فـقه البنــات الواعييــــن للبنات وبس

[حياتى وقف لله]

مش أحيانا بتيجي عليكي أوقات بتواجهي فيها تساؤلات محيرة !!

ومش عارفة تروحي لمين تبوحي له بأسرارك دى

وتفضلي محتارة بين:

أمهــات بيهربوا من مواجهة بناتهم في الأمور دى ..

و مدرسات بيعتبروا مناقشة المواضيع دى مع طالباتهم عيب فادح ..

وصديقات حواليكي اللى بيجهلوه أكتر من اللى عارفينه ولو سألتيهم هيفتوا من غير تردد ،،، و نفس الوقت من غير علم !


فتفضل التساؤلات حبيسة جواكي .. وتعاني لوحدك في صمت




عشان كده عملنالك السلسلة دى هدية .. لكي تجيب على كل اللى محيرك

عشان تكوني على علم .. وتعبدي الله على بصيرة .. وتكفي نفسك هم سؤال غيرك في شئ لصيق و دقيق في حياتك زي الموضوع ده




كلامنا في السلسلة دي إن شاء الله

عن

أحكام خاصة بالنساء

أحكام الدين الخاصة بفقه الطهارة للنساء





بإذن الله السلسلة هتنزل على حلقات
كل حلقة بتتكلم عن موضوع مهم من مسائل فقه النساء الشهيرة

مش هنشرح فقه على أد ما هنركز على الأسئلة المحيرة اللي بتشغل بال الكثيرات ونعرف مع بعض حكمها

وإن شاء الله السلسلة هتكون وافية للمواضيع والأسئلة اللي ممكن تخطر على بالكم

فرجاء قراءة كل حلقة باهتمام و تركيز وبإذن الله ستجدي الجواب بين السطور ..


حتى المواضيع التي لا تظني أنها تهمك في مرحلتك دي اقرأيها برضو وعلميها لغيرك ..
لأخواتك... لصحباتك .. لجيرانك
واكسبي ثواب فيهم








ورجاء الانتظار حتى نهاية كل حلقة لأن ممكن جواب سؤالك يكون في الحلقة اللي بعدها


نحبكم في الله

[أم عمار قائد الأحرار]

جزاكم الله خير سلسله راااااائعه وجاري التثبيت واسمحيلي بدمجها مع موضوع الاستاذ خالد

[حياتى وقف لله]

(1)
الافرازات

من أكتر أسئلة النساء شيوعا لكونها سبب يعوق أداء العبادة على طهارة

لكن بإذن الله لما نفرق بين أنواع الإفرازات ونعرف أحكامها .. نبقى على بينة من أمرنا وطمأنينة بفضل الله




أول حاجة عايزين نفرق بين حاجتين أن في:
افرازات لا سبب لها:
(سواء بتنزل بصورة طبيعية أو مرضية)

افرازات لها سبب:
ودي بتنحصر في 3 مسميات
( ودي - مذي - مني)



# افرازات لا سبب لها:

** الافرازات الطبيعية:
هي افرازات تخرج من الرحم أو المهبل قد تشعر بنزولها المرأة أو لا تشعر

صفاتها.. أنها بتكون:
مائية .. سائلة .. شفافة

وبيسميها العلماء "رطوبة فرج المرأة"
ومن اسمها رطوبة يعني من المية

حكمها:
الراجح من كلام العلماء أنها طاهرة لكنها تنقض الوضوء

ازاي يركبوا مع بعض؟

طاهرة (ده حكمها في نفسها من حيث أثرها على الثوب)
فهي طاهرة يعني لا تنجس الثوب

لكنها تنقض الوضوء (ده من حيث أثرها على طهارتكِ أنتي)
هل هينفع تصلي بها ولا لا

فالراجح من كلام العلماء أنه يلزمك الوضوء قبل الصلاة

طيب ايه الحل في في حالة أنها بتنزل باستمرار؟
الحل أنك تتوضأي قبل كل صلاة عند دخول وقتها
وتتحفظي بشئ (مناديل أو ما شابه) بحيث لا تتسخ الملابس




** الافرازات المرضية:

هي إفرازات تكون نتيجة التهاب المهبل ، عنق الرحم ، الرحم ، قناة فالوب .

