برمجة " دروس البرمجة مع ++c " محمد القبانى

[ananoo]

السلام عليكم

بجد انا سعيدة جدا انا الدرس الجديد نزل لاني كنت فعلا قربت افقد الامل

الحمد لله الدرس مفهوم بالنسبة لية
و حليت الquiz
1-A
2-A
3-D
4-D
مش عرفة صح كدة و لا ايه؟؟؟؟؟؟؟؟

بس كان عندي سؤال برة الدرس ده

انا لما بكتب كود جديد بفتح البرنامج و اجيب من FILE --->NEW --->TEXT EDIT

و بعدين بعمل SAVE لما بخلص باي اسم المهم ان اللي بيحصل ان بيبقى موجود كذا FILE بنفس الاسم بس الاكستنشن مختلف
يعني بيبقى في واحد اخره EXE ده البرنامج نفسه و واحد اخره CPP ده بيبقى الكود في تانين بقى مش بعرف افتحهم اصلا و مش عرفة دول يبقوا ايه؟؟؟؟؟؟؟؟؟

انا مش عرفة هوة اللي انا بعمله صح و لا ايه؟

بس كدة و جزاك الله كله خير
و ربنا يوفقك في شغلك ان شاء الله

[همس]

ياااااااااه اخيرا

بجد مش مسداة نفسي

ربنا يكون في عون حضرتك يا باشمهندس


بس هطلب من حضرتك طلب صغير اوي

ان حضرتك مش تنزل دروس تاني لحد ما نآخد الاجازة عشان نتابع وكدا

وتبقى فرصة حضرتك تستريح مننا شوية

هههههههههههه

انا عن نفسي اجازتي هآخدها يوم 24\1 ان شاء الرحمن

طبعا دا بعد ما الباشمهندسين الي متابعين الكورس معايا يوافقوا

ان شاء الله اطبق الدرس

وجزاك الله خيرا على المجهود الي حضرتك بتبذله معانا

[msamido]

المشاركة الأصلية كتبت بواسطة ananoo

السلام عليكم

بجد انا سعيدة جدا انا الدرس الجديد نزل لاني كنت فعلا قربت افقد الامل

معلش بقى أنا عارف إنى اتأخرت عليكم كتيير بس مش بإيدى معلش

الحمد لله الدرس مفهوم بالنسبة لية

الحمد لله

و حليت الquiz
1-a
2-a
3-d
4-d
مش عرفة صح كدة و لا ايه؟؟؟؟؟؟؟؟

مش هقول دلوقتى لما نشوف باقى الإجابات إن شاء الله

بس كان عندي سؤال برة الدرس ده

فى أى وقت تحبى تسألى اسألى مش لازم اكون نزلت درس جديد علشان تسألى

انا لما بكتب كود جديد بفتح البرنامج و اجيب من file --->new --->text edit

و بعدين بعمل save لما بخلص باي اسم المهم ان اللي بيحصل ان بيبقى موجود كذا file بنفس الاسم بس الاكستنشن مختلف
يعني بيبقى في واحد اخره exe ده البرنامج نفسه و واحد اخره cpp ده بيبقى الكود في تانين بقى مش بعرف افتحهم اصلا و مش عرفة دول يبقوا ايه؟؟؟؟؟؟؟؟؟

انا مش عرفة هوة اللي انا بعمله صح و لا ايه؟

صح وتمام الله ينور
بالنسبة للـ fiels دى هى عباره عن file تنفيذيه الـ compiler بيعملها اثناء التنفيذ وأهمها طبعا واللى إحنا عايزينه هو الـ file.cpp لأن ده اللى فيه الكود وبالنسبة للـ file.exe ده الـ file التنفيذى اللى لما تحبى تنفذى البرنامج من غير ما تفتحى الـ boralnd c تشغليه منه وباقى الملفات ممكن تحذفيها عادى

