شرح الباب الاول ( مختلف وجامد )

[الباش مهندس]

بسم الله الرحمن الرحيم
والصلاة والسلام علي المبعوث رحمة للعالمين

هنكمل مع بعض شرح الباب الاول
بس انا قولت اما اجيب الشرح من اولو علشان اللي ما شافهوش

بإذن الله النهاردة هنعمل أبسط وأسهل شرح تقدر تشوفوا علي الباب الأول
((( أصل هوا هيكون بالبلدي يا صديقي )))
أنا قلت مفيش أحلي من البلدي
عشان كدة نسمي الله ونبتدي شرحنا اللي بتمني من ربنا ان اي حد يستفيد منو ولو حرف واحد

أولاً الباب اسموا ((( بنية الذرة )))
و اعتقد ان الجواب باين من عنوانه
وفي الباب ده كدة ان شاء الله احنا هندرس الآراء اللي اتقالت علي الذرة لحد دلوقتي
وهنشوف بصراحة ناس كانت بتفتي وتالف علي راحتها ويجي اللي بعدوا يعدل علية وهكذا
كل واحد شايف حاجة من وجهة نظرة كان بيقولها وهوا مالهوش دعوي الكلام دة صح ولا غلط هوا بس كان بيفترض حاجة معينة
طيب هنبدأ كدة بالصلاة علي النبي مع :

(( فلاسفة الاغريق ))
ودول تقريباً كلامهم كان قريب من الصواب طيب هما قالو اية ؟
قالوا ان احنا لو معانا قطعة مادية ((( ورقة مثلاً )) فاحنا نقدر نجزء القطعة المادية الي اجزاء
تمام
وكمان نقدر نجزء الاجزاء دي الي اجزاء اصغر منها
حلو اوي
لحد ما في الاخر هنوصل لاجزاء مش هينفع تتجزأ خالص
وهما قالو علي الاجزاء الصغيرة خالص دي ان هي اسمها (atom )
علماً بان حرف ال (a) معناه ( لا ) وكلمة (tom) معناها ( ينقسم )
تبقي علي بعضها اية يا شاطرين ؟ ( دا سؤال للمتفوقين بس )
كدة كلام بتوع الاغريق انتهي .

نيجي بقا (( للفيلسوف ارسطو ))
المعلم ارسطو رفض كلام الاغريقين وقال ( لالالالالالالالالالالالالالالالالا) الكلام دة غلط ( تك غلط في عينك )
وراح جاب فكرة قديمة وتبناها والفكرة دي كانت بترغي وبتقول
( كل المواد مهما اختلفت طبيعتها بتتكون من اربع مكونات بس هما الماء والهواء والتراب والنار )
ربنا يشفي ........... شوفتوا العبط
وكلنا نعرف من دراستنا للفلسفة في الصف الاول الثانوي
( ارسطو دة كان الكوماندا وكلامو كان محل ثقة ومش اي ثقة بقا دي ثقة عمياء )
فعلشان كدة العلماء يا عيني صدقوا كلاموا وقالوا اية
احنا نقدر نحول المواد الرخيصة زي الحديد والنحاس لمواد غالية زي الذهب والفضة
طب ازااااااااااي ؟
قالوا باننا نغير نسب المكونات الاربعة الموجودة في كل مادة
بردوا عبط
كلام ارسطو خلص

ندخل علي العالم الايرلندي (( بويل ))
جية بويل سنة 1661 م ورفض تماما فكرة ارسطو وقالنا اول تعريف للعنصر
العنصر : مادة نقية بسيطة لا يمكن تحليلها الي ما هو ابسط منها بالطرق الكيميائية المعروفة .
كلام جميل وخلص لحد كدة .