صفاتها:

1- إفرازات صفراء أو خضراء اللون تكون نتيجة إصابة الرحم بالبكتيريا .

2- الإفرازات المهبلية البيضاء ، جامدة تسبب الحكة ، وهي ناتجة عن الإصابة بالفطريات .

3- الإفرازات المهبلية ذات الرائحة تدل على الإصابة بالتريكوموناس ، أما الرائحة الكريهة فتدل على وجود جسم غريب أوتقرح في الأنسجة




إذن الخلاصة أن علامات الافرازات المرضية.. أن يكون :
لها لون - لها رائحة كريهة - تسبب حكة


وفي حالة وجود هذه العلامات أو أحدها
لا بد من مراجعة الطبيبة عشان توصف العلاج المناسب

وكاحتياط لمن عندها بوادر هذا الأمر أو وجوده:
- تقلل من دخول الحمامات العامة
- لو اضطرت تدخل يبقى ترش المكان بالديتول
(زجاجة برفان وتملأها بالديتول يفي بالغرض)
- قص الأظافر وغسل الايدين قبل التشطيف
- تستخدم مناديل ورقية مقوية للتجفيف

حكمها : - والله أعلم- نفس حكم رطوبة فرج المرأة كونها تنزل من نفس المحل
طاهرة لكنها ناقضة للوضوء




# افرازات لها سبب:

1- الودي
عبارة عن سائل أبيض ثخين (يعني تقيل) يخرج عقب البول
وبياخد حكم البول في نجاسته

يعني له حالة واحدة بس أنه بينزل بعد البول مباشرة
وقد يتأخر نزوله لو مشي الانسان بعد التبول مباشرة فينزل في الثوب على الصفة اللي ذكرناها

حكمه:
نجس.. وناقض للوضوء
نجس= يعني ينجس الملابس ولازم تغييره او غسل الملابس
ناقض للوضوء = يعني لازم الوضوء قبل الصلاة لأنه في حكم البول
فزي ما التبول بينقض الوضوء.. فنزول الودي ناقض للوضوء




2- المذي
ماء رقيق لزج شفاف لا لون له
يخرج عند الشهوة الضعيفة أو المداعبة أو تذكر الجماع أو إرادته أو النظر أوغير ذلك وربما لا يشعر بخروجه .

حكمه:
نجس .. وناقض للوضوء

لكن من تخفيف ربنا سبحانه وتعالى على بني آدم لكثرة ما يصيب الانسان العزب .. تخفيف نجاسته
يعني ..
يكفي لتطهير الثوب منه : النضح ( الرش ) يعني رش الملابس بالماء مع غسل الفرج طبعا
وخروجه ناقض للوضوء فيجب عليه الوضوء لا الغسل .




3- المني:

صفاته:
1.الخروج بشهوة (شهوة قوية بعد الوصول للذروة)
2. يعقب خروجه فتور في الجسم
3. لونه أبيض مائل للصفرة .
4. ثخين ليس رقيقاً .
5. يخرج دفقاً وفي دفعات .
6. رائحته تشبه طلع النخل أو رائحة العجين ، وإذا يبس يكون رائحته كرائحة بياض البيض الجاف.
كل واحدة من هذه الثلاث كافية في كونه منياً


ايه الحالات اللي بيخرج فيها؟ :
1- الجماع
2- الاحتلام (يكون الشخص نام ورأي في منامه ما يثيره ثم صحي من النوم فوجد بللا في ملابسه)
3- الاستمناء المحرم (ممارسة العادة السرية)


حكم المني:
طاهر.. لكن يجب الغسل منه
طاهر = إذا أصاب الملابس أو الفرش فهو طاهر لا ينجسها
وممكن ازالته بغسل المكان اللي نزل فيه فقط للتنزيه
او فركه لو كان نشف

