|
||||||
| اجتماعيات طالب منتدى خاص بالطلاب لتبادل المعارف والحلول للمشكلات التعليمية والمسابقات والألغاز الهادفة |
 |
|
|
أدوات الموضوع | انواع عرض الموضوع |
|
#1
08-08-2017, 06:58 PM
|
|||
|
|||
اكبر تجارب طلاب وطالبات الثانوية العامة مجمعة فى موضوع واحد .. ادخل ولن تندم
بسم الله الرحمن الرحيم
فى الموضوع ده ان شاء الله حاولت اجمع اكبر كمية لتجارب طلاب وطالبات الثانوية العامة  المواضيع هتكون بالتتابع عشان محدش يزهق ملحوظة... التجارب منقولة من مواقع التواصل الاجتماعى (الفيس بوك او تويتر او جوجل ) اول تجربة ▼ اجمع هنا يا دفعة✊ .. البوست طويل شويه بس هيفيدك✋ كل واحد فينا ليه تجربة مع الثانوية العامة مر فيها بتجارب كتير .. والبوست ده هتكلم معاكم فيه عن تجربتي الشخصية .. أنا كنت أدبي وعايزة أدخل كلية الألسن .. بس كنت بلاقي تعجيز من اللي حواليا وكمية طاقة سلبية رهيبة .. تخيل أنت قاعد فـ مكان اللي فيه بيقولك كلام طول الـ ٢٤ ساعة أنك مش هتوصل وأنك مش هتجيب المجموع اللي أنت عايزه ! .. كان بيتبصلي اللي هو مش مستواكي أنك تعدي ال٩٥٪ .. وبصراحة أنا فعلاً مجبتش مجموع عالي أوي كده كان من ساعة الإعدادية تقريبا😂✋ .. بس كنت بقول لا ديه سنة مختلفة ومش هخالف قانون الطبيعة .. أصل أنا مش هتعب وهجتهد وهتقي الله وفـ الآخر ربنا مش هيحققلي حلمي .. المشكلة أن التعجيز كان من أقرب الناس ليا .. كان من داخل العيله نفسها! .. بس سبحان الله ربنا خلق جوايا حاله من العند الإيجابي كده .. كنت دايما حاطة قدامي ورقة كاتبه فيها Alsun Isa 👌😉 كان الكل بيتريق عليا .. بس مكنتش بتدايق بالعكس كان حاجة بتشجعني دايماً .. كنت كل ما أروح ع الموب أفتح أي App أفتكر أن مينفعش أضيع وقت وأن الترفيه ده ليه مواعيد محددة مينفعش أخترقها كده وأتحجج .. كان فيه بعض المواد مش بقفلها أو بجيب درجات عالية وده كان بيثبتلي مع الوقت أنه فعلاً الي حواليا معاهم حق .. وكان الشيطان دايما بيعمل شغله😂✋ ويقولي يعني كل اللي حواليكي دول مش شايفينك هتجيبي المجموع ده و الدرجات وأنتي بردوه بتكابري .. بس كنت دايماً واخدة الموضوع ده تحدي لأن كان نفسي أدرس لغات لأنها الحاجة اللي بستمتع بيها ومش بمل منها .. الضغط ده معالوقت مكنتش باخده فالأعتبار .. ولما كنت بسمع الجمل المشهورة بتاعت ( ابقي قابليني لو عديتي حتى ) وخصوصاً إني أدبي والنظرة المتأخره بتاعت أدبي فاشلين والكلام ده إلخ .. كان عندي ثقه بالله عالية وكنت دايماً بدعي ربنا كده من قلبي (وأقوله يارب أدخل ألسن انت عارف قد إيه هيفرق معايا إني أدرس الحاجة اللي بحبها) .. المشكلة الثانية الي قابلتني من نص السنةإني لقيت ناس صحابي بدأو يلتفتو لحاجات تانية غير الدراسة وبالنسبالهم التركيز الأول والأخير مش عليها .. أنا كنت ممكن أكمل معاهم وأقول مانا ماليش دعوة ما أنا ماشيه صح ناحية هدفي .. بس كنت صريحه بزياده مع نفسي .. الغلط بيجر غلط .. ع الأقل هياخد جزء من تفكيرك فحاله ومشاكله .. كنت بقول لأ الجزء ده أنا أولى بيه فـ مذاكرتي والمواد اللي عندي .. كنت بحضر الدروس لوحدي حتي لو قاعدين فـ نفس المكان كنت بحاول يكون إختلاطي قليل بيهم .. وخلصت السنه وطلعت النتيجه ولقيت نفسي جايبة فوق ال ٩٦٪ .. ودخلت ألسن😌 وبالعربي كده خرست وكسفت أي حد كان بيبصلي بصة أستهزاء✋ طب أنتِ بتقوليلنا الكلام ده ليه !! عشان عايزة أقولك لو كل الاي حواليك معندهمش إيمان بيك وبقدراتك وبطاقتك وأنك قادر توصل .. متسمعلهمش هتوصل .. لو كان اللي بيقولك كده أهلك .. بردوه هتوصل أن شاء الله👌 لو شايف إن صحابك هيعطلوك لو بنسبة ١٪ بلاش منها الصحوبية .. وصدقني انت كده مش بتاع مصلحتك ولا كل ده .. أنت إنسان طموح عايز يحقق حلمه مهما كان .. والصاحب الي مش واقف معاك عشان توصل لهدفك وبيرجعك لورا صدقني ده ميستحقش يكون صاحب  ------------------------------------------------------------------- كلمة شكرا تكفى لأعرف اننى على الطريق الصحيح 
|
|
#2
08-08-2017, 07:06 PM
|
|||
|
|||
ثانى تجربة
▼ السلام عليكم ورحمه الله وبركاته اولا كده ازيكم يا طلبه ثانوي انا الحمدلله داخله اهوه علي اولي طب عين شمس حبيت افيدكم واقولكم على شوية نصائح . اولا كده النظام اتغير بس هقول المذاكرة ازاي وطبعا لازم يبقي في وعي و تنظيم وقت 1/اولا وقبل كل شئ توكلوا علي الله خلي علاقتكوا بيه كويسه صلوا انا عن نفسي كنت بقرا ربع قران قبل المذاكرة انتوا اقروا ولو ايتين بجد هترتاحوا 2/متخافوش ابدا من ماده مهما كانت ومتخلوهاش تهزيمكوا بل ع العكس اهزموها انتوا 3/نخش ع الموضوع ازااااااااااااااااااااي نتفوق؟ ازاي نخش كليه نفسنا فيها والتنسيق بيعلي؟ اولا لازم قبل اما السنه تبدا تتعبوا شويه 1/تسالوا عن افضل المدرسين للدروس متسالوش بس مدرسين اسالوا طلبه كبار شاطرين من مدرستكم عن افضل مدرسين لان بجد المدرس برده بيتعب معاك 2/الكتب الخارجيه عن نفسي 1/العربي ......... كتاب الوزارة لازم معاك هو اه ملخبط حبتين بس انا مكنتش بحب الملازم كنت في الادب بقرا الصفحه من الكتاب والخصها ورقه وقلم واكتبها يعني سؤال واجابه بالطريقه اللي احبها ده احسن حل للادب اللي كان سهل جدا بجد وطبعا كان معايا كتاب خارجي رائع هو المثالي في العربي 2/الرياضه حل جامد مكنتش بسيبها يوم الا واحل شويه من المعاصر اساسي فيه كل حاجه بس تمسك التمرين لاخر مساله اللي هي الذكاء متسيبش مساله الا المكرر افكاره وبرده مسائل الوزارة والتقويم 3\الكيمياء وزارة للمذاكرة والامتحان للحل مبيطلعش منه الامتحان بس طبعا التقويم هو الاساس الكيمياء من اسهل المواد خصوصا عضويتها 4/الانجليزي..... لازم تكون معاك كتاب خارجي ممتاز ومدرس بريمو يكون متابعك وطبعا نصيحه...............عربي وانجليزي ماتنساش التعبير والبراجرافات ولو بالتبادل واحد كل اسبوع 5/اللغه التانيه.....طبعا المدرس بيبقي بيقول علي كتاب خارجي ولازم برده تحل امتحانات كتير(وده برده في كل المواد اخر شهرين تلاته تكون مخلص وبتحل امتحانات) 6/احلي ماده في الكون الفيزياء......حلها سهل اوي اولا المدرسين بيخوفوا الطلبه منها معرفش ليه دي رائعه بس محتاجه انك تحل كتير اوي مسائل وكمان النظري انا كان في مدرسين بيركزوا علي النظري اكتر دول لا لازم المدرس يبقي موازن لان النظري سهل المهم المدرس يكون عبقرينو في المسائل وطبعا حضرتك متبقاش مش بتذاكر فيزياء كما تستحق وتقول صعبه لازم تتعب فيها اوي الفيزياء لاتترك يوما بس سهله جدا ورائعه اهم حاجه متخافش منها ولا تستهترش بيها 7/الاحياء ياااااااااااااااااااااااااه ماده جميله جدا حلها سهل 1/مدرس شاطر 2/كتاب الامتحان تفهمه اوي ولا ابالغ في مصر لازم تحفظه كمان بالنص عشان تجيب مجموع وملكش دعوة باللي بيقولوا حفيظ 3/تحل فيها كتير اوي اوي اوي (طبعا التقويم لازم في كل المواد وكتاب الوزارة) 8/علم النفس مادة رائعه وسهله محتاجه انك تكون فاهم وحافظ المنهج صح واخيرا بقي كلمه بس بصراحه بلاش البخل اللي بيحل في الامتحانات اكتب كل ما تعرفه عن السؤال حتي ولو هتكتب صفح بس في المضمون يعني مش تجيب حاجه مش مطلوبه اقصد بلاش الايجاز والامتحانات ليها فن اللي مذاكر صح واعصابه حديد في اللجنه هو اللي بيكسب بتوفيق ربنا ونصيحه.................................... بلاش تسمع للطلبه اللي بيقولوا مذاكرناش هنسقط لان دول عاوزين يحطوا منك بامانه خلي صديقك كتابك ومنارتك مدرسك معلش طولت عليكم
|
|
#3
08-08-2017, 07:29 PM
|
|||
|
|||
|
ثالث تجربة
▼ لسلام عليكم ورحمة الله وبركاته اولا:أنا فتاه من دفعة ثانوية عامة 2016 حبيت افيدكم بامور كنت عاملاها ف3 يمكن تفيدكم. فيه حاجات مهمه لازم تاخدوا بالكم منها . اولا التنظيم/ده نوعين/ اولا :الوقت/ماكانش ليا جدول محدد خصوصا ف الاول ..ع لخبطه الدروس وكده..مع الوقت كنت بحط جدول امش عليه شوي واسيبه وارجع احط واحد تانى. _مش لازم يكون ليك جدول..بس ف فرق بين حد عارف هو ذاكر ايه وحد تان سايبها بالبركه. _تقدروا تستغنوا عن الجدول بان كل باب ف الماده تقسموه وتشوفوا ذاكرتوا اي وسايبين اي. 2_المكان/ ااكيد هتشتروا كتب او عندكم ..كنت عامله حاجه ريحتني جامد...كل ماده كان ليها ركن سواء ع المكتب او الارض او كرتونة..كل ماده عباره عن صفين صف خاص بكتب الشرح /والتان خاص بالاسئله. ثانيا م الضروريات/ كتب المدرسه ثم كتب المدرسه خصوصا ف ادب وتعليق العربي ،(الاحيا،الجيولوجيا)لو بتشتغلوا من كتاب الامتحان تمام بس مايضرش تبص ف كتاب المدرسه يمكن يكونو نسوا سطر ولاحاجه. انتم طلاب مصريون عارفين يعن اي؟دمعناها كبير جدا. يعن تصموا ال ف الكتاب تحطوه ف الاجابه هتعدوا بجداره هتالفوا يبقي ربنا يسترها معاكم. __________________ مش عارفه رقم كام / *اأقلام التحديد(الهاي لايتر)او اي قلم..المهم تعلموا ع الحاجات ال بتقف معاكم او فيها افكار..(مسائل،فايند،تشوز،..الخ) لان ده ال هتبص عليه ليله الامتحان مش هتلحق تبص لغيره. فعلموا اول باول ع ماتندموش ف الاخر. _ال بعدها ماعرفش رقمها/ لو بتاخدوا شيتات او امتحانات ف الدروس ياريت يعن كل ماده يكون لها ملف خاص بيها الحكاية دي ريحتني جامد او مثلا تجيبوا كرتونة وتقسموها بورق كرتون وتكتبوا اسم كل ماده علية بحيث تفرقوا كل ماده عن اختها ع ماتبقاش خلطبيطه.٠ هتستفيدوا ف الاخر ايام الامتحانات ومش هتحسوا بلخبطه ف النهاية هتبصوا ع غلطاتكم دي ايام الامتحانات. كفاية كد عليكم وعليا لان تعبت من الكتابه٠- - كل يوم هبقي اكلم ع ماده وعملت فيها اي. __________________ ###ماتنسوش حاجه مهمه جدا__العامل النفسي،،3 ما هي الا لعب بالاعصاب.. مش طلاب 3 المتفوقين هما ال دايما مكشرين ومشيلين ال حواليهم الهم بالعكس طول ما اعصابكم هادية وبارده خصوصا ف الاول هتنجحوا بجداره ان شاء الرحمن. اكيد هيجي اوقات مش طايقين حد فيها بس صدقوني باذن الله هتتحل خليكوا بس مساعدين لغيركم دراسيا او غير ذلك وباذن الرحمن ربنا هيبعت ال يطمن قلوبكم. افتكروا "فان مع العسر يسرا.ان مع العسر يسرا." يعن مفيش عسرين ورا بعض ولا يسرين كذلك هي دائره وقت اليسر الشكر ووقت العسر الرضا والصبر. -افتكروا(لايدرك النعيم بالنعيم ) 
