عن كلية الهندسة بشبرا نتحدث !!!!!

[blackcracker]

بسم الله الرحمن الرحيم

اولا احب اعرفكم بنفسى انا منير طالب بكلية الهندسة بشبرا
وان شاء الله هابقى متواجد معاكم عشان ارد على اى استفسار عن كليات الهندسة وهابدء معاكم ان شاء الله بكليتى الحبيبة كليه الهندسة بشبرا

اولا تقع الكلية فى قسمين
قسم فى روض الفرج وقسم فى الخلفاوى السنة الاعدادية والسنة الاولى فى اغلب الاقسام تتم دراستها فى الخلفاوى باقى السنين فى روض الفرج والكلية بها العديد من الاقسام ساورد تقارير مقتبسة عن اقسامها وارجو الله ان ينفعكم بها

[blackcracker]

أولا قسم اتصالات
دا قسم لذيذ جدا وقسم سهل جدا جدا جدا والي يقول عليه انه صعب يبقى ميستحقش يدخل هندسة من أساسه ... طبعا القسم كله بيعتمد أساسا على الإلكترونيات والدوائر الكهربية وشغل الكهربا عامة .

نيجي بقى للمواد وتوزيعها وبعد كدا نتكلم عن كل مادة ...

اول حاجه هتاخد في الترم الأول

1- مبادىء هندسة الكترونية :-
المادة من 150 .... 90 امتحان ... 60 اعمال سنه

المادة بيديهالك دكتورين الاول دكتور عماد زيور والتاني دكتور حسام

طبعا توزيع الدرجات بيتقسم عليهم هما الإتنين

2- مادة الدوائر الكهربية :-
المادة من 150 .... 90 امتحان ... 60 اعمال سنه

المادة بيديهالك دكتورين الاول دكتور حسام والتاني دكتورة هالة عبد القادر

طبعا توزيع الدرجات بيتقسم عليهم هما الإتنين

3- مادة البرمجه :-
المادة من 150 .... 90 امتحان ... 60 اعمال سنه

المادة بيديهالك دكتورين الاول دكتورة هالة حلمي والتاني دكتور محمد الشعرواي

توزيع الدرجات التلتين للدكتورة هالة والتلت للدكتور محمد

4- مادة الرياضيات :-
المادة من 125 .... 80امتحان ... 45 اعمال سنه

المادة بيدرسها الدكتور علي الصباغ


5- مادة الهندسة المدنية والميكانيكيا :-
المادة من 125 ... 80 امتحان و 45 أعمال سنه

المادة بيدرسهالك دكتور أسامة النحاس وبيديك الهندسة المدنية والتاني بيديك الهندسة الميكانيكيه


6- مادة التشريعات الهندسة :-
المادة من 50 درجة وبيدرسهالك الدكتور عماد زايور



ندخل بقى على الترم التاني

1- مادة الإلكترونيات :-
المادة من 150 .... 90 امتحان ... 60 اعمال سنه

المادة بيديهالك دكتورين الاول دكتورة احسان عباس والتاني دكتورة هالة عبد القادر

طبعا توزيع الدرجات بيتقسم عليهم هما الإتنين


2- مادة الدوائر الكهربية :-
المادة من 150 .... 90 امتحان ... 60 اعمال سنه

المادة بيديهالك دكتورين الاول دكتورةهالة عبدالقادر والتاني دكتورة ابتسام سعيد

طبعا توزيع الدرجات بيتقسم عليهم هما الإتنين

3- مادة برمجة الحاسب :-
المادة من 175 .... 100 امتحان ... 75 اعمال سنه

المادة بيديهالك دكتورين الاول دكتورة هالة حلمي والتاني دكتورعلاء

طبعا توزيع الدرجات بيتقسم عليهم هما الإتنين


4- مادة الرياضيات :-
المادة من 125 .... 80 امتحان ...45 اعمال سنه

المادة بيديهالك الدكتور محمد عيد

5- مادة الإختبارات الكهربية :-
المادة من 100 ... 60 أعمال سنه ... 40 امتحان

المادة بيدهالك مجموعة من المعيدين في المعمل

6- مادة اللغة :-
المادة من 50 وبيدرسهالك الدكتورة فاطمة





كدا خلصنا من المواد في الترمين نيجي بقى لتعريف بسيط لبعض المواد

الإلكترونيات : مادة تقيلة بصراحه والكورس فيها جامد وبيتشرح فيها الأجزاء الخاصة بفيزياء الإلكترونات والفجوات وايه الي بيحصل داخل حتة شبه الموصل بالزبط كما بتحتوي على شوية دوائر بتحتوي على الترانزستورات والدايودات والمكونات الصغيرة الي بنشوفها في أي بوردة لاي جهاز الكتروني .

الدوائر الكهربية : وفيها طرق حل جميع انواع الدوائر الي بتحتوي على مقاومات ومكثفات وملفات مهما كان شكلها وعددها او طريقة توصيله وطبعا المادة لذيذه جدا جدا وبالذات في الترم الأول للجزء بتاع الدكتورة هالة عبدالقادر .

برمجة الحاسب :- مادة متخصصه في مجال الحاسب الألي ( سوفتوار بس ) وكلها لغات برمجة سواء في الترم الأول برمجة برامج او في الترم التاني برمجة صفحات انترنت وخلافه ... اما عن طبيعة المادة فهيا برضو سهله جدا ولذيذه ومفيش فيها اي مشاكل طبعا انا بتكلم بالنسبالي انا معرفش باقي الدفعة عاملين ايه .

الرياضيات : طبعا المادة أغنى عن التعريف بس المرادي هتتعمق اوي في الأعداد التخيليه وطرق حل المعادلات التفاضليه والتكاملات برضو وحبة حبشتكنات كدا من بتوع الرياضه .

الهندسة المدنية والميكانيكا : مادة الهندسة المدنية هي مادة من بتوع عمارة ومساحه وكدا وواخدينها زي نظام المادة الأدبية في الثانوية العامه وهي بتتكلم عن العماويد وانواعها ورسم البيوت وعفشها وتوزيع الكهرباء فيها وكدا يعني وبرضو فيها طرق لطبخ الأكل وغسل المواعين اما الهندسة الميكانيكا فهي مادة تعتبر نفس فيزياء اعدادي الترم التاني وفيها طبعا الحرارة والfluid والحاجات دي الي انتوا خدتوها .

مادة الإختبارات : مادة عملية كل شغلك فيها في المعمل طبعا مش هتشتغل حاجه بايدك ودا عشان المعامل بتاعتنا المتميزه والي فوق المستوى الطبيعي وبتتكلم عن بدائيات الدوائر الكهربية وجزء من البرمجه .

مادة التشريعات الهندسية : مادة بتتكلم عن القوانين الي ماشية في السوق سواء قوانين هندسة او قوانين اجتماعيه وبرضو بتتكلم عن الدستور وايه العقوبات الي عندنا وكدا يعني ... من الأخر هيا مادة حقوق .

مادة اللغة : مادة حلوه ولذيذه بتتكلم عن اللغه اكيد مش العربية ولا الفرنسيه وهيا مادة مكمله بس مش أكتر .


دي كدا المواد وتعريفها .. في بقى الشركات الي ممكن تدرب فيها زي توشيبا العربي والمصرية للإتصالات ومصر للطيران وفودافون وموبينيل واي سنترالات اتصالات واي حاجه تختص بمجال الإتصالات

طبعا القسم بيخرجك مهندس اتصالات يعني بتتعامل مع الرادارات والكومبيوترات والحاجات الديجيتال الحديثة

نسيت أقول ان في 3 بتخصص اما اتصالات الكترونيات أو حاسبات وبرمجة وكل قسم طبعا متعرف من اسمه

أرجو اني اكون وفيت بالشرح ولو في اي استفسار يبقى في نفس الموضوع وان شاء الله هيترد عليه فورا

وشكرا

[blackcracker]

ده ملف فيه بيان بالمواد الدراسية لكل فرقة من فرق القسم
أنا عملت الملف ده من موقع الكلية
بيان المواد الدراسية لجميع فرق قسم الاتصالات

[blackcracker]

بسم الله الرحمن الرحيم وبه نستعين
..................قسم ميكانيكا قوى ......................
تعالوا بينا نتعرف على قسم ميكانيكا قوى
القسم اللى بتحوم حواليه اشاعات كتيرة مغرضة

أحب إن أول نقطة أتكلم بيها عن القسم تكون مجالات العمل :

1/ محطات توليد الكهرباء
ودى تعتبر من أهم المجالات اللى هتسمع عنها وإنت بتدرس فى ميكانيكا قوى
ميكانيكا قوى .. يعنى توليد الكهرباء
كهرباء قوى .. يعنى نقل وتوزيع الكهرباء
ودة عشان بس نفهم الاختلاف بين عمل مهندس ميكانيكا قوى وكهرباء قوى فى المحطات بتاعة توليد الكهرباء

