برمجة " دروس البرمجة مع ++c " محمد القبانى

[msamido]

المشاركة الأصلية كتبت بواسطة ananoo

السلام عليكم

انا بعتذر جدا على التاخير

ولا يهمك يا ananoo

انا عرفت ان اي كلام بيجي بعد العلامتين دول // يبقى عبارة عن تعليق و ملوش اي علاقة بالكود

بالظبط وبيستخدم فى التوضيح يعنى لو أنا بكتب برنامج طويل شوية بيفضل اكتب التعليقات دى بوضح بيها الجزء ده من الكود بيعمل ايه علشان لما احب ارجعله الاقى الدنيا واضحة وكمان علشان لو حد بيكمل بعدى فى البرنامج يبقى مش محتاج أنا أوضحله



لا دي بقى بصراحة مش عارفة اعملها خالص

بالنسبة لدى معلش هتستنى معانا للدروس الجاية إن شاء الله

غريبة اوي
اصل احنا اخدنا الstring في الكلية و احنا بندرس الc++ بس كنا بنطبق على الvisual studio و لما حاولت اعملها على الborland منفعش و لما استخدمت wchar_t برده منفعش

ايوه الـ string موجود فى الـ visual studio لانه بيشتغل على framework تانى أو مجموعة من الـ libraries مختلفة لكن مش مهم على فكرة اسم الـ datatype ولا حتى النوع احنا هنا بنتكلم فى اساسيات تفكير البرمجة
وبالنسبة للـ wchar_t هتكلم عنه قريب أن شاء الله

في انتظار الدروس القادمة ان شاء الله

معلش بالنسبة للدروس الجديدة أنا عارف إنى مقصر شوية بس معلش إن شاء الله عسى أن يكون قريبا

معلش يا بشمهندس انا كان عندي مشكله في برنامج كنت بحاول اعمله عبارة عن ان اليوزر بيدخل 5 ارقام و بعدين يطلع على الشاشة اكبر رقم......
انا كتبت الكود و البرنامج شغال بس مش بيطلع الناتج صح

هوري لحضرتك الكود

#include <iostream.h>
#include <conio.h>
void main()             //brnamg 3bara 3n ad7'al 5 arkam then print elakbr
{
int x1;
int x2;
int x3;
int x4;
int x5;
int max;
cout<<"plz enter the 5 no. :";
cin>>x1;
cout<<endl;
cin>>x2;
cout<<endl;
cin>>x3;
cout<<endl;
cin>>x4;
cout<<endl;
cin>>x5;
max=x1;
if (x2>=max)
{
max=x2;
}
else if (x3>=max)
{
max=x3;
}
else if (x4>=max)
{
max=x4;
}
else if (x5>=max)
{
max=x5;
}
cout<<"\t\t\t the greatest nunber is:"<<max;
getch();
}

هوة الناتج ديما بيطلع اكبر رقم في اول رقمين بس
و مش عرفة المشكله فين


و جزاك الله كل خير

أقولك أنا المشكلة فين

المشكلة إنك استخدمتى الـ condition statement if بشكلها الإبدالى if else ودى معنها إنه لو شرط أول if اتحقق مش هيدخل الباقى لأن الباقى بما إنه مسبوق بـ else يبقى معناه إنه بديل للتانى بس بما إنه دخل فى الأول يبقى مش هيدور على البديل فاهمه حاجه ؟؟

حاسس إنها مش واضحه
بصى إحنا قولنا إن if else معناها لو الشرط اتحقق يبقى تنفذ اللى جوه if لو مش متحقق يبقى تدور على اللى بعدها
بس فكرة الـ nested if else معناها إنه هيدور على أول شرط يدخله وبعدين مش هيكمل يعنى فى حالتك هيشوف لو x2 اكبر من max هيدخل هنا ومش هيكمل لو مش أكبر منه أو يساويه هيشوف اللى بعده لو دخل هينفذ اللى جواه وبردوه مش هيكمل لان اللى بعده كله يعتبر بديله وبما إنه لقى الاصل يبقى مش هيدور على البديل فهمتينى ؟؟

طيب الحل ايه بقى الحل إن فى حالتك بلاش تستخدمى else هى if بس يعنى تشوفى x2 هل هو أكبر من max ولا لاأ وتنفذى الكود وبعدين تشوفى x3 من غير else وبعدين x4 بردوه من غير else وهكذااااأ
أنا برغى كتيير ليه الفرق فى الكود هيبقى الجزا ده

max=x1;
if (x2>=max)
{
max=x2;
}
 if (x3>=max)
{
max=x3;
}
 if (x4>=max)
{
max=x4;
}
if (x5>=max)
{
max=x5;
}

جزانا الله واياكم كل الخير

المشاركة الأصلية كتبت بواسطة ahmed abobakr

السلام عليكم .