|
|
#4
08-08-2017, 07:33 PM
|
|||
|
|||
|
رابع تجربة
▼ السلام عليكم بوست طويل شويه بس هيفيدكم انا طالب من دفعة السنه الي فاتت علمي رياضه الحمد لله ربنا وفقني وجبت 99% بما اني قاعد فاضي ف حبيت استغل الوقت ده في حاجه مفيده واساعد ع قد ما اقدر .. 1 : متحطش في دماغك فكرة ان الولد ده او البنت دي كل سنه الاولي ع المدرسه و عمري ما هوصل لمستواهم والكلام الفارغ ده لان تقريبا الاوائل الي بتشوفهم دول كل الناس بتعديهم .. مثال ع كده انا عمري ما كنت دحيح ولا عمري طلعت من الاوائل ولا كان حتي المدرسين واخدين فكره عني اني متفوق ودحيح لكن انا كنت مؤمن بنفسي وعارف اني لو ذاكرت هبقي احسن من اي حد وان اي حد من الاوائل دول دماغهم مش احسن مني انا بس الي منفض كنت مقتنع ان عقلي يوزنهم كلهم ثقتي في نفسي دي بعد ربنا فرقت معايا جدا لاني كنت بدخل الامتحانات وانا مش خايف مش متردد عارف انا داخل اعمل ايه داخل الماده دي هقفلها يعني هقفلها مليش دعوه بقي الامتحان صعب او سهل بس مش معني كده اني مكنتش بذاكر انا كنت بذاكر كل الي باخده في الدروس اول باول وعمري ما ركنت حاجه وجيت من شهر 3 بدات مراجعه ع المناهج كنت مخلص الماده من 10 ل 15 مره قبل الامتحان 2: مبتجاوبش في الدروس وبتجيب درجات مش كويسه في الامتحانات في الدروس ولا يهمك عادي طالما انت راضي عن مستواك في الماده دي وفاهمها كويس مش مهم الدرجات المهم امتحان اخر السنه .. مثال ع كده انا اول امتحان كيميا امتحنته جبت 25.5 من 50 بعض اصحابي اتريقو عليا وبصولي نظرة وحشه بس انا بكل ثقه وانا مبتسم قولتلهم ان انا الي جايب 25.5 بس فاهم الكيميا اكتر من اي حد فيكو وعموما بكره نشوف في النتيجه والحمد لله محدش عرف يجيب زيي او يقرب من مجموعي حتي 3: بتسرح وانت بتذاكر وبتنام كتير .. ولا يهمك خد كفايتك من النوم بس تحاسب نفسك ع الوقت ده يعني انت النهارده نمت 15 ساعه وكان عليك 5 ساعات دروس يعني 20 ساعه قدامك 4 ساعات مذاكره تخلص فيهم الي خدته في الدروس ازاي معرفش زي ما خدتها شخير 15 ساعه تدوس ع نفسك وتذاكر الي خدته وكذلك السرحان اهم حاجه متقومش الا وانت مخلص الي عليك4 : بتحب تلعب كوره وبلايستيشن متحرمش نفسك من حاجه اعمل الي انت عاوزه بس برضو تحاسب نفسك وزي ما ضيعت ساعتين في الكوره تدوس ع نفسك وتذاكر الي انت خدته - -
|
|
#5
08-08-2017, 07:36 PM
|
|||
|
|||
التجربة المشهورة
خامس تجربة
▼ الفاشل اللى جاب 98 % انا عبدالله الريان من الزقازيق كنت جايب 98 % كنت مقفل كل المواد معادا عربى وانجليزى دول هما اللى حرمونى من ترتيب الجمهورية .. انتو عارفين انا ذاكرت امتى .. او نجحت ازاى .. اولا انا كنت داخل السنة شادد حيلى ع الاخر بذاكر كل حاجة زى معظم الناس .. جيت بعد اول شهرين زهقت من الدروس ومن كل حاجة .. ممكن اغيب اطنش ,, كنت بنام 13 ساعة فى اليوم وممكن اكتر من كدة .. عاوز اقولكم انى لحد شهر واحد كنت مخلص 3 مسلسلات .. كل مسلسل تقريبا 75 حلقة .. مش ممكن اوصفلكم انا كنت عامل ازاى .. كان اكتر حاجة اعرفها انى مش هنفع وكنت بقول فى نفسى انى مش هلحق يعنى لو بدأت اذاكر مش هجيب مجموع لان ربنا بيقول .. "{ إِنَّ الَّذِينَ آمَنُوا وَعَمِلُوا الصَّالِحَات إِنَّا لَا نُضِيع أَجْر مَنْ أَحْسَنَ عَمَلًا } صدق الله العظيم . كان جوايا حاجة بتقولى انى مش عاوز اكمل انا مش هنفع اصلا .. لية اذاكر وانا مش هتقدم خطوة قدام .. ونسيت انى مش انا اللى احدد العمل الكويس من الوحش مش انا ربنا اللى بيقيم الاعمال .. مش انا اللى هقول ان عملى كويس ولا لا .. بدأ الموضوع يتدهور بدل ماكنت انا اول الدرس بقيت متوسط يعنى مقفلش امتحانات كتيير .. وكان اكتر ناس بيشجعونى ع اللى انا فية للاسف هما صحابى ,, لانهم كانو بيقولوى انا ذيك .. مكنتش لاقى حد ينصحنى يوجهنى يقولى اتصرف ازاى فاضل 5 شهور ع الامتحانات وانا خلاص هضيع حلم اهلى وتعبهم .. مكنتش بفوت ماتش كورة بروح العب ع طول اى ساعة ,,, كانت المشاكل للركب .. اهلى مش عاجبهم الوضع ,, حد يقولى ذاكر بتنرفز واقولهم انتو هتعرفو مصلحتى اكتر منى انا عارف بذاكر اية وازاى .. وكمان بعد لما والدى يقولى انت مش نافع كنت طيب بدال انا مش نافع لية مروحش اشرب سجاير وانحرف منا مش نافع .. للاسف المدرسين اللى فى الدروس فقدو الامل منى خالص .. خلاص عبدالله الريان كان حلم وراح كان حلم كل مدرس انى ادخل بترول لانى زى ابنهم وكلهم حبايبى .. بسى خلاص ,, وكلهم اخدو عليا بقوا بيقللوا من قمتى .. لعند ما فى يوم الاستاذ بتاع العربى كانت اجازة نص السنة و قال لكل