عايزة حد ينصحني نصائح واقعية !!!!!!

[بنت الاسلام ( رشا )]

السلام عليكم ورحمة الله وبركاتة
انا عضوه جديدة في المنتدي وفي تالتة ثانوي علمي علوم
وعايزة اقول مشكلتي مع الدراسة لاني بجد مليت وكرهت الدنيا كلها عشان المذاكرة مشكلتي اني تقريبا لحد دلوقتي ماعرفش حاجة في اي حاجة يعني زي ما اكون لسه مادخلتش المدرسة وكانو لسه اول يوم ومش قادرة اذاكر خااااااااااالص وكل يوم زي اللي قبلو مش بفتح كتاب وعاادي وهو دا الطبيعي
بس والله بجد عايزة اتغير اوووي بس مش قادرة اضغط علي نفسي وحااسة اني مما عملت مش هدخل الكليه اللي عايزاه يعني مش معقولة حد ذاكر من اول سنة وحد يدووب ذاكر في النهاية هيتساوو ببعض مستحيلة
اني حتي اخلص وارجع اذاكر ضاع 4 شهور وشوية وئاعد 4 تانيين معقولة هقدر اخلص المنهج كلو 7 مواد ومراجعات وحل كلو دا في 4 شهور
انا عايزة حد يقولي هو المفروض اخلص مذاكرة امتي ؟ واراجع امتي .؟
وهقدر اخلص مذاكرة بحل والا لا ؟ انا بتوصل معايا لدرجة بحس انو ربنا مش راضي عني وانو مش بيحبني وبجد عايزة اتغير والتزم واقرب من ربنا وكمان اني مش براضي بابا وماما اوووي يعني مش بعمل حاجة مع ماما في البيت بابا يقولي قومي ذاكري بقولو مليش نفس لدرجة انو بابا نفسو قالي ما تتطلعي من المدرسة احسن بس طبعا من جواه عايزني ادخل طب او صيدلة وارفع راسو وخصوصا اني اكبر وحدة في اخواتي فيعني اكيد اخواتي هيمشو علي نفس دربي حاااااااسة انو حالي كلوو عايز تزبيط بس بجد اعمل ايه عااااايزة حد يقولي حل ويقولي ازاي اقدر اتغلب علي مشاكلي وظروفي وهل لو بدات دلوقتي ائدر اخلص بالمراجعات والحل مع العلم اني ضايعة في اغلب المواد يعني ابيض يا ورد وفي مواد زي الفرنساوي نسيت حتي تصريفات الافعال وبقيت زفت في حفظ الكلمات والانجلش مشكلتي فيه قلت حفظ كلمات والعربي مش بفتحو والمواد العلمية حاسة انها سهلة بس مش ماكره فيهم حاجة وباخد درس في كل المواد الا الجيو يعني يا تري بجد هقدر اغير من وضعي دا واسس نفسي في المواد اللغوية زي f ُE ؟؟؟؟؟؟
عايزة نصيحة بجد عايزة اي حد يكون معايا وتابعني عملتي ايه انهاردة ؟؟ كانت علاقتك ايه بربنا انهاردة عملتي ايه يرضي ربك وباباكي ومامتك ؟؟ ذاكرتي مادة ايه وايه اللي وقف قدامك ؟؟
عايزة نصيحة واقعية وابعدوني عن الخيال عايزة نصيحة تنفعني علي ارض الواقع مش حاجات خرافيه مش ائدر اعملها وانفذها ؟ وازاي ابعد عن التلفجن لاني متابعة الاحداث اول باول وايه اللي حصل انهاردة ؟

عارفة اني زغيت كتير بس هي دي مشكلتي وحبيت ائولها لعلي وعسي حتي يفيدني

[شهد اليوسف]

لو لئيتي حد ينصحك يبئا ينصحني معاكي بالمرا لاني كمان ضايعة السنادي
وربنا يوفقنا ياااااااااااااارب
واتمني انو حد يفيدك

[Wagdi Shawki Fekri]

حضرتك مش هينفع الرد كتابه كلميني و انا اضع لكي جدول مذاكرة جاد جدا بس بشرط انكي تلتزمي بيه وانشاء الله هتحصلي علي ما تريد01121560208

[محمد محمود#]

