حملة.. " حجاب المرأة المسلمة " متجدد !!

[♥ملاك صعب الامتلاك♥]

جزاكى الله خيرا
وبارك الله فيكى ^ _ ^
اللهم اهدى المسلمات واجعلهم طاعة لما تحب وترضاه

[الغيورة على الدين]

لسلام عليكم ورحمة الله وبركاته

هلا بكل حبيباتي السكر

معليش على التأخير

اولا بس كدة

احب اسم على البنات الي متابعين الموضوع

طمنوني عليكم

والبنات الجدد أهلا بيكم ياقمرات معنا

وباذن الله جاري الرد

[الغيورة على الدين]

المشاركة الأصلية كتبت بواسطة شعبان رجب

السلام عليكم انا اسمى دعاء فى تانية ثانوى ونفسى البس النقاب ولما كلمت والدتى فى الموضوع رفضت الفكرة بشدة لانى الحمد لله متفوقة وانا نفسى ادخل طب وكون دكتورة نسا لستر عورات المسلمات وامى اعزها الله رفضت لان مجال العمل يرفض النقاب وقالتى ان نيتى فانى اكون طبيبة لستر عورات المسلمات ده افضل من النقاب وان الحم
لله بلبس جيب وعليها تونيكات وطرح طويلة وزعلت جدا من نفسى لما امى قالت الكلام ده وانا لم انطق بكلمة واحدة وانانفسى بجد البسه
ماذا افعل وكيف ارد وهل مجال العمل يرفض النقاب

وعليكم السلام ورحمة الله وبركاته

اهلا بكِ حبيبتي دعاء

اولاً ياقمر

عليكِ ان تحمدي الله على تفوقك في المدرسة

وليس معنى تفوقك أن تمنعي من أن تنالي هذا الفضل الرائع

وتفوزي بهذه العبادة العظيم ياقمر

أولاً غرض انك تكوني دكتورة نسا هذه غرض شريف جدا

بل انه أحتسبي الاجر عند الله

ولكن هل تثقين انك سوف تحصلين على هذا العمل ؟!

حبيبتي الامر كله بيد الله

والعمل كدكتورة أبداا لا يتنافى مع النقاب


بل الأطباء واجب عليهم أن يلبسوا الكمامة وأنتِ ستلبسن كمامة طبيعية

حبيبتي شوفي الطبيبات كلهم في اليمن معظمهم بل قول كلهم الا القليل منتقبات

تعالج المرضى في الميداين بالنقاب

الخلاصة ..

اصدقي الله يصدقك

احتبسي أجر نيتك في أن تكوني طبيبة مسلمة لله وتكوني قدورة لهم حتى تناليها


اجعلى النقاب قربة من الله واحتسبي الاجر في ان تكوني طبيبة

النقاب لن يمنعك من مزاولة مهنتك اذا أخذتيها بل سيساعدك

اليس من أول نياتك في ان تكونني طبيبة ان تستخدمي عملك في الدعوة والتكلم مع المريضات عن قربها من الله واحتساب الالم والتعب كله لله

وفقكِ الله ياقمر


***

باذن الله ارد على الباقي غداا اعذروني

[HEND HassN]

جزاكم الله خير الجزاء وجعلكم من اهل جنة الفردوس الاعلي انا الحمدالله منتقبه ادعولي بظهر الغيب علي الثباب واخلاص العمل لله وحده

[مسلمة متفائلة]

السلام عليكم ورحمة الله وبركاته
ازيكم يا بنات ؟
يارب تكونوا بخير

دلوقتي شكل الشجرة كاملة .. ,فيها اسامي كل البنات اللي كانوا عايزين يكتبوا اسمهم
وبندعي للجميع بالثبات يا رب .. واللى مش لابساه تلبسه
ويا scream angle صغيرة إيه بس .. احنا نعتبر في سن بعض
وانا لابساه من 3 اعداي وأختي من 2 اعدادي
واعرف بنات لابسينه من 1 اعدادي كمان... هنفضل صغيرين لحد امتى؟
وبجد انتى لو جواكى نية صحيحة عشان تلبسيه
هتقدري تقنعي أي حد في العالم بإن الله
ربنا يوفقك ويرزقك لبسه بإذن الله
انتى وبنت الجنه
واسمك معانا في الشجرة ^^