بس كدة و جزاك الله كله خير
و ربنا يوفقك في شغلك ان شاء الله

جزانا الله وإياكم كل الخير ويارب يوفقنا جميعا إن شاء الله

المشاركة الأصلية كتبت بواسطة همس

ياااااااااه اخيرا

بجد مش مسداة نفسي

صدقوا يا جماعه صدقوا الحمد لله أنا لسه حى أرزق

ربنا يكون في عون حضرتك يا باشمهندس


بس هطلب من حضرتك طلب صغير اوي

ان حضرتك مش تنزل دروس تاني لحد ما نآخد الاجازة عشان نتابع وكدا

وتبقى فرصة حضرتك تستريح مننا شوية

هههههههههههه

انا عن نفسي اجازتي هآخدها يوم 24\1 ان شاء الرحمن

طبعا دا بعد ما الباشمهندسين الي متابعين الكورس معايا يوافقوا

ان شاء الله اطبق الدرس

وجزاك الله خيرا على المجهود الي حضرتك بتبذله معانا

بالنسبة لموضوع تأجيل الدروس ده براحتكوا طبعا لو وافقتوا كلكم عليه أنا معنديش أى مانع وأنا لو لقيت نفسى فاضى شوية وفى وقت اكتب درس جديد هكتبه عندى لما تخلصوا وبعدين ننزله
جزانا الله وإياكم كل الخير يا همس

[PROGRAMMING LOVER]

السلام عليكم وحمة الله وبركاتة

اولا :مش عارف اقول اية علي الشرح الجميل بجد دة اكني قاعد في سكشن البرمجة اية الجمال دة

ثانيا : نسيت اعرف نفسي محمد محمود كلية حاسبات ومعلومات ج عين شمش

ثالثا : انا قريت الشرح من اول درس لاخر درس وفهمت كل شئ شكرا علي الشرح الوافي

بس ياريت مش تتاخر في الدروس الجميلة دي

واسف انا مش موافق علي تاجيل الدروس

[همس]

بس بعد اذنك عندنا امتحانات

يعني ايه مش موافق ؟؟؟

يعني نسيب المذاكرة ونتابع الكورس مثلا ؟؟

معلش يعني ياريت نفكر في غيرنا ومش نفكر في نفسنا وبس

الكورس هيقف وهيكمل مش هيقف للابد

بس لو كمل دلوقتي

هيفوت عليا جزء كبير جدا

ومش هقدر اطبقه كله مرة واحدة

عموما لو حضرتك مش موافق
فانا منسحبة من الكورس

واسفة اني بقول كدا

[علاء عادل عبد الغنى]

المشاركة الأصلية كتبت بواسطة ananoo

السلام عليكم و رحمة الله و بركاته

هوة ايه اللي حصل ليه الدروس وقفت ؟؟!!!
انا كل يوم تقريبا بخش اشوف لو حد رد في الموضوع بس مفيش اي جديد (بقالي شهر على الحال ده)

نفسي نرجع بالنشاط اللي كنا علية في اول دروس

المشاركة الأصلية كتبت بواسطة همس

بس بعد اذنك عندنا امتحانات

يعني ايه مش موافق ؟؟؟

يعني نسيب المذاكرة ونتابع الكورس مثلا ؟؟

معلش يعني ياريت نفكر في غيرنا ومش نفكر في نفسنا وبس

الكورس هيقف وهيكمل مش هيقف للابد

بس لو كمل دلوقتي

هيفوت عليا جزء كبير جدا

ومش هقدر اطبقه كله مرة واحدة

عموما لو حضرتك مش موافق
فانا منسحبة من الكورس

واسفة اني بقول كدا

فى ايه يا بنتى اهدى شويه حصل خير

[ananoo]

السلام عليكم

انا بصراحة من رايي ان احنا ناجل شويه لحد الامتحانات تخلص
انا هخلص 28
ممكن تبدأوا بدري و ان شاء الله ممكن اقدر الحقكم

[msamido]

طيب لما تحبوا ابدأ حد بس يبعتل رساله علشان مش بدخل كتيير

[همس]

ان شاء الله يا باشمندس تحت أمرك

[ananoo]

السلام عليكم

ايه الاخبار يا جماعة؟؟؟؟؟؟؟
مستعدين عشان نكمل الدروس و لا ايه النظام؟؟؟؟؟؟؟

انا خيفة الاجازة تعدي من غير ما ناخد حاجة

[ahmed abobakr]

السلام عليكم :
ازيكم يا جماعة يارب تكون الامتحانات تمام .