المجموعة استريحوا شوية انتو تعبتوا .. ورااح باصصلى كدة وقالى بالنسبة ليك يا عبدالله ملكش دعوة بالكلام دة انا معملش حاجة خالص .. كل المجموعة ضحكت مش عاوز اقولكم انا قدام نفسى كنت عامل ازاى .. قررت لا مش هسيب نفسى هكمل وهوصل .. افتكرت شوية كلام من الاساتذة بيقولوة فى اول السنة .. فى استاذ قال لما تفيد حد بعملومة ربنا بيديك معلومة تانية يعنى صفقة .. بسى خارج الامتحانات ,, هاااااا بس بدأت اعمل جدول لنفسى عاوز اقولكم انى الاجازة دى اصلا مش كان بجيلى قلب انى اضيع وقتى .. لو عاوز حاجة عندى المدرسين ممكن اروح لمدرس على بيتة .. مفقدتش الامل كنت بسمع كلام من الناس انى استحالة اوصل للى انا عاوزة انا مكنتش بذاكر بسى كنت بتحدى نفسى يعنى استاذ الكميا قال فى مراجعة ع الفصل السابع الحصة الجاية .. انا قولتلة كدة فى وسط المجموعة هات اخرك .. واعلى حاجة عندك ,, كان موقف صعب بسى لقيت نفسى بذاكر علشان اكسب التحدى .. وفى اليوم دة الحمد لله عمل امتحان انا كنت بحل لة المعادلة والمسائل باكتر من طريقة علشان اعرفة انى عارف كلة ,, وجت على مسئلة محدش عرف يحلها انا الحمد لله حليتها ,, بسهولة جداً طلعت عمال اشكر ربنا وازاى انا كدة وفى ناس بتذاكر من اول السنة ومعرفوش يعملوا حاجة بجد ربنا كان صحبى وحبيبى وكل دنيتى .. ومن هنا عرفت الحقيقة مش انا اللى بحدد الاعمال ,, سيدنا سعد بن معاذ اللى قعد فى الاسلام قليل جدا ومع ذالك اهتز لموتة عرش الرحمن ياالله ماذا فعل لقد كان من الصحابة من هم اكثر منه وقتا ساعتها.. عرفت انى اعمل وبس وربنا اللى بيقدر .. من هنا اتعلمت حاجت كتييير اتعلمت ازاى اعيش اصم علشان الناس بتسرق احلامى مليش دعوة بحد بخلص درسى اروح ع بيتى افطر واذاكر مش عارف جبت القوة دى منين انا اصلا مكنتش بحب اذاكر اصلا لكن ارجع وافكر واقول طب بعد عشر سنين انا هكون فين هكون بدور على شغل ومش لاقى وصحابى كلهم مهندسين ودكاترة و مش حد هيقبل يقف معايا لانى مثل سىء وكل حاجة هتضيع .. لا انا لازم ابدأ من دلوقتى لازم موصلش للنقطة دى .. اقوم اصلى قيام ليل واقول يارب ساعدنى يارب اقف جمبى ... كان دايما بيسمع دعايا ,, وكان دايما بيقف جمبى انا تقريبا نجحت بسبب قيام الليل وان نيتى كانت خالصة لله .. الحمد لله ذاكرت وعملت اللى بحلم بية وانا رايح الامتحان تخيلوا انى كنت ناسى كل حااااااجة انا مش عارف حاجة بفكر مرحش .. لكن كنت بقول يارب انت وقفت جمبى كتير مش هتيجى تسيبنى انهاردة .. فعلا كنت بروح اطلع من الامتحان اسهل امتحان قابلتة فى حياتى .. كنت واخد قرارى انى مش هغش حتى لو هيكلفنى مستقبل كامل .. بس عديت الامتحانات وجت يوم النتيجة .. كنت فى الشغل امال مش لازم اعدل حياتى ولا هفضل تافه .. كنت شغال فى القاهرة فى شركة سياحة مش عاوز اقولكم الصدمة اول لما شوفت النتيجة ,, مكنتش مصدق انا دة كنت جايب اعلى من صحابى كلهم .. الحمد لله .. مش عاوز اقولك فرحة الناس بيا لدرجة انا صاحب الشركة كل لما حد يجيلة يقولة عبدالله جايب 98% وهيبقى وهيبقى .. ارجع واحمد ربنا واقول لو كنت جبت 70 % كانوا هيعاملونى ازاى .. فترة كنت بعتبرها من الذ فترات حياتى ’’ من المواقف الطريفة كان فى واحدة قصادنا على طول كانت قدى جابت 69% كانت بتقول لوالدى ان كل اللى جابوا فوق 95% بالغش انا طبعا كنت هستريا الضحك بتتفجر منى ... الحمد لله اللى مش نزلنى لطبقتها .. الخلاصة : الوقت مفتش انت اللى بتلوم نفسك .. شجع نفسك بطل احباط #ابتسم مش انت اللى بتحدد اذاكنت اشتغلت حلوا ولا لا .. انت اشتغل وبس .. قرب من ربنا وحبة لانك كل ما تحبة كل ما يديك اكتر .. اعملة كل حاجة صلى قبام ليل .. متفوتش فرض على فكرة المدرسين هيحترموك لما يلاقوك بتحترم ربنا بتتأخر علشان تصلى ,,, محدش هيقلل منك لو حد قالك حاجة .. اتعلم دى عيش اصم .. الناس بتسرق الاحلام ودة كنت اتكلمت عنة فى البوست اللى فات .. انتوا المشوار لسة قدامك حلمك يعنى انت لو اتنازلت عنة يبقى انت ميت ..
|
|
#6
08-08-2017, 07:48 PM
|
|||
|
|||
تجربة عن الثانوية وما بعدها
سادس تجربة * ومن يتق الله يجعل له مخرجا▼ *انا عند ظن عبدي بي *حسن الظن بالله * *رضا امي ... ال 3 حاجات دول انا ماشية عليهم من ساعة من ربنا هداني و التزمت من تالتة ثانوي لغاية دلوقتي سني 24 سنة ... ف ثانوية عامة المفروض انه كان بيتقال عني اني متفوقة بس ساعتها حصلت ظروف صعبة اوي #امي رحمة الله عليها عملت عملية و شالت ورم خبيث و طبعا كانت ممنوعة من دخول المطبخ و من اي مجهود ساعتها انا كنت شايلة البيت كله لان اخواتي كانو صغيرين كنت اروح الصبح المدرسة و ارجع اعمل الغدا و انزل جري للدروس و ارجع طبعا تعبانة بنام مكنش في مزاكرة غير وانا ف المواصلات بس تقريبا ... و سبحان الله ف الامتحانات انا كنت بجاوب بشكل انا نفسي بستغربه حاجات كنت شوفتها مرة واحدة الاقيني فاكراها .. جبت 96% مع اني والله و