2/ التكييف والتبريد
ودة بيسموة حاليا المجال المربح
يعنى اللى بيقدر يثبت وجودة فى هذا المجال حاليا بتتهافت عليه الشركات والمكاتب الكبيرة فى مصر وخارجها طبعا خاصة دول الخليج العربى
والموضوع بتاع التكييف والتبريد لا يقتصر على التكييفات المنزلية اللى بنشوفها
لا فى تطبيق أكبر من كدة بكتير إسمة " التكييف المركزى " ودة بيكون نظام تكييف لمنشأة كبيرة زى مستشفى أو فندق أو قرية سياحية.. الخ .. تكلفتة عالية جدا لكنها فى كل الاحوال أفضل من التكييفات العادية وأسهل فى الصيانة وزى ما وضحت بيستخدم فقط فى المنشآت الضخمة اللى بتحتاج تكييف وتبريد فى كل غرفة أوفى كل جزء منها

3/ السيارات
واحد هيقولى طب ما فى كليات هندسة تانية فيها قسم السيارات لوحدة
أوك ماشى .. بس كدراسة فى قسم ميكانيكا قوى إنت تقدر تزود عليها على حسب رغبتك وتكون جدير انك تشتغل فى المجال دة إذا أردت فعلا
وهو مجال مميز جدا طبعا وبدورة بيودينا لمجال محركات الطائرات ومحركات السفن والمعدات الثقيلة عموما زى .. الحفارات و اللوادر والاوناش بكل أنواعهم

4/ البترول والغاز الطبيعى
بردة واحد هيقولى البترول والتعدين دول ليهم كليه منفصلة فى السويس وهما هيكونوا أكفأ من بتوع ميكانيكا قوى
بردة هقولة الاحتياجات بتفرض نفسها على الكل
محطات البترول والغاز الطبيعى عادة كلها عبارة عن حفر فى الارض واستخدام طلمبات واستخدام حفارات وعمل شبكة مواسير و .. و ..
خد بالك طالما ذكرت كلمة " طلمبة " اعرف انك فى أرض ميكانيكا قوى
وكذلك كلمة " شبكة مواسير "
يعنى الموضوع متوقف على مهارة المهندس نفسة وهل هو عندة الاستعداد فعلا يتعلم فى المجال دة ويمشى فيه ولا لا ومهندس ميكانيكا قوى فعلا قادر انة يشتغل فى المجال دة

5/ محطات تحلية المياة ومحطات الرفع بجانب المشروعات الزراعية الكبيرة
وبردة المحطات دى بتستخدم الطلمبات كعنصر أساسى فيها وطبعا ميكانيكا قوى ليها دور قوى جدا فى المجال دة

6/ مكافحة الحرايق
ودة مجال جديد الى حد ما وبيعتبر من المهام الرئيسية دلوقتى فى أى مشروع كبير ودة للحفاظ على المشروع ككل من أى خسائر فادحة بسبب الحرايق
وبيعتمد المجال دة على شبكة مواسير وأجهزة تحكم تعمل عند الخطر فقط طبعا

7/ الصيانة والعمل فى المصانع الانتاجيه
طبعا مفيش مصنع بيخلو من مهندس الميكانيكا والكهربا عموما
مهندس الميكانيكا طبعا يهمة جدا ان المكن يطلع أفضل انتاجية ليه وفى نفس الوقت يحافظ عليه بالصيانة الدورية السليمة
الصيانة تعتمد فى الاساس إنك تكون عارف الماكينة دى بتشتغل ازاى واية هى أجزائها ولما يحصل عطل أقدر أصلحة إزاى أو إزاى وإمتى أغير جزء تالف بجزء صالح للاستخدام
وفى كورسات خارجية على فكرة عن التزييت والتشحيم فى المكن وصيانة اغلب المعدات الميكانيكية

طيب بعد ما اتعرفنا على مجالات العمل الكتيرة دى
الموضوع تحس إنة عام .. هقولك دى ميزة وعيب فى نفس الوقت
ميزة انك ممكن تحدد انت بتحب اية وتمشى فيه بدون عوائق بإذن الله
وعيب فى حالة لما بتكون مش قادر تحدد اية المجال اللى انت عايز تمشى فيه
لان ساعتها بيبقى معاك بكالوريوس ميكانيكا قوى بس فى اية بالظبط مبيتكتبش !
بيتكتب بس المشروع اللى انت هتختارة فى آخر سنة اللى هى سنة رابعة
بس فى نقطة مهمة اوى مش عايز أنساها
الرزق يا جماعة حاجة بتاعة ربنا سبحانة وتعالى
اعمل اللى عليك وتوكل على الله وحاول تفيد أمتك وبلدك
............................
نيجى بقة نشوف اية هى العلوم اللى بتساعدنا اننا نشتغل فى المجالات اللى احنا اتكلمنا عليها فوق دى

أولا : علم الديناميكا الحرارية
thermodynamic
ودى تعتبر أشهر مادة هتدرسها فى ميكانيكا قوى
بتتدرس فى السنة الاولى الترم التانى وبعد كدة بتفضل معاك طبعا مع اختلاف المسميات
بس انا بكلمكوا عن الاساس يبقى اية
ودى بتتكلم عن الطاقة اللى بيكتسبها المائع لما بيتعرض للتسخين أو التبريد واية التطبيقات اللى انا ممكن اعملها معتمدا على الظاهرة دى
وطبعا فى المادة دى هتحتك بمجال محطات توليد الكهرياء ومجال التكييف والتبريد ومجال السيارات الجزء الخاص بالاحتراق الداخلى " أى داخل المحرك "
لان مجال السيارات ليه جزء آخر وهو خاص بعلم الهيدروليك

ثانيا : علم ميكانيكا الموائع
fluid
ودى بتدرسها فى السنة التانية الترم الاول وبتفضل ماشى فيها بقة لآخر سنة تقريبا مع اختلاف المسميات
لان احنا دلوقتى بنتكلم عن الاساسيات اللى قايم عليها قسم ميكانيكا قوى
وعلم ميكانيكا الموائع بيدرس حركة أى مائع والمتغيرات اللى بتحدث عليه بأدق التفاصيل عشان لما مهندس ميكانيكا قوى يجى يصمم آلة يعرف الاول اية هو المائع اللى هيمشى جوة الآلة دى سواء " ماء " أو " زيت " أو " غاز " ولما بيعرف نوعية المائع بيقدر يصمم الآلة بالطريقة الصحيحة
وعلى فكرة علم الهيدروليك أحد فروع العلم بتاع ميكانيكا الموائع

ثالثا : علم انتقال الحراة
heat transfer
ودى بتدرسها فى السنة التانية الترم التانى وبتكمل فيها كمان فى سنة تالتة ترم اول وتانى
ودة علم بيدرس طرق انتقال الحرارة بين الاجسام وبين الوسط المحيط وبين الاجسام وبعضها
ودة مهم جدا لانك بتتحكم فى درجات الحرارة ودة بيساعدك فى التكيف مع الوسط اللى انت شغال فيه وتتفادى حدوث أى معوقات تعوق اكمال العملية اللى الآلة بتقوم بيها
يعنى جانب مهم جدا فى الدراسة

طبعا دول الـ 3 علوم الاساسية فى القسم
واللى يقدر يفهم الـ 3 علوم دول ويربط ما بينهم ربط صحيح
كدة يبقى أصاب الهدف 10/10

طب هل الدراسة فى القسم بتبقى فى الـ 3 مواد دول بس
لا طبعا
فى مواد كتير بتيجى جنبهم فى كل ترم بتدرسوة
بس المواد دى انت تقدر تقول عليها مواد مساعدة ليهم
عشان الصورة توصلك كاملة عن العلم بتاع ميكانيكا قوى عموما
لان مهندس ميكانيكا قوى معرض انة يحتك بشغل ميكانيكا إنتاج مثلا
او معرض انة يحتك بشغل كهرباء قوى او مدنى مثلا
ولذلك وجب انك تدرس مواد بيدرسها أقسام تانية وبتكون بالنسبالهم مواد تخصص
لكن بالنسبالك بتبقى مواد مساعدة
وكمثال لاحتكاك مهندس ميكانيكا قوى بشغل ميكانيكا انتاج
فى سنة أولى بتدرس طول السنة مادة الرسم الميكانيكى
مفيش مهندس مبيعرفش يرسم الآلة اللى هو بيشتغل عليها
أينعم الرسم دلوقتى كلة معتمد على الكمبيوتر والبرامج
انما انت مش ممكن هتعرف تشتغل على البرنامج ويبقى اسمك مهندس من غير ما تعرف الاول قواعد واساسيات الرسم على اللوحة وتشتغل بايدك
وفى سنة تانية بتدرس مادة التصميم
ودى مادة بتجمع ما بين الرسم والحسابات
يعنى بيعلموك الاول فى سنة اولى ترسم
وفى سنة تانية ترسم وتصمم عن طريق حسابات بقوانين بتدرسها لكل جزء بتشوفة فى الماكينات عموما
ودة اللى بيخلى سنة أولى أسهل بكتير من سنة تانية
بس للناس اللى هى مشكلتها الرسم والتصميم
هقولكوا ان القسم بتنتهى علاقتة بالرسم الميكانيكى والتصميم بعد سنة تانية
يعنى فى سنة تالتة ورابعة مفيش رسم ومفيش مسطرة حرف تى
بس لازم تكون بتعرف كويس أوى فى الاتوكاد وبرامج الرسم الحديثة
ودة مش عشان الدراسة
لا دة عشان تلاقى فرصة عمل مناسبة
لان مفيش شركة كبيرة او مكتب كبير هيقبلك وإنت مبتعرفش ترسم على الاتوكاد او على اى برنامج من برامج الرسم الحديثة زى السوليد ورك مثلا
واستكمالا للحديث
بتدرس مادة " نظرية الماكينات " مرتين
مرة فى السنة الاولى الترم الاول ومرة فى السنة التانية الترم التانى
والمادة خاصة بعلم حركة أجزاء الماكينات ودراسة كيفية عمل التروس

