هبقي دكتور بيــــــــــطري شـــــــــــاطر

[Vet.NaDa]

السلام عليكم و رحمة الله و بركاته
ازيكم يا دكاترة المستقبل ؟
قسم الطب البيطرى فاضي اوى كده ليه ,, ميصحش؟
عاوزين الموضوع ده ان شاء الله نجمع فيه اى اساسيات للمهنة و نحطها هنا و نتناقش فيها ان شاء الله
و لو الموضوع نجح ممكن نعمل مواضيع للمواد الدراسية

هبدأ انا انزل المواضيع ,, و اى حد عنده حاجة مفيدة يحطها , بس بلاش نظام كوبى و بيست , ناخد الحاجة كوبى و بيست بعد م ننسقها و نشيل الحشو منها و نفهم كل كلمة فيها عشان لما اى حد يسأل هيسأل اللى حاطط الكومنت
يلا استودعكم الله

[Vet.NaDa]

نتكلم عن الحقن الوريدي
دلوقت احنا بنحقن وريد فى كل الحيوانات , و فيه وريدين فى الرقبة واحد ناحية اليمين و واحد ناحية الشمال و اسم الوريدين دول jugular veins
و الوريد ده هو اللى بيتم قطعه ساعت عملية ال***

طب ساعت م اجي احقن ازاى ابين الوريد؟
بضغط ساعتها اسفل العنق ع الوريد ف هينتفخ و هيبان

و يفضل لو انت مش متمرس تضرب جنب الرقبة الشمال, لان جنب الرقبة اليمين فيه المرئ مع الوريد فلو ضربت المرئ بالغلط هتبقى مشكلة كبيرة اوى
*مش عارفة بصراحة ايه المشكلة اصلي بكتب من دماغي بس هيعمل مشكلة و خلاص *

طب دلوقت هو كل الحيوانات بضرب الحقن عندها ف الوريد دا؟
اكيد طبعا , حتى الانسان ممكن ياخد حقنة ف الرقبة , و لا مشفتش انت يوسف الشريف ف اسم مؤقت لما خدر المرشح الرئاسي بحقنة ف الرقبة ؟
بس الفكرة ان كل حيوان ليه وريد اسهل فى الوصول اليه و اقل ف الالم بنضرب فيه الحقنة
يعني مثلا
الحصان و البقرة و الخروف و المعزة __ jugular vein
القطط و الكلاب ___ radial vein من اسمه موجود ف inner aspect من الرجلين اللى قدام
او ___ saphena vein موجود ف inner aspect م الرجلين اللى ورا
الدواجن ___ ف wing vein بس قبل كده دكتورة قالت بناخد من shank vein لانى لو خدت من الوينج فين جناح الفرخة هيزرق و محدش هيرضي يشتريها * م الاخر باخد م الوينج فين لو هعدم الفرخة دى*
الخنزير و الارنب ___ ear vein


الافضل طبعا انى احلق المنطقة اللى هدى الحقنة فيها و اطهرها بكحول و بعد كده اضغط ع الوريد عشان يتنفخ و ازق الابرة ,, ساعتها هلاقى دم دخل لو رجعت البتاع بتاع السرنجة ده *عشان اتاكد انى ضربت الوريد* و ساعتها احقن الدواء ببطء *عشان ممكن يعمل مشاكل لجدار الوريد لو دفعته بسرعة *

طب ليه انا بحقن وريد؟
لو كمية الدواء اللى مفروض ياخدها الحيوان كبيرة
لو عايزة الدوا يدخل للدم بسرعة *عشان المفعول يبان اسرع*

طب العيوب؟
بتحتاج خبرة و حرص عن اى نوع حقن تانى
و فيه مواد معينة هيا اللى تتاخد وريد مش كل المواد ممكن تتحقن وريدي
لازم تتدخل المادة الفعالة للوريد ببطء عشان الحيوان م يموتش
بعض انواع الحقن الوريدي ممكن تعمل irritability للعضلات لو اتسربت ليها

[Vet.NaDa]

السلام عليكم و رحمة الله و بركاته
رمضان كريم و ربنا ما يحرمنى منكو و لا يحرمكو منى
نتكلم النهاردة عن الماء بما اننا عطشانين و صايمين

اهمية الماء للحيوانات ؟
اول حاجة بيمثل حوالى 70% من وزن الحيوان
و بيساعد فى البلع و الاجترار و الهضم
بينظم درجة حرارة الجسم عن طريق العرق و الرئتين

طب مصادر الماء للحيوان؟
ماء الشرب
او الماء اللى فى العلف
او الماء الناتج من عملية الميتابولزم فى الجسم *ربنا ياخد دى عملية *

و ملحوظة ع الماشي كده ان كل ما زادت نسبة الماء فى الغذاء كل م قلت قيمته الغذائية
و برضوو زيادة نسبة الماء فى المواد الغذائية بتسرع فساد المواد دهى