محدش مصدق ده ان في مواد كنت رايحة الامتحان مش مخلصاها للاخر smile emoticon طبعا زعلت جدا من المجموع لانه قليل عليا لاني كنت عايزة ادخل طب عشان ارضي امي بس قولت الحمد لله اكيد خير ... دخلت كلية علوم قسم كيمياء و كنت فرحانة بيها جدا لاني بحب الكيمياء جدا ... في الكلية كان طبعا معظم او غالبية البنات مصاحبين ولاد و كان معظمهم بيتحجج انه عشان ناخد منهم ورق و بتاع بس انا كنت دايما بقول و من يتق الله يجعل له مخرجا و فعلا سبحان الله الورق اللي كان بيجيلهم كان بيجيلي انا من بنات حتى معرفهمش لدرجة ان مرة وانا ف المسجد واحدة قالتلي انتي ف سنة كام قلتلها قالتلي طب انا معايا ورق قورصات لو عايزاه و طبعا كل اللي معايا استغرب بعد كده ازاي معايا الورق ده ... انا كنت عارفة ازاي طبعا بعد ما اتخرجت ملقتش اي شغل ف مجالي خالص غير المعامل مع اني مكنتش عايزة اشتغل فيها خالص بس قولت احسن من البيت و سبحان الله بعد كده تتعب امي و ابقى انا اللي بسحبلها العينات من البيت بدل ما نتذل لحد ولا نبهدلها ... بعدها اتخطبت لواحد المفروض انه كما يقال عنه انه ملتزم و حافظ للقران و امام ف مسجد و كان #دكتور جراح .... مجرد اني قلتله اني مش هينفع اتكلم معاه كتير ف التليفون و لا نتكلم متاخر ولا نخرج و ان هيكون فيه حدود لغاية كتب الكتاب قالي انتي متخلفة و معقدة و مش انتي اللي هتعرفيني الدين انا عارفه كويس اوي و كلمني باسلوب بلطجي ... قلتله انا كده و مش هتغير و سيبته لان معجبهوش الوضع ... بعدها اتخطبت لواحد تاني بس من اول قعدة معاه عرفته كل حاجة عشان ميعملش زي الاول قالي صح عندك حق ده مؤقتا لغاية ما نتجوز .... بعدها فضل كتير طول الخطوبة يقولي مينفعش كده انتي مزوداها مع ان هو اصلا محترم و مؤدب كل اللي فيها انه عايز نخرج مع بعض او نتكلم اكتر من كده لاني مكنتش سامحة باي كلمة زيادة ... نطمن على بعض بس مش اكتر بكالمات صغيرة .... و لما جاب اخره قلتله والله انا كده و مش هتغير عن كده انا استحالة ارضي ايييي حد ع حساب زعل ربنا .. نراعي ربنا حتى عشان يكرمنا بعد الجواز و ده مؤقتا لغاية ما تبقي #حلالي ساعتها هعوضك عن كل ده و انا مش جامدة ولا حاجة انا العكس.. و فعلا كمل معايا ع كده خطوبة 8 شهور مكنش فيهم حاجة تزعل ربنا مني ... مع ان ال8 شهور دول كانو اسوأ فترة ف حياتي فيها تعب أمي و وفاتها و مع اني كنت محتاجاه جدا يقف جنبي الفترة دي لكن برده كنت بقوله مينفعش نتكلم كتير مع انه حرام كان بيتكلم بس عشان يطمن عليا و يقف جنبي و كان مستغرب اوي ازاي انا ف الظروف دي و محتاجاه جنبي و مع ذلك بقوله ميقربش ....!! بعد كده كتبنا الكتاب و عرف بعدها اني مش جامدة ولا حاجة انا اللي كان مانعني م الكلام هو الحرمانية و قالي بعدها انتي عوضتيني بزيادة ... الغريب جدا بقى ان بعد كتب الكتاب هو اللي كان جامد كان بيعاملني كاني واحد صاحبه وانا كنت طبعا متضايقة جدا لان حتى الكلمة الحلوة مكنتش بسمعها و انا طول عمري عافة نفسي عن اي حاجة غلط و قافلة قلبي بستين مفتاح عشان مينفتحش غير لزوجي بس يبقى ف الاخر نصيبي كده و بجد تعبت نفسيا جدا الفترة دي بس فوقت ع نفسي و عرفت ان ده كلام شيطان وانه بيحاول يخليني اسيء الظن بربنا ... قولت اكييد خير مش هقول حتى لعله خير .... طول منا بحاول ارضي ربنا استحالة ربنا يعملي حاجة وحشة قولت حتى لو متغيرش و بقى كويس معايا و ده كده نصيبي خلاص هصبر و ربنا يعوضني بقى ف الاخرة .... حصلت مشاكل كتير بيننا و تعبت جدا الفترة دي كنت بمووووووت و كنا هنسيب بعض مرتين ف كتب الكتاب يعني طلاق .. و كنت كل مرة ادعي ربنا كتييير و اصلي استخارة و قضاء حاجة ان ربنا يهديهولي و يبقى كويس معايا .. سبحان الله بدا يتغير للاحسن بقى حنين جدا و رومانسي و بقى يجيبلي هدايا حلوة اوي و مفاجات و بقيت مستغربة المعاملة الجديدة لاني اتعودت ع القديمة لكن كنت عارفه ان ده كرم ربنا عليا ربنا كريييم اوووووي و وصل لتغيير انا فعلا حتى الان حاسه اني بحلم ان بقى معايا حد كده ... اللي كنت بتمناه من ربنا لقيته فيه و اكتر و خصوصا انه مكنش كده خاااااالص ف الاول .. ربنا هداه كمان و بقى مواظب ع الصلاة لانه كان مقطع فيها و كان ليه معتقدات دينية غريبة الحمد لله كلها راحت خلاص ... وصل من التغيير ان مامته نفسها مش مصدقة ان ابنها بقى كده بتقولي ربنا يكرمك ع اللي عملتيه مع ابني انتي طلعتي منه حاجات انا نفسي كأمه معرفتش اطلعها منه ... دلوقتي انا لما بفكر مع نفسي ف اللي فات و اقول ان يجيلي حد كويس احسن و لا يجيلي حد يبقى كويس لانه بقى معايا احسن ... !! اكيد التاني احسن و يفرح اكتر ... اختيار ربنا ليا كان احسن و حسن ظني بيه كان بيتردلي اضعاف ما اتمنى ... **انا اسفة جدا للاطاله بس كنت عايزة انقل تجربتي عشان كل حد ف كرب او ف ضيق يحسن الظن ربنا و يتق ربنا و يحاول يرضي امه هيلاقي نتائج مكنتش ابدا يتوقعها ...
