استفسار بخصوص هندسة الكترمكانيك ssp

[AhmedAkram]

هل في فرص عمل في مصر مناسبة للتخصص ولا اخرتها من غير شغل او فني تكيف ؟
وايه نظام الssp ؟ من مميزات وعيوب

[Seif Albaz]

المشاركة الأصلية كتبت بواسطة AhmedAkram

هل في فرص عمل في مصر مناسبة للتخصص ولا اخرتها من غير شغل او فني تكيف ؟
وايه نظام الssp ؟ من مميزات وعيوب

السلام عليكم "

تخصص الالكتروميكانك .. هو خليط ما بين كهربا وميكانيكا وده ظاهر من الاسم طبعآ
ده اسمه العلمي .. وفي الاوساط الهندسيه بيتقال عليه " ميكاترونكس "

انا عن نفسي خريج قسم عماره ..

احب اقولك ان كلنا اخرتنا من غير شغل xD

بعيدآآ عن الهزار ..

تخصص ميكاترونكس لما بتدرسه طبعآآ بتدرس فيض من العلوم الرياضيه والنظرية .. زيه زي ميكانيكا او كهربا
بس الفرق انه بيخليك تركز في حته .. تصنيع الروبوتات .. لان الروبوت عباره عن دايرة كهربائيه وتصميم ميكانيكي .. وده الاساس في الميكاترونس .. عامآآ .. والروبوتات مش شرط تكون "انسان آلي" .. فكلمة روبوت باختصار هي التحكم عن بعد .. من الات ذكيه عامآآ ..

انا كان نفسي ادخل القسم ده جداا .. لان الدراسه مشوقه جداا .. وصعبه جدااا جداااا ..

هو تخصص حساس .. فاكيد نادر شغله جدا .. كل الي تخرجوا منه وانا اعرفهم سافروا على طول والصراحه بقوا حاجه كبيره اوي في اليابان وامريكا وغيره ..

بلدك مبتقدرش العلم .. اي علم ..

فني التكيف الي بتقول عليه ده مثلآ برا ممكن يبقى شغله اهم و"اغلى" من الدكتور نفسه ..

كانوا بيقولوا زمان كليات القمه وكليات عاديه .. دلوقتي كله عادي والي يعرف يقلب زرقه يشتغل ..

انا مبقولكش ده علشان تتعقد ..
انا عايزك تبص من منظور جديد ..
مش قضية فلوس (وكأنها يعني xD ) .. ولا قضية رغبات اهل مثلآ ولا انك لقيت مثال ناجح فعايز تبقى زيه ..

القضيه قضية تميز .. وحب للمجال ..
لو انت لسه مدخلتش هندسه .. ف في سنه اعدادي .. هتعرفك بالاقسام واختار الي تحبه ! واختار الي تحبه ! واختار الي تحبه !! .. بعيدآآ عن اي حاجه بقآآ ..

لو هنتكلم بقاا بواقع الواقع المرير .. فمفيش ولا قسم شغال فعلآآ غير قسم مدني ..
ومعنى شغال انو نسبة كبيره اوى بتطلع تشتغل على طول

لكن الواقع والبلد وغيره واي عامل ممكن فثواني يتغير قدام قدرة الله عز وجل ..

.
.
.

الـ البرامج العلمية المتخصصة "ssp"

الي هي منها الميكاترونس ..

