مذاكرات مهندس مدنى

[بستو]

التليفزيون غير حياتي، كان عمري 9 سنين، يوم ما شفتها في ايدين نور الشريف ، صفراء و مدورة ، الفيلم شغال و الحوار علي آخره و انا مش سامع أي حاجة ولا شايف غير البتاعة دي اللي في ايدين نور الشريف ، باسأل نفسي ، ايه دي ؟ بتاعة ايه دي؟ و ماسكها كدة ليه دي؟ لحد ما نور (نورني) و قام حاططها علي دماغه ، ساعتها بس عرفت إن البتاعة دي بتتحط علي الدماغ ، سألت ماما اللي كانت مركزة أوي مع الفيلم :
- ماما ماما ماما هو لابس البتاعة دي ليه؟
ردت علية امي بعد المرة رقم 16 دون توقف لأنها زهقت من زني :
- عشان هو مهندس مدني
و طبعا كرهتها في اليوم اللي شافت فيه ابويا و حبته و اتجوزته عشان تخلف ولد يقرفها في عيشتها زيي و انهال عليها سلسلة أسئلة :
- ما ما ماما ما ما يعني ايه مهندس مدني؟
-ماما ماما ماما هو لابس البتاعة دي ليه
- ماما ماما ماما هو بيعمل بيها ايه ؟
و سأكتفي بهذا القدر من الأسئلة اللي سئلتها لأمي عشان مكرهكوش في اليوم اللي دخلتوا فيه الوموضوع ...... المهم من يومها و انا قررت ابقي مهندس مدني و بحلم باليوم اللي البس فيه الخوذة دي ، دخلت اعدادي و انا عايز اكون مهندس مدني ،دخلت ثانوي و اخذت ماس تو و ما ادراكم ما ماس تو و فضلت عايز اكون مهندس مدني ، دخلت هندسة و انا لسة عايز اكون مهندس مدني و اخيرا بقيت مهندس مدني و شربت اكبر مقلب في حياتي يوم ما اتعينت في الموقع و اكتشفت إن محدش بيلبس الخوذة دي و إني كان مفروض اكون عسكري مطافي ، يعني بقيت مهندس مدني أونطة و حلفت لأشتري الخوذة من أول ماهية و استحملت نظرات العمال كل ما ادخل الوقع ، كانت عيونهم بتقول : سوسن شرفت يا رجالة ، و لسانهم بيقول لي : صباح الخير يا باشمهندس وائل
دخلت الفيلا اللي بشطبها و دماغي بتفكر : يا تري مين اللي ناوي يجيبلي شلل النهاردة ، ما هو ماينفعش يوم يمر من غير ما (يمر) و اخرج عندي شلل رعاش رباعي في المناخير (معرفش ازاي) ، كنت دايما اصل الموقع حوالي الساعة عشرة عشان يكونوا خلصوا الاسطوانة اياها بتاعة (بنفطر يا باشا ، بنشرب الشاي يا باشا ) ، وجدت اسطي رمضان جالسا علي السلمة الاولي للفيلا و يده فوق خده مطلقا نظره عبر الأثير ، انبئتني حاستي السادسة ان الشلل علي ايديه النهاردة بأذن الله


:سألته
- خير يا اسطي رمضان ، انت قاعد كدة ليه ؟
- ابدا يا باشمهندس ، حبة تفكير كدة
- و يعني هما حبة التفكير دول ما كانش ينفعوا و أنت بتشرب الشاي
نظر لي باشمئزاز من فوق لتحت و اجاب محتقرا لغبائي:
- هو انا حشرب الشاي و لا حفكر؟
اجبته و قد بدأت اشعر بالتنميل يسرح لذراعي و شعرت أن الشلل – علي رأي هنيدي- وسييييق من الفووووز :
- لأ فعلا معاك حق
قررت أن اتركه فما لبث أن ناداني ليقطع عندي اي شك انه الرجل المختار لمهمة الشلل اياها
- باشمهندس
- نعم
- انا مش عايز بقية حسابي !!!!!!!
الجمتني الصدمة ، دي حاجة ولا في الخيال ، حسيت باحساس غريب و كأن هيفاء و هبي و اقفة قدامي بتقول لي : ارجوك اتجوزني و انا اعيش خدامة تحت رجليك
تركت هيفا و عدت الي عالم الواقع ، ابتلعت ريقي و قلت له :
- انت بتقول ايه ؟
- يا بيه مش انا ليه ألفين جنيه ، اهو انا مش عاوزهم بس هاتلي نوبايل

