اى حد داخل هندسه الازهر بنات القاهره يتفضل بالدخول لو سمحتم

[م.الزعيم]

أولا مبروك يابشمهندسة انك خلصتى اعدادى
أنا بدأت أشك فى قداراتى فى الانجليزى هيا دكتورة منى ولا ايمان؟
بس ايه التعبيرات الجامدة دى (والله فعلا الكليه دى طلعت جهنم واحنا ما نعرفش ) الظاهر فعلا ان اعدادى ليها تأثير لسه
أحسن امتحان هو اللى هجيب فيه أفضل تقديير لان الكلية ملهاش مقياس كتير اووى تكونى حلة امتحان كويس جدا وتلاقيى نفسك جايبة مقبول أو مرفوع عشان كده الحكم لما تبان النتيجة أفضل
أوحش امتحان كان power electronics ويمكن امتحان digital control بس انا كنت متوقع انى مش هكتب فيهم كلمة واحدة بس كتبت غلط او صح دى حاجة مش بتعتى المهم انى كتبت!
على فكرة حكاية الوقت دى مبدأ ثابت احنا غالبا مش بنقدر نخلص قبل الوقت ده بيكون شبه مستحيل بس اللى بيخلى الواحد يزعل انو يكون عارف اجابة سؤال ويسيبه عشان الوقت
مكنتش بحب الرسم بصراحة علشان كده كنت سعيد لما امتحانه خلص بس الحمد لله كنت سايب حاجات بسيطة فى استنتاج المسقط التالت لو كان فيه وقت كنت ممكن اخلصها
امتحان الرياضة لانه اخر مادة محدش ببيدى له اهتمام اووى والحقيقة ان الناس بتكون تعبت وعايزة تروح بس عادى متقلقيش دى حالة عامة فى الدفعة
أجمل حاجة ان الامتحانات عدت وربنا يسهل والنتيجة تكون كويسية وتبقى ارتحتم من اعدادى طول حياتكم
أنا حاسس انى اتعلمت الرغى يلا بقى سلام

[dr.monna]

[quote=م.الزعيم;2345808]

أنا بدأت أشك فى قداراتى فى الانجليزى هيا دكتورة منى ولا ايمان؟

[/qu
لا اطمن يا بشمهندس الانجليزى عندك ما زال بخير
انا اسمى اسمى ايمان فعلا بس دلعى هو مونه (بضم الميم وتشديد النون)
وطبعا كان لى الشرف بانى اتعرفت ع البشمهندسة ياسمين فى القاهرة وسكنت معاها
عشان كده انا وهى نعرف بعض كويس
وبالنسبة لموضوع الروايات انا كمان بقرا كتب دين بس طبعا مش بقرا كهربا
بس انا بحترم فكر نبيل فاروق جدا وكمان بقرا له مقالاته اللى فى الصحف
وبحب اسلوب الكاتب الساخر عمر طاهر كمان ونوارة نجم
ودول كلهم بيكتبوا فى جريدة ياسمين عارفة اسمها

[dr.monna]

ياترى الاجازة عاملة معاكم ايه
حلوة ولا مملة
ياريت نتشارك وكل واحد يقول هيقضى اجازته ازاى
انا شخصيا بشتغل فى صيدلية بابا من بعد العصر لحد واحدة بليل
يعنى بيتنا فيه اتنين صيادلة
من شابه اباه فما ظلم
و بقبض مرتبى باليوم
عشان كده انا مستحملة الشغل وان الاجازة مبقتش اجازة
يعنى زى مابيقولوا
عض قلبى ولا تعض رغيفى فان قلبى على رغيفى ضعيف
مستنية ردودكم ومشاركتكم

[م.الزعيم]