(طبيبة أسنان مسلمة)
(بسمة : rabanzel) (أم عمار قائد الأحرار)
(خــــوخـــة) (*ساسَّو*) (هـــــبه الــــمسلمـــــه)
(أميرة: أم موسى) (زهرة الياسمين)(زائرة من الجنه)(الجويرية)
(لؤلؤة الاسلام)(لولو الصغيرة115)(نداء الجنة)(JusT l0sT)(حاملة الأمانة)(*هبة الرحمن*)
(ريـــمـــى أحـــمـــد) (sara-shaban)(dalia77)(المتــســائلة)("أم طــلحة")
(doctor-1-91) (مروج البحر)(حفيدة الحميراء)(حمامة فلسطين)(رؤى المسلمه)(المتبتلة)
(ســهيـلـة) (امير العطف)(الدعوة حياتى)(Dr.Rawan M.Fakhry)(شذى العطر)(لؤلؤة لورا)(جهاد الشاذلى)
(!i!crazy love!i!)(أخت جهاد الشاذلى)(جمانة 2) (ملك20)(.هدير. doda54)(الشيماء22)
(بارقة امل)(كل الحلا مصرية)(doaa11223)(دينا99)(المشتاقة للنقاب)
(طويلبه علم)(الغيورة على الدين)(حياتى وقف لله)(Asia Gis )
(" مسلمة متفائلة ")(!.فــراشــة.!)
(sweet heart)(hanaa alshrief)
(((محبه عائشه)))(كونان777)
(scream angle)(s_arab)
(HEND HassN)(...............)
(..............)(...............)
(................)(.................)
(................)(.................)
(.........)(.........)(..........)(.........)
(...........)(...........)(..........)(........... .)
(............)(...........)(.............)(....... .... ....)

(..................)(............. ..)(.............)(...............)(.............)
(...............)(.............. .)(................)(................)(........... .....)

[مسلمة متفائلة]

سبحان الله .. .. بجد صورة معبرة أوي
الله المستعان

[شعبان رجب]

ياجماعة انا نفسى البسه بس ماما مش راضية وانا للاسف مش قادرة اقنعها لانها بتقول مجال العمل وانا فى 2 ثانوى ومتفوقة

[شعبان رجب]

اشكرك شكرا جزيلا على الرد وجزاكى الله خيرا وانا سعيدة جدا بالكلام لانى انا قررت اقنع ماما بجمع الادلة الاحاديث والكلمات ذات التاثير وان شاء الله هستخدم كلماتك واحب ابشرك بانى لبست الاسدال جزاكى الله خيرا

[نبيل خلف]

السلام عليكم ورحمة الله وبركاته . اختي في الله بارك الله فيكي وثبتكي وجمعنا بكي في الجنة ان شاء الله . انا اسمي شيماء في تالتة ثانوي . وانا بالعافية لما اقنعت ابي وامي اني البس النقاب بعد الامتحانات وهما ماكانوش عايزني البس النقاب اصلا وانا والله يا اختي بعد الايام علشان البسه .واخيرا ارجو منكي الدعاء لي ولكل مؤمن ومؤمنة وبارك الله فيكي

[شعبان رجب]

يارب كل اللى نفسها تلبسه ربنا يسرلها الامر وان اتفقت على عقد هدنة حتى الامتحاناتوبعد كدة نفتح الموضوع للمناقشة

[نبيل خلف]

يا رب يا دعاء ان شاء الله وييسر لك امرك وتبقي متفوقه دايما دينا ودنيا .وكل المؤمنات والؤمنين وانتي يا رب يا ثبتك وكل اللي زيك يا من تغارين علي دينك واتمني ان كل مسلمة تاخذك مثلا في الغيرة علي دينها

[jana ayman]

سواء كان النقاب فرض او غير فرض فهو يقربنا الى الله ويزيد من ميزان حسناتنا فلن نخسر شيئا بل سنربح رضا الله عنا

[عزى اسلامى]