|
|
#7
08-08-2017, 08:03 PM
|
|||
|
|||
|
سابع تجربة طالب ف هندسه بترول بيقول▼ #إلى_من_يشتكي_ليل_نهار بعد الثانوية هتكتشف إن أكبر عقبة كانت واقفة قدامك و بتبعدك عن أحلامك .. هي نفسك ! هي أوهامك و قيودك اللى فرضتها على نفسك ، هي خوفك و كسلك و ضعف ثقتك بنفسك .. أنت أكبر مشكلة مش أى حد تانى و أنت الحل .. مهما حاولت تسمع نصايح و تحفيز مهما بالغت في الدعاء ، يؤسفني اقولك انك هتفضل زي ما أنت مش هتتغير ! مش هتتغير طول ما أنت مش واخد خطوة تثبت بيها عزمك و إصرارك على هدفك ، طول ما أنت قاعد مأنتخ و بتقبل الاحباطات بسهولة . أنا كنت زيك بشتكي و يمكن حالتي كانت جديرة بالشكوى أكتر منك .. يعني أيه أقعد 18 ساعة مذاكرة متواصلة فى ربع صفحة فى الكيميا ! يعني أيه أقضي اليوم كله فى مسألة فيزيا و فى الآخر ما فهمهاش ! يعني أيه احفظ درس أدب و ألخصه و أراجعه مرتين و تلاته و بعد كام شهر ما افتكرش و لا كلمة ! أيوة دا حدث بالفعل معايا ! من الآخر كل المشاكل اللى أنت بتشتكي منها أنا مريت بيها و أكتر . احتمال دلوقتي تقولي و أنت منشرح الصدر : بس برغم دا كله أنت جبت 98 % ، يعني اشطا الحوار سهل أهو  .. أحب اقولك انك لسه ما تعرفش باقي القصة المؤلمة ..أولاً أنا رغم كل الاحباطات لم ايأس ابداً ، كنت بقاوم مقاومة عنيفة أى تراخي أو كسل أو راحة ، كنت أقوم من أحلى نومة تحت الدفا فى شدة البرد وقت الفجر عشان اذاكر ، حرمت نفسي من التلفزيون و أجمل و أمتع ماتشات الكورة ، مفيش يوم واحد عدى عليا بدون مذاكرة ، حضرت كل الدروس و تابعت فيها على أد ما قدرت ، المنظر المروع للملخصات الضخمة و الكتب و الورق الهائل المبعثر على مكتبي أزعج والدي عدة مرات ، لكن ما أثرتش في معنوياتي إنما زودتني قوة على تحديها .. ربنا كان شاهد عليا لذلك ساعدني ،، ساعدني لما تعبت و قاومت مش العكس . بعد ما تفوق هتكتشف ان غيرك قطع آلاف الخطوات فى المذاكرة و أنت لسه بتشتكي . الحق نفسك
|
|
#8
08-08-2017, 08:18 PM
|
|||
|
|||
ثامن تجربة
▼ احدى تجارب طالبات 3ث. هي الآن في اسنان.. د/طه كان ديما يقول اعمل إللى عليك وملكش دعوة بالنتيجة لان دى حاجة مش فادينا . كنت بدأه السنة عادى خالص كأنها سنة عادية كنت بذاكر إللى بخده وبعدها بعمل إللى انا عاوزاه مكنتش بذاكر بعدد الساعات مادام خلصت إللى ورايا تمام اعمل إللى انا عاوزاه ودى طبعا كان بيضايق والدى والدتى لان ازاى واحده فى ثانوى بتذاكر ٣ساعات بالكتير وبتفرج على التليفزيون وتقعد الفيس بوك . انا اتعلمت من ٣ثانوى أنى أكون باردة ودى بعتبرها نعمة لانى مكنتش بهتم بكلام الناس خالص لما كنت بقعد على الفيس بوك مكنتش بلعب كنت بقعد اشوف الجروبات الخاصة ب٣ثانوى واقرا حكايات الدفعات إللى قبلى عن ثانوى او اشوف اسءلة وهكذا يعنى وكنت باخد اجازة عادى خالص انا إللى بخدها من نفسى 😂 مكنتش بزعل لما اشوف صحابى قاعدين بيتناقشوا فى مسالة وانا واقعه جمبهم مش عارفة حاجة الصراحة كنت بموت من الغيظ وكنت اروح اعيط . جه شهر واحد بصيت لاقيت نفسى معرفش حاجة فى المنهج ودرجات وحشة جداا وطبعا زى اى حد كنت بقول بكرا اذاكر وبكرا يجى وأقول بكرا أبقى اذاكر لحد ما بصيت لقيت نفسى فى اخر شهر ٤ قدامى فيزياء واحياء وإنجليزي وفرنساوى اعرف فيهم العناوين الاساسية بس كنت بروح الامتحان ومكنتش بعرف احل حاجة واخد الورقه وأروح كنّا تقريبا فى شهر ٣ نرجع لآخر شهر ٤ سمعت فيه كلام من كل إللى اعرفهم أنى فاشلة وان اخرى كلية التجارة وكان كل الناس بتقول عليا كدا وبيبصوا لى باحتقار ماعدا واحده وهى اختى الصغيرة هى إللى كانت بتشجعنى كان كل همى أنى اثبت أنى مش فاشلة على الرغم من ان كل المدرسين بتوعى كان بيندهولى بالدكتورة بس عندنا فى البيت مادام مش بتقعد طول اليوم على الكتاب تبقى فاشل . بالضبط ٥/٢ كان اليوم إللى وقفت فيه مع نفسى وانى مش لازم أكون اقل من اخواتى كنت باخد فى كل مادة درسين .بدات اشوف ايه هى الدروس المهمة واروحها وسبت اغلب الدروس كنت بروح انجلش وعربى وأحيانا فيزيا لما بدأت اذاكر كنت بجيب كتاب الامتحان المراجعة وافتح على اى امتحان وأحله كانى فى امتحان اخر السنة بالضبط واعلم لنفسى وبعدين اجيب كتاب الشرح وأدور على الأسئلة إللى مش عارفاها واذاكرها وبعدين ارجع اكتبها تانى فى الورقة وفى اول امتحان احياء أحله جبت ٢٠من ٧٠ وكنت فرحانة جداا لان تقريبا كنت معرفش فيها حاجة خالص وبدات اللدرجات تزيد يوم بعد يوم وصلنا ٥/١٨ كنت تقريبا مخلصة كل الحاجات إللى كانت ضايعة منى وكنت مخلصة كتب الامتحان بتاع المراجعة وكنت كل يوم اكتب تعبير وبراجراف واديه للاستاذ بتاعى يعلملى ويقولى ايه إللى فيه غلط وجالى فى الامتحان واحد من مواضيع التعبير دى .. كنت بصحى من الساعة ٣اصلى قيام الليل وادعى ربنا كتير واصلى الفجر وأبدا اذاكر قبل امتحان العربى بيومين كنت بتفرج على فيلم اسمه الثلاثة البلهاء ودى من كتر ما د/طه كان بيتكلم عنه جته ايام الامتحانات وكانت مشكله بالنسبالي لانى مكنتش بعرف احل امتحان وأقفله الا وانا بأكل لبان 😂 بس ربنا سترها .. كنت قبل اى امتحان أخط ايدى على قلبى وأقول كل شىء سيكون على مايرام وادخل الامتحان كنت بحاول أكون هادية جداا وانا بحل ولما اطلع من الامتحان مكنتش براجع مع حد خالص وأطبق الورقة وأعينها وأنسى المادة خالص وهكذا مع كل الامتحانات .. ديما كنت بدعى أنى ربنا يدخلنى كلية الطب برحمته مش بدرجاتى .. وفعلا دخلت كلية طب اسنان برحمة ربنا مش بدرجاتى والله .. انا خايف عليك من لحظة ندم هتمر بيها وتقول ياريتنى ذاكرت الكلمة دى كانت ديما بترن فى ودنًىً .. واكتر حاجة فخورة بيها أنى مندمتش على مذاكرة ثانوى نهائيا ولو قالوا هنعيد السنة تانى كنت هعمل برضو نفس إللى عملته .. وعشان ٣ثانوى سنه من السنين المهمة فى حياتنا كنت بسجل كل لحظة فيها فى مذاكراتى صدقونى ٣ثانوى هتكون أحلى سنة فى حياتكم بس لازم تعملوا إللى عليكم وملكوش دعوة بالنتيجة..