لا من ناحية الانجليزى اطمنى جدا الازهرية فرى جود فى الانجليزى
كويس ان الواحد يسكن فى المدينة مع ناس خلاف كليته انا كنت فى اعدادى ساكن مع اتنين هندسة يعنى الغرفة كانت هندسة فى هندسة
هو حرام تقولى اسم الجريدة ولا لازم نسئل ياسمين على اسمها؟
الاجازة عندى تدريب وكورسات يعنى بهدلة فى بهدلة ده انا كمان عندى تدريب فى رمضان مش عارف هعمل ايه فى التدريب ده
كل يوم بتاخدى فلوس يارتنى دخلت صيدلة عشان اخد كل يوم فلوس بدل ما انا اللى بدفع فلوس فى الكورسات
ياترى البشمهندسة ياسمين بتاخد كل يوم فلوس ؟

[yasssmine]

الله يبارك فيك ويارب اكون فعلا خلصت اعدادى يا رب فاهم قصدى طبعاهههه
لا ما تشكش فى قدراتك ولا حاجه هى ايمان مش منى مش عارفه بتقول منه ليه بس معلش نعديهالها بس ايمان دى ما شاء الله عليها عارفه حاجات عن هندسه اكتر من بتوع هندسه مهو من عاشر القوم
مش تغيرات بس دى الحقيقه الكليه والقاهره وحشه جدا مفيش احسن من البيت
انا صحيح مش عارفه ايه المواد دى بس مش مهم ربنا يعديك منهم على خير
بالنسبه للوقت كان غير كافى خالص بس ده رسم انا بحبه جدا وكان نفسى اكمل الامتحان للاخر بس الحمد لله
اما امتحان الرياضه فهو بجد كان كويس بس انا كنت دخله عندى احساس انى مش هحل مع انى كنت مذاكره كويس جدا وعارفه كل المسائل بس ما تعرفش ايه ال حصل يلا الحمد لله على كده

[م.الزعيم]

فعلا مفيش أحسن من البيت بس للاسف حتى الاجازة مش هنقعد فيها فى البيت علشان التدريب والكورسات
على فكرة انا عمرى ما دخلت امتحان وكان عندى احساس انى هحل سبحان الله الواحد بيدخل وربنا مش بيضع تعب حد
المهم نصيحة بلاش تروحى تجيبى انتى النتيجة خلى حد يجبها ليكى علشان ميحصلش ليكى اللى حصل معايا

[yasssmine]

فرى جود لا واضح ان الانجليزى لسه بخير والله
اه انت بتتكلم على المدينه وان يسكن معاك 2 هندسه انا بقى كانت غرفتى 5 هندسه وواحده بس ال مختلفه والله كان يوم الرسم اول ما نرفع المساطر اكن فى حرب فى الغرفه وما اقولكش بقى على البرده مكنش فى غير دسك ومكسور وكل يوم اقعد اصلحه طنش اهى عدت بس والله كانت سنه حلوه
نتكلم جد شويه من وجهه نظرك ايه هى الكورسات ال المفروض اننا ناخدها يعنى ال لسه طلعين من اعدادى يا رب على خير
خصيصا لو كنت نفسى ادخل عماره وابدا من امتى يعنى شويه نصائح كده وسكرااااااااااااا

[dr.monna]

لا طبعا عادى اسمها هو الدستور
وحلوة فرى جود دى
ههههههههههههههه
وبعدين انا بقبض الفتات حاجة بسيطة كده يعنى
وشد حيلك وربنا يعينك فى الدورات
ويبلغنا كلنا شهر رمضان

وممكن تاخد كورس عادى فى رمضان
بس يبقى بالنهار مثلا

[م.الزعيم]

متقلقيش من الانجليزى وى ار فرى سترونج ان انجليزى
انتوا كنتم ستة فى الغرفة !! لا بجد ربنا يكون فى عونك تلاقيكم كنتوا بتحاربوا بعض بالمساطر
طب كويس انك لاقيتى دسك مكسور فيه ناس بترسم من غير دسك ولا بردة ولا لوحة ولا مسطرة
بصراحة بغض النظر انتى هتدخلى قسم ايه أنا شايف انو عيب اوى تكونى مهندسة ومش تعرفى انجليزى كويس
ومش تعرفى icdl انتى لو تقدرى تخدي كورس انجليزى وكورس icdl بصراحة تبقى عديتى
حاولى تشوفى اى مركز تدريب قريب منكم وخدى فيهم الكورسين دول
ومتحاوليش تشغلى نفسك بكورسات عمارة دلوقتى زى الاوتوكاد لان لسه بدرى وقدامك اجازات كتير
فيه ملحوظة صغننة هيا شكراااااااااا بتكتب كده ولا بتكتب سكراااااااااا لا الظاهر العربى عندك بخير خالص

