الكادر ما بين مصر والدول الأخري

[walleed1982]

السلام عليكم

اخواني المدرسين

من عنوان الموضوع وهو الكادر

في ناس كتيرة في مصر شايفة ان الكادر ده اهانه للمعلم

نشوف بقي الكادر عند الدول التانيه من خلال تجارب ناس عايشة هناك

أولا :: الدول الغربية

ابن عمي مهاجر لاستراليا من سنة 95 يعني تقريبا 15 سنه

اولاده بيدرسوا هناك طبعا وبيتعلموا وعلي فكرة في هناك مدارس باللغة العربية ... مش كتير بس في تقريبا في كل مقاطعة مدرسة او اتنين والمقاطعة - علي حسب وصف ابن عمي - قد حي الهرم وفيصل مع بعض

المهم ابن عمي باكلمه علي النت والراجل بيقولي انهم بيعملوا دورات تدريبية للمدرسين كل سنتين في أحدث البرامج والأساليب التربوية - كلا حسب تخصصه - وبعد الدورة امتحان من يجتازه مرتبة بيزيد بنسبة معينة واللي لم يجتاز بيفضل زي ماهو

ده كلام الراجل في آخر مرة كلمته علي النت من كام يوم

وعلي حسب كلامه برده قاللي ان الكلام ده بيحصل في بريطانيا واليابان وكندا وبعض الدول الأوربية وقالي الكلام ده علي أساس ان استراليا فيها تقريبا اكتر من 40 نوع جنسية مختلفة وهو هناك فاتح مصنع ألبان مع واحد كويتي وشغال عندهم ناس من جنسيات كتيرة

-------------

ثانيا :: الدول العربية

والكلام ده من احد اصدقائي في دولة عمان قالي بالحرف الواحد

(( الناس بتوع عمان عايزين يقلدوا مصر ويعملوا امتحانات تأهليلة للمدرسين والأسخم من كده ان اللي مش هيجتاز هيكنسلوه ))

واحد تاني من دولة الأمارات قالي تقريبا نفس الكلام وهي دورات تدريبية سنوية للمدرسين يليها امتحان

------------------

طبعا ياجماعه انا باقول الكلام ده علشان بس نعرف احنا ماشين ازاي وباقوله للعلم مش لحاجة تانية

ولو شفنا سفارات الدول العربية لما تعمل اختبارات للعمل الحكومي وطبعا في ناس دخلت الأمتحانات دي وقد ايه هي صعبة ولكن ده نظامهم

ولو شفنا اعلانات نفس الدول دي هتلاقيهم بيطلبوا حاجات شبه بعض

مثلا لايزيد السن عن 35 سنه ..... يعني هما عايزين الشباب تحديدا

يكون مؤهل عالي بتقدير جيد جدا ويفضل الحاصلين علي دراسات عليا أو ماجستير او دكتوراة ..... معني كلامهم انهم عايزين الناس اللي المفروض كان هيبقوا معيدين وطلعوا من اوائل دفعاتهم يعني اكيد مميزين

يكون حاصل علي icdl أو تويفل .... يعني عايزين واحد يكون معاه المام بالأنجليزي والكمبيوتر

وبعد كل ده يعملك اختبارات تانية في السفارة علشان يتأكد انك عقلية ممتازة

غير ده تلاقي هناك المدرس الأول معاه شهادات أعلي ودراسات أكتر وخبرات اكثر من المدرس الجديد

وتلاقي الوجه هناك سنه مش بيزيد عن 45 سنه والمدير كذلك وتلاقي مثلا معاه دكتوراه غير الخبرات

وممكن تلاقي واحد عنده 28 سنه وتحت ايده ناس عندها 40 سنه

يعني في تدرج وظيفي حسب الشهادات الأعلي ثم الدورات الأكثر ثم الخبرات الأكثر بعكس مصر تماما