ال(ان اتنين و سبعين )ز
- و انا مالي انا ما تآخذ انت الفلوس و تجيب بيها اللي انت عايزه ؟
- يا بيه اعمل معروف ، هاتهولي و انا اعمل كل اللي انت عايزه و اسلمك شغل الجبس ميه ميه ، مش صاحب الفيلا مفوضك تحاسبنا
- جبتها منين مفوضك دي هي كمان ، ما علينا ، انت يابني مش لسه عمال تقول لي انا مزنوق مزنوق ، ايه العربية اللي كانت قافلة عليك طلعت ؟ مش لسة كنت عايش في دور زينات صدقي و تقولي حبة تفكير و بتاع، ايه اللي جد يعني ، و موبايل ايه اللي انت عايزه
- ما لكش دعوة يا بيه ، هاتهولي بس و خلاص
- حبيت اوفر علي نفسي المناهدة و عديت ( ملاكش دعوة يا بيه) دي كمان و قلت انهي اليوم علي خير و في الصباح استعددت لمشوار لشارع عبد العزيز لأشتري النوبايل للأخ رمضان

كان يوم جمعة ووجدت نصف الشارع قافل ، قعدت امشي لحد ما تهت وسط حواري ما أنزل الله بها من سلطان ، فجأة جائني صوت جهوري حميري من ورائي :
- في عاجة يا باشا ، عاوز عاجة
فسرت عاجة دي علي انها (حاجة ) و اعتمدت علي تأوييلي اللي من غير إسناد و اجبته
- عاوز موبايل n 72
كان شاب مثل الدولاب ، له وجه يشبه اتوبيس 116 لما يخبط اتوبيس 625 و يعوج له الأكسدم ، له شعر كااان اسود و اصبح فيه بتوع خضرة كتيرة ، دعوت الله تكون ما بتمشيش ، سألته عنها بعد ان نفذ صبري فقال
- دي هاي لايتس يا بيه ، المهم طلبك ده صعب حبتين اصل النوبايل ده بالذات ناقص
شعرت انني اشتري قطعة آثار مسروقة ، حاولت اعمل فيها ابن بلد و اكسر الحواجز فقلت له :
- اسم الكريم ايه
مد وجهه للأمام و قال :
- بوبي
- نعم
- بوبي بوبي
- اسمك في شهادة البطاقة بوبي
- لا احمد
- طب قول لي يا سي احمد
نظر لي بازدراء و قال
- مش حرد عليك
- ليه بس
- انا بقالي هنا 15 سنه و الكل بيقول لي يا بوبي تيجي انت و تخليني احمد
- طب قول لي يا بوبي ، متعرفش تخدم اخوك في الحكاية دي
نظر لي نظرة من انهي سجارة البانجو من توه و قال :
- و ايه علاكة اخويا بالموضوع ده
- انا قصدي انا
- بس انت مش اخويا سعادتك
- يا سيدي اعتبرني اخوك
امسك بياقة قميصي و صر
- اخويا ازاااااااي ، هي امي كانت علي علاكة بابوك و لا اييييييييه ، دي حلفت لأبويا انها تابت قبل الجووووواز
- يا سيدي انا قصدي مجازا
- مجازا ميييين ، هي كانت علي علاكة بمجازا كمااااااان
- يا سيدي امك اشرف ست في الدنيا ، انا قصدي اعتبرني في مقام اخوك
- آه قول كدة ، بص انت تترمي هنا جنب الفترينة متتنقلش و انا حالف لفة و انت و حظك
ابتلعت سيل الاهانات و انتظرت بجوارها و طال انتظاري لمدة ساعتين ، عاد بعدهم بوبي و هدومه متقطعة و الشرر يتطاير من عينيه ثم صرخ في وجهي :
- تصدق انا عملت معركة عشانك دلوقت ، و نوبايلي اتكسر ميت حتة
و اذا بشبابيك البيوت من حولنا تفتح و احدة تلو الاخري و تطل منهم سيدات الحتة يقولون :
- مين اللي قطع هدومك يا بووووووووبي ؟
- مين اللي كسر موبايلك يا بوووووبي ؟
- يام بووووبي ، يام بووووووبي ، الحقي ابنك بيتخانق
و ظهرت ال lady ام بوبي كخرتيت مطلق حديثا و قالت :
- مين اللي زعلك يا وااااد
- خشي جوه يامه
- قول لي هوه مين و انا اخلي ليلته زرقا
- يامه اعملي معروف اختفي من وشي يا امه ، متخلنيش ادبحلك الزبون يا امه
ارتعدت فرائصي ( يا نهار اسود ، دا انا الزبون )حاولت الهرب فإذا به يسحبني من قميصي
-رايح فيييييين
و صرخت
- خشي يا ام بوبي ابوس ايدك ، مش رايح في حته يا عم
نظر لي نظرة سوسن جت يا رجالة اياها و قال لي :
- متخافش اوي كدة يا بيه ، انا بس بخوفها ، نوبايلك اهو 3000 جنيه بس
دفعت دون نقاش و عدت من حيث اتيت
في اليوم التالي اعطيت الموبايل لرمضان فإّذا به يستوقفني :
- يا باشمهندس
- نعم
- النوبايل ده لامؤاخذة فيه ميوزك ايديشن
كسرت الموبايل علي دماغ رمضان و حلفت لأرجع اولع في الخوذة و في نفسي و في التليفزيون

