عايز تعرف أى حاجة عن هندسة (إعدادى ) .. ___طلبة هندسة عين شمس __

[DR.Neuro]

FACULTY OF ENGINEERING
AIN SHAMS UNIVERSITY
فى الموضوع ده ان شاء الله هكلمكم عن كلية الهندسة
اولا

تقع كلية الهندسة فى ميدان عبده باشا بعيد عن الحرم الجامعى بحوالى محطتين عشان يبقى فيه عازل

اللغة الاولى للدراسة هى اللغة الانجليزية ولو ان فيه بعض المواد باللغة العربية وهاقولهم بالتفصيل ان شاء الله

:::::نيجى للموضوع من اوله:::::

<STRONG>

عشان تفكر تخش هندسة لازم تبقى عارف انك لازم تذاااكر وجامد كمان
مش قصدى مذاكرة زى قبل كده بتاعة الثانوية وكده
لأ طبعا ,,,المذاكرة بتاعتك ان شاء الله تعتمد على الفهم بنسبة كبيرة اوى
ولازم تفهم ومتحفظش وده اسهل طبعا واحلى وده ل3 اسباب
1-الدكاترة بيعتمدوا فى الامتحانات على الفهم اكتر بكتير من الحفظ .
2-لما تفهم كل يوم هتحس بمدى روعة العلم ..كل يوم هتكتشف حاجة جديده احلى من اللى قبليها
3- علشان تستحق لقب مهندس
مدة الدراسة فى هندسة 5 سنين
اول سنة (اعدادى),,,,,ودى بتاخد فيها مواد كتير ,,,يمكن ماده او اكتر من كل قسم
عشان السنة اللى بعديهاتقرر هتخش قسم ايه عن علم بمواده.
المواد فى اعدادى هى
(رياضة-فيزياء-كيمياء-حاسبات-ميكانيكا-رسم هندسى-اسقاط هندسى-هندسة الانتاج والتصنيع –التاريخ الهندسى-لغة فنية)

ناخد ماده ماده!
::الرياضيات::

(عربى لكن المعادلات كلها والرموز english)
جزئين
وسيقوم بتدريسها دكتورين الترم الاول
ودكتورين الترم التانى
لانها ليست ماده ممتده (يعنى بتمتحن فيها ترم)
الترم الاول (تفاضل-هندسة تحليلية)
الترم الثانى(تكامل-جبر)


الفيزياء(english)
هيدرسها دكتورين برضه مثل الرياضة
وهى ماده غير متصله
الترم الاول(كهربية-خواص ماده)
الترم الثانى(مغناطيسية-حرارة وضوء)
وطبعا المعامل للترمين
بيبقى فيها تجارب متعلقة بالمنهج اللى خدته
والمعامل بقى بيتشرحلك التجربة وبعدين بتعملها بايدك وبتطلع نتايج
وترسم وكل حاجة لوحدك علشان تتعود

الكيمياء(english)
ودى مادة مستمرة يعنى هتاخدها طول السنة وتمتحنها اخر السنة ان شاء الله
وليها معامل برضه

الميكانيكا)

<BLOCKQUOTE dir=rtl style="MARGIN-LEFT: 0px">

بقت عربى
ماده غير متصله
الترم الاول(استاتيكا)
الترم الثانى(ديناميكا)
الرسم الهندسى(english)
ماده مستمرة
يعنى بتمتحن اخر السنة مرة واحده
ودى ماده لذيذه جدا بس فى الاول هتحس انها صعبة
وانك مش عارف تتخيل اى حاجة و مش فااااهم
بس ده احساس عادى جدا فى هندسة عين شمس
كلنا حسينا كده فى البداية بس فى الاخر ان شاء الله هتبقى فاهم كل حاجة لما تتعود على الرسم

الاسقاط الهندسى(عربى)

كان اسمها هندسة وصفية
وهى ماده جميله برضه بتدرس فيها اسقاط الاشكال والمستويات على الورق
بمعنى من 3d ل 2d

حاسبات(english)
يتم فيها الدراسة لبعض اجزاء الكمبيوتر والانظمة فيه
وكيف يتم ترتيب العمليات المدخله للكمبيوتر وايضا قواعد البيانات والانترنت والوسائط المتعدده
طبعا محدش فاهم حاجة من السطر اللى فات
ولا انا
بس بحاول اترجم كله بالعربى على قد ماقدر
بس كله هيتفهم ان شاء الله فى الكلية

هندسة الانتاج والتصنيع(english(
ماده متصله
ماده جميله بتاخد فيها كيف يتم التصنيع فى المصانع والعمليات على التصنيع مثل السباكة والحداده ووووو
وكذلك المواد اللى بيتصنع بيها
وليها ورش بقى زى الفل
هتخش تشوف الماكينات بتشتغل ازاى بتبقى على كل اللى خدته

التاريخ الهندسى(عربى)
بتبقى تبع تكنولوجيا الانتاج
ماده سهله وبتتكلم عن تاريخ الهندسة من الانسان البدائى وكييف استخدم الهندسة فى اشباع حاجاته
الى العصر الحديث
انا عن نفسى ذاكرتها قبل الامتحان والحمد لله كانت هايفة يعنى

