جروب اللغة العربية للصف الثالث الثانوى 2014

[سوبر ساره]

السلام عليكم ورحمة الله وبركاته

أقدم لكم هذا الموضوع التابع لـ
ملتقى طلاب الصف الثالث الثانوى (علمى علوم) 2014

هذا الموضوع خاص بمادة
اللغة العربية

نرجو وضع الأسئلة والمناقشات المختلفة حول المادة
كما نرجو من السادة المدرسين التفاعل معنا

[To Be Is To Do]

السلام عليكم
أولاً : ربنا يوفقكم إن شاء الله السنادى وتجيبوا المجاميع اللى نفسكم فيها وتدخلوا أحسن كليات إن شاء الله
ثانيا : كنت حابب أقولكم على نظام أنا عن نفس كنت بعمله فى ماده العربى وحسيت إنه فادنى جدا وخلانى ملكت الماده دى من اول السنه وهو :
أول حاجه تاخد الدرس مع المستر أياً كان الفرع ( قراءه نصوص قصه أدب ... .... .... ) اول ما تروح تجهز مصدر مزاكرتك وهو ( ورق المستر + كتاب المدرسه + كتاب المعلم مراجعه نهائيه بتاع الامتحانات الميزه منه هو ان جايب الاجابه النموذجيه للامتحان يعنى الاجابه اللى بتبقى فى النموذج الرسمى ) طب ايه اللى حتعمله : حتمسك الدرس تقراه من كتاب المدرسه وبعدين تقرا اللى مكتوب فى ورق المستر ساعات حتلاقى حاجات مكتوبه فى المدرسه مش مكتوبه عند المستر خلاص زودها فى ورق المستر وبعدين إمسك كتاب الامتحانات مرر بعينك على الدرس ده فى كل امتحان واقرا اسئلته واللى تلاقيه مش موجود انقله باجابته فى ورق المستر برده ... إللى انت عملته ده إسمه تجميع وتوحيد مصدر المزاكره يعنى انت كده جمعت اهم الحاجات فى الدرس ده وهما ( كتاب المدرسه + أسئله الامتحانات اللى جت عليه بالاضافه الى ورق المستر ) وبعد كده تبدأ تزاكر اللى انت جمعته ده يبقى كده الدرس خلص خلاص معاك بامتحاناته

بالنسبه بقى للفروع :
____________

1/ القراءه : لازم تقرا الدرس من الكتاب متكتفيش بمزاكره الدرس س & ج وبس تقرا الدرس كله كذا مره وتحاول تفهم بيتكلم عن ايه قبل ما تبدأ تزاكره وبعدين تعمل اللى قلنا عليه فوق

2/ النصوص : عندك كل نص مرتبط بمدرسه
أولا تبدأ مزاكره النص بحفظ الجزء المطلوب منك سواء كان جزء من الابيات او الابيات كلها على حسب النص ( إذا كان النص حفظ أصلاً ) وبعدين تزاكر التعليق العام ( ده بيتمثل فى اسلوب الكاتب النقد اللى اتوجهله المدرسه اللى ينتمى اليها الكاتب وخصائصها والحاجات دى بتبقى مكتوبه فى نص الشرح كده فى كتاب المدرسه لازم تكونوا حافظينها من الكتاب نصاً لإنها لازم بتيجى .. كده خلصت الحفظ والتعليق .. بعد كده بقى اكيد المستر مقسملك النص ابيات كل 3 ابيات مثلا مع بعض او كل فِقره مع بعض تبدأ تزاكر فقره فقره بانك الاول تشوف ( المعانى المفرد العكس الجمع ) اللى مكتوبه فى كتاب المدرسه ( بييجى منها كتير ) وبرده لو حاجه فيهم مش مكتوبه فى مزكره المستر حنزودها برده حتبص على الشرح اللى مكتوب فى المدرسه ( طبعا انت مش مطالب تشرح فى الامتحان زى الكتاب _ الشرح ده باسلوبك _ ) بس ساعات السؤال مش بييجى اشرح الابيات لأ بييجى سؤال اجابته من ضمن الشرح ده فلازم تكون قاريه وحافظه عشان تكون مستعد له بعد كده + تفهم الابيات وبعدين عايز تشرح باسلوبك ماشى عايز تحفظ الشرح اللى فى الكتاب برده عادى .. بعد كده تدخل على مواطن الجمال برده الاول حتبص على المدرسه ( حتلاقى بين السطور كده حيث جاءت كلمه كذا توحى بكذا ونجد ان ااشاعر استخدم كلمه كذا لانها تعبر عن كذا ويعاب على الشاعر استخدام كذا لانها غير مناسبه لكذا ) الحاجات دى هى موضع الأسئله فى الإمتحان الإيحاءات دى بتيجى من كتاب المدرسه ومدرسين كتير بيغفلوها فبرده لو حاجه ناقصه حنزودها فى مزكره المستر .... كده النص خلص وكذلك برده حندخل على كتاب الامتحانات ونعمل زى ما قلت فوق

