برمجة " دروس البرمجة مع ++c " محمد القبانى

[msamido]

بسم الله الرحمن الرحيم

الأول ازيكم يا جماعه عاملين أيه واخباركم ايه وكل سنة وانتم طيبين
ثانيا معلش اتأخرت فى الموضوع التانى إذا كان حد مستنينى أصلا
ثالثا بقى نبدأ بسم الله

فى البداية عايز اقول إننا أن شاء الله هنبدأ نتعلم مع بعض لغة برمجة مهمة جدا جدا جدا وقوية جدا جدا جدا من أقوى اللغات لكنها لم تعد مستخدمة كثيراً فى السوق وهى ++C
طيب يا عم هتقرفنا بيها ليه لما هى مش مستخدمة ؟؟
هقولكم أولا لأنها مهمة جداً لبناء أساسيات البرمجة وثانيا لأنها تعتبر أساس لكل لغات البرمجة التى تخص مايكروسوفت زى #c والـ visual c ثالثا أنا بدأت بيها وأنا بتعلم برمجة وبصراحه كانت مفيدة جدا اتفقنا ؟؟

نبدأ بقى ونقول إن لكل لغة برمجة ما يسمى بالـ compiler وهو ما يقوم بتحويل الكود المكتوب إلى لغة الكومبيوتر ده معناه الفلسفى والنظرى وأيضا هناك لكل لغة ما يسمى بالـ Editor وهو البيئة التى نكتب فيها الكود وإن كان هناك بعض اللغات ليس لها Editor حيث من الممكن أن تكتب الكود فى text file عادى .
بالنسبة للـ ++C فلها أكثر من Editor لكن انا بفضل نستخدم ++ Borland C ده اللينك بتاعه :

http://www.4shared.com/file/39716284/83d31cee/Borland_C_502.html?s=1

ننزله إن شاء الله ونسطبه ونبدأ مع بعض بإذن الله أول برنامج فى حياة أى مبرمج وهو برنامج Hello World

#include <iostream.h>
#include <conio.h>
void main()
{
cout<<"Hello World";
getch();
}

ده أسهل برنامج فى التاريخ ممكن تعمله وعلى الرغم من ذلك هو يحتوى على المكونات الأساسية لأى برنامج وهى بالترتيب :
1- تضمين المكتبات المستخدمة فى البرنامج
2- الدالة الأساسية فى البرنامج

طبعا محدش فاهم حاجه ؟؟
نوضح :

يعنى ايه مكتبات فى لغات البرمجة هى اسمها libraries ودى ترجمه حرفية ليها بس انا بصراحه مش بحب الترجمة فى البرمجة وعلشان كده هنتكلم عنها باسمها الحقيقى ان شاء الله .
الـ libraries هى ملفات تحمل الدوال الرئيسية المستخدمة فى لغة البرمجة وده مصطلح عام لكل لغات البرمجة مش بس الـ ++C طيب بردوه يعنى ايه ؟؟
من الأخر كل جمله بنكتبها فى البرنامج لازم تترجم للكومبيوتر وبيكون ليه الـ library بتاعته اللى بترجمه ده شرح مبسط ويمكن يكون مش واضح أوى بس هيوضح بعدين ومع التعامل هيوضح أكتر. ودلوقتى هنقول إن معظم الدوال اللى هنستخدمها هتكون فى الـ Liberary اللى اسمها iostream.h أو input output stream header ده هو اسم الـ liberary وما يسبقها فى الجمله include# هى expression بيفهم الكود ان البرنامج هيحتوى على دوال من الـ liberary ده . واضح كده الجزء الأول ؟؟

2- الدالة الأساسية للبرنامج :

void main()
{
}

أى برنامج أول ما بيبدأ بيدور على الدالة الأساسية بتاعته أو الـ main method وبيناديها أول حاجه وبينفذ الكود اللى جواها تمام كده ؟؟
ده باختصار شديد علشان مينفعش ادخلكم فى تفاصيل أكتر من كده بس بعدين هنلاقى details فى التفاصيل كتير
نيجى بقى للكود اللى جوه الـ main method :

cout<<"Hello World";

>>cout الدالة دى معناها اكتب على الشاشه وما يأتى بعدها بيكون بين double quotation وهو اللى بيظهر مكتوب على الشاشة "Hello World "

getch();

الدالة دى اسمها getch أو هى اختصار لـ get character ومعناها بتقول للبرنامج يستنى لغاية ما ياخد أى حرف من اليوزر طيب لو مش موجوده هيحصل ايه البرنامج هيعرض كلمة hello world ويقفل علطول لدرجة إننا مش هنشوفه فتح أصلا تمام كده ؟؟

وبكده نكون انتهينا من أول برنامج ليكم فى البرمجة بحمد لله
ملحوظة : كل كلمة وكل حرف فى الكود لها معنى ولها فايدة.