الدول دي كانوا متأخرين عنا كتير جدا واحنا اللي علمنا الناس بتوعهم لكن زي مااحنا شايفين هما شغالين صح واحنا عندنا فكر قديم جدا وهو ان الأقدمية بغض النظر معاه ايه او واخد ايه وممكن تلاقي مدير مدرسة معاه دبلوم زراعه وموجه معاه دبلوم معلمين

--------------------------

أخيرا ياجماعه وجهه نظري الشخصية ان الكادر هيخلي المدرس اللي عايز يطور من نفسه ويطلع علي كل ماهو جديد يتميز عن المدرس اللي يادوب خلص كليته ورمي الكتب تحت السرير وخلاص - مع احترامي لهم طبعا - وفي النهاية دي وجهه نظري المتواضعه واللي انا مقتنع بيها

تحياتي للجميع

[YaserTrboush]

أنا معاك فى كل ما قلتة ولكن هل تم تدريب المدرس هنا على ما سيمتحنة
الدورات التدريبة عندنا حبر على ورق

[walleed1982]

اهلا بك اخ ياسر

الدورات التدريبية والكورسات في النظام الفاسد القديم حبر علي ورق لكن المفروض دلوقتي نبقي زي الغرب وده دورنا اننا نجبر النظام الجديد ما بعد الثورة انه يكون كده

تحياتي لك

[علي فهمي]

العمل الجاد والتدريب مطلوبان ولكن بدون كرامة المدرس لا يساويان إلا ضياع الوقت والجهد هناك حقوق مادية وأدبية تمنع محاسبتنا إلا من نقابتنا وتمنحنا عيشة كريمة

[طلعت احمد]

ياخ بصلى
بصلى كمان
طاب متحسب هناك المدرس بياخد كام واحنا هنا بناخد كام
شوف مستوى المعيشه هناك وهنا

[هيما2010]

أنا معاك فى كل ما قلتة ولكن هل تم تدريب المدرس هنا على ما سيمتحنة
الدورات التدريبة عندنا حبر على ورق

[walleed1982]

الأخوة الأساتذة

انا هدفي من الموضوع ده اننا نعرف ان المدرسين بيمتحنوا في كل دول العالم يعني الموضوع ده مش في مصر بس

وعلشان احنا في مصر فاحنا بنطبق الكادر غلط وده كان مقصود من النظام الفاسد الذي زال والحمد لله

يبقي ايه المطلوب دلوقتي

اننا نقول مفيش مشكلة من امتحانات وكل حاجة بس عايزين نطبق ما يحدث في الغرب

مفيهاش حاجة اعتقد لو حصل زي مثلا دورة تدريبية وبعدها امتحان

ومفيش مشكلة برده لو زي الـ icdl ويبقي الكادر عبارة عن مستويين او ثلاثة ويكون الأمتحان بنفس طريقة امتحانات الـ icdl

ده هيبقي افضل بكتير مانلغي الكادر من الأساس .... لأن ده فعلا موجود في دول كتير تانية وان كان التطبيق أفضل من هنا ولكنه موجود ومحدش معترض عليه

علي الأقل لو حبينا بعد كده نطالب بحقوق المدرسين او نطلب ترقيات نبقي احنا مدعومين اننا نتطور من أجل تعليم أفضل

تحياتي للجميع

[alaa20022003]

الدورات التدريبية والكورسات في النظام الفاسد القديم حبر علي ورق
نريد تدريبات أولا ثم نتحدث عن الاختبارات
ففي السعوديه الذي يتقدم للتدريس هو الذي يمتحن وليس القديم
نحن تعلمنا على يد معلمين لم يختبروا الكادر والحمد لله عايشين
المفروض كل شئ يصحح ولا يوجد هذه الضجه الاعلاميه التي تصاحب الامتحانات لأنها هي التي فيها اهانه
وكذلك دورات icdl التي تعطى لمعلمين تعدوا الـ 50 عاماً فماذا تنتظر منه