وبردة بتدرس مادة " هندسة الانتاج " فى السنة الاولى الترم الاول وفى السنة التانية الترم الاول وإنت أساسا هتدرس المادة دى فى إعدادى الترم التانى

أما بقة كمثال لاحتكاك مهندس ميكانيكا قوى بشغل كهرباء قوى
بتدرس مادة زى الهندسة الالكترونية فى سنة تانية الترم التانى ودى مجرد بس بتعرفك على مبادىء الهندسة الالكترونية
وبتدرس بردة مادة هندسة القوى والآلات الكهربية فى السنة التالتة الترم التانى

وكمثال لاحتكاك مهندس ميكانيكا قوى بشغل مدنى
بتدرس مادة الـ structure فى السنة التانية الترم الاول
ودة مادة خاصة بتصميم الاجزاء المعدنية المصنوعة من الـ Steel اللى بتتصمم عشان تشيل حمل معين
كمثال مثلا " كوبرى إمبابة "
ودى هتاخدوا فكرة مبسطة عنها فى مادة الميكانيكا فى إعدادى
الجزء بتاع الجمالونات أو الـ trusses

وبقية المواد اللى بتدرسها فى القسم مفيش مانع أبدا إنك تاخد منها على قد ما تقدر
دة هيفيدك جدا جدا
......................

......................

[blackcracker]

مواد الدراسة
....................
اولى تيرم اول

1/ رسم ماكينات ( ملهاش امتحان فى الترم الاول )

2/ مواد هندسية وفلزات

3/ هندسة الإنتاج

4/ ميكانيكا هندسية ونظرية ماكينات

5/ فيزياء

6/ رياضيات

اولى تيرم تانى

1/ رسم ماكينات ( امتحان على العام الدراسى كله )

2/ ديناميكا حرارية هندسية

3/ مقاومة مواد واختباراتها

4/ تحليل الإجهادات

5/ هندسة مدنية ومساحية

6/ رياضيات

........................

تانيه تيرم اول

1/ ديناميكا حرارية هندسية

2/ ميكانيكا الموائع

3/ ميكانيكا الهياكل

4/ هندسة إنتاج

5/ رياضيـــات وحاسبات

6/ تصميـم أجــزاء الماكينات ( ملهاش امتحان ترم اول )

تانيه تيرم تانى

1/انتقال الحرارة

2/ ميكانيكا الموائع

3/ نظرية الآليات والماكينات

4/ هندسة إلكترونية

5/ رياضيات وحاسبات

6/ هندسة صناعية وإدارة

7/ تصميم أجزاء الماكينات ( امتحان على العام الدراسى كله )

........................

تالته تيرم اول

1/ محركات حرارية واحتراق

2/ ميكانيكا الموائع

3/ انتقال الحرارة والكتلة

4/ الطرق الحسابية فى علوم الطاقة

5/ القياسات وأجهزة القياس

6/ مقرر اختيارى غير تخصصى من :
كمبيوتر
ضبط الجودة
بحوث العمليات الصناعية

تالته تيرم تانى

1/ انتقال الحرارة والكتلة

2/ محركات حرارية واحتراق

3/ اقتصاد هندسى وتشريعات مهنية

4/ قوى وآلات كهربية

5/ أنظمة ومعدات هيدروليكية

6/ آلات الموائع

........................
رابعه تيرم اول

1/ اهتزازات ميكانيكية

2/ آلات توربينية

3/ محركات الاحتراق الداخلى

4/ التبريد وتكييف الهواء

5/ مشروع

6/ مقرر اختيارى تخصصى من :
محركات الاحتراق الداخلى المتطور
احتراق متقدم
السريان ثنائى الطور
استخدام الحاسب الآلى فى التحكم
تحلية المياه
تصميم شبكات الأنابيب
التبريد وهندسة درجات الحرارة المنخفض
محطات قوى هيدروليكية
الحرائق والانفجارات
الهندسة النووية
تلوث بيئة متقدم
تكييف الهواء المتقدم

رابعه تيرم تانى

1/ محطات قوى تقليدية

2/ طاقات متجددة وحماية البيئة

3/ آلات توربينية

4/ التحكم الآلى

5/ مشروع

6/ مقرر اختيارى تخصصى من :
محركات الاحتراق الداخلى المتطور
احتراق متقدم
السريان ثنائى الطور
استخدام الحاسب الآلى فى التحكم
تحلية المياه
تصميم شبكات الأنابيب
التبريد وهندسة درجات الحرارة المنخفض
محطات قوى هيدروليكية
الحرائق والانفجارات
الهندسة النووية
تلوث بيئة متقدم
تكييف الهواء المتقدم
........................

[blackcracker]

ميكانيكا أنتاج
ايه بقى ميكانيكا انتاج دي ... ؟

زي ما باين من اسمها ... انها متخصصة في الأنتاج , خلينا نقول بمعنى اصح , في التنفيذ ... , وبالتالي فهي اكثر شمولا واكثر عموما من اي قسم تاني ... لأن أي قسم تاني أثناء شغله لازم يعدي على انتاج ..

تعالوا ناخد مثال أكثر وضوحا

مدني ... مش ممكن مهندس مدني يشتغل سواء خراسنة مسلحة او (steel) إلا إذا مهندس الانتاج عمل له قطاعات الـ steel على ماكينات الدرفلة .. او استخلص له اسياخ الحديد من خام البليت ..

كهرباء باور ... اي شغل لوحات كهربية , او محولات او خطوط ضغط عالي ... الحاجات دي تنفيذها هي في حد ذاتها (يعني جسم المحول نفسه) لازم يكون على ايد مهندس انتاج ..

عمارة ... وان كان مش هايتضح هنا أوي لأن معظم شغلهم على ورق ... لكن , عندك مثلا الألوميتال بتاع الشبابيك ... ده بيعمله مهندس الانتاج عن طريق ماكينات البثق , وبعد كدة ياخده المعماري يركب او يصمم

اتصالات ... كذلك , نفس الفكرة , شاسيهات اي جهاز في الدنيا , لازم اللي بيعمله مهندس انتاج .. بالمناسبة شغل البلاستيك يندرج تحت شغل مهندس الانتاج

ميكانيكا باور ..... ونيجي للقسم ده ويمكن ده يكون الأصعب في المقارنة .. (أصل احنا ولاد عم) , لكن ابسط مثال لشغل ميكانيكا باور ... العربية , بتاع باور بيحدد لنا الماتور وشغله وكفاءته ودرجات الحرارة والذي منه , كمان بيصمم التكييف بتاع العربية ومعادلات درجات الحرارة بين جوة وبين برة ... لكن بتاع انتاج بينفذ العربية كلها من أولها لآخرها ..... شاسيه , صاج , فبر , اكسيدمات , فوانيس , مساعدين , عفشة كاملة , .... الخ

وعلى الرغم من أهمية القسم , زي ما انتوا شايفين , إلا ان الناس بتخاف تدخله , لإشاعات غريبة عن صعوبته , مع انه الحقيقية ... من أسهل وأحلى الأقسام

طبعا لازم يتحط في الإعتبار , ان الواحد لازم يكون بيحب القسم اللي هايدخله .... علشان يقدر يأدي فيه

نيجي لمشكلة تانية , وهي الرسم ... وطبعا كل الناس بتخاف من ميكانيكا بسبب الرسم (زي الأخ ده بصوا بقه عمل ازاي), خلينا نكون واقعيين ... صحيح الرسم في الأول والآخر موهبة .... لكن ممكن احنا بالتعلم نكتسبها , محدش فينا اتولد من بطن امه بيعرف يكتب ولا يقرا ... لكن احنا اتعلمنا , كذلك الرسم ... محتاجين نتعلم
اللي شايف ان الرسم معضلة , ممكن يتعلمه بسهولة (بس هو يكون عايز يتعلم فعلا) ...