و يجب الغسل منه (الاغتسال بتعميم البدن بالماء) عشان يكون الانسان طاهر ويقدر يصلي




**ملاحظات مهمة**


** إذن للتفريق بين المني والمذي** :
المذي يخرج في حالة شهوة ضعيفة ..تفكير .. مداعبة بين زوج و زوجة .. رؤية أو تذكر ما يثير
قد يشعر الانسان بخروجه او لا يشعر

المني يخرج في حالة شهوة قوية سواء في حالة يقظة أو نوم (احتلام) .. ويعقبه خروجه فتور في الجسم (احساس بالخدر) ويخرج بكثافة



** بالنسبة للشخص (سواء رجل أو امرأة) اللي احتلم وصحي وجد في ثوبه بلل
سواء تذكر الحلم أو لم يتذكره
وجب الغسل
لأن العبرة برؤية المني أو بلل في الثوب
ولأن النبي صلى الله عليه وسلم قال لمن سألته عن غسل المرأة إذا احتلمت: إذا رأت الماء وجب الغسل.

لكن إذا استيقظ ولم يجد شئ حتى لو كان متذكر أنه احتلم... فلا شئ عليه.

[حياتى وقف لله]

جزاكى الله خيرا يا ام عمار

حضرتك اللى شيفاه فى الصالح افعليه

كنت اود بس ان الموضوع يكون للبنات فقط

ويكون لوحدة لايدمج هو مش هيكون شرح فقه

اد ماهيكون باذن الله اجابه وافية لتساؤلات كتير مننا

اعانك الله وايانا

[وردة امل]

جزاكى الله خيرا

[حياتى وقف لله]

جزانا الله واياكم

يارب تكونى استفدتى ياغاليه

واى سؤال

متواجده بأذن الله

[شيماء20]

جزاكى الله خيرا
ونفع بكى

[حياتى وقف لله]

جزانا الله واياكم

انتظروا المشاركه القادمه بأذن الله

اتمنى من الله ان تنتفعوا بها

[حياتى وقف لله]

(2)
الحيــض

مش هنتكلم عنه بالتفصيل لأنه من اسمه "عادة شهرية" يعني شئ اعتادته وتعرفه النساء

لكن هنتكلم عن أكتر الأشياء اللي بتلخبط في الحيض

علاماته:

كتير بيشتكي من وجود افرازات بنية غامقة بتنزل قبل معاد الحيض بفترة مثلا قبل ب3-4 أيام
وبعضهن بيتوقف عن الصلاة لمجرد رؤية هذه الافرازات

XX وده خطأ XX

الصحيح >> أن علامة الحيض المعتبرة
هي نزول أول نقطة دم حمراء تعرفها النساء جيدا

حتى تعريف دم الحيض أنه دم أسود "يُعرف"

أسود.. ده باعتبار أن لونه أحمر قاتم مائل للسواد
يُعرف .. يعني معروف صفته .. ولها معنى تاني أن له رائحة كريهة تعرفها المرأة وتميزه بها




الفرق بين دم الحيض و دم الاستحاضة:

ومن أهم العلامات التي تَعرف بها المرأة دم الاستحاضة وتميزه عن غيره من الدماء:

1- كل دم تراه المرأة خارجاً من الجهاز التناسلي ولم يكن دم حيض، ولا دم جروح، أو قروح، أو ولادة فهو دم استحاضة.

2- يتميز دم الاستحاضة عن دم الحيض غالباً بكونه بارداً لا يُحدث حرقة، ورقيقاً يخرج بفتور، ولونه أصفر، بينما يكون دم الحيض أحمر، أو أسود، وحاراً يخرج بدفق وحرقة، في الغالب.

3- قد يكون دم الاستحاضة في بعض الأحيان يحمل نفس صفات الحيض، فعندئذ يمكن التمييز بين دم الحيض والاستحاضة بما يأتي:
- بالعادة الشهرية: فللحيض مدة معلومة عند أغلب النساء، بينما الاستحاضة ليس لها وقت معلوم (وذلك بالنسبة للدورات المنتظمة).
- بالمدة: فمدة الحيض محصورة بين 3 و10 أيام، فإذا انقطع الدم قبل 3 أيام فهو استحاضة، وكذلك الدم الذي تراه المرأة بعد اليوم العاشر هو دم استحاضة.