ياأخي الحبيب الصين من أجل أن تنشأ قناه بالعربية ارسلت صينيون منذ ما يقارب 60 عاماً لتعلم اللغة العربيه والمعايشه في مصر ثم ظهرت القناه .
هل نحن نخطط بهذا الشكل ؟
كل فرد يجد ما يعجبه يحاول تطبيقه دون دراسه هل هو مناسب لنا أم لا ،،، ولابد من تهيئه المناخ أولا حتى لايوجد معارضين أو مناقشه الطريقة الصحيحة للتطبيق وليس مجرد ورق × ورق
الرجا التخطيط أولا توجد لدى أسئله اريد الاجابة عليها :
1 ) هل يوجد أجهزه بالمدارس تعمل بكفاءة ؟.
2 ) هل يوجد غرف في المدارس تكفي لعدد الدارسن ؟
3 ) هل يوجد بالمدارس العقليات الغير ورقيه والعهد ؟
4 ) هل يوجد في المديريات الاداريون الناجحون ؟

ياراجل عند عودتي من السعودية عملت دفتر تحضير بالكمبيوتر وقوبلت بالرفض والتريقه من الجميع
لأن دفتر التحضير لا بد أن يختم بختم المدرسة ويرقم وكذلك دفتر متابعة المدرس الأول
عموما بعد سنتين كاملين لم أجد دورة واحده في مادتي التعليمية ، علما بانني حضرت هناك على الأقل كل سنه لا يقل عن 5 دورات
بلاضافه لمجلس الماده الذي يناقش المادة التعليمية وما يريد توضيحه وعمل برامج تخدم جميع المعلمين بلاضافة الى ملتقى الماده الذي يقام سنويا لمناقشه المستجدات من الوسائل التعليمية والخبرات .
اين نحن حضراتكم من التقدم
وهناك شئ مهم أني لم احصل على دوره icdl ولكن والحمد لله عندي من المعلومات ما يفوق هذه الدوره
لابد من أن تحب الشئ حتى تبدع فيه وليس لمجرد الامتحان والشهاده .
هل عرف الطلاب لماذا يتعلم أساساً لكان لنا شأن آخر. فأيامنا كان هناك طموح أن نعمل بهذه الشهاده ، أما الآن ....

* نريد دورات في التنميه البشريه أهم من التربوي الذي يتحدثون عنه في الكتب انزلو للواقع تجدوا في المدارس أخصائي نفسي هو نفسه يريد العلاج وكذلك اخصائي اجتماعي لا يعرف التعامل مع الطلاب ويتحدث فقط عن القانون رقم ... والقانون رقم ... ولا توجد قوانين من الأساس .
لماذا لا يوجد أخصائي للموهوبين أليس هم أحق بالرعاية
والى الأمام
مدرسه مدرسه ..... معلم معلم .....بيت بيت ..... زنقه زنقه مع الاعتذار للقذافي

[tena]

يا سيدى صباح الفل مين الى قال ان النظام الفاسد زال ده فيه لغاية دلوقتى موجهين وناس فاسدة عمالة تلعب لصالح اقربائهم والى بيأكلوهم ده بيقولك الأقدامية بتعتك ضاعت الأقدمية بدخول امتحان الكادر وسلملى على النظام الذى زال وبقولك ايه ايه رأيك انى انا نزلى الدرجة الأولى فى أول العام واتشالت او اتسرقت بعديها بأسبوع عارف مين الى سرقها البلطجية وعجبى على التدريس والنبى يا شيخ متقرينش بينا وبين اسيدنا

[tena]

الدولة كانت فاسدة ودلوقتى مبقتش حتى دولة

[هيما2010]

يا استاز محمدعامر/هل تظن انه سيعاد تسكين المعلمين من الاول وتعاد الحقوق الضائعة كلام السيد الوزير لم يوضح ذلك ان كان عندك معلومات تفيدنا بها لان حالتنا متشابهة

[فاطمة الزهراءمحمد]

فى مصر التدريبات حبر على ورق وقلما يبقى ليها فائدة بالنسبة للمدرس
يا ريت يبقى فى تدريب بصفة دورية تفيد المعلم ويستفيد منها الطالب بعد ذلك

[مصرى الى الابد]

وزير فاشل
وزير فاشل
وزير فاشل
وزير فاشل
وزير فاشل