العلاج المائى Hydrotherapy

[DPT-Blue Phoenix]

‫#‏العلاج_المائى‬
Hydrotherapy
Aquatherapy
Water Healing

يعنى ايه علاج مائى دا ؟! و هل الماء بتعالج فعلا !؟ و لو بتعالج بتعالج ازاى يعنى هل فيها مادة فعلا مثلا ولا ايه الحكاية ؟! و ايه دور دكتور العلاج الطبيعى هنا اصلاااااا ؟! و الى اى مدى العلاج المائى دا فعال ؟!
#العلاج_المائى : يعنى استخدام الماء فى العلاج ايا كان حالة الماء دى بخار او سائل او ثلج .. و بنستعمل هنا خصائص الماء الفيزيائية او الميكانيكية بشكل خاص و الكيميائية عشان نعالج بيها .. دا غير اننا بنستعمل درجة حرارة الماء نفسها فى العلاج سواء الماء دا ساخنة فبنستعمل خصائص الحرارة فى العلاج او باردة و نستعمل خصائص البرودة فى العلاج و ممكن بندمج خصائص الماء و الحرارة و البرودة زى بعض الاجهزة منها مثلا الحمامات المتناقضة او المتعاكسة Contrast Baths
هو الماء دى بتعالج فعلا !؟ اااااااه طبعاااااااا بتعالج و نص كمان طيب ازاى يا ترى ؟!
عن طريق استعمال خصائصها و ليكن مثلااااا :-
1-‫#‏قوة_دفع_الماء‬ Buoyancy : ايه فكرة قوة الدفع ؟! من قانون العالم ارشميدس فى الطفو بيقول Fb=Fg يعنى ايه ؟! يعنى قوة دفع الماء لاعلى بتساوى وزن الجسم لاسفل فى حالة الطفو و دا معناه حاجة واحدة ان طول ما الجسم فى حالة طفو فالوزن بتاعه كانه مش موجود لان قوة الدفع المائية بتلاشى الوزن يعنى ايه برده !؟
- يعنى لما الوزن يكون 50 نيوتن و الماء هتدفع فى الاتجاه المعاكس ب 50 نيوتن يبقى المحصلة بصفر ييجى المريض يحرك الطرف بتاعه او جسمه يلاقيه خفيف جدااااااااااا تقريبا مش هيحس بيه ؟! و بالتالى المرضى الى عنده مشاكل فى الحركة نقدر نعمل ليهم اعادة تاهيل خطوة خطوة مع زيادة الصعوبة لحد ما يرجع يتحرك بشكل كويس تانى ..
- مش بس كدا انا ممكن بعمل تمارين او ايا كان فى عكس اتجاه قوة الدفع و بالتالى هقابل مقاومة و بالتالى ممكن استعمل دى ك Resistance Exercise ...
حاجة لذيذة صح ؟!
2- من خلال معرفتنا بكثافة الماء بنقدر نحط حاجات زى العوامات كدا عشان تعمل الطفو و نوصل للحاجة المطلوبة و البرنامج المطلوب ..
3- ‫#‏الضغط_الهيدروستاتيكى‬ Hydrostatic Pressure : ايه حكاية الضغط دى P=pgh الضغط بيساوى الكثافة فى عجلة الجاذبية الارضية فى العمق ... و بالتالى كل ما المريض يغوض فى الماء اكتر يقابله ضغط اكبر لان العمق بيزيد و بالتالى h دى بتزيد و بالتالى دى حاجة انا اقدر استخدمها مش بس كدا شوف الجمال بقى ...
الجزء السفلى دائما بيكون على عمق اكتر من اعضاء الجسم العلوية و بالتالى الضغط العالى بيكون عندها اكتر من الاجزاء العلوية و دا بيخلى فى ضغط مرتفع عند اجزاء الجسم السفلى و ضغط منخفض عند اجزاء الجسم العليا و بالتالى و دا القوانين العادية ان اى حاجة بتتجه من الضغط المرتفع للمنخفض فالدم يطلع بسرعة من اجزاء الجسم السفلى ناحية القلب و بالتالى يزيد امتلاء القلب و بالتالى معدل الضخ يزيد و بالتالى يزيد معدل الدورة الدموية ...
و طبعا دا بياثر على وظائف الجسم كلها و دى بنستخدمها فى العلاج ..
و الاحلى ان من خصائص الماء الكيميائية انها بتقدر تحتفظ بالحرارة و البرودة لفترة طويلة و دا يخلينا نقدر ندمج معاها باقى الوسائل زى الجرارة و البرودة و نستفيد منهم ...
و فى خصائص كتير جدا للماء بنستفيد منها بس دى على سبيل المثال لا الحصر ..

علاج طبيعى علاج مائى ...