وهنا بقى هنطلب من الناس اللى هتابع وتهتم عمل مثال بسيط يختبروا بيه نفسهم يشوفوا هل فهموا ولا لأ

السؤال :
أكتب برنامجاً يعرض أسمك على الشاشة؟

وفى النهاية عايز اقول بردوه يا جماعه أنا برتجل وبحاول ابسط ووأوضح بس ممكن أكون مش كويس بس لو فى حد عنده أى اسئلة أنا موجود بإذن الله
تمنياتى بالتوفيق ومستقبل باهر بإذن الله
محمد القبانى

[lamar]

اولا شكرا على الموضوع الرائع
و اكيد مستنيين اى موضوع رائع و مفيد زى ده
اما بالنسبة للسؤال فانا هاجرب و اعمله و يارب يطلع

[ahmed abobakr]

شكرا لك على هذا الشرح المفيد ..



ممكن اعرف الخطأ فين ..

او ايه اللى اعمله بعد كتابة هذه الخطوات لكى يظهر الاسم

[ananoo]

السلام عليكم

جزاك الله خيرا موضوع مفيد و شرح ممتع بس كالعادة في اساله

1 - الexpertion اللي بيبقى قبل كل library على طول هيبقى include#?????????

2 - احنا اختارنا الmain method على اساس ايه؟؟؟؟؟

3- انت قولت ان احنا مش هنستخدم غير 2 library اللي همة iostream.h او input output stream header بس في التطبيق كان اسم الlibrary التانية conio.h!!!!!

4-احنا في البرنامج ده استخدمنا main method واحدة يبقى المفروض تبقى في library واحدة بس احنا استخدمنا 2 library !!!!


و ده على حسب ماانا فهمت بس فعلا حسة ان في حاجة مبهمة في حكاية الlibraries و الmain method

وكان نفسي اعمل البرنامج بس البرنامج مش راضي ينزل

و في السؤال برة الموضوع

ازاي اصور صفحة الكمبيوتر؟؟؟؟؟


و بالمناسبة انا عرفت الخطأ بتاع ahmed abobakr

كان خطأ مطبعي في كلمة cout مش count

و شكرا

[ahmed abobakr]

المشاركة الأصلية كتبت بواسطة ananoo

و بالمناسبة انا عرفت الخطأ بتاع ahmed abobakr

كان خطأ مطبعي في كلمة cout مش count

شكرا جدا على الملاحظة فى الخطأ .

انا هجاوب على سؤال واحد اللى انا متأكد منه .

تصوير سطح المكتب

نضغط على print screen sysrq قى لوحة المفاتيح .
نفتح برنامج paint .الرسام .ونعمل ctrl + v ونقص الصورة .

[ahmed abobakr]

المشاركة الأصلية كتبت بواسطة ananoo

في كلمة cout مش count

غيرت الكلمة ولم يحدث شئ . لو فى اعدادات لازم نعملها فى البرنامج قولنا عليها عشان منوقعش فى المشكلة من اولها كده .

[msamido]

المشاركة الأصلية كتبت بواسطة tweety12

اولا شكرا على الموضوع الرائع
و اكيد مستنيين اى موضوع رائع و مفيد زى ده
اما بالنسبة للسؤال فانا هاجرب و اعمله و يارب يطلع

شكرا ليكى يا تويتى وأتمنى تكونى استفدتى

ومنتظر أجابتك للسؤال
.
.

المشاركة الأصلية كتبت بواسطة ahmed abobakr

شكرا لك على هذا الشرح المفيد ..



ممكن اعرف الخطأ فين ..