المحطة الجاية مع العالم (( جون دالتون ))
في اول القرن التسع تاشر العالم دالتون قعد يعمل ابحاث وتجارب وحط اول نظرية عن تركيب الذرة
نظرية دالتون :
1- المادة تتكون من دقائق صغيرة جدا تسمي الذرات
2- كل عنصر يتكون من ذرات مصمتة متناهية في الصغر غير قابلة للتجزئة
3- ذرات العنصر الواحد متشلبهة
4- الذرات تختلف من عنصر لأخر
كلام جميل ومافيهوش الا غلطة واحدة وعلي فكرة خلص لحد كدة

ودلوقتي الدرس هيمتعنا مع (( اكتشاف اشعة المهبط ))
اشعة : عشان بتخرج وميض او اشعاعات
مهبط : عشان جاية من المهبط او الكاثود او القطب السالب
اصلي ؟
في سنة 1897 م العلماء بقت عمالة تعمل تجارب كتيرة جدا جدا علي ( التفريغ الكهربي خلال الغازات )
وفي معلومة بسيطة اوي بتقول
(( جميع الغازات تحت الظروف العادية من الضغط ودرجة الحرارة عازلة للكهرباء))
يعني اي غاز بطبيعتوا عازل ما بيوصلش كهربا ومن غير استثناءات
جوووووووووود
بس لو جبنا انبوبة زجاجية وفضيناها من الغاز اللي فيها
لحد ما يبقي ضغط الغاز فيها من 0.01 الي 0.001 مم زئبق
المفاجأه ان الغاز هيصبح موصل للكهرباء بس لو تعرض لفرق جهد مناسب
عاااااااااال يا عم عب العال
ولو خلينا بقا فرق الجهد دة 10000 فولت هنلاحظ انطلاق سيل من الاشعة غير المنظورة من المهبط هي دي بقا
(((( اشعة المهبط )))
واشعة المهبط دي ليها خواص كتيرة من اهمها :
1- شحنتها سالبة
2- تسير في خطوط مستقيمة زي الضوء كدة
3- ليها تأثير حراري ( يعني لو عرضنا ليها معدن بيسخن يا صديقي )
4- بتتأثر بالمجال الكهربي والمغناطيسي كمان
5- بتتكون من دقائق مادية صغيرة
6- لا تختلف في طبيعتنها او سلوكها باختلاف مادة المهبط او نوع الغاز المستخدم مما يثبت انها تدخل في جميع المواد
طيب لحد كدة يبقي تمام اوي اوي اوي ومات الكلام علي اشعة المهبط

خش بقا معايا علي العالم (( طومسون ))
احنا اتفقنا ان في سنة 1897 العلماء عملوا تجارب كتيرة اوي والعالم طومسون استفاد منها كتير واستنتج الكلام دة
قال ان الذرة هي عبارة عن كرة متجانسة من الكهرباء الموجبة مطمور بداخلها عدد من الالكترونات السالبة يكفي هذا العدد لجعل الذرة متعادلة كهربياً
وبكدة كلام طومسون راخر خلص