كل عام وانتم بخير بمناسبة عيد الاضحى وعارف انها متأخرة بس اسف والله كنت مشغول جدا بسبب الدكاترة ربنا يخليهم لينا .
وربنا يسهل واعرف اجمع الدروس دى . لو مش نفع هجمعهم فى اجازة نصف السنة .ان شاء الله .


!

كل سنة وانت طيب يا أحمد
وربنا معاك فى الكلية وفى تجميع الدروس ولو احتجت أى حاجه اسأل فى أى وقت

[ananoo]

جزاك الله خيرا

كدة الامور وضحة تمام

وفي انتظار الدروس القادمة................

[همس]

كل سنة وحضرتك طيب يا باشمهندس

وفي انتظار الدرس القادم ان شاء الله

[msamido]

المشاركة الأصلية كتبت بواسطة ananoo

جزاك الله خيرا

كدة الامور وضحة تمام

وفي انتظار الدروس القادمة................

الحمد لله
إن شاء الله قريبا

المشاركة الأصلية كتبت بواسطة همس

كل سنة وحضرتك طيب يا باشمهندس

وفي انتظار الدرس القادم ان شاء الله

كل سنة وانتى طيبة يا همس
وإن شاء الله ربنا يقدرنى وانزل الدرس الجديد قريبا

[msamido]

السلام عليكم ورحمة الله وبركاته
أنا عارف إنى إتأخرت كتير والناس ملت من الإنتظار بس بجد معلش ظروف شغلى مش مديانى أى وقت أكتب فيه الدرس الجديد ... عموما النهاردة نرجع بإذن الله بدرس جديد ويلا نبدأ
بسم الله
أخر كلامنا المرة اللى فاتت كان عن حاجه لذيذة كده وبنت حلال إسمها الـ loops واتكلمنا عن أحد أنواعها اللى هو while loop وقلنا إيه فايدته وشغال إزاى وقلنا كمان إن فى كمان نوعين مهمين جدا من الـ loops هنتكلم فيهم النهادرة بإذن الله ونبدأ بأولهم do while loop وده اللى استخدمته همس فى حل سؤال سابق ..
إحنا قولنا عن while loop إنه بيختبر شرط معين وبيشوف طول الشرط ما هو متحقق هو هيفضل شغال لغاية الشرط ما تكون نتيجته false والفرق بقى بينه ويبن do while loop إن do while loop بيقول نفذ الكود ده وبعدين شوف الشرط لو متحقق ارجع نفذ الكود تانى لغاية ما الشرط يكون مش متحقق ... حد فاهم حاجه ؟؟؟
طيب خلينا نشوف الأخ ده شغال ازاى ونقول مثال ونوضح أكتر
ده شكل الـ، do while loop

do{
// some code
}while(condition);

يعنى do معناها ده بداية الكود اللى عايزين ننفذه أكتر من مرة بناءا على الشرط اللى موجود فى النهاية وبعدين يبدأ ينفذ الكود اللى جوه ويوصل عند while يشوق الـ condition بتاعتها لو true يرجع ينفذ الكود تانى لو false يبقى خلاص ويكمل باقى البرنامج وده معناه إن الكود اللى جوه do while هيتنفذ مرة واحدة على الأقل حتى لو كان الـ condition نتيجته false من الأول خالص على عكس while loop لو الشرط فى البداية مش متحقق يبقى مش هينفذ الكود اللى جواه خالص ... يارب يكون حد فهم حاجه ؟
وخدوا بالكم من الـ semicolon اللى فى الآخر بعد الـ while(condition) بتتنسى علطول
نشوف مثال بردوه توضيحى

#include <iostream>
#include<conio.h>
int main()
{
  int x;
  x = 0;
  do {
    // "Hello, world!" is printed at least one time
    //  even though the condition is false
    cout<<"Hello, world!\n";
  } while ( x != 0 );
getch();

