خلي بالك !! انت بتدوس على حرام !!

[BaNZeR]

صحيح الدين بيقول اتقو الشبهات

لكن ربنا بيقول بردو الدين يسر


الواحد يفتح التلفزيون يقولك التلفزيون حرام

يشغل الكاسيت ... او الام بي بلغة العصر
يقولك الاغاني حرام !

لو البنطلون بتاعك زاد شبر ... يقولك ده اسبال والاسبال حرام
لو نقص شبر .. يقولك اصلك مقصر و(ربنا يكون في عونك ساعتها)

ويا سلام لو كنت كمان ملتحي
هو صحيح اللحية فرض ؟
قالك اه عشان ميبقاش تشبه بالكفار !!
مهو كل رجال الدين دلوقتي في اي ديانة ملتحين اصلاً
لونخالف يبقى شيوخنا تخالف شيوخهم وتحف اللحى
واحنا نربيها !!

في كلتا الحالتين لا حتعرف تمشي بيها ولا حينفع ممشيش من غيرها
ايه اللى يخليني افكر اصلاً !!

تيجي البنت تلبس البنطلون ... وفضفاض وكل حاجة
يقولك البنطلون حرام وكدا المرأة سابت لبسها الشرعي !
على الرغم من انه بيبقى احياناً اكثر حشمة لها !


تيجي تلبس الطرحة بدلاً من الخمار
يقولك الكتف باين ... ومادام الكتف باين فده تشبه بالرجال
والمتشبهات ملعونات !! (ده كان كلام بعض ناس في السعودية)
على اساس إنها شارية الكتف ده رجالي ومركباه !!

يعني الكلام هنا قد يكون ملوش لازمة بما إنه في ناس اوجبت فرض النقاب اصلاً !!

تخش عالكمبيوتر وتفتح النت
يعني ... متحاولش تفتح اي حاجة غير المواقع الاسلامية !!

لو فتحت منتدى .. حيقولك فيه اختلاط والاختلاط حرام
على الرغم من انه اهون بمراحل من مناظرنا في الجامعة مثلا !!

تدخل على بعض مجالات الكسب عالنت
على الرغم من خلوها من اي تعاملات ربوية
بس بردو عن الشيوخ هي ربا وميسر متعرفش ازاي !!

اوعى تدخل الفيس
بتقول ليه ؟
لا لا مش عشان الاختلاط
الفيس اتحرم من قبل الازهر
اه اتحرم !!
متسألنيش انا اسألهم هما


الكدب ،، النفاق ،، الرشوة احم ... قصدي الاكرامية

كان زمان بيضحكو علينا وبيقولو إنها حرام
بس اوعى تصدق ... دول اساس الحياة اصلاً انت اتجننت !

هو ايه معنى كلمة حرام اصلاً ؟
الحرام بقى بيتوزع ببلاش في الشارع
بل وبقيت بتنتجه منزلياً كمان !

شوية تاني حتمشي في الشارع حيقولك
خلي بالك !! حتدوس على حتة حرام تحتيك !!!

بصراحة مش عارف

بس هو الحرام ده مكوناته ايه ؟
ليه بقى عندنا منه فايض كبير اوي ؟
هو صحيح في حرام
لكن مش للدرجة دي
الحرام بقت كلمة سهلة اوي
بقى اسهل ما عند الشيوخ يقولك
حرااااام ولا يجوز

عمتي مثلا كانت في حجة مرة - ربنا يرزقنا جميعاً - ... في الحرم ... بتسأل أحد الشيوخ هناك
هو ينفع أحج عن حد ؟
طبعاً كلنا عارفين إنه اه
بشرط متكنش الحجة الاولى
طبعاً هي قبل ما تكمل الكلمة قالها
لالالالالالا يجوووووز

وطبعاً لا يجوز بتساوي حرام او تقاربها في المعنى

هو ليه بقى اي حد ملوش فيها بيتكلم ؟

هل احنا فعلاً وصلنا للمرحلة اللى قال عليها النبي
عليه الصلاة والسلام
في الحديث الشريف
إذا وكل الأمر لغير أهله فانتظر الساعة

تلاقي السجادة اللى بتصلي عليها صناعة بوذية صينية !
تلاقي وزير التربية والتعليم مهندس
تلاقي وزير الصحة مدرس
تلاقي عاملة في مصنع بقت وزيرة القوى العاملة

كل ده ممكن يعدي

لكن لما تكتشف انه تلات تربع الشيوخ اللى قدامك ملهمش فيها !!!
والديانة عندهم مهنة
وكثرة التصريحات والتحريمات والافتاءات هي للشهرة فقط
ولا سيما عندما تكون الفتوى مثيرة للجدل !


لما اصبح كل من حولي حراماً
ليه محرموش النت كله من البداية كانو ريحوني من التفكير اصلاً

النبي عليه الصلاة والسلام قبل ما يمشي قالنا
تركت فيكم ما ان تمسكتم به لن تضلو بعدي ابداً .... كتاب الله وسنتي

ماذا لو وجدت ان العلماء انفسهم اختلفو في امر تحريم شيء من تحليله ؟

إذا فهنا نطبق مبدأ ... اختلاف العلماء رحمة

ولا سيما إن اتخذنا قراراً وسطاً
فديننا دين الاعتدال والوسطية

ديننا يسر وليس عسر

ونحن اصبحنا في عصر العسر
فليس لنا ان نتحمل تعسير الامور اكثر مما هي عليه

كما كان يقول البعض

استفت قلبك
الحلال بين والحرام بين

ياترى اللى انت بتعمله صح ولا غلط ؟
حاسس انك راضي عن نفسك وعنه ؟
بس تكون ساعتها صادق مع نفسك
وتقرب اكتر من ربنا وهو مرشدك دايماً

(لم احرم ولم احلل شيئاً حتى لا يؤخذ بعض كلامي على انه فرضاً)
(ولكن ما أنا مقتنع به ان الامر قد فاض كثيراً بالفعل!)

بقلمي ... BaNZeR