وهنا خلص موضوعنا الاول

وصحصح معايا اوي علشان داخلين علي (( رذرفورد ))
والعالم رذرفورد دة كلف اتنين اسمهم جيجر وماريسدن ان هما يعملو تجربة رذرفورد المعملية الشهيرة
والكلام دة كان سنة 1911 م
واحنا دلوقتي داخلين علي جزء طويل بس سهل جداً والله وعايز تركيز مش اكتر
(((( تجربة رذرفورد ))))
في الاول رذرفورد حط عنصر مشع ( الراديوم مثلاً ) جوا مكعب من الرصاص
وبعدين ؟
وبعدين سمح لاشعة الفا اللي خارجة من العنصر دة ان هي تخبط في لوح معدني
بس اللوح المعدني دة كان مطلي بطبقة من كبريتيد الخارصين
طب لية ؟
علشان كبريتيد الخارصين بيعمل وميض لما الاشعة بتخبط فية
وقدر رذر فورد ان هوا يحدد مكان وعدد جسيمات الفا المصطدمة باللوح
ازااااااااااااااااااااي ؟
ما احنا قولنا بقا من الومضات اللي كانت بتظهر علي اللوح المعدني بسبب كبريتيد الخارصين
تمام
جاب رذرفورد صفيحة رقيقة جدأ من الذهب وحطها بين العنصر وبين اللوح المعدني
علشان تعترض مسار الاشعة
وطلع في اخر التجربة بمشاهدة واستنتاج
وده الطبيعي
طب اية هي المشاهدة ؟
1- معظم جسيمات الفا ظهر اثرها في مكان واحد قبل وبعد وضع صفيحة الذهب
2- نسبة قليلة اوي هي اللي ما قدرتش تعدي من الصفيحة ورجعت في عكس مسارها تاني
3- ظهرت بعض ومضات علي جانب المكان الاول ( يعني انحرفت عن مسارها )
واية هي الاستنتاجات ؟
1- فاكرين طبعاً ان دالتون وطومسون قاللو ان الذرة مصمتة
بس رذرفورد من خلال التجربة دي اثبت ان الذرة فيها فراغ
( ودي الغلطة اللي كانت في كلام دالتون )
2- الذرة فيها جزء كثافتو كبيرة بس حجموا صغير جداً
( اطلق علية النواة )
3- لا بد ان تكون شحنة النواة مشابهة لشحنة جسيمات الفا الموجبة
( علشان كدة تعارضت معها )
وبكدة تكون تجربة رذرفورد خلصت
وارجوا ان انتو تراجعوها تاني علشان تتفهم اكتر
وفي حاجة تاني رذرفورد عملها
اللي هي (( نموذج ذرة رذرفورد ))
رذرفورد قال الكلام اللي جاي دة :
1- الذرة :
الذرة رغم ان هي صغيرة جدا جدا بس معقدة التركيب اوي
وتشبه في تكوينها المجموعة الشمسية
يعني النواة هي الشمس
وتدرو حولها الالكترونات زي الكواكب
ها تمام ولا ؟
2- النواة :
اصغر بكتير اوي من الذرة
وكمان في مسافة كبيرة بين النواة والمدارات الالكترونية
وتتركز في النواة شحنة موجبة ومعظم كتلة الذرة
خلصت النواة
3- الالكترونات :
لو جبنا الالكترونات جمب النواة هنلاقي كتلتها ضئيلة جدا جدا
الشحنة السالبة اللي علي كل الالكترونات تساوي الشحنة الموجبة اللي علي النواة
( ودة اللي مخلي الذرة متعادلة كهربياً )
الالكترونات كمان بتدرور حول النواة في مدارات خاصة برغم من قوي التجاذب الشديدة اللي بينهم
طب ازااااااااااااااااي ؟
اصل في قوي تانية بتتعادل مع قوي الجذب دي واسمها قوي الطرد المركزي
( واحنا درسنا الكلام دة في اولي )
وبكدة نكون قضينا علي كلام رذرفورد خالص