طب احتياجات الحيوان للماء؟
تختلف من نوع لنوع و من فصيلة لفصيلة و من حيوان لحيوان جنبه

حجم الانتاج : طبعا الحيوانات اللى بتدر لبن كتير بتحتاج ماء اكثر من غيرها *عشان من مكونات اللبن الماء و ده بينقل من دم الجموسة الى اللبن من غير م يحصل لها metabolism

نوع الانتاج : الحيوان اللى بينتج لبن بيحتاج ماء اكثر من اللى بيربى لحم و اللى بيربى صوف ,, الخ

عمر الحيوان : البالغ بيحتاج ماء اقل من النامى

نوع الغذاء : يعني لو بتدى له اكل فيه املاح معدنية كتير هيحتاج ماء اكثر * الملح بيخزن ماء فى الجسم *

و طبعا العامل اللى بيتحط دايما هو نوع الحيوان : ف الجمل بيحتاج اقل من الحصان مثلا ) سفينة صحراء بقى و كده

طب ازاى الحيوان بيفقد سوائل ؟
عن طريق الجهاز التنفسي بالزفير فى الحيوانات العادية ,, او باللهث panting فى الكلاب * اللى بيعملها عشان يفقد حرارة من جسمه*

عن طريق العرق *بتختلف كمية العرق من حيوان لحيوان على حسب عدد الغدد العرقية *
عن طريق البراز * على حسب نوع الغذاء*
عن طريق البول *و هرمون ADH اللى بيلعب دور جامد هنا*


طب علاج نقص السوائل فى الجسم ؟
عن طريق FLUID THERAPY اللى هنشرحه بعدين ان شاء الله


خلصنا النهاردة ,, سلامات

[Vet.NaDa]

النهاردة هنتكلم عن fluid therapy

ده انى بدخل سوائل لجسم الحيوان و كعادة اى دوا بدخله للعلاج او للوقاية

طب ازاى اعمل adminstration للفلويد دا للجسم ؟
عن طريق intravenous, الحقن الوريدي
intraperitoneal الحقن فى الغشاء البريتونى _ تستخدم مع حيوانات التجارب في المعامل أو في الحيوانات الكبيرة نادرا وتحتاج إلى خبرة وممارسه
intraosseous الحقن فى نخاع العظام
subcutaneous تحت الجلد _ يتم الحقن في الأماكن الرخوة من الجلد و بعد الانتهاء من حقن كامل الجرعة تسحب الإبرة والمحقن ويدلك مكان الحقن قليلاً حتى يتوزع الدواء تحت الجلد
oral routes عن طريق الفم

بيقلك بقى من 60 ل 70 ف الميه من وزن الجسم بيبقى ماء
و بيتقسم ل
extracellular fluid _ اللى بيتقسم الى plasma , interstitial fluid
intracellular fluid

امتى بقى بستخدم fluid therapy ؟
ساعت م حاجة من الفلويدز اللى تم ذكرها فوق دى يحصل فيها نقص او اكون خايف من ان يحصل فيها نقص

طب امتى يحصل فيهم نقص؟
فى حالات
انخفاض ضغط الدم
نقص حجم الدم __ اللى بيحصل ساعت : العرق الكتير , الحرمان من الماء ,القئ و الاسهال , النزيف , Pathological dilatation of capacity of the ciruclatory system, and therefore a relative reduction in circulating blood.
Electrolyte, metabolic and acid base disorders
انخفاض تسليم الاكسجين للخلايا
الحيوانات الكبيرة المعرضة لخطر الفشل العضوي

طب فيه انواع للفلويد ؟
اه ,, نوعين
Crystalloids _ممكن ادخله لكل اجزاء الجسم
Colloids _بدخله للبلازما

و طبعا بحسب كمية الفلويد اللى مفروض تدخل الجسم بحسبة كده بس كسلت افهمها و انقلها لان طول عمرى بكره الرياضة و المعادلات

طب ازاى اراقب العلاج ده و اعرف كده انا ماشي كويس و لا لأ ؟
عن طريق كذا حاجة زى , كمية اليورن اللى خارجة , PCV , لون mucous membrane , ضغط الدم و غيره

باااااااااااااااااااااااس كفاية كده النهاردة لانى هبطت نكمل بعدين بقية الفلويد ثيرابى ده

[كوم حماده]

انا لسه هخش اول سنه وكنت مش طايق بيطري لان علاج طبيعي فرقت معايا علي واحد من عشره وكان نفسي فيها الصراجه بس الصراحه اما قريت الموضوع دا كله بقيت متشوق جداااا للكليه شكرا لتعبك

[Ezel]

جزاكى الله كل خير )
مجهود رائع بس للاسف مفيش حد هنا !!