خــواطــر سـنـه أولـى جــامـعـه

[Bent 3bdo]

• ياترى هطلع بعريس عدل؟

وطبعا اللبس والذى منه مش لله ف لله .. يمكن أطلع لى بعريس عدل .. يعنى تبقى شهادة وجوازة .. من باب اختصار الوقت والجهد .. وبعدين أي بنت بتدخل الجامعة النهاردة بتطلع مخطوبة أو مشبوكة أو متجوزة ويمكن تطلع ومعاها عيال .. مش بعيييد .. يامسهل .. وطبعا الصبيان اللى معانا مينفعوش للمشروع ده لأنهم بالطبع شوية عيال لسة قدامهم مشوار طويييييييييل .. تخرّج وجيش وشغل .. دا طبعا إذا لقى فرصة عمل .. واذا لقى .. موت ياحمار على ما يكون شقة ويفرشها .. حلنى بأه .. يعنى الإرتباط بيهم حوار فاشل من الآخر .. لكن مفيش مانع أخوه الكبير ، خاله ، ويمكن أبوه يبقى عريس لقطة .. على الأقل كون نفسه وجاهز من مجاميعه .. ويقدس الحياه الزوجية .. ويمكن الحظ يضرب وطلع بدكتور من الكلية .. محدش عارف .. ابعت يارب

• الزى المدرسى – البالطو :

وكلة كوم واللبس كوم سمعت إن احنا بنلبس البالطو فى المعامل آل إيه – دكاترة بقا – زمان فى المدرسة كنا مبنعرفش طريق المعمل والزى مبنغيروش غير فى الحفلات وف حصة الألعاب . ياترى شكلى فى البالطو هيبقى إيه ؟ أكيد دكتور ملو هدومه . أول حاجه هعملها أول ملبس البالطو هاخد صورة بيه عشان أوريها لبابا وماما وأقولهم : افرحو ابنكم بقا دكتور.ههههههه

• الطابور وتحية العلم

كنا زمان نصحى بدرى بالعافية عشان نلحق الطابور وكان ياويله اللى يتأخر عن الطابور وتحية العلم كان الأستاذ جمال يديلة طابور ذنب رافع إيديه ووشه للحيطة ويمكن يخليه يعمل شقلباظ – زرع بصل – لمدة حصة كاملة .. مش بقولكم كانت أيام الله لا يرجعها. الحمد لله إن الجامعة مفيهاش لا طابور صباح ولا علم كمان ..

• الفصول والمدرجات والحوش والفسحة :

كانت تالته ثانوى فى مدرستنا 5 فصول كل فصل فيه سبعين طالب كل تخته كان فيها 3 طلاب سمان عشان أجيب كشكولى من الشنطة اللى بين رجليه لازم زميلى اللى على طرف التختة يقع على الأرض عشان كده كنت بقعد دايما جوه . وكان فيه تنافس بين فصول سنة تالته وكانت تالتة أول تغلب فصلنا رغم إن الفصلين كانو فصول متفوقين عشان كده كانت أول ماالفسحة تيجى كنا بننزل فيهم ضرب فى الحوش وفين يوجعك وفى الآخر نجمع عند المدير عشان ناخد الطريحة اللى فيها الشفا – تشخيصها ورم فى القفا وتمزق فى أربطة الجذمة وتهتك فى ألياف الشراب وضمور فى مصروف الأسبوع الجاى . ياخسارة كانت حاجات لذيذة وذكريات حلوة ياترى هشوف أحلى منها . أولا مفبيش فصول .. فيه مدرجات تقعد فيها الدفعه كلها .. يعنى مفيش تنافس بين الفصول .. وبالتالى مفيش خناقات .. إيه الخنقة دى .. ومفيش حوش .. فيه بداله جنينة المجمع الطبى .. كويس عشان نشم الورد .. ومفيش فسحة .. لو حبيت آخدها لازم أطنش محاضرة أو سكشن .. مش حلوة الحكاية دى .

يتبعـــ

[Bent 3bdo]