دلوقتي مع العالم ((ماكسويل ))
او
دلوقتي مع (( الاعتراض علي نموذج ذرة رذرفورد ))
وزي ما قولنا في اول الموضوع
كل واحد بيفترض افتراض ويجي اللي بعدوا يعترض علي كلاموا
ويفترض الافتراض اللي في دماغو هوا
طيب ماكسويل قال اية
ماكسويل استند في كلامو علي ميكانيكا نيوتن
وميكانيكا نيوتن كانت بتقول :
(( اذا تحرك جسم مشحون بشحنة كهربية في مدار دائري فانه يفقد جزءاً من طاقتة تدريجياً علي هيئة اشعاعات
مما ينتج عنة صغر نصف قطر مدار الجسيم المتحرك تدريجياً تبعاً لنقص الطاقة ))
وعشان نفهم الكلام دة
كإن واحد بيلف الاستاد جري مثلاً ( عايز يخس يعني )
وفي في وسط الملعب بتاع الاستاد كرسي
فهو هيعد يلف يلف يلف
وطول ما هوا بيلف هيلاقي نفسوا بيقرب من الكرسي
ودة عشان هوا بيفقد طاقتوا تدريجياً وبيشطب بنزين بمعني اصح
وهيلف لحد لما يوصل للكرسي في النهاية
وهوا دة الكلام اللي ماكسويل قاللو
قال ان نموذج ذرة رذرفورد قال
ان الالكترونات بتدور حول النواه
اصلي ؟
طب ما الالكترونات دي هتفضل تفقد طاقة تفقد طاقة
وبعدين يفضل نصف قطر المدار يقل تدريجياً
لحد ما الالكترونات تدخل جوا النواه
( يعني الذرة هتتلاشي )
ودة مش موجود في الواقع
بس طبعاً الاعتراض دة كان غلط
لان ماكسويل ما كملش تعليمو ولا اية مش عارف
يا جماعة
( ميكانيكا نيوتن دي بتنطبق علي الاجسام الكبيرة بس )
زي الاجرام السماوية يعني
ودة اللي هيحصل فعلاً ان الاجرام دي هتدخل جوا الشمس
بس دة هيبقي يوم القيامة
وبكدة كلام الاستاذ ماكسويل خلص

وزي ما الدرس متعنا مع اشعة المهبط
دلوقتي هيمتعنا بردوا مع ( الطيف الذري )
من الاخر الطيف الذري دا حل الغاز كتيرة اوي
واللي اكتشفوا كان العالم الدينماركي نيلز بور
وكمان خد علية جايزة نوبل سنة 1922
طيب اية هوا الطيف الخطي دة ؟
دة صفة اساسية ومميزة لاي عنصر
( يعني مفيش عنصرين طيفهم الخطي زي بعض )
(زي بردوا مفيش شخصين بصمتهم زي بعض )
طيب امتا نقدر نحصل علي الطيف الخطي دة ؟
لما نيجي نسخن الغازات او ابخرة المواد تحت ضغط منخفض الي درجات حرارة عالية
فانها تشع ضوءاً لما نيجي نفحصوا بالمطياف نجدة مكون من عدد محدود من الخطوط الملونة
الخيوط دي اسمها
(( الطيف الخطي ))
وبردوا في طريقة تانية اسمها
( كشف اللهب )
بتقول
لو جبنا سلك بلاتيني وغمسناة في حمض الهيدروكلوريك المركز
( علشان ينضف )
وبعدين يتم غمسه في الملح المجهول
وبعدين نعرضوا للهب بنزن غير المضئ
نلاقية اكتسب اللون المميز لكاتيون العنصر
وفي عندنا امثلو لاربع عناصر بالونها
الليثوم قرمزي
الصوديوم اصفر ذهبي
البوتاسيوم بنفسجي فاتح
السيزيوم ازرق بنفسجي
وانتوا عارفين العلماء ازاي عرفوا ان الشمس بتتكون من غازي الهيليوم والهيدروجين
( عرفوا عن طريق دراسة الطيف الخطي لاشعة الشمس )

واشكركم لحسن انتباهكم
علشان انا ايدي وجعتني من كتر الكتابة
ونلتقي في اي يوم تاني
نكمل فية مع بعضنا الباب اللي مش عايز يخلص دة
وكل عام وانتم بخير

[الباش مهندس]

يلا عايزين ردود جامدة كدة تشجع الواحد

[Mostafa Mohamed Keshta]

هذ الشرح غير موفق لان حضرتك جاى تهذر مش تفيد الناس

[الباش مهندس]

علي العموم انا شايف ان دي وجهة نظر مش اكتر ولازم تحترم
بس انا عايزك تدخل علي الموضوع اللي بعنوان
(( الدرس الاول في حدوتة ))
وتشوف الردود كانت عاملة ازاي
واحنا عايزينك تشرح الباب الاول في موضوع
بس ياريت مايكونش هزار ويكون بجد علشان كل الناس تقدر تستفيد منو
ومتقبل مرورك يا عثل