السلام عليكم ورحمة الله وبركاته

اخواتى الكريمات

حبيباتى فى الله

اشهد الله انى احبكن فى الله

تسمحولى اسأل سؤال ؟؟؟؟

انتى ليه لسه مش منتقبقة

الاولى اصلى انا لسه صغيرة وعايزة اعيش حياتى

التانية انا والله بلبس كويس بس شايفة ان النقاب مسؤلية وانا خايفة مكنش قدها

والتالتة والله انا شايفة النقاب مش فرض

والرابعة يا حبيبتى الاحتشام فى القلب ومش لازم اكون لابسه الخيمة دى عشان اكون ملسلمة


الخامسة والله بجد انا نفسى البسه بس اهى رافضين ومش عارفه اعمل ايه ادعيلى

والسادسة جوزى رافض بشدة ومش عارفه اعمل معاه ايه


السابعة خطيبى خايفة يبص لغيرى


الثامنة حماتى كل ما اكلمها تزعقلى وتقولى جوزك هيبص لغيرك


التاسعة بصى خلينا نتكلم بصراحة العنوسة بقت منتشرة اوى اتجوز الاول وبعد كدة ابقى اتنقب



العاشرة ارحموووووووونا بقى



بالله عليكم مش هى كدة

الاخوات منقسمات ل3 اقسام

اول قسم نفسها بجد تلبسه ومقتنعة بيه ولكن الى حوليها رافضين يا اما اهلها جحوزها حماتها...


والتانى الى هما الى حوليهم عوزينهم يلبسوا النقاب وهما حاسين انه مش الوقت المناسب او مترددين


والتالت مش مقتعنين بالنقاب اصلا


اختى وحبيبتى بالله

انا مش هقولك النقاب فرض ولا فضل ولا سنة ولا الكلام ده خلاص


احنا هنا هنتكلم من قلوبنا


انتى عاوزة ترضى ربنا؟؟؟

اكيد

طيب حبيبتى ممكن تقرأى بقلبك لو سمحت


اختى والله انا مقتنعة بالنقاب بس

بس ايه حبيبتى

اهلك رافضين؟؟؟؟

شايفه انك لسه صغيرة ؟؟؟

جوزك رافض ؟؟؟؟؟

حاسه انه مش الوقت المناسب؟؟؟؟

خايفة تلبسيه وتخلعيه؟؟؟؟؟

يا الله

كل دى حجج ؟؟؟؟

كل ده بينك وبين ربنا؟؟؟؟؟

حبيبتى اقعدى مع نفسك كدة

انا عاوزة ارضى ربى

عاوزة احس بجد انى قدمت شئ لله

طيب لازم بجد لازم اقرر

انا هلبس النقاب هلبسه فعلا

هنتصر على نفسى وعلى الشيطان

الاخوات الى مش عاوزين يلبسوه تفتكرى حبيبتى ايه الى يستاهل انك تضيعى احساس ان ربنا راضى عنك

تفتكرى ايه الى يستاهل انك متحشريش مع نساء النبى صلى الله عليه وسلم
قررى دلوقتى وقولى انا هقدم الخطوة دى لله

يارب انا هفضلك عن كل شئ

انا هكسر كل الحواجز عشانك يارب

طيب اهلى مش موافقين

حبيبتى ابدا ماهى حجة

بيقولوا صغيرة بيقولوا لما تتجوزى

شوفى اختى عشان كدة انا هحكيلكم قصة نقابى

كنت لا احب ذكرها

حتى اتكلم عن نفسى وبعض الخصوصيات

ولكن لعل يكون فيها حل لمشكلة اى واحدة

سواء اهلها رافضين او معتقدة انه لسه بدرى وانها صغيرة او خايفن وفاكرينه تشدشد



شوفى اختى تعتقدى انك صغيرة على النقاب؟؟؟؟؟

(انا فى تانية ثانوى)


اهلك يرفضون النقاب؟؟؟؟

امى على الرغم من انها منتقبة كانت ترفض النقاب بطريقة غير عادية

وابى الله المتولاة والمستعان على هدايته انسان عادى اقصد غير ملتزم ولا يقتنع بشئ من هذا