3/ الأدب : عُقده العربى رغم انه ب 4 درجات بس الأدب = كتاب المدرسه وبس أوعى أوعى أوعى ثم أوعى تزاكره من أى حته تانيه فيه ناس ممكن تقولى لا الادب فى الكتاب كتير والمدرسين بيلخصوه صدقونى الأسئله بتيجى من بين السطور فى الأدب لازم كتاب المدرسه حتمسك مدرسه الأدب اللى عليك تحاولى تزاكرها من كتاب المدرسه وبس

حاجه مهمه فى الأدب :_ 1/ لازم تحفظ المدرسه واستشهادات عليها ،، مثلا فى خصائص المدرسه حتلاقى فى كل خصيصه مكتوب تحتها 3 او 4 ابيات شعر طبعا انت مش ملزم ب 4 ابيات كفايه بيت واحد بس ،، حاول تخليك زكى بمعنى مثلا الخصيصه بتتكلم عن التفاؤل ومكتوب تحتها ابيات عن التفاؤل بس الابيات دى صعبه بس انت عندك اخدت فى النص اللى تبع المدرسه دى ابيات عن التفاؤل يبقى خلاص ترمى الابيات التانيه خالص وتستشهد بابيات النص اللى عليك واللى انت اصلاً مزاكره وحافظه وده بيخفف عليك حفظ ابيات على الفاضى ... حد فاهم اى حاجه ؟؟ ... الملخص زاكر الخصائص باستشهادات لقيت الخصيصه ينفعلها بيت من النص اللى عليك احفظ البيت ده مع الخصيصه دى ،، ملقتش بيت ينفعلها خلاص احفظلك بيت من اللى مكتوبين تحتها

2/ حاجه تانيه حتلاقى فى مدرسه مثلا 8 خصائص ليها لازم تحفظ ال 8 دول ،، طب ليه مهو بيطلب فى الامتحان 3 او 4 بس ولا هو حفظ وخلاص ؟ .. انا بقولكم كده عشان ساعات السؤال مبيجيش " اذكر خصائص المدرسه الفلانيه " وبييجى " الخاصيه كذا تمتعت بها المدرسه كذا ،، اذكرها مع الاستشهاد " فممكن على حظك السئ تكون الخصيصه دى انت مش حافظها وبكده راح السؤال

4/ القصه : اكتر حاجه ممله فى العربى بيحكيلك عن قصه حياه واحد هو الل كاتبها فاكيد كاتب ادق التفاصيل احلى اسلوب لمزاكرتها انك تقرا الفصل كذا مره خصوصا ان حتلاقى فيه فصول ربع صفحه ونص صفحه وصفحه وفيه فصول طبعا كبيره فحتقرا الفصل لغايه ما تعرف احداثه وبعدين تزاكره من مزكره المستر بنفس الاسلوب اللى فوق برده