[الباش مهندس]

مفيش تاني ولا اية ؟

[el_magic]

جـــامد يا عمدة

وكل واحد ليه وجهه نظر

[الباش مهندس]

المشاركة الأصلية كتبت بواسطة el_magic

جـــامد يا عمدة

وكل واحد ليه وجهه نظر

ماشي يا عم الساحر

[مستر// فيكتور بخيت]

المشاركة الأصلية كتبت بواسطة الباش مهندس

ب
وبردوا في طريقة تانية اسمها
( كشف اللهب )
بتقول
لو جبنا سلك بلاتيني وغمسناة في حمض الهيدروكلوريك المركز
( علشان ينضف )
وبعدين يتم غمسه في الملح المجهول
وبعدين نعرضوا للهب بنزن غير المضئ
نلاقية اكتسب اللون المميز لكاتيون العنصر
وفي عندنا امثلو لاربع عناصر بالونها
الليثوم قرمزي
الصوديوم اصفر ذهبي
البوتاسيوم بنفسجي فاتح
السيزيوم ازرق بنفسجي
وانتوا عارفين العلماء ازاي عرفوا ان الشمس بتتكون من غازي الهيليوم والهيدروجين
( عرفوا عن طريق دراسة الطيف الخطي لاشعة الشمس )

كده انت خلطت بين الطيف الخطى والطيف المستمر-- وده مش كويس

[mohamedashry]

علي فكره والله انت استاذ جامد وبتسهل الموضوع وسيبك من اي حاجه انت ممتاز

[shofolofa]

ألف الف الف الف الف الف شكر ربنا يعلى مراتبك هههههههه

[advdk]

ربنا يباركلك يا رب بجد انا فهمت كويس جدا جدا و هاروح اذاكر بقى

[محمد السيد وجدي قباري]

مع الأحترام الشرح جميل ولكن هناك خطأ علمي قوي وضحه لك ا فيكتور واحب ابسطهولك يا أبني بص
الموضوع الفرق بين الطيف المستمر والطيف الخطي كبير ولكن اهم ما يميز الطيف المستمر انه ينتج من الأثارة المباشرة(لون اللهب عند الأثارة ) وبدون تحليل طيفي اما الطيف الخطي لا بد من أستخدام مطياف واستقبال الناتج علي فيلم نري عدد من الخطوط الملونة
ثانيا الطيف المستمر يميز المواد الصلبة كالليثيوم والكالسيوم والصوديوم أما الطيف الخطي فينتج من الغازات او الأبخرة (بمعني لو سلئل أو صلب وعايز تشوف طيفه الخطي لازم تبخره الأول ) وتضعه في انبوبة التفريغ وتعرضه لشرارة أو حرارة أرجو ان تكون فهمت الفرق
ما عدا ذلك فشرحك جامد و متميز ارجوك استمر علشان نصلحلك اي معلومة فهمها غلط ونستفيد من اسلوبك من جهة اخري
انا متوقعلك انك حتبقي معيد شاطر

[leprince]

بارك الله فيك

[تربوي عجيب]

بصراحة لازم اتوجه لك بالشكر الجزيل والاحترام العميق على بساطة شرحك الجميل ما شاء الله عليك .
ولو كان هناك اي خطأ علمي فهو خطأ وارد من اي مدرس مش منك بس . والحمد لله سنجد حوارا فيما بيننا مثلما فعله الأستاذ فيكتور يصحح لنا المعلومة ويعمقها في اذهاننا . فلكم مني جزيل الشكر والاحترام وادعوك للاستمرار بطريقتك المميزة

[الحب التائه]

بجد الشرح جميل اوى بس ممكن تعيد شرح الطيف الخطى والطيف المستمر علشان انا مش فهمه