حد يقوللى نتيجة الكود ده إيه ؟؟؟
أنا هقولكم أنا
فى البداية بنعرف variable اسمه x وبنديله قيمة صفر وبعدين بنبدأ do while loop وبنطبع على الشاشة hello world وبعدين نشوف الشرط بتاع التكرار x!=0 أو x لا تساوى صفر هل الكلام ده صح لا طبعا نتيجة الشرط ده false لان x فعلا بتساوى صفر يبقى مش هيرجع ينفذ الكود ده تانى وكده ينهى البرنامج طيب فين التكرار بقى ؟
محصلش هنا أى تكرار لأن نتيجة الشرط كانت false لكن الكود اتنفذ مرة واحده على الأقل لكن لو استخدمنا while loop مع نفس المثال الكود مش هتينفذ خالص لأنه بيعتمد على الشرط فى البداية يعنى البرنامج بيشوف الـ condition الاول لو نتيجته false مش هينفذ الكود خالص .... تمام كده
راجعوا المثال اللى عملته همس قبل كده ولو مفيش حاجه فيه واضحه اسألوا بس إن شاء الله يكون واضح

وكده يكون انتهى الـ do while loop وييجى دور نوع أخر من أنواع loops وهو for loop ....

طيب نبدأ نقول بقى معنى الأخ for loop ايه بس خلونا الأول نقول شكله إيه

for ( variable initialization; condition; variable update ) {
  Code to execute while the condition is true
}

بيبدأ الـ loop بكلمة for وبنفتح قوس وبنعرف variable ونديله قيمة ابتدائية ولازم يكون له قيمة ابتدائية وبعدين semicolon اللى هى دى ( وبعدين نقول الشرط اللى طول ما هو متحقق يتنفذ الـ loop وبردوه بعده semicolon وبعدين على نفس الـ variable اللى اديناله قيمة ابتدائية فى الأول نقول الـ varaible ده هيتغير ازاى وعلى اساس التغير ده قيمة الشرط هتتغير سواء من true إلى false أو العكس وعلى اساسه هيتحدد يكرر تنفيذ الكود ولالأ وبعدين نفتح قوس { ونكتب الكود اللى عايزينه يتغير وبعدين نقفل القوس تانى} وتبقى دى نهاية الـ loop
طبعا مش واضح أوى الكلام صح ؟؟؟
طيب خلينا نقول مثال ونوضح عليه الكلام ده
هنقول مثال بسيط بنستخدمه دايما فى توضيح فكرة الـ loop ونقول بنستخدم الـ for loop علشان نستعمله ازاى وهناخد نفس المثال اللى خدناه من شوية وهو لو عايزين نكتب كلمة hello world عشر مرات على الشاشة نعمله ازاى ؟؟؟
طبعا عرفنا إزاى نعمله باستخدام while & do while loops وهنقول دلوقتى نعمله ازاى باستخدام for loop

for(int x=1; x<=10; x++)
{
cout<<x<<" - Hello World \n";
}

أنا مكتبتش البدايات بتاعة الكود ونهايته علشان طبعا انتوا عارفين شكلها ايه انا بس ركزت على الـ for loop
وخلينا نمشى معاه فى البداية قلنا for وفتحنا قوس من ده ( وبعدين عرفنا variable اسمه x واديناله قيمة ابتدائية اللى هى 1 و semicolon وبعدين قولناله الشرط اللى هو لو x <=10 إكس اقل من أو تساوى عشرة يعنى طول ما الشرط ده متحقق ادخل الكود ونفذ وبعدين قولناله ++x ودى معناها زود قيمة x بواحد وبعدين كتبنا جوه الأقواس اطبع على الشاشه قيمة x وجنبها كلمة hello world وانزل سطر جديد وقفلنا القوس
أنا ركزت أوى فى شكل الكتابه وشرحته واحده واحده علشان محدش يتلخبط فيه
نيجى بقى نقول البرنامج هيمشى فى الـ loop ده ازاى
الل هيحصل إن البرنامج هيعرف الـ variable x ويديلة القيمة الإبتدائية بتاعته واحد وبعدين يشوف الشرط لو نتيجته true يدخل ينفذ الكود لو false هيوقف ومش هينفذ الكود اللى جوه طبعا نتيجة الـشرط true لأن الواحد أقل من العشرة يبقى هيدخل ينفذ الكود وهو إنه يطبع على الشاشه 1- Hello World وينزل سطر جديد وبعدين هيروح ينفذ الـ variable update يعنى هيروح عل الجزء بتاع ++x ويزود x بواحد يعنى تبقى قيمة x اتنين ويروح يشوف الشرط تانى طبعا الإتنين اقل من العشرة يبقى النتيجة true يبقى هينفذ الكود تانى ويطبع 2- Hello World وينزل سطر جديد ويرجع للـ variable update ويزود x بواحد يعنى تبقى تلاته ويشوف الشرط وينفذ الكود وهكذا لغاية ما تبقى قيمة x بـ 11 وبكده تكون قيمة الشرط بـ false يوقف تنفيذ الكود ويخلص الـ loop ويشوف اللى بعده .......... واضح كده ؟؟؟
معلش أنا معنديش ++C هنا علشان كده مش عارف اوريكوا النتايج بس طبقوا انتوا بقى وورونى