|
|
#9
08-08-2017, 08:38 PM
|
|||
|
|||
|
ليست عن الثانوية ولكن عن سورة اليفرة
تاسع تجربة
في الأول دي قصه بنت بتحكيها حصلت معاها .. الحكاية بدأت من دعاء كنت بدعي بيه ليا 5 سنين ، و فعلا كنت متعلقة بالدعاء دا جدا ، مع أن الدنيا واقفة إلا إني مابطلتش الحمد لله اقول يا رب كذا .. و في فترة من الفترات خلاص يأست أن الموضوع دا يحصل 😔 !؟ فكان ليا صاحبة بتروح دروس فى المسجد و عرضت عليا اروح معاها و المحاضرة يومها كانت عن ' سورة البقرة ' المهم و انا راجعة قررت أقرأها كل يوم لعل الفرج يقرب و الحلم يتحقق ☺ .. في الأول كان الموضوع صعب شوية ، كنت بقسمها علي الصلوات طول اليوم ، و بعدين بقيت بقراها بسهولة الحمد لله ،فمكنتش أنام إلا بيها 👌 بعد حوالي 15 يوم أو أكتر شوية .. الدنيا كلها اتسخرت لتحقيق حلمي .. و الحمد لله اتحقق 😍 ربنا رزقنا من حيث لا نحتسب ، و مش رزق عادي دا كان رزق واسع و الله 😍 مكنتش متخيلة أنها ممكن تتحقق بالسرعة دي الحقيقة 😍 و من بعدها مافيش أمر يعدي عليا إلا و الحمد لله بيتيسر بإذن الله و بركة البقرة .. ❤ .. قصه كمان☺ بص هو الحقيقة يعني في الأول كنت بقراها عادي ! بعدها قريتها و قصادي آيه ' وألف بين قلوبهم لو أنفقت ما في الأرض جميعا ما ألفت بين قلوبهم ولكن الله ألف بينهم إنه عزيز حكيم ' ❤ و من بعد ما اتملي قلبي باليقين بالآيه دي ، لقيت الأمر العسير بيتيسر ، و أن الخوف اتبدل أمن ☺ .. و دي قصة بسيطة علشان مش أطول عليكم❤ انا من الناس الل كانت علطول تعبانة😔 و الل يعرفني كويس عارف كدة .. و من بعد ما بدأت أقرأها بإنتظام الحمد لله بقيت احسن بكتير وصحتي بقت بومب 💪 و بقيت اما أتعب اعرف إن السبب تقصير مني .. من وقتها عرفت يعني ايه أخذها بركة☺ لأن فعلا لما تقرأها هتلاقي بركة في الرزق ، و الصحة ، و الوقت ، هتلاقي تيسير عجيب في الأمور بإذن الله ، بس المهم اليقين 👌 .. أخيرا بقى دي فضل سورة البقرة ]❤ - قال النبي ﷺ اقرءوا سورة البقرة فإن أخذها بركة وتركها حسرة ولا تستطيعها البطلة - عن النعمان بن بشير عن النبي ﷺ قال : إن الله كتب كتاباً قبل أن يخلق السماوات والأرض بألفي عام أنزل منه آيتين ختم بهما سورة البقرة، ولا يقرآن في دار ثلاث ليال فيقربها شيطان ❤ - قال النبي ﷺ من قرأ آية الكرسي دبر كل صلاة مكتوبة ، لم يمنعه من دخول الجنة إلا أن يموت " عن أبي مسعود رضي الله عنه قال / قال النبي صلى الله عليه وسلم " من قرأ بالآيتين من آخر سورة البقرة في ليلة كفتاه ' ❤ - عن أبي هريرة رضي الله عنه أن رسول الله صلى الله عليه وسلم قال " لا تجعلوا بيوتكم مقابر إن الشيطان ينفر من البيت الذي تقرأ فيه سورة البقرة ' ❤ - عن ابن عباس رضي الله عنهما قال : بينما جبريل قاعد عند النبي صلى الله عليه وسلم سمع نقيضا من فوقه فرفع رأسه فقال هذا باب من السماء فتح اليوم ، لم يفتح قط إلا اليوم ، فنزل منه ملك فقال هذا ملك نزل إلى الأرض ، لم ينزل قط إلا اليوم ، فسلم وقال أبشر بنورين أوتيتهما ، لم يؤتهما نبي قبلك ؛ فاتحة الكتاب ، وخواتيم سورة - البقرة - ، لن تقرأ بحرف منهما إلا أعطيته ]❤ - من يحافظ على قراءة سورة البقرة لمده طويلة متواصلة سيرى في حياته عجبا -ً وفي جسده شفاءً ، وفي رزقه زيادةً .. وفي صدره تنشراحا -ً وفي عمره بركة ❤ - من حافظ على قراءة البقرة صارت لقلبه الأفراح مُجاوره والخيرات على حياته مُتكاثره ، فكن أنت من أهلها ستأنس بها ، ستعشق قُربها ، ستشتاق إليها 💪 - مَكث شهوراً يسرد البقرة كل ليله فأبدل الله مرضه عافية وضيقه فرحاً وعُسره يُسراً وتناثرت البركات عليه من كل جِهاته وصار سعيداً في حياته ❤ - تعلّم أن تُحقق أمنياتك - وتزيد بركة حياتك - وتُفرّج كُرباتك وتزيد حسناتك - !؟ بسرد البقرة كل يوم لمدة طويلة .. كشهر مثلاً 👌 - حطّم أصنام الأوهام في داخلك - بفأس تكرار سورة البقرة إسألوا من يُكثر من سردها عن انشراح صدرِه ، وتيسير أمرِه ، سيُجيبكم لفوره ☺ الرسول الصادق الأمين يقول عن سورة البقرة .. أخذُها بركة يعني : قراءتها وحفظها والعناية بها ستُعطيك بركة في أهلك ومالك وولدك وجسدك وروحك]❤ - سورة البقرة أشبه ماتكون بالتمرة لن يطيب لك طعمها إلا بعد مضغها إذن تكرارها ومجاهدة النفس على قراءة البقرة سيُورث في حياتك حلاوةً وفرحاً 😍 تكرار قراءة سورة البقرة يجلب للعبد خيرات لا حصر لها - ويدفع عنه شروراً لا علمَ لهُ بها - وفيها منافع لا يستغني العاقل عنها 😍 - تكرار قراءة سورة البقرة يجلو عن القلب القسوة ويذوق البعد فيها لذة الخلوة - وتعيش معها الروح أرق مشاعر النشوة ]❤ - إذا كانت أوجاع العيون والحسد والسحر في جسد الإنسان ( كالصخرة ) فإن تكرار سورة البقرة هي المِطرقه لألمك ( تنكسر ، تضمحّل ، تتلاشى ) 👌 - قراءة سورة البقرة عسيره في بدايتها لأن الشيطان يعلم علم اليقين عظيم نفعها فلا يريد لك قطف ثمارها ، بعد اجتياز الصفحة ١٢ غالباً ستنشط روحك💪 - كان يقوم الليل في ركعتين لمدة شهرين يقرأ سورة البقرة في هاتين الركعتين ويُوتر بسورة الضحى يقول فتح الله لي من جميل أبواب الرزق والعافيه☺ - كثيراً ماكان يقول ابن القيم رحمه الله : أن العين والحسد كالكُتلة في جسد المحسود لا يُزيلها ويمحوها ويجلوها گ تكرار ( سورة البقرة ) والمعوذات .❤ الله المستعان [img]☺ مفيش حد من صحابي سألني علي حاجة يعملها او يقرأها لعل ما يفرج كربه ، إلا و قولتله علي ' سورة البقرة