[بروف انس]

انا مش عارف ده مهندس مدني ولا مقاول ولا ايه وياعم بدل مايلبس الخوذه الصفرا دي خليه يتصور ويحط الصوره في جيبه وخلاص

وطلب اخير ياريت تشيل الصوره الرمزيه دي وتحط صوره غيرها ده طلب ارجو انك تجيبه يعني

[ريناد2025]

ما شاء الله بداية جيدة وحضرتك بقى فى سنة كام ولو كنت داخل اولى هندسة اية كمية الاحباط دى والحمد لله انا لابحب مدنى ولاعايزة اشوف خلقتة اة والله وربنا حوش الصورة دى احسنلك انا ما صدقت طلعت من تحت ايدة

[sooomaaa]

ربنا يكون فى عونه
ده اتذل يا ناس ده العامل بيتعامل احسن منه
ورجاء لحضرتك تشيل الصوره بتاعتك ديه
والله ما كنتش هاقرأ الموضوع لما شفتها

[Eng. A'laa Salah]

هو انت ملقتش غير صوره الراجل ده علشان تحطه تحت اسمك

وبالنسبه لمدني
انا خالي مهندس مدني وشايفه اللي بيحصل معاه علشان كده مش ناويه ادخله اصلا ولا بافكر فيه حتي

[EnG.Mohammed]

شكرا ليك يامان
وانا ان شاء الله ناوي اطلع مهندس مدني

بس مش حلبس الخوذه الصفرا

[basabeso0o]

عجباني اوي الصوره الرمزيه دي
احنا مش خلصنا من التعليم المنخفض وبقينا في التعليم العالي
ليه بتفكرونا بالذي مضى

[BaNZeR]

يبدو إنه ازمة الموضوع تكمن في تلك الصورة الجميلة

شخصية فريدة من نوعها عملت في التعليم المصري اللى محدش قدر يعمله ابداً قبله ولا بعده

زعلانين منه ليه بس

[basabeso0o]

المشاركة الأصلية كتبت بواسطة BaNZeR

يبدو إنه ازمة الموضوع تكمن في تلك الصورة الجميلة

شخصية فريدة من نوعها عملت في التعليم المصري اللى محدش قدر يعمله ابداً قبله ولا بعده

زعلانين منه ليه بس

يا شاشه

[BaNZeR]

المشاركة الأصلية كتبت بواسطة basabeso0o

يا شاشه

ايوه صحيح والصورة برده شاشة مش اكتر
واحنا كمان شاشة
وبسابيسو شاشة برده

[eng_dero]

قولى بقى اتفرجت عالفيلم ده امتى
وفى انهى قناه بالظبط
وبالمناسبه انا مدنننننننننننننننننننى باذن الله وانا مغمضه

[جعلتني مهندسا]

ياه قصة مؤثرة خالص

قلبي معاك بس ياريت ماتحكيش الحكاية دي لحد تاني علشان مشولع في نفسي والصورة بناعتك وبوبي والخودة والمنتدى كله

أنا حذرنك وقد أنذر من أنعر

[theotherface]

لا اله الا الله .............. ولا حول ولا قوة الا بالله

تعرف وانا بقرا الموضوع حسيت ان انا رجعيت تلاتة سنين كده وانا بقرا قصص ادهم صبرى للدكتور نبيل فاروق تصدق تنفع تشتغل معاه هو فى رجل المستحيل وانت فى يوميات(بوبى وام بوبى) وممكن تعملها بعد كده كذا جزء وياعم كنت رايحت دماغك ومكنتش تشترى الخوذة اللى مجنناك ديه وهو اساسا فى حد يدخل الكليه عشان الخوذه طب مانا ممكن اروح اشترى دلوقتى قفة خوذات وعلقهم فى كل حته فى الشقة .................
بس بجد اتصل بـــــــ نبيل فاروق هيحبك اوى لوعاوز نمرته معايا نمرته متقلقش بس احكيله على ننوس عين امه بوبى وهو هيفرح منك اوى ............

[Eng M-Adel]

ههههههههههههههههههههههههههههههههههه موضوع تحفه
انا ضحكت ضحك بجد رهيب
وبالمناسبه انا بضم صوتي لصوت ال 80 مليون مواطن وبقولك ارجوك شيل الصورة الرمزيه دي

[BaNZeR]

المشاركة الأصلية كتبت بواسطة BaNZeR

يبدو إنه ازمة الموضوع تكمن في تلك الصورة الجميلة

شخصية فريدة من نوعها عملت في التعليم المصري اللى محدش قدر يعمله ابداً قبله ولا بعده

زعلانين منه ليه بس

مازلت أؤكد هذا الرأي