او ايه اللى اعمله بعد كتابة هذه الخطوات لكى يظهر الاسم

العفو يا احمد اتمنى بس يكون مفيد فعلا

الخطأ بالظبط مطبعى زى ما وضح ananoo وبتعديله يكون كده البرنامج تمام

مفروض تعمل ايه بعد كده
ما عليك غير إنك تضغط F9 وسيقوم الـ compliler ببناء البرنامج وتشغيله
وسيظهر الأسم
الكلام اللى بالأحمر هرجعله تانى للشرح والإستفاضه إن شاء الله

جرب كده وقولى

المشاركة الأصلية كتبت بواسطة ananoo

السلام عليكم

جزاك الله خيرا موضوع مفيد و شرح ممتع بس كالعادة في اساله

جزانا الله وإياكم
ويسعدنى أجاوب على أى اسئلة إن شاء الله

1 - الexpertion اللي بيبقى قبل كل library على طول هيبقى include#?????????

إن شاء الله علشان تعرف البرنامج إنك عايز تستخدم أى library ما علي إلا إنك تكتب include# وتكتب أسم الـ library بين <> ده بالنسبة للغة الـ ++C

2 - احنا اختارنا الmain method على اساس ايه؟؟؟؟؟

لو خدت بالك إنى فى شرحى قولت إن أى برنامج بيكون فى الـ main method كجزء أساسى لأن الكومبايلر أول حاجه بيدور عليها علشان يشغل البرنامج هى الـ main method إذن فهى جزء أساسى من أى برنامج

3- انت قولت ان احنا مش هنستخدم غير 2 library اللي همة iostream.h او input output stream header بس في التطبيق كان اسم الlibrary التانية conio.h!!!!!

بالظبط ده سهو بس بدليل إنى قلت هنستخدم اتنين وبعدين ذكرت واحده بس وهى iostream.h التانيه بقى كانت هى conio.h وهى الـ library التى تتضمن الدالة ()getch

4-احنا في البرنامج ده استخدمنا main method واحدة يبقى المفروض تبقى في library واحدة بس احنا استخدمنا 2 library !!!!

لا لا لا الـ main method هى داله واحده بس مينفعش تكون موجوده مرتين فى نفس البرنامج كمان الـ library ليس لها علاقة بالـ main method وإنما الـ libraries هى لدول الكود الموجودة بداخل الـ main method أو فى أى مكان فى البرنامج ولهذا فقد استخدمنا الـ iostream.h library لأنها تحتوى على الدالة >>cout واستخدمنا conio.h library لانها تحتوى على الداله ()getch فاهمنى ؟؟

و ده على حسب ماانا فهمت بس فعلا حسة ان في حاجة مبهمة في حكاية الlibraries و الmain method

وكان نفسي اعمل البرنامج بس البرنامج مش راضي ينزل

و في السؤال برة الموضوع

ازاي اصور صفحة الكمبيوتر؟؟؟؟؟

اجابة السؤال ده جاوب عليها أحمد


و بالمناسبة انا عرفت الخطأ بتاع ahmed abobakr

كان خطأ مطبعي في كلمة cout مش count

و شكرا

العفو وسعيد بأسئلتك واتمنى أكون وضحتها

المشاركة الأصلية كتبت بواسطة ahmed abobakr

شكرا جدا على الملاحظة فى الخطأ .

انا هجاوب على سؤال واحد اللى انا متأكد منه .

تصوير سطح المكتب

نضغط على print screen sysrq قى لوحة المفاتيح .
نفتح برنامج paint .الرسام .ونعمل ctrl + v ونقص الصورة .

المشاركة الأصلية كتبت بواسطة ahmed abobakr

غيرت الكلمة ولم يحدث شئ . لو فى اعدادات لازم نعملها فى البرنامج قولنا عليها عشان منوقعش فى المشكلة من اولها كده .

جاوبتك عليها فى الأول يا باشا
وزى ما قلت هرجع تانى بشرح واستفاضة إن شاء الله
.
.

[واحـد من النــاس]

جزاك الله خيراً يا مساميدو

كان ليا سؤالين كده بره الموضوع بعد إذنك

انا كنت سمعت ان خريج تجارة اللي واخد كورسات برمجة بتبقى فرصته احسن في الشغل من خريج حاسبات عشان بيكون دارس مواد إدارة وتجارة عموما ( مش عارف ايه فايدتها بس سمعت كده ) يا ترى الكلام ده صحيح ؟؟

سؤال تاني معلش .. قريت بردو في منتدى طالبة في حاسبات بتقول ان دكتور عندهم في الكلية قالهم لازم تدرسوا وتتعلموا حاجة غير البرمجة ( جرافيك مثلا ) عشان الإنسان بيوصل لسن ما ينفعش يشتغل فيه مبرمج .. يا ترى انت ايه رأيك في الكلام ده ؟؟