• الرحلات والأنشطة وحصة التربية الفنية والألعاب

كانت أحلى حاجة فى المدرسة حصة الأنشطة .. كنت بموت فى الرسم وبعمل كاريكاتير على الشخصيات البارزة مثل السيد مدير المدرسة والمدرس اللى بحبة من حشايا قلبى .. وتكون أمه داعيه عليه .. أعمل له الكاريكاتير اللى فيه الشفا .. وكل الفصل ينزل ضحك .. ربنا يسامحنا بأة .. كنا طايشين .. ياترى هتبقى فيه حرية أوى كدا فى الجامعه للتعبير عن الرأى .. الله أعلم .. طب هناك المدرسين كانو طيبين وبيعتبرونا ولادهم ويقولو خليهم يعيشو سنهم – هم صحيح أحيانا كانو بيدونا الطريحة إياها بس بردو كنا بنحس إنهم خايفين علينا وكنا عارفين إن احنا أشقيا أوىىى بس هما كانو بيسيبونا نعيش سننا.. ياترى الدكاترة هيعاملونا كده واللا هيبقو متكبرين عشان هما دكاترة كبار ولهم وضع اجتماعى مميز .. ربنا يستر ويجعل كلامنا خفيف عليهم .. سمعت من صحابى الأكبر منى إن فيه طالب فى إحدى الكليات حب بنت دكتور من الدكاترة ولما الدكتور عرف فضل يسقطه فى مادته كذا سنة ورا بعض لحد مالواد جت له حاله نفسية وحول كلية نظرية .. لازم أستفيد من الدروس العظيمة دى ومهوبش ناحية بنت أى دكتور .. والأحسن آخدها من قصيرها ومهوبش ناحية أى بنت خالص لحسن تطلع قريبة الدكتور من بعيد ويمكن تطلع جارته .. الطيب أحسن .. بلاش نمشى جنب الحيط.. الأحسن نمشى جوا الحيط .. عاوزين ناخد البكالوريوس ياعم ونفرح أهلينا بيه. • الدين والتربية الوطنية طبعا مفيش دين فى الجامعه .. ولا تربية وطنيه .. ياخسارة .. كانت مواد مضمونه .. كنا بننجح فى الدين بخطب الجمعة بس من غير مذاكرة .. وكنا بننجح فى التربية الوطنية بالفكاكا أو بنشرة الأخبار وأهو كان الحال عال العال ومية مية. ياترى فيه مواد روشة كدا فى الجامعه ولا كله جد ف جد ربنا يستر.

• الدراسة باللغة الإنجليزية

فيه حاجة مموتانى من الرعب وقلقانى جدااااا .. كان عندنا الإنجليزى مجرد مادة وكنا شاطرين فيها كمان . بس المشكلة دلوقتى إن الدراسة نفسها بالإنجليزى .. يادى الحوسة ياولاد .. يعنى الدكتور هيفضل يرطن بالإنجليزى طول الوقت .. ويمكن يكح بالإنجليزى كمان .. طيب هنفهم إزاى .. ولو فهمنا نجاوب إزاى .. ياوقعة سودة .. إيه الحل ؟.. اللى محيرنى .. ويمكن يصبرنى .. اللى دخلو قبلنا نجحو إزاى فى الظروف المعنكلة دى ؟.. أكيد لها حل .. أبقا أسأل بتوع أولى عملو إيه ؟؟ .. تبقى نكته لو قالولى نجحنا بالغش .. هههههه آخد كورس انجليزى احتياطى .. بس الإنجليزى فى الكلية مصطلحات علمية .. دى وقعه مايعلم بيها إلا ربنا .. ربنا يستر.

• الندالة وخزى العين فى المذاكرة

طيب هوا الواحد هيستندل مع اصحابه فى المذاكرة زى ماكنا بنعمل فى ثانوى .. يعنى لما زمايلى يسألونى ذاكرت واللا لأ أخزى العين وأقولهم دنا ضايع خالص ومعرفش أى حاجة ف أى حاجة . دنا كنت عيان امبارح وماما كان عندها الحصبة أول امبارح وكنت سهران جنبها .. وأول أول جدى خوفو مات .. والشهر اللى قبله جدى خفرع مات .. والحقيقة إنى كنت طاحن نفسى من المذاكرة .. وآخر السنة أجيب الدرجة اللى هيا .. الغريب إن كله كان بيعمل كده .. وكله كان عارف إن كله بيعمل كده .. فعلا شغل عيال .. يمكن نبقى جدعان شوية فى الجامعة ونبطل حركات ثانوى النص كم دى .

• الكتب الخارجية والمذكرات والكورسات :

وياترى هنذاكر بردو من كتب الوزارة واللا من الكتب الخارجية .. هههههههه وزارة إيه وخارجية إيه ياعبيط .. إنتا لسه عايش فى دور الطفولة .. مذكرات جامعية من تأليف دكتور المادة وسعرها فى متناول الجميع يعنى على متتخرج كدا هنكون شحتنا بأمر الله .. ده طبعا إن كنا ناويين نذاكر من الأساس . والداهية التقيلة إن بيقولو أن الكورسات فى الكلية على ودنه .. والكورس بشىء وشويات .. ياللهول .. الله يكون فى عون بابا .. هحاول أكون محترم وأخلى الكورسات فى أضيق الحدود ويمكن أحضر المحاضرات كلها وأوفر الكورسات .. دا طبعا إن مكنتش هاخد فلوسها من بابا وأصرفها فى حاجات مفيدة تانية زى اللبس والفسح . وربنا يخليلنا بابا ومينتحرش على سنة رابعة .

يتبعـــ