علامات الطهر من الحيض:


ازاي تعرفي تميزي علامة انتهاء أيام الدورة الشهرية؟؟

أولا معلومة مهمة: ده بيختلف من امرأة لامرأة
العلامات:

** القصة البيضاء
القصة البيضاء دي علامة استبراء الرحم..أن الرحم خلاص فضي
أنتي بتبقي عارفة عدد أيام الدورة ولنقل مثلا 6 أيام
في اليوم السادس ده بتظهر افرازات صفراء أو مكدرة(عاملة زى الماء المعكر) وبتقعد حوالي نصف يوم
يعقبها نزول سائل أبيض رقيق يسمى القصة البيضاء
ده بتعرفه المرأة بأنها تمسح بقطنة أو منديل مسحا خارجيا على الفرج وتشوف لون القطنة
لو ظهر فيها سائل أبيض رقيق.. إذن دي علامة الطهر من الحيض

** من العلامات أيضا : الجفاف التام
انقطاع الدم والاقرازات الملونة تماما

** من العلامات التي لا تعرفها كثير من النساء وهي مهمة جدا للسيدات اللي بيعانوا من موضوع الافرازات المرضية

العلامة هي : رجوع الافرازات المعتادة تاني بصورتها اللي هي عارفاها
يعني بعد ما يحصل انقطاع الدم وذهاب الكدرة والصفرة
لو فاتها رؤية القصة البيضاء .. هتشوف افرازاتها الطبيعية تاني




ليه اتكلمنا عن علامات الطهر؟

عشان هتفيدنا في التفريق بين:
الافرازات التابعة للحيض و الافرازات التي لا تتبعها

بمعنى..
أن ممكن واحدة تستعجل الطهر وتغتسل وتكون هي لازالت في حالة حيض (بنزول الكدرة والصفرة)
وده طبعا مصيبة لأن على أساسها هتنبني صلاتها
فالعبرة عشان نتطهر أن نكون رأينا علامة الطهر


فنفرق ازاي؟
التفرقة بأننا نعرف أن كل الافرازات ما قبل وما بعد فترة الحيض المعتادة لا تعد من الحيض

شوفوا المخطط ده بيوضح الافرازات ما قبل وما بعد الحيض




بمعنى..
مثلا واحدة دورتها 6 أيام وبتجيلها مثلا يوم 15 من الشهر

- أي افرازات هتنزل عليها قبل يوم 15 .. لا تعتبر من الحيض

- أي افرازات هتنزل عليها خلال فترة ال 6 أيام .. تعتبر من الحيض

- أي افرازات تنزل بعد رؤية علامة الطهر وبعد مرور ال 6 أيام بتوع الدورة.. لا تعتبر من الحيض

لحديث أم عطية رضي الله عنها قالت :
" كنا لا نعد الصفرة والكدرة بعد الطهر شيئاً "





الحيض المتقطع

ده عبارة عن حيض مضطرب يأتي يوم أو أيام وينقطع ثم يأتي مرة آخرى

أسبابه غالبا:
اضطرابات هرمونية - أو توتر شديد - أو تركيب أو تناول أحد وسائل منع الحمل زي اللولب أو حبوب منع الحمل

مشكلته أنه بيسبب حيرة عند النساء لأنها مش بتبقى عارفة أيام انقطاعه دي بتكون طاهرة فيها ويجوز لها الصلاة فيها ولا بتكون لازالت نجسة؟

ومن مشاكله أيضا أنه بيزود عدد أيام الدورة عن معادها المعتاد
يعني بيزحزح الأيام وتمتد أكتر من مدتها فتشك المرأة هي كده حائض ولا مستحاضة؟

هنفرق الموضوع ده ب3 حاجات:

# أول حاجة أنها تعرف أن أيام الانقطاع دي داخلة في الحيض وتعتبر من الحيض
وعليه..
هينطبق عليها أحكام الحائض يعني -على سبيل المثال-
لا تصلي و لا يجوز مجامعة الزوج خلال اليوم اللي انقطع فيه الدم في نص الدورة ده..