5/ النحو : عباره عن فهم وحل بحت مينفش تزاكر نحو نظرى تقعد تحفظ وخلاص اكيد لأ انت تاخد الدرس افهم القاعده بتاعته روح طبق من اسئله امتحانات الثانويه على طول على الدرس ده وحل قطع كتير حتلاقى نفسك النحو ده هديه العربى

6/ البلاغه : حاجه لطيفه كده بتفهم من شرح المستر وبتطبق برده خصوصا ان الاسئله بتتكرر دايماً بنفس الاجابه انما الصيغه مختلفه للسؤال فاهم حاجه الحل برده من قطع الثانويه العامه

على فكره هو الكلام تحسه إنه مجعلص وكبير وبصراحه يجيب إكتئاب بس والله سهل جدا
وأكيد طبعا كل واحد بيبقى ليه نظامه // الكلام اللى انا كاتبه ده مجرد تجربه شخصيه حستها نفعت معايا وجابت نتائج هايله

إللى عايز اقوله فى الآخر
أ/ العربى لو زاكرته صح من الاول عمرك ما حتلاقى فيه مشكله انما لو راكمت درس قراءه مع درسين ادب مع 3 نصوص حتلاقى عندك جبل مش عارف تبتديه منين خصوصا وانها ماده حفظ

ب/ العربى سهل فيه انك تجيب 29.5 و 29 بس ركز اوى وخليك دقيق فى مزاكرتك

جـ / كتاب المدرسه مهم جدا جدا جدا جدا جدا فى العربى ( إينعم بتيجى أسئله من برا كتير وده الطبيعى بس برده لما ساعات بيرخم بيجيب أسئله من بين السطور من الكتاب خصوصا فى الأدب والنصوص )

وبس

[ابوعمرة]

ربنا يخليك ياخالد على النصائح الهايلة اللى بتساعدنا بيها وربنا يوفقنا ويوفقك ان شاء الله بس عندى سؤال انت ليه اخترت كتاب المعلم مراجعة نهائية بالذات مع انه فيه كتاب الاضواء وبيبقى فيه امتحانات وكذلك دليل التقويم بردو بيبقى فيه اسئلة على كل درس والمفروض لما يرخموا يجيبوا منه معلش انى هتقل عليك فى الاسئلة بس كتاب المدرسة بيبقى شكله كئيب ومش مرتب نهائي والمذاكرة منه مش سهلة وياترى كتاب المعلم مراجعة نهائية بينزل فى السوق امتى لانى اعتقد انه مش بينزل فى بداية الدراسة ؟؟؟

[To Be Is To Do]

المشاركة الأصلية كتبت بواسطة ابوعمرة

ربنا يخليك ياخالد على لنصائح الهايلة وربنا يوفقنا ويوفقك ان شاء الله
بس عندى سؤال انت ليه اخترت كتاب المعلم مراجعة نهائية بالذات مع انه فيه الضواء بيبقى فيه امتحانات وكذلك دليل التقويم بردو فيه اسئلة على كل درس والمفروض لما يرخموا يجيبوا منه معلش انى هتقل بس كتاب المدرسة بيبقى شكله كئيب ومش مرتب نهائيا ؟؟؟

انااقصد من المعلم مراجعه انه فيه امتحانات الثانويه العامه السنين اللى فاتت مش الامتحانات اللى بينزلها الكتاب ذات نفسه

مهو كتاب المدرسه كئيب ومش مرتب اه عندك حق بس لو قسمت اى درس فيه حته حته حتلاقى الموضوع مشى معاك عادى حاول انت تقسمه نقط كده ورا بعض حتلاقى الموضوع اسهل بكتير