انا مستعد عشان نكمل . كده الاجازة هتخلص من غير حاجة .

[ananoo]

السلام عليكم

الاجازة كدة خلصت من غير منعمل حاجة

عاوزين بجد نكمل الدروس هتفرق معايا كتير في الدراسة

في انتظار اي تطورات

[msamido]

بسم الله الرحمن الرحيم
بداية أهلا ومرحبا بكم أعزائى واتمنى تكونوا انهيتم الترم الأول على خير الحمد لله وأهلا بكم فى النصف الثانى من العام الأول وإليكم الدرس الجديد ....
دلوقتى بعد ما كنا اتكلمنا عن الـ variables, conditional statements & loops بأنواع كل الحاجات دى مفروض دلوقتى هنتكلم عن درس جديد اسمه الـ functions وهنتكلم ازاى نعملها وازاى نستخدمها .. واحنا بالفعل استخدمنا نوع منها بيتمثل فى شكل الـ main واحنا قولنا قبل كده إن الـ main دى هى الـ function الرئيسية فى البرنامج اللى بيبدأ منها ... طيب إيه بقى function دى ؟؟؟
عامة بنعرف الـ functions على إنها block of code أو جزء كده من الكود على بعضه (هو يعنى إيه block بالعربى؟؟) عبارة عن مجموعة commands بتنفذ هدف معين. طيب شكلها إيه بقى طنط function دى ؟؟؟ أقولكم أنا شكلها إيه ؟؟ هى حلوة ولذيذة كده وبنت حلال وبتتكون من جزئين :
1- Prototype
2- Body
مصدقنا خلصنا من function يطلعلنا بـ prototype و body ؟؟؟
هنقول كل ده إن شاء الله حالاً .... بصوا بقى إحنا نمسك كل حاجه لوحدها أولا نشوف الـ prototype ده هو تعريف الـ function اللى الـ compiler هيبص عليه ويعرف الـ function دى بيه طيب عبارة عن إيه الـ prototype ده ولا يبقى ازاى ولا شكله إيه ؟؟
نقول بردوه .... هو عبارة عن 3 أجزاء ... أول جزء مهمته بيقول للـ compiler الـ function دى هترجع إيه ؟؟ أو إيه النوع اللى هترجعه أو إيه ال datatype اللى هترجعه . وده واحد من الـ datatypes اللى خدناها قبل كده ولو مش عايزينها ترجع حاجه بنقوله keyword اسمها void والأخت void دى معناها إن الـ function دى هتنفذ الكود اللى جواها بس مش هترجع حاجه تمام كده ؟؟؟
طيب هو يعنى ايه اصلا الـ function بترجع حاجه ؟؟
ده معناه إن الـ function دى هتنفذ كود وتكون نتيجة الـ function دى كلها variable من الـ data type اللى احنا قولناله انها هترجعه أو ممكن نقول بكل بساطه إن مجمل الـ function دى هيساوى قيمة المتغير اللى راجع ومن نوعه كمان. هنشوف كل ده بالتوضيح مع الأمثلة إن شاء الله.
الجزء التانى بقى .. هو إسم الـ function دى وبنسميها زى ما احنا عايزين بس يفضل يكون اسم معبر عنها يعنى اسم لما اقراه كده افهم هى عايزه ايه أو بتعمل ايه بس طبعا ليك مطلق الحرية تسميها زى ما انت عايز بس الإسم مفيش فيه مسافات بس ... حلو الجزء التانى مش كده ؟؟
طيب الجزء التالت بقى بيقول إيه ؟؟ بيقول ايه الـ arguments أو (مش عارف يعنى ايه بالعربى بردوه) المهم دى القيم اللى ممكن نباصيها للـ function دى أو نبعتهالها تنفذ عليها الكود بتاعها وترجعلنا نتيجة أو مترجعش هى حرة بقى حسب الجزء الأول ما قالها
تمام كده ؟؟ ده الـ prototype
أما بقى الـ Body فهو بنفتح قوسين مجموعة وبنكتب بينهم أى شوية code وكده تبقى خلصت الـ function كلام جميل ؟؟
طيب ناخد مثال بسيط جدا ونقول إننا عايزين نعمل function بتضرب رقمين صحيحين فى بعض وبترجع الناتج ونشوف شكلها هيبقى ازاى