كدة احنا عرفنا القسم كويس , فاضل حاجة أخيرة ...

قسم انتاج بيتقسم من تالتة للأقسام التالية
التصميميم المدعم بالحاسب الآلي
هندسة الانتاج والمواد
الهندسة الصناعية وإدارة مصانع

وطبعا ... في اشاعات (مغرضة) ... بتقول ان ما فيش ميكاترونيكس ..... اللي هو التصميم المدعم بالحاسب الآلي .. الكلام ده مالوش اساس من الصحة , القسم موجود , والمعلومات دي انا جايبها من ورق من شؤون الطلاب فيه كل المعلومات عن القسم والمواد اللي بتدرس

[blackcracker]

المواد اللي بتدرس في الترم الأول

1-هندسة انتاج (1)
الدكتورة : ايمان الكومي
درجات أعمال السنة : 60
درجات التحريري : 90

2-رسم ميكانيكي وانشاء ماكينات (1)
الدكتورة : فريدة سيد احمد
درجات أعمال السنة : 40
درجات التحريري : ـــ

3-مقاومة المواد واختباراتها (Material test)
الدكتور : فؤاد حلمي
درجات أعمال السنة : 50
درجات التحريري : 75

4-نظرية ماكينات (Theory of Machine)
الدكتور : عبدالسلام
درجات أعمال السنة : 30
درجات التحريري : 70

5-رياضيات (1)
الدكتور : محمد عيد
درجات أعمال السنة : 45
درجات التحريري : 105

6-هندسة مدنية ومساحية
الدكتور : محمد علي & ميرفت
درجات أعمال السنة : 40
درجات التحريري : 60

مجموع درجات الترم الأول 625 درجة

المواد اللي بتدرس في الترم الثاني

1-هندسة انتاج (2)
الدكتور : ايمان الكومي
درجات أعمال السنة : 50
درجات التحريري : 75

2-تحليل اجهادات (Stress analysis)
الدكتور : فؤاد حلمي
درجات أعمال السنة : 60
درجات التحريري : 90

3-علم المواد والفلزات (Metallurgy)
الدكتور : تامر سمير
درجات أعمال السنة : 40
درجات التحريري : 60

4-رسم ميكانيكي وانشاء ماكينات (2)
الدكتور : فريدة سيد احمد
درجات أعمال السنة : 40
درجات التحريري : 135

5-ديناميكا حرارية (1) (Thermodynamic)
الدكتور : طارق عبدالقادر & نبيل
درجات أعمال السنة : 45
درجات التحريري : 80

6-هندسة كهربية
الدكتور : نجاة
درجات أعمال السنة : 30
درجات التحريري : 70

7-كتابة تقارير فنية
الدكتور : سامح شوقي
درجات أعمال السنة :15
درجات التحريري : 35

مجموع درجات الترم الثاني 875 درجة

[blackcracker]

تعريف بقسم الهندسة المدنيه

أول سؤال . ايه الفرق بين المهندس المعماري والمهندس المدني ومهندس مساحه ؟

مهندس مساحة : وهو موكل بالتخطيط المساحي للمدن الجديدة . وتخطيط الطرق وتقسيم مساحات الاراضي . وتخطيط شبكات الصرف الصحي وشبكات المياه والكهرباء .
وبالنسبة للموقع الواحد . هو موكل بتوقيع المبني وضبط أبعاده .

المهندس المعماري . وهو الذي يخطط المدينة عمرانيا . ويحدد أماكن الوحدات السكنية . وأماكن المطارات والخدمات .
كما انه يحدد شكل المبني وعدد الوحدات السكنيه فيه وتقسيمها من الداخل . وشكل الواجهات ويهتم بالفرش والديكور الداخلي للشقق .
المهندس المدني . يقوم بالتنفيذ .

وقد تبدو الكلمة بسيطة " التنفيذ "
قديما لم نكن نتوقع هذا التطور الهائل في المعمار . لان المشاريع المعمارية العملاقة لم تجد طريقا لتنفذ . لضيق حدود التكنولوجيا في قسم الهندسة المدنية . ولكن بعدما تدخل الحاسب الآلي وظهرت برامج sap2000 و stad و safe . وغيريها . حدثت طفرة في عالم الهندسة المدنية . وأطلق للمهندس المعماري ان يجول بخيالة وينفذ المهندس المدني تلك الفكرة أيا كانت بعبقريته . فظهر . برج دبي والابراج الدوراة والكباري العملاقه . ولا يخفي عنكم اننا الآن في العهد الذهبي لمهندسي مدني .



تخصصات المهندس المدني



ينقسم قسم الهندسه المدنيه الى قسمين العام والانشائى
ويكون ذلك بعد السنه الثانيه ف القسم من خلال تنسيق داخلى للقسم الذى ترغب ف دخوله
ف البدايه سوف نتكلم عن المهندس العام وما هى حدوو عمله

مهندس مدني عام .

أ‌- مهندس طرق : وهو الذي يقوم بانشاء الطرق وتنفيذها وربط شبكات المواصلات بين المدن وبعضها البعض . وتصميم قطاع الطريق وتحديد سمك طبقات الرصف ونوع الرصف المستخدم . وتحديد شكل الطريق الهندسي وتوقيعه علي الطبيعة .

ب- مهندس نقل ومرور :وهو الذي يتوقع أعداد السكان التي ستشغل المدينة في الحاضر والمستقبل ويحدد نوعيات المركبات التي ستستخدم ويحدد الاعداد التي ستشغل كل نوع من انواع المركبات . وهو علي دراية بمستوي المنطقة الثقافي والاجتماعي . و يحدد الاماكن التي سيسير فيها الطريق ليكون أكثر فاعلية . كما انه يحدد كمية المرور علي الطريق الواحد .

ت‌- مهندس صحية : وهو الذي يقوم بمد شبكات الصرف الصحي وشبكات المياه . وهذا يخضع لدراسة الموائع والهيدروليكا .ويصمم تغذية المدينة وحجم المواسير التي ستقوم بالتغذية ويضع شبكة تغذية وشبكة صرف . سواء للوحدات او للمدينة او للمحافظة .

ث- مهندس ري : من أقدم التخصصات في مصر لذا مهندس الري المصري ذو كفاءة عالية جدا . وهو الذي يصمم قطاع الترعة وكذلك قطاع المصرف ويحدد شبكة للري ويصمم الاعمال الترابية والاعمال الصناعية . من شق ترع ومصارف وانشاء سحارة او بدال او قنطرة او دليل . ومشروع توشكي يبرهن علي كفاءة مهندس الري في مصر .

- ادراة مشروعات : وهو الذي يدير المشروعات في المشاريع العملاقه .ويحل العراقيل في المشروع الواحد وينسق بين المهندسين بمختلف تخصصاتهم .

ث‌- ضبط جوده : وهو الذي يراجع جوده تنفيذ المنشأ داخل الموقع . فيعمل علي ضبط جودة مواد البناء وضبط جودة الخرسانه . وضبط جوده خط سير العمل . وينقل تقريرا موافيا بذلك للمهندس مدير المشروع . كما انه يمكنه ان يعمل في المعمل لتحديد الاختبارات علي العينات الواردة من الموقع .

ج- مهندس جيوتقنية : وهو يهتم بدراسة التربة وخواصها ويخرج تقريرا عن نوع التربة والتوصيات اللزمة للتعامل مع هذه التربة في البناء . مثل احلال التربة أو عمل اساسات عميقة . ويحدد منسوب التأسيس وايضا قوة ضغط الارض علي المنشأ .

ج‌- مهندس تنفيذي : وهو الذي يعمل علي تنفيذ لوحات الانشائي ولابد ان يكون علي دراية عالية بعلوم material والمساحة و structure لكي يتمكن من التنفيذ الجيد والتعامل مع المشكلات في الموقع بكفاءة عالية .


2- مهندس انشائي :


وهو مهندس تصميمي . يعمل علي تصميم أبعاد الخرسانات وتحديد كميات التسليح وشكلها داخل القطاع الخرساني . وهو يقوم بتصميم الكباري والابراج والفيلات والمباني السكنيه .
فبعد ان يتم تصميم المبني عمرانيا . يقوم المهندس المدني بتحديد الاحمال علي المنشأ وأنواع الاحمال . ويحقق الاتزان ويقوم بعدها بتحديد أماكن الاعمده المستخدمة والكمرات وأبعادها وتسليحها وكذلك البلاطات ( الاسقف ) ويحدد نوع الاسقف ويقوم بتحديد سمكها ويقوم بتسليحها . ويخرج مجمل عمله في هيئة لوحات انشائية يقوم المهندس المنفذ بتنفيذها في الموقع .
كما انه يصمم القواعد آخذا في اعتباراته تقرير مهندس الجيوتقنيه .