والف شكر يا باشا ع الموضوع لسه ما طبقتش بس اوعدك بإذن الله هاجرب

[ahmed abobakr]

شكرا با باشمهندس ..
دى اجابة السؤال

[msamido]

المشاركة الأصلية كتبت بواسطة واحـد من النــاس

جزاك الله خيراً يا مساميدو

جزانا الله وإياكم

كان ليا سؤالين كده بره الموضوع بعد إذنك

طبعا فى أى وقت اتفضل

انا كنت سمعت ان خريج تجارة اللي واخد كورسات برمجة بتبقى فرصته احسن في الشغل من خريج حاسبات عشان بيكون دارس مواد إدارة وتجارة عموما ( مش عارف ايه فايدتها بس سمعت كده ) يا ترى الكلام ده صحيح ؟؟

لالا لا لا خالص مش صحيح الكلام ده طالب حاسبات ومعلومات فرصته أحسن وأفضل بكل المقاييس بس بردوه ممكن طالب التجارة اللى واخد كورسات برمجة يكون أحسن من بعض طلبة حاسبات الموضوع مش بيمشى كده الموضوع هو انت كويس ولا لأ ؟؟ سواء بقى أنت حاسبات أو تجارة بس صدقنى مستوى طالب الحاسبات أفضل دايما من مستوى طلبة التجارة
وعايز اقولك كمان بجد مجالنا مفتوح وفرص العمل فيه كتييييييييييييييييييره جدا فى مصر وبره مصر شد حيلك انت بس وخلص الكلية وما تقلقش من مين فرصته أحسن طلبة حاسبات ولا طلبة تجاره سوق العمل ممكن يستوعبنا كلنا

سؤال تاني معلش .. قريت بردو في منتدى طالبة في حاسبات بتقول ان دكتور عندهم في الكلية قالهم لازم تدرسوا وتتعلموا حاجة غير البرمجة ( جرافيك مثلا ) عشان الإنسان بيوصل لسن ما ينفعش يشتغل فيه مبرمج .. يا ترى انت ايه رأيك في الكلام ده ؟؟

بص هو أنا مينفعش أقولك ما تتعلمش جرافيك مثلا لأ هو لو اتعلمتها هيبقى ميزة ليك بس اللى عايز اقولهولك بقى إن 99% من دكاترة الجامعات ميعرفوش حاجه عن سوق العمل
اللى بيجصل إن إنت لما تكبر وتكون خلاص وصلت لسن مينفعش تكون فيه مبرمج _وابقى افكرنى اعلق على كلمة مبرمج دى _ بتكون وصلت فى مكانك لمناصب أكبر فى الشركة ممكن يعنى مثلا تبقى technical consultant يعنى مستشار فنى بتساعد المبرمجين بدون ما تكتب كود بنفسك أو مثلا development manager حاجه كده بسم الله ما شاء الله أو ربنا يكرمك كده وتكون عملت شركة خاصة بيك انت فاهمنى؟؟
ما تشغلش بالك بالكلام ده دلوقتى سيب كل حاجه تيجى فى وقتها ومتقلقش

والف شكر يا باشا ع الموضوع لسه ما طبقتش بس اوعدك بإذن الله هاجرب

العفو يا باشا اتمنى تكون استفدت من الموضوع واتمنى اشوف تجربتك أو تقولى عملت إيه ؟

المشاركة الأصلية كتبت بواسطة ahmed abobakr

شكرا با باشمهندس ..
دى اجابة السؤال

العفو يا أبو حميد
ألف مبروك يا باشا اول برنامج فى تاريخ حياتك كمبرمج
دلوقتى بقى انت ممكن تكتب على الشاشة كل اللى أنت عايزه أنت عرفت الدالة اللى بتكتب إيه هى حاول بقى تكتب كده موضوع كبير قول فيه أى حاجه وأنا دلوقتى هديك أداتين مساعدتين فى الكتابة

 
cout<<"\n\t\t\t In the Name of Allah ";
cout<<"\n Ahmed Abobakr ";

جرب دول كده عندك فى البرنامج وشوف النتيجة هتجد إن \n معناها سطر جديد يعنى بتقول للبرنامج يكتب سطر جديد وهتلاقى إن \t معناها ياخد شوية مسافات كده قيمة الـ tab جرب وشوف واكتب ولو قابلك أى حاجه انا موجو د إن شاء الله أسال بس
.
.