# ثاني حاجة بالنسبة لطول المدة ... فده مش شرط يكون استحاضة بدليل أن الدم اللي بينزل ده له نفس صفات دم الحيض من حيث اللون والرائحة.. لذلك فهو حيض
لكن لون دم الاستحاضة مختلف.. وعرفنا الفرق بينهم قبل كده

# ثالث حاجة تخص أيام الانقطاع وكدليل أنها داخلة في أيام الحيض فمينفعش تتطهر وتغتسل
أنه معروف أن الحيض مش بينقطع فجأة كده من دم غامق لجفاف تمام
لكن بيمر بمراحل :
دم غزير .. ثم يقل تدريجيا لافرازات بنية .. ثم كدرة وصفرة .. ثم الجفاف التام وهو الطهر

فمادام لسه ماشافتش الطهر إذن هي في حالة حيض لحد ما تشوف الطهر


طيب بفرض أن الحيض أيامه امتدت لأيام كتيرة أوي عن عادتها ؟
لو المدة لازالت في حدود 15 يوم .. ده تعتبر حيض

لو المدة زادت عن 15 يوم.. كده تدخل في حكم المستحاضة
فتتطهر بالاغتسال .. ثم تتحفظ وتتوضأ قبل كل صلاة

[مسلمة متفائلة]

جمـــيــل جداً أختى
بــآركـ الله فيكــِ
وفى انتظـآر البـآقــى بإذن الله

[أمــ الرحمن ــة]

جـــــــزاكِ الله خيراً
سلسله رائعه
نفع الله بكم

[رقيه.]

بارك الله في حضرتك والله دايما مواضيع حضرتك بتفدني ربنا يكرمك

[حياتى وقف لله]

** أحكام تتعلق بالحائض

نوضح قبل ما ندخل في المسائل دي
أن كتير منها خلاف العلماء فيها مشهور جدا..
يعني مسائل فيها اختلاف بين العلماء.. خلاف سائغ
وكل عالم منهم له اسمه و ثقله

فلذلك هنكتفي بأننا نذكر أقوال العلماء فيها و دليل كل واحد منهم

ونترك لك أنتي تخيُّر القول الذي تستريح إليه نفسك و يطمئن إليه قلبك

مع الأخذ في الاعتبار ..
أنك هتحاسبي على اعتقادك ..!
و ربنا هيسألك ليه اخترتي القول ده و عملتي به وليه ما اخترتيش التاني

يعني عايزين نتحرى الحرص جدا في أمور الفقه بالذات

ماتكونش اختياراتنا بين أقوال العلماء في (مسائل الخلاف المعروفة) مبنية على الهوى والمزاج أو على الاستسهال

لأن انتي محاسبة على اختيارك ده لأنه على أساسه هتعبدي ربنا

وكذلك عايزين اختياراتنا يحكمها العلم





1 - قراءة القرآن للحائض

هنتكلم عنها من كذا جهة..

- هتقرأ القرآن منين؟
هل قراءة القرآن عن ظهر قلب ولا من المصحف؟

كل واحدة فيها كلام

- هتقرأ القرآن لحاجة أو لغير حاجة؟
يعني هل قراءة القرآن لغرض معين وهو التعلم والتعليم..
زي بنت في مدرسة ومطالبة بحفظ القرآن من كتاب الدين
او واحدة معلمة قرآن في مسجد وبتعلم وبتحفظ البنات
أو واحدة قاعدة في بيتها وحافظة لكتاب الله فخايفة تنسى القرآن في أيام الحيض فبتقرأ القرآن حتى لا تنساه

أم أنه لغير حاجة ...
زي أنها تقرأ القرآن و هي حائض في رمضان للتعبد و أجر التلاوة ؟
أو أنها بتقرأ آيات قرآن في أذكار الصباح و المساء أو بتقول المعوذتين و آية الكرسي عند النوم وهي حائض