وللمهندس المدني نظرة تختلف عن غيره للأشياء . فمنذ ان قمت بدراسة الهندسة المدنية وانا انظر للمباني بنظرة مختلفة تماما عن ذي قبل . فالآن يستهويني فهم اساس اتزان اي مبني اراه كما يستهويني فهم لماذا صمم كذلك





ننتقل للدراسة وخاصة قسم الهندسة المدنية بكلية شبرا .

اولا المواد التى سيتم تدريسها ف القسم
.

ف البدايه نود ان نذكر ان ما يميز القسم هو انه يسبق غيره في تحديد التخصص . فنجد ان هندسة شبرا يتم التخصيص فيها في ثالثة مدني . بينما عين شمس يتم التخصيص فيها في بكاليريوس . والقاهرة والمطرية لا يهتمان كغيرهما بالتخصيص من الاساس .
والتخصص مهم جدا اذا انه يؤهلك بشكل محدد لتلقي وضعك بشكل سريع بمجرد التخرج اذا انك تحيط علما بأشياء كثيرة داخل تخصصك وهذا أفضل من ان يحيط علمك بكل شئ وفي النهاية ستعمل بشئ واحد مما أحط به . ولا يستويان بالطبع . المتخصص من غيره .
ولكن ليس معني التخصص انك لن تتمكن من الشغل في غير تخصصك . الجميع في النهاية يكون مهندس مدني يعمل في اي مجال يعرفه ويتقنه .

[blackcracker]

شرح مبسط لكل ماده من المواد السابقه

اولا المواد في الفصل الاول الدراسي ودرجاتها


تحليل منشآت (150درجة) : وهي أهم مادة في قسم الهندسة المدنية . اذا انها تهتم بالتوازنات والمهندس المدني في الاصل مهندس اتزان . وهي لن تنقطع عنك في الدراسة مستمرة كل الترمات ولكن نختلف باختلاف تخصصك فاذا دخلت قسم مدنى عام فتكون اخر ترم لها الترم الاول من تالته مدنى وفى قسم مدنى انشاءات تستمر معك الى الترم الأول من السنه الرابعه

خواص المواد واختباراتها(150درجة) : وهي دراسة لخواص مواد البناء . وفي هذا الترم سيتم دراسة الحديد وخصائصة ودراسة الشروخ وكيفية انتشارها ودراسة الفيبر وكيفية استخدامة ودراسة الاخشاب .

مساحة(150درجة): ولاننا بينا تداخل الاقسام الثلاثة مساحة ومدني وعمارة . فالمساحة هتدرس في قسم الهندسة المدنية علي ترمين . وفي هذا الترم . سيتم دراسة المساحة الخطية والترافيرس والميزانيه ومكعبات الحفر والردم .


تطبيقات الحاسب(125درجة): سيتم دراسة الاكسل وده مفيد جدا للمهندس المدني . وكذلك سيتم دراسة جزء من الفيجوال بيسك لإدماجه فقط في تطبيقات الاكسل .


ميكانيكا(100درجة): وهذه ليست كميكانيكا اعدادي . اذ انه فقط سيتم دراسة أجزاء ستدرس فيما بعد في قسم الهندسة المدنية . وهي عزم القصور الذاتي ومركز الثقل والشغل والطاقة .
وتعتبر هامه جداااا وبالاخص الفصل الثانى منها الخاص بالقصور الذاتى الذى سيتم استخدامه ف كل سنوات دراستك بالقسم


جيولوجيا هندسية(75درجة): وهنا سيتم دراسة صخور الارض ومعرفة خصائصها . ومعرفة بعض المطلحات الجيولوجية الهامة . وهي سيدرسها دكتورين . الاول جزء نظري بحت . والاخر جزء عملي يتمثل في رسم خرائط كنتورية .



الترم التاني

لفصل الثانى:
تحليل منشآت(150درجة)

خواص المواد واختباراتها(150درج): وفي هذا الترم سيتم دراسة الاسمنت والركام وخصائص مياة الصب والخرسانة الطازجه . وبدائل الاسمنت .

رسم مدنى(150درجة): سيتم دراسة الاستيل من البداية وسيتم فهمه جيدا وتقريبا هي في الاصل مادة امتياز للجميع . وكذلك رسم الري والصرف .

انشاء معمارى(100درجة): هي مادة من عمارة سيتم دراسة الفواصل والعقود والسلالم وطرق رص الطوب .والماده فى غايه السهوله ولكن المشكله الكبرى بها تتمثل فى الدكتور الذى سيقوم بتدريسها وربنا يسهل ويغير الاسلوب السنادى


فيزياء وكيمياء فيزيائية(100درجة): مادة اضافية سيتم دراسة الاشكال البلورية وكيفية ترابطها في الفيزياء . كما سيتم دراسة الغازات والغرويات والدهانات في الكيمياء .
رياضة (100): سيدرسها دكتورين . وهي خاصة بدراسة الاحتمالات وحل المعادلات التفاضلية .




نتمنى لكم كل التوفيق في قسم الهندسة المدنية .

[blackcracker]

الموضوع ده خاص بكل الطلبة اللى حابين يدخلو قسم عمارة او نفسهم يعرفو اكتر عن القسم وكمان يعتبر موضوع ارشادى لكل طلبة سنة أولى عمارة عشان يعرفو قسمهم وكل حاجة عنه وهيتعرض اغلبية الاسألة اللى بتدور فى ذهن الطلبة وغالبا بيسألوها على مدار السنين اللى فاتت وكمان فى تصحيح معلومات خاطئة للاسف عن القسم او الدراسة فيه
ان شاء الله اللى عنده استفسار عن القسم يلاقى اجابته فالموضوع والموضوع يساعده على اختيار القسم المناسب ليه



هندرس ايه فقسم عمارة ؟


قسم عمارة بندرس فيه بصفة اساسية ازاى اصمم اى مبنى او اى مكان واكون فاهم كل شىء عن المكان ده وازاى اوفر كل سبل الراحة للناس اللى هتستخدم المكان ده واحققلهم كل اللى هيحتاجوه منه واثناء دراستنا فيه هنفهم كل الناس فكل مكان هتحتاج ايه بالظبط؟ وهيناسبهم فراغ شكله ايه ومقاساته ايه؟ يعنى على سبيل المثال الناس فى المستشفى تفكيرها واحتياجتها غير الناس اللى فى مدرسة غير الناس اللى فى عمارة سكنية غير الناس اللى فمول تجارى وهكذا


وايه الفرق بين المعمارى والمدنى ؟

اى مبنى فالدنيا طبعا بدايته كانت مجرد ارض فضا بيجى المهندس المعمارى يعمل رسم للارض دى ويبدأ يبنى المبنى بتاعه عالورق يعنى بيرسم كل تفاصيله اللى هتبقى موجودة فالحقيقة من الألف للياء ومن بعده بياخد الورق ده المهندس المدنى عشان يشوف هنقدر نعمل الكلام ده فالحقيقة ازاى وبعد ما المعمارى فكر ازاى نريح الناس فالمبنى؟
يبدأ المدنى يفكر ازاى المبنى نفسه يكون مرتاح
يعنى المعمارى قال المكان ده مثلا مينفعش نبنى فيه عمود لانه هيضايق الناس فالمكان ده
يبدأ المدنى يفكر فالاماكن التانية المتاحة للعمود ده وازاى هخليه يشيل الحمل كويس بدون ما يتأثر بتغير مكانه
يعنى المعمارى ببفكر ازاى يطلع للناس مبنى مريح ويحقق مطالبهم ويكون جميل فنفس الوقت والمدنى بيفكر ازاى يخلى المبنى ده قوى ومتين ويفضل شايل نفسه كويس على مدار السنين

