (بصوت مرتفع ): لو سمحت عايزة أختم ورق البطاقة ده
الموظف( بكل برود ) : أفندم؟!!!!
الطالبة : عايزة أختم دى
الموظف : انتى قسم إيه
الطالبة فى دهشة : علم نفس
الموظف : علم النفس حد وأربع
( طبعاً إتحرق دمى يعنى هو مخصص علم نفس يقول حد وأربع بمناسبة إيه .. و الأغرب من كده إن فى بنت دفعتى كانت واقفة جمبى وقالها سبت وتلات !!!! )

::::::::::

بعد مرور إسبوع فى تمام التاسعة والنصف صباحاً

توجهت لنفس الشباك لأختم الورقة اللى حمضت معايا

الطالبة : لو سمحتى عايزة أختم ورق البطاقة
الموظفة : انتى سنة كام ؟؟
الطالبة : أولى علم نفس و الله العظيم
الموظفة : واقفة فى الصف ده ليه اقفى فى الصف التانى
الطالبة (فى تعجب شديد) : يعنى هو الصف ده غير ده ؟!!!

( مع العلم إن كل الصفوف كان فيها اولى وتانية وتالتة ورابعة )

بعد الوصول لأول الصف

الموظفة : سنة كام؟؟
الطالبة بعد الملل : أولى
الموظفة : العنوان اللى عندى مش هو اللى انتى كاتباه فى ورق البطاقة ليه ؟؟
الطالبة : حضرتك اللى عندك ده على عنوانى اللى كان فى المدرسة .. لكن البطاقة عايزة أعملها على عنوان والدى
الموظفة : ماينفعش يا ماما لازم الاتنين يكونوا زى بعض
الطالبة : والحل؟؟
الموظفة : جبيلى آخر وصل نور للعنوان اللى عايزاه فى البطاقة وانا أغيرهولك
الطالبة : طيب مفيش وصل نور بقالنا 7 سنين سايبين الشقة مطفية .. أجيبلك وصل النور منين
الموظفة : ماتعطليناش .. اعملى ورقة جديدة

( أه نسيت أقولكم كانت بتكلمنى وهى ماسكة الكوسة بتأورها ومسكت الورقة بإيدها الخضرا دى .. أكنها بتقولى الورقة بايظة بايظة .. اللى محيرنى إشمعنى الكوسة هى اللى بيمسكوها !! عرفتوا ليه لما بنتكلم على عيب فى شىء ما بنقول كوسة )

الموظفة : خدى الورقة دى
الطالبة : أعمل بيها إيه؟!!
الموظفة : إدفعيها فى الخزنة
الطالبة : يا رب صبرنى

:::::::::

عند الخزنة أمة لا إله إلا الله .. بعد حرب إستمرت طويلاً .. وصلت لشباك الخزنة حتى أدفع ال 10 جنيهات

الموظفة : هاتى الفلوس
الطالبة : إتفضلى
الموظفة : إيه ده دى بطاقة .. روحى شباك 3
الطالبة : اللى هو فين ؟!!
الموظفة : هو انا مطلوب منى أوصفلك الطريق .. بنات آخر مياعة
الطالبة :

(وصلت للشباك المقصود بعد عناء إستمر طويلاً)

الموظفة : دورى على 3 معاكى علشان أقطع الوصل مرة واحدة

( وسابتنى و فضلت تتساير مع اللى جمبها )

الطالبة : اتفضلى 3 كمان
الموظفة : وانتى مستعجلة على إيه هو القطر هيفوتك يعنى

( كان نفسى أجيب زمارة رقبتها .. بس ماطلتهاش من الحديد .. ساعتها بس عرفت ليه بيكون فى شباك حديد على كل شباك فيه موظفين )

طبعاً اخدت الوصل وروحت وكانت بالظبط الساعة 1 ظهراً

أنا طولت عليكم جداً هكمل بقية كلامى مع ردودكم فى الموضوع