الأول طبعا : بسم الله الرحمن الرحيم
شوفي :
أنا برده في 3 ثانوي علمي علوم برده بس الحمد لله بذاكر من أول السنة وماشي إلي حد ما كويس في كل المواد
أما بالنسبة لوضعك إنتي فأنتي تقدري تشوفي التقسيمة دي واقعية جدا إن شاء الله وتتابعيها تمام ؟؟؟
أنتي عندك مادة زي الإنجليزي مكونة من جرامر وكلمات تمام ؟؟ أنا مش عاوز أرص كلام وخلاص .
الجرامر عندك حاجة زي الروابط والمستقبل والمعلوم والمجهول والتمني والغير مباشر والأفعال الناقصة
وفيه وحدة مفيهاش جرامر ووحدتين عبارة عن أفعال تتحفظ بييجي بعدها to +المصدر
وأفعال تانية بعدها v+ing أو noun دول يتحفظوا ما يتفهموش
دول ممكن تاخدي كل أسبوع قاعدة واحدة ممكن إن شاء الله تخلصيهم في شهرين لو قلنا تقسميهم علي 8 أسابيع بـ 8 قواعد وكل قاعدة هتذاكريها أو هتاخديها مع المدرس تحلي عليها في وقتها علي طول أما الكلمات فدي بتعتمد علي الحفظ متقلقيش منها خالص احفظيها وحلي عليها
كده هيبقي قدامك حوالي شهر ونصف شهرين كده دول تراجعي فيهم وتحلي كل الامتحانات الثانوية السابقة دي أهم حاجة تمام .
كده دي مادة الإنجليزي .
نشوف مادة الفيزياء مثلا أنا أعرف مدرس عامل مشروع مكثف لشرح الفصل التاسع والعاشر والحادي عشر والثاني عشر في 5 أيام ورا بعض هيبدأو من يوم الأحد القادم إن شاء الله .
وهيشرح الحاجات المهمة اللي بيتسأل فيها في كل فصل وهيحل عليها مسائل ساعة أو ساعة ونصف كده . فبالتالي مش هيكون قدامك غير الفصل 13 و 14 و 15 بس وتخلصي منهج الفيزيا ودول فصول سهلة ال 14 ده تافه جدا والبقيين نظري مفيهومش مسائل .
تمام دي الفيزيا .
أما بانسبة للعربي فأنتي عندك 7 وحدات نحو . وخدي حتة بلاغة كده كل مرة . هتخلص علي طول .
هل تقدري تجيبي وحدة كل أسبوع ؟؟؟؟؟
لو تقدري يبقي هتخلصي النحو كله في شهرين بس ويبقي عندك شهرين تحلي فيهم امتحانات
أقولك علي نصيحة ؟؟ فيه كتاب الامتحان لغة عربية فيه درس النحو وبعده أسئلة الثانوية اللي جت قبل كده عليه لو حليتيها هاتغنيكي عن حل امتحانات النحو لأنها منها .
تمام ؟؟
أما النصوص والأدب فعندنا تقريبا 8 مدارس و8 نصوص سواء نثر أو شعر علي ما أذكر تمام
لو قدرتي تاخدي نص مع وحدة النحو دي بالتوازي هتخلصي منهج النصوص كمان ونفس الكلام من كتاب الامتحان الامتحانات السابقة تمام ؟؟
القراءة فيه 8 دروس قراءة لو عرفتي تاخدي واحد بس كل أسبوع هتقفلي المنهج تمام ؟؟
أما القصة 22 فصل والفصل ورقتين ولا تلاتة حاجة بسيطة يعني خدي 3 فصول كل أسبوع هتخلص علي شهرين .
أما بالنسبة للفرنساوي فأنا ألماني ممكن حد يفيدك فيه !!
أما بالنسبة للكيمياء فالباب السادس سهل وتقدري تذاكريه وتحلي عليه
بس خدي بالك لازم ممكن تخلصيه علي أسبوع قسميه براحتك المهم يخلص علي أسبوع تمام ؟؟
هو الجزء النظري سهل وجزء المسائل أفكاره إلي حد ما متشابهة تمام ؟؟
الباب السابع إديله عشر أيام هو بيعتمد علي فهمك للتفاعل الطار والماص وعوامل التفاعل وحاجات إن شاء الله لو ذاكرتيها كويس هتبقي سهلة .
الباب التامن معاكي برده عشر أيام أهم حاجة فيه رسومات الخلايا هي اللي ممكن تلاقيها صعبة بس إن شاء الله هتفهميها وتحفظيها وبالنسبة لجزء المسائل فلو قانون زي ده
كمية اكهربية بالكولوم × الكتلة المكافئة = الكتلة المترسبة × 96500
هيسهل معاكي كتير إن شاء الله
واحسبي عدد الفاراداي تجيبيه من f ×الشحنة أو التكافؤ
أسئلة ومسائل إن شاء الله سهلة .
نيجي بقي للموضوع الكبير قوي وهو الكيمياء العضوية أنا هديكي ليها شهر كامل
تقدري دي مع نفسك تقسميها بحيث كل يوم أو 2 تخلصي من جزء مع أهم حاجة الحل عليه ومراجعة اللي فات علشان بتتنسي زي ما مدرسينا بيعلمونا تمام ؟؟
بكده هيكون معاكي شهرين تحلي وتعملي كل اللي انتي عاوزاه.
بالنسبة للجيويوجيا والأحياء هفكر لهم في تقسيمة بعد كده أرد عليكي

شوفي بقي أهم حاجة في اللي أنا قلته ده دلوقتي بعد ما تذاكري أي حاجة وتخلصيها لااااااااااااااااااااااااااااااااااااااااااااااااا ااااااااااازم تحلي عليها علشان المعلومة تتأكد !!!!!!!