يعنى فى النهاية كل واحد فيهم بيكمل التانى ومحدش فيهم يقدر يشتغل بدون التانى


طيب والفرق بينهم فالدراسة فالكلية؟

فالدراسة فالكلية هنلاقى الفرق نابع من الكلام اللى قلناه يعنى عشان المعمارى يبقى عنده الخبرة الكفاية لازم ينزل زيارات كتير ويروح اماكن كتير ويشوف بعنيه وهيكون اغلبية الشغل بعد كده هو الرسم ومش رسم منهجى زى ما خدنا فاعدادى يعنى يبقى معاك حاجة ومطلوب منك تكمل عليها او تستنجلها مساقط
لا رسم عمارة " التصميم أو design" حاجة بتحتاج ابداع اللوحة الفاضية دى بتاعتك وانت بترسم مشروعك زى ما انت عاوز يعنى هتلاقى مثلا لما يبقى عند كل الدفعة نفس المشروع ورغم ذلك كل مشروع مختلف عن التانى
وفى رسم تانى بتتعلم فيه ازاى ترسم كل تفصيلة مهما كانت صغيرة فالمبنى بتاعك ودى مادة تخصص برضه اسمها بلدينج وبعد كده بتبقى اكبر شوية ويبقى اسمها working من اول سنة تالتة
هنلاقى كل دراستنا ما بين رسم لوحات ومشاريع أو أبحاث بنعملها من المكتبات او النت او زيارات او مواد نظرى بتبقى اقل شوية من مدنى .
لكن مدنى الدراسة بتعتمد على مواد نظرية اغلبيتها حسابات عشان نحسب كل حاجة خاصة بالمبنى بتاعنا حمله " وزنه " قد ايه؟ هنخليه يقف كده ازاى؟ هنحتاج اعمدة شكلها ايه واماكنها فين؟ ولحد كمية الحديد والاسمنت والرمل وكل حاجة هستخدمها عشان اعمل المبنى بنتاعى ده كل ده مبنى على حسابات بيدرسها قسم مدنى وطبعا مواد تانية برضه زى الماتريال اللى بيدرسو فيها خصائص المواد اللى بتدخل فتكوين المبنى وخصائص وانواع التربة المختلفة عشان اعرف الارض اللى ببنى عليها دى عاملة ازاى ومشكلاتها ايه؟ ومواد تانية اغلبيتها من نفس النوع وعلى فكرة اغلبية المواد دى برضه عمارة بتدرسها لكن مش بتوسع اوى لأن المعمارى برضه لازم يحط فحساباته وهو بيصمم مشروعه مهندس المدنى اللى هيشتغل وراه ايه ممكن تبقى مشكلة كبيرة بالنسباله عشان يتلافاها من الاول وهو لسة بيصمم ويوفر الوقت.


وبالنسبة لمواد سنة أولى ؟؟؟

عندنا فسنة أولى مواد الترم الأول هى
تصميم معمارى -إنشاء مبانى -تحليل إنشائى -إختبارات مواد -نظريات العمارة-تاريخ العمارة -ظل و وسائط تعبير بصرى

وبالنسبه للتيرم الثانى

تصميم معمارى - انشاء معمارى - تحليل انشائى - حاسب آلى - نظريات العمارة - تاريخ العمارة - منظور ووسائط التعبير البصرى


طيب بيقولو قسم عمارة صعب أوى ومحتاج شغل كتير صح ا؟؟

طبعا صح لأن اولا مفيش قسم سهل وقسم صعب أنت دخلت هندسة يعنى أكيد هتدرس حاجة مش عادية ولازم تكون مجتهد فيها أياً كان قسمك وعمارة فعلا قسم بيحتاج مجهود كبير وخاصة المجهود البدنى لانك مش معتمد على مزاكرة وحفظ زى اغلبية الاقسام أنت بتتعلم ازاى انت تجيب المعلومة وتوظفها فبحث او مشروع وتقدر تقوم باكتر من حاجة فنفس الوقت يعنى شغل عملى لابعد الحدود


عشان ادخل قسم عمارة لازم اكون كويس فرسم اعدادى؟؟

مش شرط لأن رسم اعدادى ده رسم ميكانيكا ورسم استيل بتاع مدنى ومفيش ولا مادة فاعدادى ليها اى علاقة بقسم عمارة ودى الحقيقة اللى غايبة عن كليتنا للاسف
لكن العلاقة الوحيدة بين رسم عمارة ورسم اعدادى هى تخيل المساقط لأنك فعمارة لما بترسم مشروعك بتبدأ بالبلان وتتخيل القطاع بتاعك والواجهة "elevation " هيبقو شكلهم ازاى وحتة التخيل دى الى حد ما موجودة فاستنتاج المساقط بتاعة رسم اعدادى
لكن بكرر مش شرط ابدا
المهم يكون عندك صبر وعندك استعداد تقعد على لوحة لمدة توصل ليومين ورا بعض عشان تقدر تخلصها


وبالنسبة للمصاريف فقسم عمارة بنسمع انها كتير ؟؟

هى فعلا اكتر شوية من باقى الاقسام يعنى فأول سنة خالص بيبقى مطلوب منك تجيب ادوات فحدود من 600 ل800 جنيه بالاضافة لترابيزة سعرها فحدود 200 جنيه تقريبا وبعد كده كل شهر بتحتاج مصاريف زيادة شوية عشان اللوحات والادوات بتبقى على حسب استخدام كل واحد عن نفسى مصاريف الدراسة فالشهر فحدود من 500 ل600 وممكن يزيدو قرب الامتحانات عشان المشاريع والابحاث الفاينال او لو فى كورسات
ودى نقطة لازم تصارح اهلك بيها عشان متكلفهمش فوق طاقتهم ولو ان بصراحة ربنا بيرزق لكن برضه متحطهمش قدام الامر الواقع مرة واحدة .


وايه الكورسات اللى لازم اخدها لو دخلت قسم عمارة؟؟

اولا فالقسم مش هينفع تشتغل الا اما يكون معاك 3 برامج اساسين ومش بتدرسهم فالكلية هما الاوتوكاد والثرى دى ماكس والفوتو شوب وفى برامج تانية لو حبيت تزود مهاراتك زى الاوتوكاد ثرى دى واسكتش اب واركيكاد ودول بتاخدهم فالاجازة واغلبية الناس بتاخدهم فهندسة القاهرة وافضل ناس تاخد عندهم البرامج دى هناك هما بشمهندس طارق وبعده بشمهندس تامر وبتاخدهم فالاجازات بتاعتك


يعنى القسم كله شغل وتعب ومصاريف !!؟؟؟

أكيد لا طبعا والا مكنتش كل الناس دى دخلت عمارة
اى نعم انت بتتعب بس بتدرس حاجة جميلة بجد وبتكون حاببها ومعروف ان فى روح تعاون فقسم عمارة سواء داخل الدفعة او بين الدفعات وبعضها يعنى محدش فاولى بيتكسف ابدا يطلب مساعدة من اى حد اكبر منه
والمختلف فالقسم انه مفيهوش روتين تماما شغل كل يوم بشكل جديد يوم رسم يوم ابحاث يوم زيارات وبجد محدش بيزهق من اسلوب الدراسة فالقسم
وعشان انت اغلبية شغلك رسم وابحاث بتتسلم اول بأول فبتوصل ايام الامتحانات بيبقى عندك مواد كتير بتبقى قبلها فاضى فعلا
أهم حاجة أنك بتكون حابب القسم ودراستك وزمايلك وعلى فكرة أغلبية اللى بيدخلو عمارة بيكونو كاتبينها رغبة اولى ونادر لما حد يدخلها عشان مجموع لأنه قسم محتاج منك تكون بتحبه فعلا


الناس بتقول ان اللى ملوش تقل عالمزاكرة يدخل قسم عمارة احسن ؟

لا طبعا قسم عمارة فيه مواد نظرى بتحتاج مزاكرة وهتيجى على سنة تانية مثلا تلاقى نفسك عندك كمية مواد نظرى كتير اكتر من اى سنة وفكل سنة هتلاقى مواد نظرى سواء خاصة بقسم عمارة او مواد مدنى وكهربا وميكانيكا ومساحة
يعنى فسنة أولى عندنا تاريخ ونظريات العمارة وعندنا استركشر وعندنا ماتريال وفسنة تانية عندنا تاريخ ونظريات ومساحة وخرسانة وتحكم بيئى وفلسفة العمارة والتخطيط العمرانى وفسنة تالتة عندنا ميكانيكية وكهربية وسويل والمادة الاختيارى والاستيل وفبكلريوس برضه الكميات والمواصفات والمادة الاختيارى كلهم مواد بتحتاج مزاكرة بجانب الشغل العملى وعلى فكرة الفخ اللى اغلبية طلبة عمارة بيقعو فيه انهم بيهملو المواد دى فبنلاقى ان طلبة كتير بتشيلها
اى نعم شغلك الاساسى ومواد التخصص بتاعتك رسم مفيهاش مزاكرة تقريبا
لكن فى عندنا مواد تانية مش قليلة هتحتاج منك شوية مجهود فى المزاكرة



على كده فعلا القسم فيه لف ودوران ومشاوير وتعب زى ما بيقولو ؟؟

بالعكس والله الزيارات دى من امتع الحاجات اللى فالقسم وكتير اوى بتلاقى الاماكن اللى المفروض تنزلها جديدة واول مرة تروحها وبتستفيد كتير بجد وبيبقى جو الزيارة كأنه جو رحلة بالظبط مع اصحابك فالقسم والدكاترة عندنا فالزيارات بيبقى كويسين اوى ومرحين والناس بتنبسط وتستفيد .