بالنسبة للـ homework بصراحه مش قادر أفكر فى حاجه دلوقتى ده quiz صغير وسهل من على النت حلوه

1. What is the final value of x when the code int x; for(x=0; x<10; x++) {} is run?
A. 10
B. 9
C. 0
D. 1
2. When does the code block following while(x<100) execute?
A. When x is less than one hundred
B. When x is greater than one hundred
C. When x is equal to one hundred
D. While it wishes
3. Which is not a loop structure?
A. for
B. do while
C. while
D. repeat until
4. How many times is a do while loop guaranteed to loop?
A. 0
B. Infinitely
C. 1
D. Variable

وبكده ينتهى درسنا الـ loops يارب تكون واضحه وسهله ويارب اكون وفقت فى شرحها ولو فى أى اسئلة أو تعليقات منتظرها بإذن الله
شكرا ومتأسف مرة تانية على التأخير
.
.

[ananoo]

السلام عليكم

بجد انا سعيدة جدا انا الدرس الجديد نزل لاني كنت فعلا قربت افقد الامل

الحمد لله الدرس مفهوم بالنسبة لية
و حليت الquiz
1-A
2-A
3-D
4-D
مش عرفة صح كدة و لا ايه؟؟؟؟؟؟؟؟

بس كان عندي سؤال برة الدرس ده

انا لما بكتب كود جديد بفتح البرنامج و اجيب من FILE --->NEW --->TEXT EDIT

و بعدين بعمل SAVE لما بخلص باي اسم المهم ان اللي بيحصل ان بيبقى موجود كذا FILE بنفس الاسم بس الاكستنشن مختلف
يعني بيبقى في واحد اخره EXE ده البرنامج نفسه و واحد اخره CPP ده بيبقى الكود في تانين بقى مش بعرف افتحهم اصلا و مش عرفة دول يبقوا ايه؟؟؟؟؟؟؟؟؟

انا مش عرفة هوة اللي انا بعمله صح و لا ايه؟

بس كدة و جزاك الله كله خير
و ربنا يوفقك في شغلك ان شاء الله

[همس]

ياااااااااه اخيرا

بجد مش مسداة نفسي

ربنا يكون في عون حضرتك يا باشمهندس


بس هطلب من حضرتك طلب صغير اوي

ان حضرتك مش تنزل دروس تاني لحد ما نآخد الاجازة عشان نتابع وكدا

وتبقى فرصة حضرتك تستريح مننا شوية

هههههههههههه

انا عن نفسي اجازتي هآخدها يوم 24\1 ان شاء الرحمن

طبعا دا بعد ما الباشمهندسين الي متابعين الكورس معايا يوافقوا

ان شاء الله اطبق الدرس

وجزاك الله خيرا على المجهود الي حضرتك بتبذله معانا

[msamido]

المشاركة الأصلية كتبت بواسطة ananoo

السلام عليكم

بجد انا سعيدة جدا انا الدرس الجديد نزل لاني كنت فعلا قربت افقد الامل

معلش بقى أنا عارف إنى اتأخرت عليكم كتيير بس مش بإيدى معلش

الحمد لله الدرس مفهوم بالنسبة لية

الحمد لله

و حليت الquiz
1-a
2-a
3-d
4-d
مش عرفة صح كدة و لا ايه؟؟؟؟؟؟؟؟

مش هقول دلوقتى لما نشوف باقى الإجابات إن شاء الله

بس كان عندي سؤال برة الدرس ده

فى أى وقت تحبى تسألى اسألى مش لازم اكون نزلت درس جديد علشان تسألى

انا لما بكتب كود جديد بفتح البرنامج و اجيب من file --->new --->text edit

و بعدين بعمل save لما بخلص باي اسم المهم ان اللي بيحصل ان بيبقى موجود كذا file بنفس الاسم بس الاكستنشن مختلف
يعني بيبقى في واحد اخره exe ده البرنامج نفسه و واحد اخره cpp ده بيبقى الكود في تانين بقى مش بعرف افتحهم اصلا و مش عرفة دول يبقوا ايه؟؟؟؟؟؟؟؟؟

