مدنيه .... لا اخوانيه ولا سلفيه

[maths city teacher]

بسم الله الرحمن الرحيم
من فتره طويله وانا مهتم باخبار الفيس بوك
وحبيت انقل لكم اراء بعض الشباب اللى ع الفيس اللى بيؤمنوا بمدنيه الدوله ولكن مدنيه بمرجعيه اسلاميه ليست سلفيه ولا اخوانيه

بس لقيت خبر جميل جدا عن حزب النور حبيت انقله الاول كده

قام منظمى مؤتمر انتخابي لحزب النور السلفى، فى ميدان الرأس السوداء بالإسكندرية، بتغطية تمثال إغريقى ضخم فى الميدان، بالقماش، باعتبار انه ''خارج ''.
وأظهرت صور تم تداولها على مواقع التواصل الاجتماعي، تغطية تمثال يمثل 4 حوريات بحر يجلسن على منصة رخامية بالقماش وربطه بالحبال لحجبه عن انظار الحاضرين بالمؤتمر الانتخابي .
وعبرت هالة سرحان مقدمة برنامج ناس بوك على فضائية روتانا مصرية، على اندهاشها من هذا الأمر على صفحتها على ''الفيس بوك'' قائلة '' نهار اسود! السلفيين لبسوا التماثيل حجاب!''
بينما عبر كثير من مستخدمى ''تويتر'' و'' فيس بوك'' عن سخريتهم من تحجيب التمثال، فقال احدهم '' هل تماثيل البحر مثيرة لهذه الدرجة؟''، وسخر آخر قائلا'' النهارده غطوا حوريات البحر, بكره يركبوا لأبو الهول ذقن'' ، وقال آخر'' والله تصرفات السلفيين دي هاتخلينا ندافع عن الفن القبيح بتاع حوريات البحر ''
وكان عبد المنعم الشحات، المتحدث باسم الدعوة السلفية، قد طالب بضرورة تغطية وجوه التماثيل الفرعونية المصرية بالشمع لأنها تشبه الأصنام التي كانت موجودة بمكة في عصر الجاهلية،متهما الحاضرة الفرعونية ''بالعفن'' .

[maths city teacher]

احد الثوار بلا اي انتماءات سياسية يكتب رسالة لمرشد الاخوان :


سيادة المرشد العام مع إحترامي لشخصكم
أحب أقولك
... إنت لبستنا كلنا في الحيطه إترميت في حضن المجلس العسكري وغمضت عينيك عن كل الإنتهاكات اللي عملها المجلس .
في الوقت اللي كان الشباب بيموتوا في العباسية كنت حضرتك بتفتتح مقر حزب الحريه والعداله مع العيسوي وبعض الوزراء

... في الوقت اللي كانت بتتقفل فية قنوات كنت حضرتك بتكرر ان الجيش هو حامي الثوره

في الوقت اللي كانت بتتصادر فية جرايد كنت حضرتك بتقول مش عاوزين نعطل البلد

في الوقت اللي كنا بننزل التحرير كنت حضرتك بتعمل يوم ترفيهي مقابل 10 جنيه للفرد أو قوافل طبيه

في الوقت اللي كنا بنصرخ ونقول المجلس بيحمي الثورة المضادة كنت حضرتك مع حزب الوفد بقيادة السيد أفندي البدوي بتقسموا نسبتكم كم في الإنتخابات

في الوقت اللي كنا بنصرخ بعزل الفلول وتطبيق قانون الغدر كنت حضرتك بتتفق على شعار الإسلام هو الحل

وقرب موعد الإنتخابات والفلول زي ما هية ونازله بقوة ع القوائم والفردي 9 أحزاب للفلول دة حتى حزب الوفد اللي انت متفق معاة منزل فلول تبع القوائم بتاعته
وأخيرابقى وثيقة
الدكتور على السلمي اللي بيقولك أيه هيختارو 20 واحد بس من مجلس الشعب و 80 من خارج المجلس طب البس بقى في الحيط يا سيادة المرشد
ياما قدمت تنازلات عشان تدخلوا المجلس وتقعدوا ع الكراسي وإحنا كنا بنصرخ عشان نقعدكم على كراسي نضيفة ولم تصغى إلينا أبدا

أيها المرشد العام عجبك حضن العسكري طب إشرب بقى اللي هيعمله فيك وفينا العسكري
طول الوقت كنا بنمد إيدينا ومستنيين إيدين الإخوان تمسك إيدينا وسبتونا لوحدنا للمجلس يلفق لنا التهم والقواضي

وياما قال علينا عملاء وأجندات ودهسنا تحت المدرعات ومحاكمات عسكريه وطوارىء وداخليه كلها قتله وبلطجية

إشرب يا سيادة المرشد إشرب وإفتكر اللي مات في التحرير

إشرب يا سيادة المرشد المجلس هوة اللي هيعمل الدستور

إ شرب ياسيادة المرشد بس متنساش إنت اللي هتحاسب ع المشاريب

[.. New life recharge]