طيب هو لازم اللى يدخل عمارة يشترى لاب توب؟؟

هو يفضل انك يكون معاك لاب من سنة تانية لكن مفيش طالب عمارة بيموت عشان معندهوش لاب
فى ناس بتبقى ما شاء الله من اوائل الدفعة ومجابوش لاب لحد دلوقتى
يكفى يكون عندك جهاز بمواصفات كويسة او تحدث بتاعك القديم وتقدر تضغط على نفسك شوية عشان شغلك كله يخلص فى البيت
لكن لو تقدر يكون معاك لاب فده هيكون افضل طبعاً وهيساعدك كتير

ايه حكاية الناس بتوع عمارة اللى بتقعد فالكلية لحد بليل دى؟؟

دى ناس بيبقى عندها تبييض مشروع او مجموعات مضغوطة فشغل بحث عندهم بيضطرو يسهرو فالكلية يخلصو الشغل ده وسنة اولى اكتر ناس بتسهر لانهم بيشتغلو مشاريعهم مانيوال فبيبدأو يسهرو فالكلية من قبل التسليم باسبوع واذن السهر حالياً بيبقى اخره الساعة 10 بليل وده مش طول السنة زى ما قلت لكن فايام معينة

يا ريت لو كنتى بنت تعرفى اهلك من البداية على الحكاية دى عشان ميبقاش فى مشاكل بعد كده ان شاء الله

بس سمعت ان التقديرات فعمارة مش عالية اوى ؟؟

هو فى مرة دكتور قال للناس وهما فتدريب اولى " المجهود اللى يخليك تجيب جيد هنا يخليك تجيب امتياز فأى قسم تانى " وبصراحة عنده حق
فعمارة عامة تقدير جيد بيبقى كويس لكن انت تعمل اللى عليك وربنا مبيضيعش تعب حد والتقدير عامة لو قارنته بالخبرة فالخبرة مطلوبة اكتر
يعنى لو انت فالاجازات اتدربت فمكاتب واشتغلت من بدرى بعد ما تتخرج هتكون مطلوب فالشغل بغض النظر عن تقديرك.

طيب وبعد ما اتخرج بلاقى شغل؟؟

طبعا الشغل ده رزق من عند ربنا والحمد لله مجال العمارة مجال مطلوب ومهندس العمارة مطلوب جوة وبرة مصر ومجالات شغله كتير على حسب الحاجة اللى هو متميز فيها يعنى فى مهندس شاطر فالتصميم اوى فبيشتغل ديزينر وفى واحد تانى بيعرف يعمل اللوحات التنفيذية بتاعة المشروع وواحد تالت موهوب فشغل الماكس فبيشتغل فالشركات والماكتب الكبيرة وبيكون متخصص فالماكس وواحد بيقدر يعمل ماكيتات كويس وده برضه بيتخصص ماكيتات وممكن يبقى ليه مكتب خاص واحد تانى عجبه مجال الترميم وصيانة المبانى الحديثة والاثرية فبيتخصص فالمجال ده ويشتغل فيه وهكذا يعنى مجالات الشغل كتير المهم انت اثناء الدراسة تعرف انت قوى فايه؟؟ وتنمى قدراتك فالجزء ده


بيقولو الشركات مبتحبش تشغل بتوع عمارة شبرا؟؟

أولا الشركة مش بتاخد شهادة تخرجك وتعلقها على الباب عشان الزباين تيجى
اى شركة ميهمهاش منك الا شغلك والبرامج اللى بتعرف تشتغلها ومدى جودة شغلك وميهماش انت خريج شبرا ولا اوكسفرد ما دام بتاخد منك الشغل بالجودة اللى هى عاوزاها
وعلى فكرة انا ليا زمايلى بيشتغلو من اثناء الدراسة وسهل تلاقى شغل اثناء الدراسة ما دام انت فاهم الشغل وعارف تقوم بيه.

طيب لو اتكلت على الله وجيت عمارة هلاقى اللى يساعدنى لحد ما اقف على رجلى؟؟

ولحد ما تقدر تجرى كمان
متترددش ابداً انك تسأل اللى اكبر منك عن اى حاجة انت مش عارفها وتطلب منهم اى حاجة مش عارف توصلها احنا فالقسم كلنا اخوات وهتلاقى ممكن يجى عليك يوم انت نفسك تساعد حد اكبر منك فمشروع او حاجة هيسلمها.

متهيألى دى اغلبية الاسألة اللى ممكن يسألها طالب اعدادى اللى عاوز يعرف ايه هو قسم عمارة ويحدد هو القسم المناسب ليه ولا لا واى اسألة تانية هجاوبكم عليها ان شاء الله


وربنا يوفقكم ان شاء الله ويكتبلكم الخير
وأهلا مقدما بكل اللى خلاص رسى على عمارة

[blackcracker]

السلام عليكم و رحمة الله و بركاته


اعزائي طلبة و طالبات الثانوية العامة
قد يتسأل البعض منكم
ما هو قسم الهندسة المساحية ؟؟
و لماذا تنفرد كليتنا العزيزة بوجود ذلك القسم بها ؟؟
و هل هو حقاً قسم هام ؟؟

و لكي نعرف اجابات تلك الأسئلة
دعونا نسبح سوياً فى بحر ذلك العلم
علم الهندسة المساحية

1- ما هو علم المساحة ؟؟
هو علم يبحث في الطرق المناسبة لتمثيل سطح الأرض على خرائط. هذا التمثيل أو التشابه يشمل بيان جميع المحتويات القائمة والموجودة على سطح الأرض، سواء أكانت طبيعية مثل الهضاب والجبال والصحاري والأنهار والبحار والمحيطات، أو كانت صناعية مثل الترع والمصارف والقناطر والسدود والطرق وخطوط السكك الحديدية و المنشآت والمباني والمدن وحدود الدول السياسية، وكذلك حدود الملكيات الخاصة والعامة .

كما يجب أن يكون هذا التمثيل معبرا أيضا عن مقدار الإرتفاع والإنخفاض عن سطح الأرض بحيث يمكن تمييز قمم الجبال وسفوحها، والهضاب والوديان والأعماق والبحار. ومن الواجب أن تكون الخريطة صورة صادقة مصغرّة للطبيعة التي تمثلها، وأن تؤدي الغرض الذي عملت من أجله تاما كاملا.


2- مميزات الهندسة المساحية :-
من أهم مميزات الهندسة المساحية أنَّها جزء من تقنيات العولمة تأخذ منها وتعطي. فالهندسة المساحية تستطيع أن تمثِّل التفاصيل الدقيقة عن الأشياء على مساحات شاسعة من الأرض أو عليها كلِّها بدقةٍ عالية وتجعلها في متناول يد المهتم بها في الحقول المختلفة.
ومن هنا فالهندسة المساحية تتكامل وتترافد بدرجاتٍ متفاوتة مع التخصصات (العلوم) الأخرى كافة.
وإليكم بشيءٍ من الإجمال بعض العلوم التي تتكامل وتترافد معها الهندسة المساحية في صورة من صور التكامل الكثيرة:-
--العلوم الكهربائية
-العلوم الصناعية
- العلوم النَّفطية
-العلوم المائية
-العلوم العمرانية
-العلوم الجغرافية
-العلوم الزراعية
-العلوم الجيولوجية
- العلوم الحاسوبية
-العلوم الرياضية
-العلوم الفيزيائية
-العلوم الاقتصادية
-وعلوم الطرقات
-وعلوم التُّربة
-وعلوم البيئة



3- تخصصات الهندسة المساحية
ومن أفضل السُّبل لمعرفة الهندسة المساحية أن ينظر إليها من خلال تخصصاتها أو فروعها المعروفة. وسنكتفي هنا بذكر أهم الفروع العامة في عالم اليوم دون التفصيل في التصنيف لأنَّه قد يأخذ أوجهًا مختلفة أمَّا بحسب العلم والتقنية وتطورهما عبر القرون (تصنيف زماني)، أو بحسب مدى أو حيز العمل المراد إنجازه (تصنيف مكاني)، أو بحسب نوع المشكلة المراد حلّها وما يلائمه من تقنيات (تصنيف نوعي)، أو بحسب ذلك كله أو بعضه أو غيره :

1- المساحة المستوية (Plane Surveying)
وهي تبحث في رسم الخرائط، وتمثيل سطح الأرض على أنه سطح مستو، خال من الكروية تماما، وتكون الخريطة في هذه الحالة هي المسقط الأفقي لهذا السطح .

2- المساحة الجيوديسية (Geodesy)
يبحث هذا النوع من الخرائط في رسم سطح الخرائط وتمثيل سطح الأرض على أنه سطح كروي كحقيقته، حيث تكون المناطق المطلوب تمثيلها كبيرة والمساحات شاسعة، مما يؤدي إلى ظهور الكروية الأرضية عند إسقاط الخرائط على المستويات الأفقية.
وعلى ذلك فإنه من المتبع لتمثيل إقليم من سطح الأرض تمثيلا كاملا على الخرائط، أن نقوم بعمل خرائط المساحة الجيوديسية لهذا الإقليم لبيان الحدود الخارجية ونقط الضبط والشكل الطبوغرافي العام، ثم يلي ذلك عمل الخرائط الطبوغرافية لبيان المعالم العامة بأنواعها المختلفة، يلي ذلك انشاء الخرائط التفصيلية لأخذ القياسات وبيان التفاصيل.
وتبعا للتقسيم السابق لتمثيل سطح الأرض على خرائط ينتج تقسيم آخر موافق له ومرتبط به، وهو بالنسبة إلى مقياس رسم الخريطة، فمن البديهي أنه لايمكن تمثيل معالم الطبيعة على خرائط بنفس الأبعاد الحقيقية لها على الأرض. لذا نلجأ إلى إختزال قيم هذه الأبعاد بنسب ثابتة في جميع الإتجاهات، حتى لا يحدث أي خلل في التشابه والتمثيل بين الخريطة والطبيعة، وتسمى هذه النسب بمقياس الرسم للخرائط.
وعلى العموم أيا كان الغرض من الخريطة، أومهما كانت مقاييس الرسم صغيرة أو كبيرة، فإن إنشاء الخريطة وربط المعالم ببعضها يحتاج إلى قياس الإنحرافات والأبعاد، أو بمعنى آخر قياس أطوال الخطوط وتعيين الزوايا التي بينها.

