الموضوع ده هيوفر كتير لكل اللي عاوز يتفوق ثانوي عام ان شاء الله

[دراكو مالفوى]

المشاركة الأصلية كتبت بواسطة lolododo2010

ياما حطيت جداول من النوع ده وابشرك لو جبت سبيدر مان ولا الرجل المقنع مش هينفذه فين وقت الاكل فين وقت الصلاه مين قالك ان جسمك هيرضي ب6 ساعات المراهق بينام 8 فين وقت المواصلات فين وقت تصوير ورق الدروس فين وقت الراحه ولو حتي المشي للتلاجه
بامانه عاوزة اوفر عليك لو ماده واحده ذاكرتها بضمير احسن مما تكتب مليون جدول خيالي ده التهويل بعينه يا جماعه وبعدين عقلك مش هيقدر يدخل معلومات ماديه ومعنويه في يوم واحد (لو مفهمتهاش هبقي اوضحها) حط جدول حلو وبعدين ممكن تثبت الفيزياء والاحياء بس بوقت معقول
وتلعب بباقي المواد كل يوم ماده وابقي ناقشني لو عندك بروبلم

ههههههههههههههه
ليه 5 ساعات احياء و5 فيزياء مش واسعه ولا حاجة انا بقول علشان اراجعهم اول بأول علشان الوقت
ثم انا حطيت الجدول ده وواثق ان شاء الله همشى عليه علشان دى السنة اللى هتحدد مصيرى للابد.
فعلا وقت النوم قليل بس هعمل ايه .لازم كده
وقت الراحة يشمل الاكل والصلاه والمشى لغاية التلاجة وممكن اذاكر جوة التلاجة علشان اوفر وقت المشى
تعتقدى 3 ساعات كافيه للاحياء ولفيزياء؟
انا ظلمت علم النفس بساعة يوميا ؟؟
_فيه مشكلة دلوقتى انا ضميرى بيأنبى علشان مذاكرتش ولا حاجة فى الشهرين اللى فاتوا دول ( 7و8)
لانى كنت عايز اخلص العربى فيهم وعايز احفظ كلمات انجليزى كتير ولكن ضااااع الشهرين.
كده افضل ولا لو كنت خلصت العربى افضل
انا بشوف ناس جايبة درجات حلوة فى 2 وينقصوا جامد فى 3
السبب ايه بقى ؟
3 اصعب من 2
ولا هما بيتغروا بمجموعهم وحماسهم بيقل ؟؟
_حضرتك كنتى بتذاكرى 3 بنفس مجهود 2 ولا اكتر (( وانت مالك انت)
تعتقدى لو نفذت الجدول ده لاخر السنة (()) ممكن اقفل فيزياء واحياء وعلم نفس ومستوى وانجليزى .ولا صعب والمواد رخمة يعنى ولا فيه ايه
(( بلاش الدعا والنبى انا داخل على سنه مهمه))

[lolododo2010]