وشوفي برده كل اللي انا قلته ده أفكار وانتي توظفيها زي ما تحبي وزي ما يناسب قدراتك وظروفك تمام

بعد كل ده ربنا يوفقك ويوفقني ويوفقنا كلنا وياااااارب ننجح ونوصل للي إحنا عاوزينه
ده إيميلي medo111213*ymail.com لو فيه أي استفسار تاني أنا موجود إن شاء الله وهرد عليه بإذن الله
وبخصوص التواصل مع المدرس لو عاوزه عنوان مكان شرحه هو موجود في سنتر لو عاوزاه هبلغه لكي ورقمه ابعتي لي ع الإيميل وأنا أبعتهم لك بإذن الله .
وشكرا وآآآآآآآآآآآآآآآآآآآآآآآآسف للإطالة والسلام عليكم ورحمة الله وبركاته .

[theprincemoh]

المشاركة الأصلية كتبت بواسطة wagdi shawki fekri

حضرتك مش هينفع الرد كتابه كلميني و انا اضع لكي جدول مذاكرة جاد جدا بس بشرط انكي تلتزمي بيه وانشاء الله هتحصلي علي ما تريد01121560208

انت عايز ايه من البنت ؟
انا والله كرهت البلد بسبب الناس اللي كل ماتشوف بنت بتبقي خلاص هتموت عليها
أعتقوا البلد بقي واعتقوا نفسيكوا

[theprincemoh]

من الاخر عايزين نصايح؟
والا عايزين حد يقولكوا انتوا كويسين ومتخافوش ويزقكوا لقدام ؟
عايزين التانية صح؟ انا برضه كده لما بسأل سؤال ببقي عايز حد يطمني مش اكتر
متخافيش انا هطمنك بس في حالة واحدة
لو انتي فعلا عندك أرادة للتغيير (أرادة مش عايزه وبس لازم ارادة)
علي العموم انا في علمي رياضة بس خدي بقي اهم وأول نصيحة من كل الظيطة دي
1:المفروض كله دلوقت نايم وفي اجازة أسبوعين صح؟ استغليهم كلهم تماما هتخلصي علي الأقل تلت المنهج لو هتمشي كويس وتسيبي الموبايل والنت شوية (هقولك دلوقت ازاي)
اولا: انا عايزك تقرأي الدروس مش اكتر (مرتين تلاتة) وبعدين حلي عليهم علي طول وشوفي الأجابات (هتلمي بنسبة 80%) والنظام ده يمشي علي معظم المواد من الاخر بس هنشيل منهم الفيزيا مؤقتا والكيميا
هتيجي للأنجليزي مثلا:سيبك من الجرامر دلوقت خالص (هياخد وقت كبير جدا علي الفاضي) طبعا في ناس هتشتمني وتقولي انت بتضيعها ومتسيبكيش من الجرامر : وبأجابة بسيطة جدا الجرامر مش هيجي عليه 1 من 50 من الامتحان حتي
بيجي في الاختياري والبرغراف وممكن بأبسط القواعد تمشي فيهم
ركزي علي الكلمات واحفظيها (المفروض تخلصي كلمات 12 يونت علي الاقل في الفترة دي + القواعد اللغوية (زي prefer تاخد ايه معاها to والا with ) مثلا يعني + القصة طبعا اقرئيها بالعربي وبالانجليزي بس نصيحة بالعربي الاول (دوري عليها ع النت عشان مينفعش احط روابط) وهكذا الانجليزي هتكوني ماشية مع بقية الطلبة بس ماعدا الجرامر !!! هتعملي ايه فيه بقي؟ هتسيبيه زي ماهوا كده ومع الوقت هيتظبط ومع الحل الكتير هيتظبط كتير)
تيجي للأحياء والجيلوجيا : بما أني مش علمي علوم فمش هقدر افيدك قد كده بس علي حسب خبرتي وتجربتي للأحياء في سنة تانية : اقعدي احفظي بس اقرأي اقرأي لحد مايطلع عينك خدي رست بقراءة الحاجات دي(يعني زهقتي من المواد زي الفيزيا والكيميا وكده؟ اقرأي اي حاجه زي المواد الباقية كلها وده هيلم كتير جدا معاكي)
العربي : هتسيبي النحو مؤقتا برضه وهتلاقي في مدرسين كتير عاملين اليومين دول بالذات دروس في النحو فقط وفي خلال شهر هتكوني لماه مع مدرس ) والباقي اقرأي وحلي بالذات القراءة
لو انتي فرنساوي : احفظي تصريفات المضارع والماضي طول مانتي فاضية
طبعا اللي انا طالبه كتير
لكن لو عندك أرادة اضغطي علي نفسك شويه واستحملي
ممكن ياخد معاكي الكلام ده اكتر من اسبوعين الأجازة
بس حاولي تذاكي علي قد ماتقدري
لان بعد الاجازة مش هيبقي في مجال للمراجعة علي اي حاجه لحد شهر 4
لان كله هيبقي داخل طحن في الدروس عشان يخلص بقية المنهج في خلال شهر او شهر ونص
اتمني اني اكون أفادتك
تحيات طالب معاكي في نفس الزنقة