انا مش عرفة هوة اللي انا بعمله صح و لا ايه؟

صح وتمام الله ينور
بالنسبة للـ fiels دى هى عباره عن file تنفيذيه الـ compiler بيعملها اثناء التنفيذ وأهمها طبعا واللى إحنا عايزينه هو الـ file.cpp لأن ده اللى فيه الكود وبالنسبة للـ file.exe ده الـ file التنفيذى اللى لما تحبى تنفذى البرنامج من غير ما تفتحى الـ boralnd c تشغليه منه وباقى الملفات ممكن تحذفيها عادى

بس كدة و جزاك الله كله خير
و ربنا يوفقك في شغلك ان شاء الله

جزانا الله وإياكم كل الخير ويارب يوفقنا جميعا إن شاء الله

المشاركة الأصلية كتبت بواسطة همس

ياااااااااه اخيرا

بجد مش مسداة نفسي

صدقوا يا جماعه صدقوا الحمد لله أنا لسه حى أرزق

ربنا يكون في عون حضرتك يا باشمهندس


بس هطلب من حضرتك طلب صغير اوي

ان حضرتك مش تنزل دروس تاني لحد ما نآخد الاجازة عشان نتابع وكدا

وتبقى فرصة حضرتك تستريح مننا شوية

هههههههههههه

انا عن نفسي اجازتي هآخدها يوم 24\1 ان شاء الرحمن

طبعا دا بعد ما الباشمهندسين الي متابعين الكورس معايا يوافقوا

ان شاء الله اطبق الدرس

وجزاك الله خيرا على المجهود الي حضرتك بتبذله معانا

بالنسبة لموضوع تأجيل الدروس ده براحتكوا طبعا لو وافقتوا كلكم عليه أنا معنديش أى مانع وأنا لو لقيت نفسى فاضى شوية وفى وقت اكتب درس جديد هكتبه عندى لما تخلصوا وبعدين ننزله
جزانا الله وإياكم كل الخير يا همس

[PROGRAMMING LOVER]

السلام عليكم وحمة الله وبركاتة

اولا :مش عارف اقول اية علي الشرح الجميل بجد دة اكني قاعد في سكشن البرمجة اية الجمال دة

ثانيا : نسيت اعرف نفسي محمد محمود كلية حاسبات ومعلومات ج عين شمش

ثالثا : انا قريت الشرح من اول درس لاخر درس وفهمت كل شئ شكرا علي الشرح الوافي

بس ياريت مش تتاخر في الدروس الجميلة دي

واسف انا مش موافق علي تاجيل الدروس

[همس]

بس بعد اذنك عندنا امتحانات

يعني ايه مش موافق ؟؟؟

يعني نسيب المذاكرة ونتابع الكورس مثلا ؟؟

معلش يعني ياريت نفكر في غيرنا ومش نفكر في نفسنا وبس

الكورس هيقف وهيكمل مش هيقف للابد

بس لو كمل دلوقتي

هيفوت عليا جزء كبير جدا

ومش هقدر اطبقه كله مرة واحدة

عموما لو حضرتك مش موافق
فانا منسحبة من الكورس

واسفة اني بقول كدا

[marwa1080]

السلام عليكم
ماشاء الله عليكم مجهوود راائع
شكرا يا ياباش مهندس محمد
وياريت تكملوا المحاضرات بس بعد الراحه الا هتخدوها بس ما تتاخروش عن 24/1 لانه بجد كورس ممتع
وانا هنضم للكورس دا بعد اذنكم طبعا لانى برده باخد برمجه بلغه ++c فى جامعتى(النيلين )ودى جامعه فى السودان لانى لقيت اسلوب الشرح رائع ولغايت لما تخلص الاجازه اكون رجعت الا انتم اخدتوا ان شاء الله

[ananoo]

السلام عليكم

انا بصراحة من رايي ان احنا ناجل شويه لحد الامتحانات تخلص
انا هخلص 28
ممكن تبدأوا بدري و ان شاء الله ممكن اقدر الحقكم

[msamido]

طيب لما تحبوا ابدأ حد بس يبعتل رساله علشان مش بدخل كتيير

[همس]

ان شاء الله يا باشمندس تحت أمرك

[ananoo]

السلام عليكم

ايه الاخبار يا جماعة؟؟؟؟؟؟؟
مستعدين عشان نكمل الدروس و لا ايه النظام؟؟؟؟؟؟؟

انا خيفة الاجازة تعدي من غير ما ناخد حاجة