3- المساحة التصويرية الجوية (Photogrammetry)
و هو بصورة مبسطة علم التصوير الجوي عن طريق الطائرات و محاول دمج الصور لتكوين خريطة شاملة تبين تفاصيل الموقع

4- الاستشعار عن بعد (Remote Sensing)

5- نظام تحديد الموقع العالمي (Global Positioning System,GPS)

6- نظام تحديد المعلومات الجغرافية (Geographic Information Systems, GIS)

[blackcracker]

تعريف بمواد القسم

بالنسبة للترم الاول

1- الرياضة

المادة دي ممتعة اووووووي و اللي هيديها دكتور محترم اوووي ( د\ محمد عيد )
وهي من 150 درجة
60 درجة اعمال سنة ( ميدترم و شيتات وسكاشن وحضور ) م الاخر انت من السهل انك تضمنهم
لو انت حضرت السيكشن مع المحاضرة مش هتحتاج اي كورسات ولا اي حاجة فيها

90 درجة امتحان الفاينال
وهو امتحان بيكون ف بسيط ومش صعب لان بيكون جاي من المحاضرات وش

م الاخر مادة هدية بتاعة تقدير

2- مساحة

بيديها اتين دكاترة (د\ كريم رشوان - د\ فرج بسطاوي )

ودي مادة التخصص الوحيدة اللي انتوا هتاخدوها ف اولي

وهي من 150 درجة مقسومة علي الاتنين كاترة كل دكتور له 75 درجة
كل دكتور له 30 درجة اعمال سنة و 45 درجة ف ورقة الفاينال

اعمال السنة لكل دكتور ال 30 درجة ( عملي و شفوي و كويزات و حضور محاضرات وسكاشن و ميدترم)
دول مضمونين اوووووووي طالما انت بتحضر ملتزم

المادة جديدة عليكم واول مرة هتسمعوا عنها
ودي يعتبر اول خطوة ليكم ف القسم فتقبلوها بصدر رحب وهي بسيطة جداااااااااا
وهتعرف قد ايه هي بسيطة جداااااااااااا لما تخلص السنة

3- الفيزياء

اللي بيديها بردة اتنين دكتاترة ( د\ احمد عبد الله - د\ خالد العيسوي )

انت بتدرس حاجات بسيطة مفيش منها قلق
بتدرس العدسات و الليزر و polrization وشوية حاجات تانية لذيذة كدة

انا مش فاكر توريعة الدرجات ازاي
لكن علي ما اتذكر ( حكم الزمن بقي )
60 درجة اعمال سنة
منهم 30 امتحان شفوي ف اخر السنة مع الشيتات
30 درجة الباقيين ( حضور و ميد ترم وسكاشن )

هي مادة بسيطة مفهاش مشاكل ( لكن كتير بيشلوها و الحياة بتكون زي الفل )
وهتلاقي ورق الكورسات قايم بالواجب ف قلب الدفعة
مبدأ ( مذكرة مع كل مواطن )

60 الباقيين امتحان فاينال
مش هكدب عليك سهل او بكون صعب ( لانه بيجي غير متوقع و معظمه من المحاضرا و بيكون مساله عجيبة )
م الاخر انت ونصيبك

4- هندسة الري

ودي مادة من قسم مدني بيديها (د\ علاء الحاذق )

انت هتدرس فيها تصميم الترع والمصارف و المياة و شوية حاجات كدة زي الفل
مع شوية رسم استيل من اعدادي و رسم ري كدة ( حاجة خفيفة ع الماشي )

45 درجة اعمال سنة
امتحان شفوي و ميد ترم و حضور محاضرات و سكاشن )

80 درجة فاينال
الامتحان بيجي انت بتحل اللي عارفة و كمان اللي انت مش عارفه
وهتلاقي نفسك بتالف و الحياة بتبقي زي الفل و الحمد لله بتلاقي نفسك بتنجح

5- كمبيوتر

بيديها دكتور جينتل جداااااااااااااا ( د\ ايمن رشاد )
هو دكتور محترم اوووووووي

انا مش فاكر توزيع الدرجات بالضبط
لكن زي اللي فوق
في جزء اعمال سنة و جزء فاينال
انت ف المدة دي مش عارف اذا كنت هتنجح ولاء
الدفعة اللي قلبكوا خارجين الترم الاول اكتر من 60% من الدفعة شايلينها

( انا مش بخوفك انا بطمنك علشان تعمل حسابك انك شايلها )

6- لغة

هو هيديها دكتور جديد علي دفعتكم ان شاء الله

هي ع العموم
مادة خيفة اووووي بتدرس شوية انجليزي كدة

هي من 50 درجة
15 اعمال سنة ( حضور و ميد ترم و شيتات )
30 فاينال

الامتحان بيجي اسهل من بتاع الثانوية العامة

الترم التاني

1- الرياضة

الكلام مش هيتغير عن الترم الاول

2- المساحة

برضة مش هيتغير عن الترم الاول

3- الجولوجيا

بيديها اتنين دكاترة ( د\ عبد العزيز - د\ مختار )
واحد بيشرح نظري و التاني بيشرح خرايط
محدش فيهم بياخد غياب الا ف اخر 3 محاضرات او اخر 4

الدكتور بتاع الخرايط انت هتبقي قاعد طبعا مش فاهم حاجة
وهتلاقي نفسك تايه

طبعا هتلجا لكورس عند لاسعة ف الاخر
وهو هيقوم بالواجب ( انا ماليش دعوة مقلتش لحد ياخد عنده )

وبردة مش هتعرف تحل ف الامتحان الخريطة

الدرجات بردة جزء ف الفاينال و جزء اعمال سنة

4- استراكشير

المادة دي من قسم مدني
بيديها دكتورة زي العسل و محترمة جدااااااااا ( د\ جيهان حمدي )

مادة تقدير م الاخر ( لانك لو حليت صح هتبقي عارف ولو حلين غلط بردة هتبقي عارف )

90 علي ما تذكر فاينال

و 60 اعمال سنة
حضور سكاشن و محاضرات و ميدترمات وشيتات و كويزات )

علي فكرة المادة دي ليها حوالي 4 ميد ترم

مادة جميلة جداااااااااااا وممتعة وهتكون فاهم من المحاضرات و السكاشن و الحياة زي الفل

5- مباني وكميات ومواصفات

بيديها ( د\ عبد المجيد خضير )

بتتكلم عن كيفية البناء حساب كميلت الحفر والردم و الخرسانات و كل ما هو متعلق بالبناء

مادة حفظ جااااااااااااااااااااااامد وهي ليها كتاب بالعربي و الامتحان بيجي بالانجليزي ( ولا سحر ولا شعوذة )

80 درجة فينال
45 درجة حضور و ميد ترم وتسليم لوح ( متقلقوش من الرسم انت يعتبر بتنقل رسومات )
مادة حضوووووووووووووووووووووووووووووووور ( والحدق يفهم )

6- ارصاد جوية

بيديها راجل لذيذ جدااااااااا وهو محترم ودمه خفيف ( د\ عبد الفتاح )

المحاضرة بتاعته طووووووووووووووووووووووووويلة
لكن مهم جداااااااااااااااااا الحضور ( و الحدق يفهم برضه )
م الاخر احضر تنجح

80 فاينال وهو بيكون نظري صرف

45 اعمال سنة ( شفوي و تقديم بحث و حضووووووووووووووووووووووووور )
المادة دي احتمال كبير ميكونش ليها ميد ترم

وكدة انا خلصت تعريف المواد الدراسية ف القسم

[blackcracker]

كدة فاضل بس قسم كهرباء باور اللى ماتكلمناش عنه وان شاء الله جارى تحضير تقريره

[خالد فتحي1]

تم تغير هيئه التدريس
والمعلومات دي من 2005

[blackcracker]

لا يافندم انت على خطأ انا فى الكليسة لم يتم تغير هيئة التدريس بالمعنى الكبير ده ولا حاجة والمعلومات ديه مش من 2005 ولا حاجة شكرا لردك