كل دي مسائل متعلقة بقراءة القرآن للحائض

وهناخدها واحدة واحدة بالتفصيل


بالنسبة للنقطة الأولى
حائض هتقرأ القرآن عموما سواء عن ظهر قلب أو من المصحف

العلماء فيها على 3 أقوال
قولين منهم قويين و قول منهم ضعيف

* علماء قالوا يحرم قراءة القرآن للحائض مطلقا
يعني ماتقراش قرآن خالص.. لا للتعلم ولا للتعبد ولا حتى في الذكر
واستدلوا بحديث ضعيف.. ضعفه أهل العلم سلفا و خلفا
((لا تقرأ الحائض ولا الجنب شيئا من القرآن))
فقاسوا الحائض على الجنب.. رغم أن كل حالة منهم مختلفة
لذلك نستنتج أن القول ده ضعيف جدا


فهنختار من القولين التانيين:

* علماء قالوا تقرأ فقط للحاجة عند التعلم والتعليم وخوف نسيان القرآن و هؤلاء قالوا انها تقرأ عن ظهر غيب من حفظها
وجائز تقرأ من المصحف.. لكن لا تمس المصحف

* علماء قالوا يجوز أنها تقرأ القرآن وهي حائض مطلقا
سواء لحاجة او لغير حاجة
لأن معندناش دليل يمنع ذلك والصحابيات على زمن النبي صلى الله عليه وسلم كن يحضن ولم نسمع حديث أن النبي نهاهم عن القراءة وهن حيض
وكذلك لأن في عدم قراءة القرآن للحائض تفويتا للأجر عليها

اقتباس:
فتبين مما سبق قوة أدلة قول من ذهب إلى جواز قراءة الحائض للقرآن ، وإن احتاطت المرأة واقتصرت على القراءة عند خوف نسيانه فقد أخذت بالأحوط .
ومما يجدر التنبيه عليه أن ما تقدم في هذه المسألة يختص بقراءة الحائض للقرآن عن ظهر قلب ، أما القراءة من المصحف فلها حكم آخر
الشيخ محمد بن صالح المنجد



2- مس المصحف
زي ما عرفنا أن كده خلاص أنه جائز قراءة القرآن للحائض
سواء هتختاري :
قول قراءته للحاجة فقط وخوف النسيان..
أو قراءته مطلقا بدون تقيد لأن مفيش دليل يمنع


بالنسبة لمس المصحف للحائض فالعلماء أيضا اختلفوا فيه على قولين:

$ الفريق الأول قال يحرم مس المصحف للحائض
واستدلوا بالآية الكريمة:
( لا يمسه إلا المطهرون )

وبحديث:
جاء في كتاب عمرو بن حزم الذي كتبه النبي صلى الله عليه وسلم إلى أهل اليمن وفيه:
" ألا يمس القرآن إلا طاهر "

فالحل أنها لو أرادت قراءة القرآن أن تمسك المصحف بحائل.. بقماشة طاهرة أو تلبس جوانتي أو تقلب الصفحات بقلم
لكن لا تلمس ولا جلدة المصحف ولا ورق المصحف


$ الفريق الثاني قال ..يجوز مس المصحف للحائض
ودليلهم حديث النبي صلى الله عليه وسلم:
"المؤمن لا ينجس"
والأصل براءة الذمة .. وربنا قال: (إنما المشركون نجس)
فالمؤمن طبعا عكسه
وردوا على علماء القول الأول وقالوا أن الآية ( لا يمسه إلا المطهرون ) بتتكلم عن الملائكة وهم الموصوفون بالمطهرون في القرآن والآية كانت بتتكلم عن اللوح المحفوظ مش عن القرآن في المصاحف بين ايدينا

كده خلاصة كلامهم أنها يجوز للحائض تمسك المصحف مباشرة بدون حائل ولا جوانتي و تقلب صفحاته بيديها


وكلا الفريقين لم يختلفا في جواز مس كتب التفاسير والكتب الدينية المحتوية على آيات قرآن... لأنه فيها كلام بشر بجانب القرآن
فلذلك لا تأخذ حكم المصحف