المشاركة الأصلية كتبت بواسطة دراكو مالفوى

ههههههههههههههه
ليه 5 ساعات احياء و5 فيزياء مش واسعه ولا حاجة انا بقول علشان اراجعهم اول بأول علشان الوقت
ثم انا حطيت الجدول ده وواثق ان شاء الله همشى عليه علشان دى السنة اللى هتحدد مصيرى للابد.حلو الحماس اعقد العزم وتوكل علي الله بس بقولك مش هتقدر بنسبه 100%انه يتم بحذافيره بس حلوة النيه وحلو الحماس افضل تحط شئ واقعي مثلا لو واحد هيبني بيته من الكريستال جميل بس ميبنهوش فمنطقه عشوائيه وناس فقرا لانه اكيد هيطربق عليه اولا العقل مش هيستحمل كل نوعيه المواد في اليوم ثانيا في الدرس المستر بيسمع فهتبقي عاوز تبقي البريمو فهتركز علي حاجه بكرة من الاخر حط جدول طبيعي يتنفذ وبعدين الميزة ان 3 اسهل من 2 وهتحس بمتعه في المذاكرة
فعلا وقت النوم قليل بس هعمل ايه .لازم كده
وقت الراحة يشمل الاكل والصلاه والمشى لغاية التلاجة وممكن اذاكر جوة التلاجة علشان اوفر وقت المشى هههههههههه فكرة برده بس صدقني ان ربنا وفقك وعملت الخلطه دي مخك هيحتاج وقت نوم عشان يرتب المعلومات صح فبمجرد ما هتنام مش هتحس بنفسك جرب كده وحاول وربنا هيوفقك
تعتقدى 3 ساعات كافيه للاحياء ولفيزياء؟اه
انا ظلمت علم النفس بساعة يوميا ؟؟لا
_فيه مشكلة دلوقتى انا ضميرى بيأنبى علشان مذاكرتش ولا حاجة فى الشهرين اللى فاتوا دول ( 7و8)هو انت مش كنت مخلص 2 علي ما هو باين هتذاكر بعد يوم من الامتحانات في 7 ولا رمضان بلاش تهويل ربنا يستر عليك وخلي بالك من المثل داري علي شمعتك تقيد ممكن تكون مش هتقدر تعمل ده كله وتقول لصحابك يحسدوك قرب لربنا وادعيه وابدا في 9 انا ابتديت السنه اللي فاتت 9 دروس ومذاكرة
لانى كنت عايز اخلص العربى فيهم وعايز احفظ كلمات انجليزى كتير ولكن ضااااع الشهرين.بس مضاعتش السنه الوقت طويل بس للي ينظمه صح انت كده عامل زي اللي معاه حده حديده رفيعه ومصر انه يحطم بيها الجبل في 3 دقائق ممكن تنحت فيه شويه بشويه وهينهد براحه علي نفسك لان بتهويلك هتفقد عزيمتك بسرعه
كده افضل ولا لو كنت خلصت العربى افضل
انا بشوف ناس جايبة درجات حلوة فى 2 وينقصوا جامد فى3 للاسف انا من دول نقصت في 2 نص درجه وفي 3 درجه ونص بحالهم وده عشان اوليت الباقي اهتمام جامد خصوصا الفيزياء واعترف اني كنت بدلع في العربي بامانه كنت ماله اني اذاكرة بحفظ بس اخر ما زهقت لقيت ان القرايه بفهم افضل وللاسف نقصت في التعبير اغلب الدرجه ونص لاني كنت هملاه لكن باقي الفروع متقفله بفضل الله
السبب ايه بقى ؟
3 اصعب من مش اصعب اتقل حجما ومظلومه لاننا كنا بنهتم بغيرها2
ولا هما بيتغروا بمجموعهم وحماسهم بيقل ؟؟لا والله انا كنت جايبه ف 2 مجموع 99% ولا اتغريت ولا حاجه بالعكس عيطت لاني كان نفسي في مجموع اكبر واجتهدت اكتر في المذاكرة بس العربي قام بالواجب ده نصيب بس في الاخر حققت حلمي
_حضرتك كنتى بتذاكرى 3 بنفس مجهود 2 ولا اكتر (( وانت مالك انت) وانت مالك صحيح ههههههههه لا 3 اكتر شويتين 3 اربعه 5 لاني حسيت اني في 2 قصرت وبعدين مواد 3 اكبر بس اسهل
تعتقدى لو نفذت الجدول ده لاخر السنة (()) ممكن اقفل فيزياء واحياء وعلم نفس ومستوى وانجليزى .ولا صعب والمواد رخمة يعنى ولا فيه ايه انت مش هتقدر تنفذه للاسف مبحبطكش بس يمكن عشان ليسه مشوفتش المواد هقولك علي حاجه 3 احياء و3 فيزياء و ساعه نفس او اجتماع
والباقي اما عربي او انجليزي انا عن نفسي كنت مثبته فيزياء واحياء وبلعب ب3 مواد الباقيين كل يوم ماده مختلفه مكنتش مثبته النفس بس كان الوقت اكبر اني اعمل ما اريد
(( بلاش الدعا والنبى انا داخل على سنه مهمه))