الدليل شايفه فاكس اوى يعنى عدا قطع النحو بس وكذلك البلاغه ممكن تحلها غير كده انا بشوفه تافه بصراحه وبرده دى حاجه ترجعلك على قد ام تقدر تحل وتجمع كل ما يبقى احسن

[To Be Is To Do]

المشاركة الأصلية كتبت بواسطة ابوعمرة

وياترى كتاب المعلم مراجعة نهائية بينزل فى السوق امتى لانى اعتقد انه مش بينزل فى بداية الدراسة ؟؟؟

لا بينزل على فكره قبل ما الدراسه تبدأ كمان

[ابوعمرة]

ربنا يسهل والعملية تتظبط ان شاء الله بس المشكلة ان تقسيمة المواد مع بعض تقيلة و كتيرة وده ممكن يتسبب فى انى اهمل العربى واركز على المواد التانية لانه معنديش وقت وبصراحة انا خايف من الحتة ديه لان مذاكرة العربى والفيزياء بالذات محتاجة دماغ وصبر وطولة بال لكن انا عندى 7 مواد هركز مع مين ولا مين وكلهم بسم الله ماشاء الله وايه رايك اجيب دليل التقويم فى كل المواد ولا فى مواد بيبقى فاكس فيها واجيبه منين بينزل فى المكتبات ولا منين ؟؟؟

[ابوعمرة]

المشاركة الأصلية كتبت بواسطة to be is to do

لا بينزل على فكره قبل ما الدراسه تبدأ كمان

تمام حلو اوى بس رايك ايه اجيبه مع الاضواء ولا اكتفى بيه بس مع ملازم المستر وكتاب المدرسة

[To Be Is To Do]

المشاركة الأصلية كتبت بواسطة ابوعمرة

ربنا يسهل والعملية تتظبط ان شاء الله بس المشكلة ان تقسيمة المواد مع بعض تقيلة و كتيرة وده ممكن يتسبب فى انى اهمل العربى واركز على المواد التانية لانه معنديش وقت وبصراحة انا خايف من الحتة ديه لان مذاكرة العربى والفيزياء بالذات محتاجة دماغ وصبر وطولة بال لكن انا عندى 7 مواد هركز مع مين ولا مين وكلهم بسم الله ماشاء الله وايه رايك اجيب دليل التقويم فى كل المواد ولا فى مواد بيبقى فاكس فيها واجيبه منين بينزل فى المكتبات ولا منين ؟؟؟

اعتقد لازم تجيب الدليل فى الفيزيا والانجلش والاحياء ( على حد ما سمعت من صحابى عملى العلوم )

الدليل مش بينزل فى المكتبات للاسف بينزل فى المدرسه بس وبيبقى على شهر 4 فانت لو تعرف حد اكبر منك حاول تاخده منه وتبدا فيه من اول السنه

[To Be Is To Do]

المشاركة الأصلية كتبت بواسطة ابوعمرة

اجيبه مع الاضواء ولا اكتفى بيه بس مع ملازم المستر وكتاب المدرسة

هو الكتاب المراجعه ده مفيهوش شرح هو اسئله بس
وانا مجبتش الأضواء خالص ولا بحب أزاكر منه ولا برتاحله أصلاً ( سورى على الإحباط ده كله ) بسانا كنت بزاكر من المدرسه والمستر واحل امتحانات ثانويه من المعلم مراجعه

[ابوعمرة]

المشاركة الأصلية كتبت بواسطة to be is to do

اعتقد لازم تجيب الدليل فى الفيزيا والانجلش والاحياء ( على حد ما سمعت من صحابى عملى العلوم )

الدليل مش بينزل فى المكتبات للاسف بينزل فى المدرسه بس وبيبقى على شهر 4 فانت لو تعرف حد اكبر منك حاول تاخده منه وتبدا فيه من اول السنه

مظبوط بس للاسف معنديش حد اكبر منى عشان اخده منه المفروض يبقى مع المدرسين ونبقى ناخده منهم عشان نصوره !!!!!!!!
انت جبت الدليل فى الفيزياء والانجلش ولا معرفتش ؟؟؟؟؟؟؟؟