|
|
#10
08-08-2017, 08:48 PM
|
|||
|
|||
انتهت التجارب ولكن قبل ان اذهب اليكم بعض النصائح
اقرأوا هتستفيدوا :-D ١-لازم تكون عارف اسلوب مذاكرتك يعني متشوفش حد بيذاكر ازاي و تحاول تقلده لازم تعرف انت بتجمع كويس امتى اسلوب مذاكرتك ايه و كده ٢-توكل على الله و متتوترش و اعرف ان لكل مجتهد نصيب ٣-متحاولش تخبي عن زمايلك ورق مذكرات حتى لو هما عملوا كده و هتلاقي ٧٠٪ من اصحابك كرهوك متتصدمش ده طبيعي و لا تزعل و لا تتضايق و افتكر دايما إن الله في عون العبد ما دام العبد في عون اخيه ٤- ذاكر من كتب المدرسة و حل النماذج (دليل التقويم) و تقويم كتاب المدرسة ٥- حل كتيييييير عالاقل كتاب في كل مادة ٦-متخافش الوقت يكفي و زيادة بس انت متضيعوش ٧- اثناء السنة احفظ ادق ادق التفاصيل و اللي بين السطور و في المراجعة الاولى و التانية ٨-المراجعة التالتة و الرابعة شوف العنوان و سمع و اللي مش فاكره راجع عليه و حل كتب المراجعة النهائية (بتنزل في شهر ٣) ٩- متستغربش ما كلمة مراجعة رابعة 😂😂 لو في وقت تراجع الخامسة و السادسة راجعها ١٠-الاحياء و الجيولوجيا و الادب و النصوص و القراءة و معظم الفيزيا الحديثة بيتحفظوا زي ما هم 😏 ابتسم انت في مصر ☺️☺️دول فيهم نسبة ١٠٪ فهم و ٩٠٪ حفظ و لو مفهمتش و حفظت زي الحمار تبقى طالب مثالي 😂😂فيما عدا مسائل الوراثة (ودي اتحذفت من المنهج خلاص)😎و ال DNA ١١- ركز عالعربي كويس جدا و لو ضعيف في النحو حل كتير هتلاقي نفسك حفظت الاسئلة 😂في فترة المراجعة بس انا حليت اكتر من ١٢٠ قطعة نحو و طبعا مش محتاجة اقولك انك لازم تصحح اللي بتحله من اجابات او مع مدرس او عالاقل مع زمايلك اللي هتلاقيهم اندثروا اصلا بعد ثانوية عامة 😁😒 ١٢- ابعد عن الموبايل الموبايل ابعد عنه 😂 ١٣- في برنامج اسمه self control for studying بيخليك متقدرش تفتح اي ابليكيشن لفترة انت بتحددها و ممكن تعمل استثناء لحاجات محتاجها زي الgoogle translation ده حل حلو اوي ١٤-متحطش في دماغك انك هتقعد سنة كاملة متعملش حاجة في حياتك الا المذاكرة لازم حاجة في النص تكسر و تجدد يعني خروجة حلوة و غدوة برا و تكون مخلص كل اللي وراك قبل ما تخرج عشان يبقى بالك رايق بس ده ممكن كل اسبوعين او تلاتة مش كل يومين 😂 ١٥-كل ما تكسل او متبقاش قادر تذاكر افتكر ان انت عندك هدف و مينفعش تستغنى عنه بس انا شخصيا كنت كل ما ازهق من المذاكرة اقوم اكل و ده حل منصحش بيه خالص عشان متتخنش😂😂 ١٦- حاول تذاكر في مكان هادي و في وقت البيت كله نايم لو عندك اخوات صغيرين زي حالاتي ١٧- اختار مدرس كويس في الشرح و المتابعة و بيخلص بدري و ده اسأل فيه ناس من الدفعة اللي اكبر منك ١٨-نام كويس بس مش بزيادة يعني من٦ ل٨ ساعات لا يزيدوا و لا يقلوا ١٩- حاول تعتمد ع نفسك اكتر من المدرسين في فترة المراجعة عشان نزول الدروس بيضيع وقت كتيييييير ٢٠- نظم دروسك بحيث انك متنزلش كل يوم يعني تخلي يوم بتنزل مثلا ١٠ و ترجع ٦ و يوم بتقعد في البيت من اوله لاخره و حاول تنظم دروسك بحيث ان متاخدش مادتين ادبيتين ورا بعض ويكون عندك بومين اذا مكانش ٣ اجازة ٢١-خلي كل اسبوع وقت محدد مثلا يوم او ١٢ ساعة تراجع فيه عالقديم و ده ابدأ فيه من تاني شهر ٢٢-ذاكر بذكاء يعني انت خلاص فاهم الدرس اقراه مرة بعدين احفظ التعريفات و افتح اي كتاب بعدها حل عالدرس هتلاقي انك بتحل كله صح و التعليلات و ماذا يحدث و الكلام ده حله في الكراسة و بعدين افتح الاجابات و عدل ع اجابتك و كده بدل ما انت كنت هتحفظ الاجابة كلها حفظت التعديلات بس ٢٣- صلى و حسن علاقتك بربنا و ادعيله و خليك طماع في الدعاء يعني حتى لو انت عارف نفسك متجبش ٩٠٪ ادعي و قول يا رب اجيب ١٠٠٪ يمكن ربنا يستجيب الدعاء و دي اخر و اهم نصيحة يا رب اكون سبب في اي فايدة ليكو و ربنا معاكو دي بجد و يوفقكو كلكو و ادعولي و لو حد عايز يسأل عن اي حاجة يقول و بس ☺️☺️
|
|
#11
08-08-2017, 08:54 PM
|
|||
|
|||
|
شكرا جدا جدا وجزاك الله كل خير
|
|
#12
08-08-2017, 09:00 PM
|
|||
|
|||
|
اقتباس:
|
|
#13
09-08-2017, 05:51 PM
|
|||
|
|||
|
اتمنى الرد لكى تشجعوننى وشكرا
|
|
#14
13-08-2017, 09:34 AM
|
|||
|
|||
|
مقولة اعجبتنى.....
أحب دائما أن يقول لي الناس انك لا تستطيع أن تفعل ذلك، لأنهم كلما يقولون لي ذلك، أعمله بجدارة
|
|
| العلامات المرجعية |
| الكلمات الدلالية (Tags) |
| تجارب.ثانوية.عامة |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 05:23 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