لا هدعي بس مش عليك ليك ربنا يوفقك ويوفقكوا جميعا

[دراكو مالفوى]

شكرا لحضرتك يا دكتورة ربنا يوفقك فى الكلية وتطلعى الاولى علشان تبقى تشرحيلنا. اصل الكورسات غالية
(ناس بتاعة مصلحتها)

كلامك جميل ومشجع . وفعلا شكلك دكتورة فى الجامعة

[دراكو مالفوى]

يا جماعة
فى سؤال محيرنى
عدد الطلبة فى 2011 اللى جايبين من 95% الى 100%
اكتر من عدد الطلبة فى 2012 ب 16 الف طالب
2- 2011 اللى كان جايب 201 كان ترتيبه 20000
2012 اللى جايب 201 ترتيبه 11000
2011 اللى كان جايب 200 كان ترتيبه 30000
2012 اللى جايب 200 ترتيبه 18000
وهكذااااااا
ايه اللى نستنتجه من ده ؟؟من حيث التنسيق

[hobahoby]

ممكن بعد اذنك يا دكتورة اخد رأيك فى حاجة


ان شاء الله بكرة هبتدى دروسى بس عايزة اعرف حاجة
بالنسبة للفيزيا اعرف المدرس كويس ولا وحش فيها ازاى ؟؟
يعنى لازم يعمل امتحانات كل حصة احسن ولا يكون شرحة حلو اوى و كدة
معلش انا اسفة اصل مش عندى خبرة فى موضوع الفيزيا دة خالص

و سؤال تانى معلش

هو المفروض من اول السنة ابتدى جامد و اشد ولا ابدأ بالتدريج
اصل فى ناس بتخوفنى من الموضوع دة و بيقولوا اللى بيبدأ اوى من الاول بيزهق فى الاخر

و اركز على الفيزيا و الرياضة اكتر من باقى المواد عشان اصعبهم ؟

و شكرا جداا ليكى ربنا يوفقك يا رب

[lolododo2010]

المشاركة الأصلية كتبت بواسطة hobahoby

ممكن بعد اذنك يا دكتورة اخد رأيك فى حاجة
اتفضلي

ان شاء الله بكرة هبتدى دروسىربنا يوفقك شدي حيلك بس عايزة اعرف حاجة
بالنسبة للفيزيا اعرف المدرس كويس ولا وحش فيها ازاى ؟؟
يعنى لازم يعمل امتحانات كل حصة احسن ولا يكون شرحة حلو اوى و كدة
معلش انا اسفة اصل مش عندى خبرة فى موضوع الفيزيا دة خالص

و سؤال تانى معلش
ينفع كدهاسالي حتي ولو 100000000 سؤال
هو المفروض من اول السنة ابتدى جامد و اشد ولا ابدأ بالتدريج
اصل فى ناس بتخوفنى من الموضوع دة و بيقولوا اللى بيبدأ اوى من الاول بيزهق فى الاخر
لا بالتدريج انا بامانه كنت في الاول بذاكر بتاع 5 ثم 6 ال 8 لحد16 ساعه في الامتحانات
خدي الموضوع بالراحه انا في اول السنه كنت عادي بس في الاخر اتجدعنت
و اركز على الفيزيا و الرياضة اكتر من باقى المواد عشان اصعبهم ؟
لا دي غلطه جامده انا مش ناقصه في 3 الا في العربي 1.5 لازم تبقي عادله مع المواد كلها بس تركزي علي دول طبعا كتير اوي لانهم مواد قوة بس متظلميش الباقي
و شكرا جداا ليكى ربنا يوفقك يا رب
لا شكر علي واجب

الاتنين اولا يكون شرحه حلو وبتفهميه كويس ثانيا ميكونش مركز اوي ع السهل والنظري ومهمل المسائل ثالثا يكون مهتم بالمسائل بمستوياتها الصعبه خصوصا لان فيه مدرسين بيركزوا ع النظري فاحذروهم رابعا يكون بيعمل امتحانات علي طول مش لازم كل حصه بس باستمرار