اللغة الفنية(english)
ماده للترم التانى
ومفيده جدا
فيه ناس كتير بتنفضلها
بس هى بجد مفيده
بتعلمك ازاى تكتب تقارير هندسية وتكتب ايه ومتكتبش ايه
والجز الاول فيها كله زى ثانوية عامة كده بييجى اختيارات وسهل جدا
بس الجزء التانى هو اللى مفيد بجد
وبالنسبة للرسم الهندسى
فيه الترم التانى معمل كمبيوتر ليه
Autocad
بتدرس مبادئ له

بس
كده المواد
خلصت

بالنسبة لامتحانات الميد تيرم
عندك اتنين واحد ترم اول والتانى
الترم التانى
بيبقوا غالبا بعد شهر او شهرين من بداية الترم
وبيجيبوا فيها الجزء اللى تم دراسته فى الشهور دى
وطبعا بتضاف لاعمال السنة


نييجى بقى للتخصصات
عندك اربع تخصصات
كهرباء
ميكانيكا
مدنى
عمارة
كهرباء بتاخد مواد بتمهدلها فى اعدادى
زى(كهربية-مغناطيسية-رياضة)
ميكانيكا(خواص ماده-حرارة-ميكانيكا-رياضة-رسم هندسى-تكنولوجيا الانتاج والتصنيع)
مدنى(خواص ماده- رياضة –اسقاط هندسى-ميكانيكا)
عمارة(اسقاط هندسى)
كل التخصصات بتاخدها اولى وتانية
تالته بقى بتتفرع كالاتى
Electrical engineering
(power-communications-computers)
mechanical engineering
(production-power-mecatronics-cars-)
دول على ما اتذكر
و مدنى (انشاءات –هيدروليكا ورى –مش فاكر الباقى)


بس كده تمام


نيجى بقى لنصيحة مجرب



بسم الله الرحمن الرحيم

هتموووووووت

ذاكر يابن الحلال احسن لك




بهزر طبعا


بصوا يا جماعة
الموضوع جميل وهتستمتع بهندسة اوى خصوصا لو بتحب العلم
فياريت تدرس بنية العلم انك عايز علم مش هتذاكر عشان الامتحانات وخلاص
علشان تبقى مهندس كويس ان شاء الله
ف المذاكره هنا مهمة جدا وبصفة مستمرة علشان المواد كتير
وانت داخل على دنيا تانية
فلازم اول باول علشان متتراكمش اى حاجة عليك
ومحدش يخدعك ويقوللك انك خلاص بقى دخلت الكلية يبقى راحت ايام المذاكرة
انسى

[ebrahem_el]

و المنصورة كده برضه ولا بتختلف

[DR.Neuro]

بصراحة أنا مش عارف
بس أكييد حد من الاخوة الباشمهندسين هيفيدك

تحياتى,,,

[shrief_2008]

شكرا يا انس على الموضوع الجامد ده

[Solom_X]

شكرا يا بشمهندس على المعلومات بس انا هندسة القاهرة

[أحمد بلما]

مشكور وياريت تعرفنا : هوده نفس الوضع في هندسة القاهرة؟؟؟؟؟؟؟؟؟؟؟

[shrief_2008]

شكرا يا بشمهندس على المعلومات بس انا هندسة القاهرة

ده دكتور انس من جامعه عين شمس

[FUNNYBABY]

شكرا جدا يابشمهندس وربنا يوفقك

[silverfox]

انا فى هندسة عين شمس فى اعدادى مدبلر للاسف لو اى حد عاوز اى حاجة يكلمنى على
silverfox_91@yahoo.com
عشان انتوا مش هتفهموا حاجة فى الاول

[hossamahmed30]

حلوة أوى المعلومات دى والله شرا كتير
وعلى فكرة أنا هندسة اسكندرية

[KeMoZzAzZ]

ميرسى اوى علي الموضوع ده مفيد جدا بجد
اهو بيدينا خلفية عن الكلية قبل اما نروح
ربنا يستر عشان انا مقلق من اللى بيقولوه علي الدكاتره
واضح انهم شرانيين اخر حاجه

[~M-ELMasry~]

بجد والله تسلم ايدك يا DR.Neuro على المعلومات الجامدى دى


ألف شكر ليك

اخوك محمود المصرى هندسه عين شمس

[ahmed_ahmed2]

ربنا يخليك يا DR.Neuro ميرسي كتير ليك
ربنا يسهلنا ان شاء الله في الكليه ونقضي احلي 5 سنين في حياتنا باذن الله

[KeMoZzAzZ]

المشاركة الأصلية كتبت بواسطة KeMoZzAzZ

ميرسى اوى علي الموضوع ده مفيد جدا بجد
اهو بيدينا خلفية عن الكلية قبل اما نروح
ربنا يستر عشان انا مقلق من اللى بيقولوه علي الدكاتره
واضح انهم شرانيين اخر حاجه

ياللهوى يامصرى انت جبت الموضوع ده من الادغال يابنى؟؟؟
ده قديييييم جدا
ده من ايام مانا كنت لسه داخل اعدادى واهو حتى علامات الاحباط اللى كنت واخدها كانت ظاهرة عليا
الحمد لله بردلكوا اليومين دول على قد ماقدر

[~M-ELMasry~]

هههههههههههههههه

والله كنت بحآول اصحصح الموآضيع الميتهٍ لكن < ولا حيآه لمن تنآدى