[حياتى وقف لله]

** تابع.. أحكام تتعلق بالحائض


3- المكوث في المسجد

أيضا اختلف فيها العلماء على قولين:

& علماء قالوا يحرم على الحائض المكوث في المسجد والجلوس فيه مطلقا
وبالتالي طبعا لا يجوز حضور حلقات العلم فيه

عنْ أُمِّ عَطِيَّةَ رضي الله عنها قَالَتْ :
( أَمَرَنَا -تَعْنِي النَّبِيَّ صَلَّى اللَّهُ عَلَيْهِ وَسَلَّمَ- أَنْ نُخْرِجَ فِي الْعِيدَيْنِ الْعَوَاتِقَ وَذَوَاتِ الْخُدُورِ ، وَأَمَرَ الْحُيَّضَ أَنْ يَعْتَزِلْنَ مُصَلَّى الْمُسْلِمِينَ)

فمنع النبي صلى الله عليه وسلم الحائض من مصلى العيد ، وأمرها باعتزاله ، لأن له حكم المسجد ، فدل على منعها من دخول المسجد .

ولقول النبي صلى الله عليه وسلم :
( إني لا أحل المسجد لحائض ولا جنب)

فكده خلاصة كلامهم أنه يحرم على الحائض أنها تجلس في المسجد .. لكن جائز تمر فقط مرور سريع
( وَلا جُنُبًا إِلا عَابِرِي سَبِيلٍ حَتَّى تَغْتَسِلُوا )
وقالوا لو عايزة تستمع لدرس علم تجلس خارج المسجد عند باب المسجد أو على السلم وتسمع
أو تجلس في ساحة المسجد (فناؤه) أو في حجرة تابعة للمسجد ، لكن لا تدخل!



& علماء قالوا يجوز جلوس الحائض ومكوثها في المسجد وحضور دروس العلم
ودليلهم حديث
"المؤمن لا ينجس"
ولأنهم يرون أن حديث
"إني لا أحل المسجد لحائض ولا جنب"
حديث ضعيف فلا يؤخذ منه حكم

فخلاصة كلامهم أنها ممكن عادي تجلس في المسجد وتحضر دروس العلم.. لكن تتحفظ وتاخد بالها حتى لا تنجس المكان.



4- أداء مناسك الحج و العمرة

النساء اللاتي يأتين للحج والعمرة يمكن أن يكنَّ حيَّضاً وهنَّ ممنوعات من الطواف بالبيت فقط
وقد كانت عائشة رضي الله عنها مع النبي صلى الله عليه وسلم في حجة الوداع ، وحاضت قبل دخول مكة ، ولم يمنعها صلى الله عليه وسلم من دخولها حتى تطهر !

بل أمرها أن تفعل جميع مناسك الحج إلا الطواف بالبيت ، فإنها تؤجله حتى تطهر ، فقال صلى الله عليه وسلم :

( افْعَلِي مَا يَفْعَلُ الْحَاجُّ غَيْرَ أَنْ لا تَطُوفِي بِالْبَيْتِ حَتَّى تَطْهُرِي )
رواه البخاري (305) ومسلم (1211) .

منقول من فتوى من موقع :الاسلام سؤال وجواب

فممكن تقرأ القرآن وتقول الأذكار وترمي الجمرات لكن لا تطوف بالكعبة لأن الطواف بمثابة الصلاة
فمادام الحائض ممنوعة من الصلاة فكذلك تمنع من الطواف



- الحائض ورؤية علامة الطهر والصيام

يجب أن ترى المرأة علامة الطهر قبل أذان الفجر لذلك اليوم اللي هتصومه
يعني تكون طاهرة الحيض بأنها تشوف علامة الطهر قبل أذان الفجر
وتغتسل بعد كده في أي وقت براحتها

بمعنى أنها لو رأت علامة الطهر بعد الأذان بخمس دقايق أو نصف ساعة
فكده تفطر هذا اليوم ولا تصومه وتقضيه في يوم آخر

[حياتى وقف لله]

up