[م.الزعيم]

أنا بدات اخاف من العربى خالص ( الفتات) ينهار ابيض العربى ضاع خالص
انتى خايفة من الحسد يادكتورة متقلقيش بتوع هندسة مش بيحسدوا انا ليا زمايل ليا فى صيدلة وعارف الفتات ده قد ايه ههههههههههههه
يارب ارزقنا الفتات.اللهم امين
امين ربنا يبلغنا جميعا شهر رمضان.اللهم امين
المشكلة ان الكورس فى شركة يعنى مش هكون قاعد فى مكان مكيف وغالبا هضطر للسفر يوميا
ربنا يسهل لو قدرت اروح هكمل لو مقتدرش هنام فى بيتنا واريح دماغى
هو احنا زيكم يادكتورة قاعدة فى الصيدلية ومعاكى جهاز الكومبيوتر وقاعدة فى الظلة أنا مش بحسد

[eng refa3y]

حمد الله على السلامه ياياسمين
لسه عايشه بعد جبهه اعدادى

ربنا يبعد عنا الاصابات ونعدى بسلام


لا لا لا بجد نمسك الخشب
انا سيبت الموقع يومين ارجع الاقى المشاركات دى
ما شاء الله ما شاء الله ربنا يذيد ويبارك

مممممممممممممممممممم
دايما الدكتور الصيدلانى بيكون قاعد الكميوتر قدامه
التلفزيون متعلق فى الحيطه تحت السقف بشويه
معرفش ايه الغيه فى شعلقه التلفزيون كده ما علينا

اوعى تكونى مفكرانى بحسد ابد never
احم احم ثقافه

بس ده مايمنعش ان فى شويه حقد كده
هههههه


بس بجد نمسك الخشب

[م.الزعيم]

لا حظت ان كثير من الاخوة بيسئلونى عن قسم كهربا فقررت اعمل الموضوع فى صورة سؤال وجواب يمكن اقدر افيد اخواتى فى المنتدى



س- ما هو أفضل الاقسام؟

السؤال ده غلط لان أفضل الاقسام عملية متفاوتة فقد يكون قسم افضل بالنسبة لشخص وفى نفس الوقت سيىء بالنسبة لشخص اخر. ولكن قد نسئل السؤال بطريقة أخرى

س- كيف اختار القسم وخصوصا مع كثرة الاوقاويل؟

اختيار القسم امر مهم جدا ويحتاج الى تركيز واتخاذ قرار سليم ويوجد نوعين من الطلبة

1-طالب داخل هندسة علشان قسم معين فهذا لاتواجه مشكلة اختيار الاقسام

2-طالب زى حالتنا مكنتش متوقع هندسة بس ربنا قدر ودخلها ونجح فى اعدادى. وده نقول له النصايح الاتية

أ‌-اختار القسم المناسب ليك .بمعنى ان كانت لك رغبة فى الرسم وتملك خيالا واسعا ولاحظت تفوقك فى مادة الرسم والوصفة ولم تكن محب للرياضة فيمكن ان تختار (ميكانيكا او عمارة او مد نى او تخطيط)

ب‌-حاول ان تنظر الى الامام بالنسبة لك هل تعرف مجالا متاحا لك بعد النتهاء من الكلية .بمعنى قريب لك يمكنه مساعدتك بعد التخرج فحاول دخول القسم المناسب لهذا المجال

ت‌-لا يوجد قسم سيىء او غير مرغوب يجب ان يكون بداخلك ان القسم الذى ستدخله هو افضل الاقسام



س- ما هى مميزات قسم كهربا؟

قسم كهربا يحتل المرتبة الثانية وفى بعض الاحيان الاولى عن قسم بترول وتعديين وهذا وان دل فانما يدل على كثرة الراغبين فى القسم للاسباب التالية