مدنيه بمرجعيه اسلاميه .. لا اخوانيه ولا سلفيه ولا علمانيه ولا ليبراليه

[maths city teacher]

المشاركة الأصلية كتبت بواسطة .. New life recharge

مدنيه بمرجعيه اسلاميه .. لا اخوانيه ولا سلفيه ولا علمانيه ولا ليبراليه

والله معاك مليون فى الميه

[aymaan noor]

جزاك الله خيرا أستاذى الفاضل و بارك الله فيك

هناك بالفعل فوضى حالية فى الفتاوى ، فأنتشرت فتاوى كثيرة عارضها علماء الدين الثقات وأكدوا أنها لاتنتمى الى الفهم الصحيح للاسلام ، نتمنى أن يبذل علماء الدين الثقات مجهودا أكثر فى تنقية المجتمع المصرى من الفتاوى الخاطئة ، و أن يعود لنا الفكر الاسلامى المعتدل الذى تربينا عليه والذى يظهر العظمة الحقيقية للاسلام . لأن الخطأ فى الفكر والفهم لايصححه الا عرض الفكر الصحيح ، حتى يتيسر للمسلم العادى فهم دينه على الوجه الصحيح

[Observer]

شكرا استاذ maths city teacher على الموضوع، واطمئن لن ينال من مصر احد ولن تخضع لـ "طائفة" بعينها فقدر مصر ان تكون للجميع يستظل بظلها من اراد ومن رفض فارض الله واسعة ولن يفرض منطقه على الاخر مهما فعل او خُيل اليه انه سيصل الى مسعاه، مصر دولة مدنية ولن تكون غير ذلك. حفظ الله مصر دائما.

[صوت الامة]

انا شايف ان الموضوع اصلا قائم على الحرب ضد التيارات الاسلامية
لية مش عارف ......موضوع ملوش اى لزمة بصراحة ومستفز
مع احترامى للناقل او الكاتب
ربنا يهدى الجميع

[maths city teacher]

شكرا ع المرور .....اظن انك لم تفهم المقصد من الوضوع
ومع ذلك ليست مشكلتى ان الموضوع بالنسبه لك مستفز فهذه هى الحريه التى اعرفها

[مرموور]

موضوع رائع
شئ مؤسف ان يكون الاخوان المسلمين ليسوا اسما على مسمى
وانهم يسعون الى الوصول الى الكراسى فقط
لا ينظرون الى مصلحه بلد ابدا
فهذا واقع لابد ان يعلمه جميع المصريين
طبعا الا من رحم ربى
فالدكتور محمد سليم العوا منهم ولكنه يعى جيدا مايقول

[الاستاذ محمد سرور]

تستطيع ان تسمى الدولة التى تريدها كما تشاء
ولك الحق ان ترفض ان يتم تسميتها اخوانية سلفية ليبرالية علمانية

ولكن يبقى حق الشعب كافة فى اختياره هوية الدولة بعيدا عن اى مسمى

فاذا اختار الشعب تحكيم شرع الله .....وجاء البعض وسماها ليبرالية علمانية بتناجنية

فاتركهم واسمائهم ..ولكن التطبيق فى الواقع


ملحوظة اخيرة يا ريت تسأل على رأى علماء الازهر فى عرض التماثيل العارية للنساء
وان كنت اجزم انك تعرف حكم الصور العارية للنساء

[صوت الامة]

المشاركة الأصلية كتبت بواسطة maths city teacher

شكرا ع المرور .....اظن انك لم تفهم المقصد من الوضوع
ومع ذلك ليست مشكلتى ان الموضوع بالنسبه لك مستفز فهذه هى الحريه التى اعرفها

لاء بالعكس انا فهمة جدا على فكرة
وكلامى الى قلتة صحيح والدليل رد الى بعدى
يعنى هى بتيجى تدريجيا اخى الكريم
الرسالة الى مكتوبة فى الرد الثانى اظن بانة هجوم على الاخوان
والرد الى بعد ردى اعتقد بانة واضح
وراس الموضوع علية اصلا شبهة لاننا لا نعرف تفاصيل الموضوع او ما المقصد من حدوث ذالك
طبعا لكل منا وجهة نظرة ولة كامل التقدير والاحترام

[maths city teacher]

المشاركة الأصلية كتبت بواسطة صوت الامة

لاء بالعكس انا فهمة جدا على فكرة
وكلامى الى قلتة صحيح والدليل رد الى بعدى
يعنى هى بتيجى تدريجيا اخى الكريم
الرسالة الى مكتوبة فى الرد الثانى اظن بانة هجوم على الاخوان
والرد الى بعد ردى اعتقد بانة واضح
وراس الموضوع علية اصلا شبهة لاننا لا نعرف تفاصيل الموضوع او ما المقصد من حدوث ذالك
طبعا لكل منا وجهة نظرة ولة كامل التقدير والاحترام

