للى عايز اى تفاصيل عن هندسه اسكندريه

[To Be Is To Do]

بسم الله الرحمن الرحيم

أولاً مبروك ليكم على دخول كليه الهندسه جامعه الإسكندريه وإن شاء الله تكونوا موفقين فيها

ثانياً اللى محتاج اى تفاصيل عن الكليه من أى إتجاه على قد معرفتى هقوله إن شاء الله

وربنا معاكم إن شاء الله

[Ahmed M. Fayez]

بالنسبة لقسم ssp
ينفع أقدم فيه وأنا مثلاً في جامعة كفر الشيخ ؟
وامتي التقديم ؟ والمصاريف كام ؟

[To Be Is To Do]

المشاركة الأصلية كتبت بواسطة Ahmed M. Fayez

بالنسبة لقسم ssp
ينفع أقدم فيه وأنا مثلاً في جامعة كفر الشيخ ؟
وامتي التقديم ؟ والمصاريف كام ؟

بالنسبه للتقديم امتى فده بيبقى بتحديد ميعاد محدد للكل سواء العادى او ال SSP وهيعلنوا عنه
بالنسبه ينفع من جامعه كفر الشيخ او لأ فمعنديش بيها علم واللى يبفيدك فى الكلام ده الإداره ف الكليه
بالنسبه للمصاريف هسألك حد أعرفه SSP وأرد عليك

[Ahmed M. Fayez]

المشاركة الأصلية كتبت بواسطة To Be Is To Do

بالنسبه للتقديم امتى فده بيبقى بتحديد ميعاد محدد للكل سواء العادى او ال SSP وهيعلنوا عنه
بالنسبه ينفع من جامعه كفر الشيخ او لأ فمعنديش بيها علم واللى يبفيدك فى الكلام ده الإداره ف الكليه
بالنسبه للمصاريف هسألك حد أعرفه SSP وأرد عليك

تمام جداً ، أستأذنك لو ينفع تبعتلي Add علي الفيس بوك

https://www.facebook.com/ahmed.fayez.9674

[2 moon sun]

السلام عليكم ورحمة الله وبركاته
ممكن حضرتك تقولى ايه الاوراق المطلوبه للتقديم لكلية هندسة اسكندرية علشان اروح اقدم
وشكراااااااااااااا لمساعدتنا

[To Be Is To Do]

المشاركة الأصلية كتبت بواسطة 2 moon sun

السلام عليكم ورحمة الله وبركاته
ممكن حضرتك تقولى ايه الاوراق المطلوبه للتقديم لكلية هندسة اسكندرية علشان اروح اقدم
وشكراااااااااااااا لمساعدتنا

لما يحددوا ميعاد التقديم هيقولوا بالظبط ايه الاوراق اللى هما عايزنها وبتبقى غالبا
حوالى 10 صور شخصيه 4×6
بطاقه الترشيح وكام صوره ليها ( للاحتياط )
صوره من البطاقه الشخصيه
بالنسبه للشباب بيبقى فيه استماره 6 جند
تقريبا برده شهاده الميلاد الاصليه وصوره منها
واكيد انا ناسى حاجات برده بس كل الكلام ده هيتم الاعلان عنه بالتفصيل وقت ما يعلنوا ميعاد التقديم

[2 moon sun]

متى يكون موعد التقديم لكلية الهندسة ؟

[To Be Is To Do]

المشاركة الأصلية كتبت بواسطة 2 moon sun

متى يكون موعد التقديم لكلية الهندسة ؟

لسه متحددش

[a7med_ali]

أيه أصعب مواد ممكن أى حد يقابلها ف أعدادى ؟؟ ..

وبتحتاج قد إيه مذاكرة ف اليوم ؟؟ ..

وأيه المواد اللى ممكن يتاخد فيها كورسات ف أعدادى ؟؟ ..

[To Be Is To Do]

المشاركة الأصلية كتبت بواسطة a7med_ali

أيه أصعب مواد ممكن أى حد يقابلها ف أعدادى ؟؟ ..

وبتحتاج قد إيه مذاكرة ف اليوم ؟؟ ..

وأيه المواد اللى ممكن يتاخد فيها كورسات ف أعدادى ؟؟ ..

بص يا باشا
مينفعش تسأل عن اصعب مواد لانك لو عرفت ان الماده دى صعبه هتتعقد حتى لو انت شوفتها سهله هتقنع نفسك انها صعبه وكمان مستوى الصعوبه والسهوله نسبى من شخص للتانى ، فانت اللى هتحدد ايه السهل والصعب

المذاكره العاديه جدا بمعنى لو اخدت محاضره انهارده محاضرتين وروحت ذاكرتهم فى يومها انت كده برنس وتمام جدا واضمن لنفسك تقدير انما لو أخرت الحاجات لقبل الامتحان ومفكر انك هتلم فانا بقول يستحيل هتقدر لان الكليه نظامها مختلف عن الثانوى فى كل حاجه

برده حته الكورسات دى نسبيه مينفعش اقولك انك تاخد كورس فى ماده كذا وكذا لان برده انت اللى بتحدد كل ده بناء على مستواك واللى انت محتاج فيه كورس

[ميسي بيبيتو]

طيب ايه احسن طريقه للمذاكره في الهندسه يابشمهندس لو سمحت ؟؟؟

وايه اللي يتحل بالظبط وكده

[To Be Is To Do]

المشاركة الأصلية كتبت بواسطة ميسي بيبيتو

طيب ايه احسن طريقه للمذاكره في الهندسه يابشمهندس لو سمحت ؟؟؟

وايه اللي يتحل بالظبط وكده

بص أغلب الإمتحانات فى الكليه بتبقى عباره عن الحاجات اللى اتشرحت فى المحاضرات ومسائل الشيت اللى الدكاتره بينزلوه وشويه اسئله من امتحانات سابقه + اسئله من تأليف الدكاتره ( والاسئله دى مبتبقاش كتير اوى مجرد بس بتقيس مدى فهمك للى اتقدملك فى المحاضرات )

فاللى مطلوب منك انك تزاكر محاضرات كويس جدا وتحل أسئلتها وكمان تزاكر اللى اخدته فى السيكن مع المعيدين وتحل الشيت اللى بينزل ولو خلصت كل ده تبص على امتحانات قبل كده لان فيه اسئله بتتكرر من امتحانات سابقه

احسن طريقه للمذاكره : دى بترجع لكل واحد حسب هو متعود على ايه او بيعرف ينظم وقته ازاى بس خلى بالك الوقت اللى هتقضيه فى البيت مش كتير مقارنه بالوقت اللى هتقعد فيه فى الكليه بمعنى ان وقت مزاكرتك فى البيت مش كتير يعنى لازم تنظمه بطريقه كويسه عشان تعرف تلم اللى بتاخده

[To Be Is To Do]