الاسلام فى القلب وسيبك من الكلام ده

وعادى يعنى بالنسبة له اتنقبت متنقبتش

مرة يقولوا انتقبى ومرة لاء

ولكن مش المشكلة فى ابى المشكلة فى امى

الى رافضه جامد جداااااااا

وطبعا هى منتقبة يعنى عارفه فضل النقاب وعارفه انه فضل

ولكن الموضوع بالنسبة لها صعب جداااااااا

لان لو كان موشوع اقنعها بفروضيته فده سهل

ولكن المشكلة انها راضة انى انا انتقب فى السن ده

ولكن طبعا انا لا اقتنع بموضوع السن

او لما تتخرجى او لما تبقى تتخطبى

اصل طالما لو انتى اقتنعتى انه فرض يبقى من يوم ما بلغتى لازم تلبسيه

ومينفعش تأجليه

وبلاش بالله الحجج الى بنسمعها والكلام الغريب

يا بنتى بدل اهلك رافضين يبقى هما عليهم الذنب وانتى تؤجرى بنيتك

كلام كويس اوى

يبقى لو كان المسلمين الاوائل عملوا كدة مكنش الاسلام انتشر

غلط حبيبتى !!!

هو انا لو كنت فضلت اسمع كلامكهم كنت انتقبت

لا. لا والله

المهم نرجع للقصة

من سنة وانا بحاول

ولما دخلت الدراسة الموضوع شغلنى

وبقت محاولتى فى اقناعهم ضعيفة الى حد ما

كنت مشغولة بالمحافظة على قلبى من فتن اصحابى وتقوية ايمانى الى حد ما

ولكن الاجازة جات

وحسيت انى مقصرة اووووووووووووى

وقفت مع نفسى هو مش هيبقى فيه اى تغير ولا ايه

المهم اختى الصغيرة بدأت تلتزم وما شاء الله عليها بقت احسن منى حتى

بدات تشعر بموضوع النقاب


وبدانا انا وهى فى رحلتنا المريرة فى اقناع اهلى ولكن كانت ممتعه جدا والله

كل يوم ينتهى الموضوع ببكاء مريرانا واختى

وافضل ادعى ربنا

واسمع قصص المنتقبات

واشوف بعض العبارت

اصدق الله يصدقكك

فى النقاب حتى التراب

موتوا بغيظكم لن اتنازل عنه ابدا ما حييت

والمشاعر الرهيبة تتحرك فى قلبى

يارب عنى

امى حست بجد اننا ذودناها

وقالت خلاص انتهى الموضوع

اوعى تتكلمى فى الموضوع ده تانى

وانتى مجادلة وعاقة

لما اقولك حاجة تسمعيها

طبعا كلامها بيدمرنى

ولكن!!!

المحاولات لم تقف

امى مش هلبس النقاب بأه

اخرسى يا بنتى بقى انا قلتلك ايه


المهم كسبت الى حد ما ابى


اختى كانت تسهر معاه كل يوم وتقعد تبكى وهى بتقنعه

الى حد ما يقتنع ولكن اول ما يسمع كلام امى يرجع تانى

انا ذودت الالحاح وبدأت فى الترهيب

على فكرة انتى كدة اثمة لانك عارفه ان النقاب فرض ومش راضية

متقوليش مش راضية يا بنتى بقى

متحوطنيش فى الموقف ده

متحسسنيش انى حرام عليه

بطلى كلام بقى فى الموضوع ده

هو انامش بقول انى رافضة بس مش دلوقتى


والله على حججها بقى

انتى هتلبوخينا دنتى بتيجى من الدروس بتبقى هتموتى هتلبسى نقاب ازاى؟؟؟؟
وابى بكل بساطة