#include <iostream.h>
#include <conio.h>
Int Multiply(int firstno, int secondno)                                                                                                                          
{
Int result = firstno * secondno;
Return result;
}
Void main(void)
{
Int x;
Cout<<”enter the first no. : “;
Cin<<x;
Int y;
Cout<<”enter the second no. : “;
Cin<<y;
Int z = Multiply(x,y);
Cout<<”the result is : “<<z;
Getch();
}

طيب تعالوا بقى نشوف الموضوع ده ايه ونتكلم واحده واحده, طبعاً أول سطرين احنا عارفين بتوع ايه ندخل فى اللى بعد كده وده هيبقى أول جزء فى الـ function بتاعتنا وهو الـ prototype وقلنا إن الـ prototype بيتكون من 3 اجزاء وهى أول حاجه الـ return datatype أو هى الـ function دى هترجع ايه ؟ وزى ما قلنا إننا عايزين نعمل function بتضرب رقمين صحيحين فى بعض فالنتيجة هتكون أيضا رقم صحيح ولذلك قلنا إن الـ function دى هترجع حاجه من نوع int أو إن الـ datatype اللى راجع هيبقى int . طيب ولو مش عايزين الـ function دى ترجع حاجه قولنا نعمل ايه ؟؟ نكتب مكان الـ int datatype كلمة void ودى معناها إن الـ function مش هترجع حاجه.
ده كان أول جزء فى الـ prototype طيب تانى جزء للـfunction ايه ؟؟ قلنا هو اسم الـ function وده اللى احنا هناديها بيه فى أى مكان واحنا هنا سميناها Multiply .... تمام ؟؟
طيب الجزء الثالث إيه هو بقى ؟؟
قلنا إنه ايه هى الـ arguments اللى هنباصيها للـ function دى أو إيه المتغيرات اللى محتاجاها الـ function دى , وبما إننا عايزينها ترجع لنا حاصل ضرب رقمين صحيحين يبقى لازم نباصيلها الرقمين الصحيحين دول وإلا هى هتجيبهم منين؟
وبنكتب الـ arguments دى بالشكل اللى شوفناه وهو بنفتح قوس بعد اسم الـ function ونكتب الـ datatype ومسافه واسم الـ variable وبعدين "," وهكذا الـ argument الثانى والثالث وأى عدد .... طيب لو مش عايزين نباصى للـ function دى حاجه نعمل ايه ؟؟؟ نفتح القوس ونقفله وخلاص وكده يبقى الـ prototype انتهى ... تمام؟؟
نيجى بقى للجزء الثانى من الـ function وهو الـ body .... وقلنا بنفتح قوسين مجموعة وبينهما الكود اللى عايزينه يتنفذ ... وهنا المثال واضح جدا بيعرف variable اسمه result وبيساويه بحاصل ضرب الأرقام اللى جاياله وبكون يكون عندنا حاصل ضرب الرقمين المطلوبين ... طيب نرجع النتيجة دى ازاى بقى ؟؟؟ هى دى الجملة الجديدة فى الموضوع وهى إننا بنقوله return وبعدها الـ variable اللى عايزين نرجعه... كويس كده ؟؟؟
وبعدين قوس المجموعة اتقفل وده معناه إن الـ function خلصت خلاص ..