[ahmed abobakr]

تمام يا باشا

[msamido]

تمام كده يا أبو حميد
أحسنت الفهم والتطبيق
وإنتظرنى إن شاء الله فى الدرس القادم علشان نقدر نعمل حاجات تانية بإذن الله
.
.

[ananoo]

السلام عليكم

الحمد لله انا كدة فهمت بس في حاجة عايزة اتاكد اني فهمتها صح

يعني هوة مفيش غير main method واحدة في برنامج ال++c
بس لو ده صح يبقى ايه لزمتها؟؟؟؟؟؟؟؟؟؟؟

معلش بس ياريت توضح اكتر

و بحاولانزل البرنامج دلوقتي ان شاء الله لو عرفت انزله هبقى اطبق و اوريك النتائج

[واحـد من النــاس]

أولا شكرا جدا يا باشا ع الإجابة ريحتني نفسيا واديتني ثقة

----------------------------------

ثانيا بأه صورة التطبيق ..

ينفع النصب ده ؟

اه معلش سؤال بالمناسبة .. ليه الصورة عندي سوده وعند ahmed abobakr زرقا ؟؟

----------------------------------

صحيح ماتنساش تعلق على كلمة مبرمج

[msamido]

المشاركة الأصلية كتبت بواسطة ananoo

السلام عليكم

الحمد لله انا كدة فهمت بس في حاجة عايزة اتاكد اني فهمتها صح

يعني هوة مفيش غير main method واحدة في برنامج ال++c
بس لو ده صح يبقى ايه لزمتها؟؟؟؟؟؟؟؟؟؟؟

معلش بس ياريت توضح اكتر

و بحاولانزل البرنامج دلوقتي ان شاء الله لو عرفت انزله هبقى اطبق و اوريك النتائج

هو ده صح فعلا مفيش غير main method واحدة فى برنامج السى بلس بلس ليه بقى ؟
إحنا قولنا إن الـ compiler علشان يشغل البرنامج أول حاجه بيروح يدور عليها هى الـ main method وبيبدأ منها طيب لو ملقاش main method ولا هيعمل أى حاجه تمام كده ؟؟
يبقى لازم يكون فيه main
طيب ليه مفيش أكتر من main لأن زى ما قلنا الكومبايلر بيدور عليها ولو لقى أكتر من واحدة مش هيبقى عارف يشتغل من مين فيهم تمام كده ؟
بس فى الواقع أصلا مينفعش يكون فى اتنين method بنفس الأسم إلا بشروط معينة هتيجى فى ميعادها إن شاء الله.
أتمنى أكون كده وضحت أكتر

مستنى أشوف النتائج أو التطبيق على الأقل

المشاركة الأصلية كتبت بواسطة واحـد من النــاس

أولا شكرا جدا يا باشا ع الإجابة ريحتني نفسيا واديتني ثقة

----------------------------------

العفو يا باشا

ثانيا بأه صورة التطبيق ..

ينفع النصب ده ؟

زى الفل عقبال ما يكون حقيقة بإذن الله

اه معلش سؤال بالمناسبة .. ليه الصورة عندي سوده وعند ahmed abobakr زرقا ؟؟

----------------------------------


مش عارف بس تقريباً أختلاف نسخة الويندوز وعلى فكرة أنت ممكن تغير لون الخلفية براحتك بس ده هيجى قدام بردوه شوية

صحيح ماتنساش تعلق على كلمة مبرمج

بالنسبة بقى لكلمة مبرمج
كلمة مبرمج يا جماعه بالنسبة للى بيشتغل فى مجالنا هى كلمة محددة أوى لكن إحنا مسمانا الصحيح أو العملى الموجود فى السوق Developer مش عارف بصراحه معناها إيه بالعربى ومش عايز اترجمها ترجمة حرفية لكن هى كلمة أشمل وأوسع وأوقع من مبرمج أو programmer مش هينفع أدخلك فى تفاصيل أكتر بخصوص دى علشان مش عايز اشتتك بس اللى عايز اقولهولك دلوقتى إن أنا مثلا المسمى الوظيفى بتاعى " web Developer " لتخصصى فى نوع من الـ developing هو الـ web وبردوه فى وقته إن شاء الله هشرحلكم ايه هى التخصصات المختلفة .

تمنياتى للجميع بالتوفيق إن شاء الله
.
.