انك في البرامج العلمية المتخصصة بتدرس نفس مواد الكلية العاديه ونفس الدكاتره والمعيدين ...
بس ده ميمنعش ان في فرق مواد بيصل لحوالي 8 مواد بينك وبين الاقسام العاديه

والمعامل هي معامل الكلية العاديه والاماكن مش واضحه الملامح لانك بتدرس تقريبا في كل مباني الكلية



المميزات

1-الدراسه بنظام الساعات المعتمده
وده نفس نظام الدراسه في الجامعات الخاصه ونظام التقدير هوا نظام gpa
والنظام ده بيتميز بانه بيديك الفرصه تختار موادك بنفسك وتدرس في الصيف بحيث تخفف الحمل وتتقي شر انك تفضل في الكلية كتير ... اضافه الي ان النظام ده من مميزاته انه بيريح الاعصاب في موضوع الامتحانات .. بتاخد درجاتك اول باول وبسرعه جدا وبيكون ليك الحق في مراجعه ورقة اجابتك بسهولة ومفيش سلطوية الدكاتره في الامتحانات زي الاقسام العاديه


2-العدد
من مميزات الاقسام دي ان العدد قليل جدا بيتراوح في المحاضره ما بين 40 ل 50 وفي السكشن ما بين 20 ل 25 ودي ميزة كبيره جدا للناس اللي نفسها تتعلم وبيعمل جو اجتماعي بينهم وبين المعيدين والدكاتره وبيديهم فرص كتير .. بس ده للناس اللي نفسها تتعلم بجد


3-الانجليزي
المفروض ان لغه الدراسه هي الانجليزي والدراسه بتكون من مراجع دولية


4-الرغبه في تخصص معين
بعض الناس بيكون عندهم رغبه في انهم يتخصصوا من البدايه ويريحوا نفسهم من وجع قلب اعدادي ودي ميزة بتوفرها البرامج بحيث انك لو نفسك تبقا مهندس كمبيوتر فده موجود .. ولو نفسك تكون في مجال البترول فده موجود ... ولو نفسك تبقا مهندس بريمو كهربا وميكانيكا فده موجود ... بس بشرط تخلص النيه وتدرس بضمير ومتتدلعش زي ناس كتير اتدلعت لما دخلت الاقسام دي


5-بتعرف تطالب بحقوقك
بتختار دكاترتك بمزاجك وتقدر تقدم شكاوي في المقصرين وليك الحق في استبدالهم وبتقدر تغير حاجات كتير غلط بس لو قدرت تعمل اجماع طلابي وتتعب نفسك شوية .. بس الاجماع الطلابي ده بيبقا صعب شوية لان الامور بتبقا نايمة



الممميزات دي قصادها عيوب زي

1-انك بتدفع فلوس اكتر من الخدمات اللي بتخدها بكتير

2-مفيش معامل ومدرجات مُخصصة لطلاب البرامج بس يمكن في الفترة الاخيرة اتعمل مدرجات
جديدة للبرامج ..والمعامل الخاصة بالبرامج العلمية في الكلية تكاد تكو معدومة

3-سوء الاداره .. الاداره الموجوده مش قادره تتعامل مع نظام الساعات المعتمده وفي بعض الاحيان بتفسده

4-المزاج ... الاداره بتمشي حاجات كتير في نظام الدراسه واللايحه بمزاجها

5-لو عندك ميل 10% انك تكمل في اعدادي وعينك علي قسم عادي فبلاش تدخل برامج عشان ميحصلش اي نوع ندم بعد كدا ولو حاسس انك مش هتقدر تتكيف مع العدد الكبير وهتتبهدل في اعدادي يبقا ادخل برامج وحول قسم عادي بعد اول سنة لو ليك ميل في العادي

6-بعض الدكاتره والمعيدين بيتعمدوا يظهروا البرامج في صورة وحشه لاسباب غير معلومة

7-في بعض الاحيان الكلية بتعامل البرامج علي انهم سبوبه


بعض الملحوظات الهامه :


بامكان اي طالب انه يقضي اول سنه في اعدادي هندسه او في البرامج ويحول السنه اللي بعدها للطرف التاني وبيتعمله مقاصه بياخد مادتين زياده بالكتير ...... ولا يحق للطلبه اللي شايلين مواد من اعدادي يدخلوا البرامج


وفي النهايه لو هتدخل برامج لازم يكون قلبك جامد وبتقدر تطالب بحقك



وبالتوفيق لنا ولكم "