ونكمل هنلاقى بعد كده الـ main بتاعتنا ودى بردوه زى ما قلنا هى اصلا عباره عن function ولو راجعناها زى اللى فاتت هنلاقى إنها بردوه بتتكون من prototype وهو عباره عن 3 اجزاء أول جزء هى مفروض ترجع ايه وقلنا إنها مش هترجع حاجه علشان كاتبين void وبعدين اسم الـ function وهو main وبعدين مش هنباصيلها arguments زى ما شايفين القوسين الفاضيين ... وبعدين الـ body والكلام اللى جواه عادى جدا مفيش جديد غير ازاى هننادى على الـ function بتاعتنا وده كان بالشكل ده ... Multiply(x,y) .... وساوينا النتيجة بالمتغير z اللى هو من نفس نوع الـ return type .... يعنى زى ما قلنا هنا الـfunction كلها على بعضها حلت محل قيمة للمتغير z ...
إذن احنا علشان ننادى الـ function بنكتب اسمها ونفتح قوسين وبينهم نباصى الـ arguments بتاعتها ولاحظوا إنها لازم تكون من نفس نوع الـ arguments اللى احنا معرفينها فى الـ function فوق ...
طيب السؤال دلوقتى بقى ؟؟؟ يا ترى خط سير البرنامج ده هيبقى ازاى ؟؟؟ أو ازاى الـ compiler هينفذ البرنامج ده ؟؟؟؟
إحنا قولنا قبل كده إن الـ compiler علشان ينفذ اي برنامج بيدور على الـ main function بتاعته ويبدأ ينفذ من عندها واللى هيحصل فى حالتنا إنه هيوصل للـ main ويعرف المتغير x ويطلبه من اليوزر وهكذا الـ y وبعدين يعرف z وينادى الـ multiply function بتاعتنا وهنا ينتقل للـ function ويبدأ ينفذ وياخد معاه قيمة الـ arguments اللى الـ function محتاجاها وهى قيمة x,y ويبدأ ينفذها فهياخد قيمة x يحطها فى الـ firstno وياخد قيمة y يحطها فى الـ secondno وبعدين يعرف result ويساويه بحاصل ضرب القيمتين ويرجع النتيجة وأول الـ compiler ما يقابل return ياخد علطول الناتج وينهى الـ function ويرجع من مكان ما جه وهو عند السطر اللى كان بينادى فيه عليها ويكون معاه النتيجة يساوى بيها المتغير z وينتقل للسطر اللى بعده , فيطبع z على الشاشه ويستنى امر علشان يقفل وكده انتهى البرنامج ..... حد فاهم حاجه ؟؟؟؟؟؟؟؟ يارب يكون حد فهم....
طيب بكده انا انتهيت من الكلام النهارده ومستنيكم تقولولى فهمتم حاجه ولا لأ علشان هنشوف بقى اشكال تانيه للـ function واختلافات اخرى وملاحظات وهكذا .. إلخ إلخ إلخ...
شكرا وإلى لقاء فى حلقة قادمة إن شاء الله....

[ananoo]

السلام عليكم

الدرس جميل جدا ما شاء الله

الحمد لله انا فهمته كله بس في حاجة في الكود عاوزة اتأكد منها اللي هية:

void main (void)

حضرتك في الشرح بتقول ان مفيش حاجة جوة القوس بس هوة في
انا لما جيت اعمل البرنامج كان مفيش فرق سواء كنت كتبها او مش كتبها
بس هل هوة فعلا مفيش فرق؟؟؟

و جزاك الله كل خير

[msamido]

الحمد لله ان الدرس كان واضح واتفهم

وبالنسبة لسؤالك هو فعلا مفيش فرق لأن احنا قلنا اصلا ان كلمة void معناها ولا حاجه يعنى بقول انه الـ function دى مش هتاخد parameters يعنى بالظبط كأنى فتحت القوس وقفلته ان مفيش حاجه هنباصيها بردوه
وعلى فكرة نفس الكلام يمشى على void اللى فى بداية الـ prototype اللى هى بتقول ان الـ function دى مش هترجع حاجه ممكن منكتبهاش اصلا وهتدى نفس المعنى ومش هتفرق

جزانا الله واياكم كل الخير