لطلبة 3 ثانوي

[أ:محمودبركات]

....
- مبدأيا فاضل حوالى 50 يوم على الامتحانات , تقدر تخلص منهج الثانوى وتراجعه , لسة قدامك وقت طويل جدا تعيد حساباتك وترتبها , أعرف ناس كانت بتخلص المنهج فى ال50 يوم دول )عن تجربة(, وناس كانت بتفتح المنهج لأول مرة على شهر 4 ودخلت هندسة عين شمس و اللي راح كلية إعلام أياً يكن بقي, لسة الوقت طويل لو مابتنزلش دروس ابدأ انزل , لو فايتك حاجة فى المنهج تقدر تلمها بس ماطنش عشان الوقت بيعدي بسرعة من غير ماتحس
....
نظام البوكلت مش صعب أغلبية الناس اللى أعرفها اللى جربوا البوكلت كانوا بيشتكوا بس من ضيق الوقت لأن الاسئلة كثير والوقت قليل يبقا ايه الحل ؟! , البوكلت مش عايز طالب يدخل يقرأ ورقه الاسئله فى 10 دقايق ويبدأ يكتب رقم جلوسه واسمه فى 5 دقايق ويضيع وقته , لا البوكلت عايز طالب متمرن ومركز كويس أول مايستلم الورقة يبدأ يحل , قدامه سؤال صعب يركنه للآخر يحل السهل الأول والصعب يفكر فيه بعدين , هتسيب كل الأسئلة وتمسكلي فى السؤال الصعب كدا الوقت هيخلص
ركز على النقط دى كويس جدا
1- ابعد عن الفيس بوك " دى أول نقطة وأهم نقطة " قلل منه جدا
‏2-سد ودنك لأي كائن هراي عمال يحبطك ويقولك الامتحانات هتيجى صعبة , ده واحد محبط وعايز يحبطك معاه .
3- صالح أمك وأبوك لو مزعلهم صدقنى دعوة منهم لربنا ممكن ترميك فى الكلية اللى أنت عايزها
4- اوعى تفكر تذاكر مع صحابك , والله ماهتذاكروا .
5- قلل من الكافين شاى قهوه نسكافيه الحجات دى كترتها بتضربلك أعصابك وتخليك تنام بدل ماتصحى
6- ماتهتمش بكتاب دليل التقويم اوى ده كتاب اللى حاطينه عقليات متخلفة , كتاب أسئلته صعبة و مش بيجى منه حاجة إلا فى المواد الادبية شوية
7- اهتم بكتاب الوزارة ده أهم من المدرس نفسه لانه فى امتحانات بياخدوا الاسئلة copy&paste من كتاب الوزارة
8- ابعد عن العلاقات العاطفية كلها هتوديك فى داهية لا هتعرف تركز فى مذاكرة ولا هتحقق مستقبلك وماتقوليش أصل حبيبتى بتشجعنى, ماحدش هينفعك غير نفسك
9 - اهتم باللغات جدا عربى انجلش لغة تانية , دول امتحاناتهم مضمونه بنسبه 95% ولازم تقفلهم عشان تعرف تنقص براحتك فى باقى المواد " فى ناس بتعرف تقفل العربى "
10- لازم تقعد على المكتب مش أقل من 6 ساعات يوميا متقطع بحيث تقعد ساعة وتريح ربع ساعة وترجع تكمل وهكذا .
‏11 - ظبط نومك كويس وريح مخك واديله الفتره اللى محتاجها " 8" ساعات ويستحسن يكونو من 10 بليل ل 6 الصبح .
- هى سنه اكتئاب صحيح بس ماتفقدش الامل ومالكش دعوة بحد وسد ودنك للاشاعات وكلام الناس وقرايبك , ممكن واحد يكون بدأ يذاكر من شهر 9 وجه على شهر 3 ووقف وساب المنهج وواحد مابدأش خالص ويجى على شهر 4 يبدأ ويدح ويجيب مجموع كل ده توفيق من عند ربنا ,مافيش حاجة اسمها طالب غبى وطالب ذكى لأن عندهم نفس المخ بس فى واحد بيشغله ويستغله وواحد لا .
- وفى النهاية كل ماتزهق وتكره المذاكرة حط الكلية اللى بتحلم بيها وتعب اهلك قصاد عينك وافتكر فرحه امك وابوك بيك لما تجيب مجموع وشوف هل ده يستاهل انك تحارب عشانهم ولا لا .
اسعي وخليها ع الله
الله معكم ‏منقول

[الاستاذ رفاعى]

جزاكم الله خيرا