الداعيه المحترم جدا اللى انتى حطه صورته مصطفى حسنى الى بجد باحبه جدا جدا جدا
تعرض لهجوم شرس من زعيم السلف محمد حسان عندك فكره بكده ***
هو مش موضوعنا بس ملاحظه صغيره يعنى
انا عايز دوله مدنيه بمرجعيه اسلاميه بس مش اللى يحكمها السلف اللى دلوقتى غطوا التمثال بكره حيهدوه ويغطوا الاثار بالشمع ونبقى حلوين خااااااالص

[أ / طارق عتمان]

تعليقا علي الموضوع في عدة نقاط

1 - أرجو تصحيح العنوان ليصبح علمانية لا اسلامية ليكون الكلام أكثر وضوحا بعيدا عن اللف والدوران والدليل علي ذلك :-

2- كلمة " مدنية " هذه المقصود بها العلمانية . لانه سبق وأن كررنا أنه لا توجد في كل نظم العالم ودساتيرها وعلوم السياسة والاجتماع لا يوجد مصطلح الدولة المدنية بل يوجد تجاوزا الحكومة المدنية والمقصود منها أنها ليست حكومة عسكرية أو بوليسية.

3- لما كان ذلك معلوما ومن المعلوم أيضا أن تلك العلمانية الخبيثة مرفوضة من الشعب المصري المسلم بطبيعته . كان إدخال تلك الكلمة الخبيثة والتي لا أصل لها لتمر علي الشعب المصري المسلم المتدين بطبيعته ولكن هيهات هيهات . فقد مضي عهد الخداع والمكر .

4 - المقصود بالهجوم علي الاخوان والسلفيين هو هجوم علي الاسلام نفسه ولكن كما قلت طبيعة الشعب المصري المسلم المتدين ترفض ذلك تماما فكان الهجوم علي الاسلام في صورة الهجوم علي الاخوان والسلفيين خاصة بعد سحقهم لدعاة العلمانية في المناظرات التي تمت بينهم سحقا دفع بالاعلام المتعلمن والمتغرب إلي النيل من الاخوان والسلفيين ولكن هيهات هيهات
فالحجة لا تقابل إلا بالحجة لا بالشتائم وإلصاق التهم الفارغة كلها أمور باتت مكشوفة لكل ذي عينين .

5 - لا أجد سببا لبغض الاسلام وأحكامه وشرائعه من جانب العلمانيين إلا لأحد سببين

أولهما : الجهل بهذا الدين العظيم فالانسان دائما عدو ما يجهل وهذا ما يفسر لنا جليا دخول قادة الفكر الغربي ونخبهم في الاسلام أفواجا يوما بعد يوم بعد التعرف علي الاسلام بإنصاف وعلي صورته الحقيقية البعيدة عن الهزيمة النفسية التي يعيشها معظم المسلمون اليوم للأسف وهي السبب الثاني في هذه النقطة وذلك بسبب الغزو الفكري والاحتلال الذي ترك آثاره الخبيثة علي مدار السنوات بل الحقب الماضية

6- أخيرا وليس بأخير لن يكون في هذا الكون العظيم الذي هو ملك لله عز وجل إلا ما يريد قال الله تعالى { وَاللَّهُ غَالِبٌ عَلَى أَمْرِهِ وَلَكِنَّ أَكْثَرَ النَّاسِ لَا يَعْلَمُونَ}
وأذكر

ليس من طلب الحق فأخطأه
كمن طلب الباطل فأصابه.

مع احترامي وتقديري لكل من كتب في الموضوع وعلي رأسهم صاحبه
وأسأل الله العلي القدير في هذه الايام العظيمة
أن يرينا الحق حقا ويرزقنا اتباعه وأن يرينا الباطل باطلا ويرزقنا اجتنابه
وأن يحفظ هذا البلد آمنا وسائر بلاد المسلمين

علي فكره يشهد الله أني لست اخوانيا ولا سلفيا ولكني أحب كل من رفع راية الاسلام بعزة

[maths city teacher]

الفرق بين المجلس العسكرى و الجيش هو نفس الفرق بين الاسلاميين و المسلميين يعنى لما اجى انتقد المجلس العسكرى يقولى واخد انت بتتنتقد جيشنا !! اجى انتقد الاسلاميين واحد يقولى انت بتتنتقد الاسلام !!!! هو للدرجة دى الجهل

[كساب السويفى]

المشاركة الأصلية كتبت بواسطة maths city teacher

الداعيه المحترم جدا اللى انتى حطه صورته مصطفى حسنى الى بجد باحبه جدا جدا جدا
تعرض لهجوم شرس من زعيم السلف محمد حسان عندك فكره بكده ***
هو مش موضوعنا بس ملاحظه صغيره يعنى
انا عايز دوله مدنيه بمرجعيه اسلاميه بس مش اللى يحكمها السلف اللى دلوقتى غطوا التمثال بكره حيهدوه ويغطوا الاثار بالشمع ونبقى حلوين خااااااالص

يا سيدى لا نريد ان نردد كلاما دون ان نفهم مقصده انت تريد مدنية بمرجعية اسلامية والله جميع التيارات الاسلامية التى تهاجمها قالت هذا وبعدين انت مصدر معلوماتك هالة سرحان ىا راجل اختشى