[lolododo2010]

المشاركة الأصلية كتبت بواسطة دراكو مالفوى

شكرا لحضرتك يا دكتورة ربنا يوفقك فى الكلية وتطلعى الاولى علشان تبقى تشرحيلنا. اصل الكورسات غالية اللهم امين من عيني بس ربنا يكرمنا كده ومش هتاخر عليكم
(ناس بتاعة مصلحتها)

كلامك جميل ومشجع . وفعلا شكلك دكتورة فى الجامعة العفو

ربنا يوفقكم وتجيبوا مجموع عالي

[lolododo2010]

المشاركة الأصلية كتبت بواسطة دراكو مالفوى

يا جماعة
فى سؤال محيرنى
عدد الطلبة فى 2011 اللى جايبين من 95% الى 100%
اكتر من عدد الطلبة فى 2012 ب 16 الف طالب
2- 2011 اللى كان جايب 201 كان ترتيبه 20000
2012 اللى جايب 201 ترتيبه 11000
2011 اللى كان جايب 200 كان ترتيبه 30000
2012 اللى جايب 200 ترتيبه 18000
وهكذااااااا
ايه اللى نستنتجه من ده ؟؟من حيث التنسيق

اللي استنتجه انك تشد حيلك وملكش دعوة بالاحصائيات دي ذاكر اجتهد واللي ربنا كتبهولك هو اللي هيكون التنسيق كده كده في الطالع بس ربنا موجود وطالما هو عالي انت اجتهد وسيب التنسيق علي الله

[Ahmed fathy 7]

حضرتك الرسم البيانى فى الفيزياء دا المفروض نذاكره من اول السنه ؟

[juventus]

المشاركة الأصلية كتبت بواسطة ahmed fathy 7

حضرتك الرسم البيانى فى الفيزياء دا المفروض نذاكره من اول السنه ؟

هو سهل جدا ده كام حالة كدة بتاع 5 مثلاً

[H.A.K]

الف مبروك وربنا يوفقك في المرحله اللي جايه

شكرا علي المعلومات الممتازه

[hobahoby]

المشاركة الأصلية كتبت بواسطة lolododo2010

الاتنين اولا يكون شرحه حلو وبتفهميه كويس ثانيا ميكونش مركز اوي ع السهل والنظري ومهمل المسائل ثالثا يكون مهتم بالمسائل بمستوياتها الصعبه خصوصا لان فيه مدرسين بيركزوا ع النظري فاحذروهم رابعا يكون بيعمل امتحانات علي طول مش لازم كل حصه بس باستمرار

ربنا يخليكى يا رب بجد
انا بحبك اوى و الله

بكرة الصبح ان شاء الله اول درس فيزياء

هعمل زى ما قلتيلى بالضبط و اشوفة كدة نظامة اية وبيركز على اية

ربنا معاكى يا رب و يوفقك يا رب

[masryaa]

شكرا ع الموضوع وع الافادات دى وكل الاسئلة اللى كنت هسالها الاعضاء سبقونى
ان شاء الله قريب نستفيد من خبرتك......... لو مفيهاش رخامة
ألف ألف مليييووون مبروك دائما من نجاح لنجاح
sorryع الاطالة

[lolododo2010]

ربنا يوفقكم ويارب اكون قدرت افيدكم واي سؤال اكتبوه وباذن الله هرد عليه

[Marry Sam]

طب الف شكر يا دكتره .. انا عندي اسئلة كتير بس مش دلوقتى
المهم
ابدأ مذاكرة جامد من دلوقتى و لا ايه ..
اصلى مذاكرتش خالص 7 و 8

و كتاب .. senior فى الانجلش ؟؟
و ايه ف علم النفس ..؟
و الاضواء عربي ..؟؟ و الامتحان عربي ؟؟

و جزاك الله خيرا