[To Be Is To Do]

المشاركة الأصلية كتبت بواسطة ابوعمرة

مظبوط بس للاسف معنديش حد اكبر منى عشان اخده منه المفروض يبقى مع المدرسين ونبقى ناخده منهم عشان نصوره !!!!!!!!
انت جبت الدليل فى الفيزياء والانجلش ولا معرفتش ؟؟؟؟؟؟؟؟

بص دليل الفيزيا كان المستر مديهولنا اول ما بدأنا الدرس فكان بالنسبه لى سهل
وكذلك فى الانجلش لما المستر بدأ يراجع كان منزلهولنا فى مكتبه وروحنا صورناه منها وكمانهو كان عندى من قرايبـى .... حاول تسأل المدرسيـن ولو معاهم صوره وحل مع نفسك

[ابوعمرة]

المشاركة الأصلية كتبت بواسطة to be is to do

هو الكتاب المراجعه ده مفيهوش شرح هو اسئله بس
وانا مجبتش الأضواء خالص ولا بحب أزاكر منه ولا برتاحله أصلاً ( سورى على الإحباط ده كله ) بسانا كنت بزاكر من المدرسه والمستر واحل امتحانات ثانويه من المعلم مراجعه

ومين سمعك الكتاب ده طول حياتى انه بكرهه لانك مهما تبذل فيه من مجهود مش بيخلص وبيفضل ابيض زى الفل عشان كده من ساعة ماخلصت اعدادى وبطلت اجيبه لان فى اعدادى المدرسين كان كيفهم يشتغلوا منه مش عارف ليه ؟؟؟ وبرده مكنتش بقدر عليه كتاب تهمة وفيه كمية فزلكة عنب

[ابوعمرة]

المشاركة الأصلية كتبت بواسطة To Be Is To Do

بص دليل الفيزيا كان المستر مديهولنا اول ما بدأنا الدرس فكان بالنسبه لى سهل
وكذلك فى الانجلش لما المستر بدأ يراجع كان منزلهولنا فى مكتبه وروحنا صورناه منها وكمانهو كان عندى من قرايبـى .... حاول تسأل المدرسيـن ولو معاهم صوره وحل مع نفسك

:0 22yb4:

[To Be Is To Do]

المشاركة الأصلية كتبت بواسطة ابوعمرة

ومين سمعك الكتاب ده طول حياتى انه بكرهه لانك مهما تبذل فيه من مجهود مش بيخلص وبيفضل ابيض زى الفل عشان كده من ساعة ماخلصت اعدادى وبطلت اجيبه لان فى اعدادى المدرسين كان كيفهم يشتغلوا منه مش عارف ليه ؟؟؟ وبرده مكنتش بقدر عليه كتاب تهمة وفيه كمية فزلكة عنب

على فكره ساعات بيبقى مخالف لكتاب المدرسه فانا بكرهه اوى وكمان المستر بتاعنا كان جامد فكنت مستغنى عن اى شرح تانى بس مجرد شويه زيادات بسيطه من كتاب المدرسه والامتحانات
ومعلش برده الأسئله اللى بيجيبها على كل درس مش اسئله موضوعيه كده ولا اسئله امتحانات برده ... والله أعلم !

[ابوعمرة]

طيب وبالنسبة للدليل فى الكيمياء واللغة التانية ( فرنساوى ) ايه رايك يستاهل اجيبه والكتب الخارجية بالذات فى المواد العلمية التلاته ( كيمياء فيزياء احياء ) اكتفى بالامتحان بس ولا فى كتب تانى ممكن تساعدنى فيهم زى الوسام فى الفيزياء (يستاهل اجيبه ولا لا ) والانجلش ايه رايك فى توب استيودنتس كفاية ولا اجيب معاه سربرايز ؟