1-مجال كهربا بعد التخرج مجال مفتوح ومع تطور اى بلد لا بد من تطوير قطاع الكهربا

2-بعض من الطلبة لايحبون الرسم لذالك يدخلون كهربا لان الرسم فيها ترم واحد فقط وهو رسم بسيط (مسامير)

3-سهولة المواد الدراسية نسبيا بالنسبة لميكانيكا ( ليس معنى هذا السهولة المطلقة)

4-يتم دراسة الرياضة سنتين فى القسم وليست رياضة صعبة

س- ماهى المواد التى يتم دراستها فى القسم؟

اول سنتين فى القسم ليس لهم علاقة بكهربا شوية رياضة على مادة من مدنى ومادة من ميكانيكا ورسم ودوائر كهربية و 000

يمكن او ارتباط بالواق يكون فى سنة ثالثة ومن احد عيوب القسم او بمعنى اصح عيوب التعليم فى مصر ليس له علاقة بالواقع



يمكن دى الاسئلة الشائعة اللى تذكرتها لو فيه حد عندو اسئلة ياريت يسئل ونقدر نخدم بعض

معلومة مهمة موضوع الشغل والفلوس ده بايد ربنا بلاش تشغل نفسك بيه اعمل اللى عليك واختار الاصلح ليك واترك الامور للمولى عزوجل



اتمنى ان الناس تستفاد وياريت لو حد عندو سؤال يسئل وانا هجاوب على قد معلوماتى

[eng refa3y]

انا عايز اقول حاجه بالنسبه لموضوع الوقت

كان الدكتور بتاع الاحصاء هو من بترول ومش مادته ولا هو فاهم فيها حاجه
ما عالينا

كان قالنا مش شرط انى اجيب امتحان يكفى الوقت
اكتر واحد هايجاوب هو ده اللى يجيب امتياز

يعنى من الاخر كده شوفى الدفعه عامله ايه
لو فى ناس حلت اكتر منك تعرفى ان كده فى مشكله
الدنيا كلها بايظه تعرفى انك كده تمام


وربنا يستر ويعديهالنا على خير

[dr.monna]

على فكرة يعنى احنا ماعندناش كمبيوتر فى الصيدلية
مفيش غير تليفزيون ومحطوط ع مكتب كمان
مش متشعلق مع العصافير
وطول الوقت بفضل واقفة على رجلى
لان ماينفعش الزبون يدخل واحنا قاعدين
والفتات اساسا كلمة عربية مأصلة معناها القليل

اما بالنسبة لموضوع الوقت
فانا شخصيا كنت بخلص بدرى بدرى واطلع اول واحدة فى الدفعة كلها
وكنت اتنرفز اوى لما الاقى حد طلب ورقة اجابة تانية
طب بيجيبوا الكلام منين
ابص ساعتها ع ورقتى والتميز اللى انا كتبته
الاقينى عديت النص بورقة ورقتين بالكتير
اقعد بقى ابخر فى نفسى طول اللجنة
اطلع بره الاقي زمايلى كتبوا وكان فاضل لهم 3صفحات ويخلصوا الورقة
اخاف بقى اقولهم يحسدونى ولا حاجة
ادعوا لى بقى اجيب تقدير
والسلام ختام

[yasssmine]

ياااااه كفاره يا بشمهندس رفاعى فينك ولا الامتحانات كانت عامله عمايلها معاك على العموم حمد لله على السلامه ويا رب ترجع بقوه زى الاول بالنسبه لموضوع الوقت لو زى ما انتى بتقول اكتر واحد يحل يجيب امتياز دا يبقى دمار فى ناس ما شاء الله كانو بيحلو الامتحان كله يبقى كده احنا فى الباى باى
اما بالنسه ليكى يا ايمان والنبى بلاش تعطينا نصايحك وتفشرى فى وشنا ارحمينا من حاجاتك الغريبه دى انتى يا حبيبتى اسبشيل ورنا يوفقك