بصى يا بنتى انا ممكن اوافق على النقاب

بس لازم تسبتيلى الاول انك قد النقاب

تسلميى الاول كدة .......... الله المستعان اقول ايه

المهم بدون الدخول فى الكلام ده

واعلنت امى الحرب كما قال لى ابى

راحت قالت لستى ام ابى وستى امها

وزوجات اخوالى والجيران وخالتى

وكل واحدة تيجى

احنا كنا سامعين انك عاوزة تتنقبى يا بنتى حقى الكلام دة

؟؟؟؟؟؟؟

انتى اتجننتى

واجى اتكلم مع اخواتى هنا على النت يفتحوا الجرح تانى

ويقعدوا يقولولى يا بنتى لو انتظرتى امك تقولك البسى النقاب مش هتقولك

وفعلا ده الى بيحصل

البسيه وادخلى عليهم مفاجاة

بس انا مش قادرة اعمل كدة

الموضوع صعب جدا وكنت خايفة منهم بصراحة

بعد كدة بدات احس انى مش صادقة عشان كدة الموضوع طول

المهم جاء اليوم المنتظر

وفتحت على برنامج الشيخ حازم شومان

راح متكلم عن عقوق الوالدين

امى قاعدة واختى واخويا

قولهم يا شيخ حازم قولهم

وانا ابوصلها يا ماما هو احنا بنعمل فيكى ايه

مبتسمعيش كلامى ومجادلة

يا ماما انتى عمرك قولتيلى حاجة ومسمعتهاش

متردش

طبعا هى بتتكلم على النقاب

فهو قعد يقول كلام عن الام وانا تعاطفت معاها


خلاص يا امى

واتكلمنا مع بعض والحالة بقت كويسة جداااااا

الحال فى الشقة الى الان

ابى برة اخويا واختى نامت

امى ماسكة المصحف وبتقرأ فى الانتريه

امى

ها؟؟؟

مش هتعقلى بأه؟؟؟؟

وصمت رهيب ونظرة مخيفة

هو انتى لسه مش عاوزة تلبسينى النقاب

يوووووووووووووووووه

بجد انتى لسه مش عاوزة

وفجأة انقلب الامر رسا على عقب

خلاص بأه

انا مش قلتلك انسى الموضوع ده احنا مش عارفين نكلمك ازاى ولا نقولك ايه



انتى بتفهمى ازاى؟؟

وانا احاول اقنعها تانى

وهى مفيش فادية والدموع تنزل من عنيا واقولها انا

انا بصراحة مش عارفه اعمل ايه واقنعك ازاى انتى حرام عليكى

تقولى مش الذنب علينا احنا يبقى خلاص ملكيش دعوة انتى بقى وانسى الموضوع ده

ابى يدخل

فى ايه يا بنتى

وانا دموعى بتنزل وبكلم امى

هو طبعا فهم

اسكتى يا بنتى بأه

اسكتى بقولك

دخلت قوضتى انا خلاص زهت بجد ومعنتش عارفه اعمل ايه

قوليلى انتى لو انتى مكانى تعملى ايه وانا هعمله

تقولى تسكتى وتسيبها لله لما يؤن امره

وابى مستمر فى قوله اسكتى

دخلت نمت وقولت يارب لو انا فعلا صادقة استجب بالله

كانوا اخواتى الى بيشجعونا هنا على النت

بيقولولى انه انتى عاوزة رضى ربنا وقلب امك بين اصبعين من اصابع الله

عليك بالدعاء فهو القادر


قلت يارب انصرنى انا مش عارفه اعمل ايه

فضلت تانى يوم مكلمش حد

وفجأة التليفون رن

رقم غريب

السلام عليكم

ايوة احنا برنامج.........عاوزين حضرتك تتكلمى انهردة مع الشيخ ....

قلبي وقف عن الدق وعقلى تجمد

وما قلت الا باذن الله


انا فعلا ؟؟؟؟؟؟؟؟؟هتكلم ايوة فعلا



اتصلوا بيه وقت البرنامج

بس يا خسارة امى نايمة مش هتسمع

ولسه راحة اتكلم وانا مرتبكةجدااااا

الموبيل فصل شحن

قلبى تحطم

دى فرصتى انه كنت ممكن اكلم الشيخ يقولها كلمة

فضلت متضايقة اوى

الفرصة راحت

ومازلت مستمرة فى دعائى لعل الله يوفقنى

تانى يوم بعد المغرب

ويرن الموبيل مرة اخرى

ونمرة اخرى غربية

السلام عليكم

انا من برنامج...........حضرتك هتكلمى الشيخ تانى انهردة باذن الله

قلبى طار من الفرح

واستعديت


وبعد كدة البرنامج بدا

محدش اتصل واناا فى ارتباك شديد

ابى فى البلكونة. اخى واختى وامى يشاهدون البرنامج

ومن ثم التليفون رن

رديت حضرتك هتطلعى دلوقتى على الهوا

وبدأت الدقات السرييييييييييييعة

كنت مجهزة كلامى فى ورقة

اول ما الشيخ قال السلام عليكم

قلبى احستت انه انخلع من صدرى

ووقعت الورقة منى

وبدات اتكلم فى ارتباك شديد وانا لا ادرى ما
اتكلم به

كل هذا وهم يشاهدون

اخى علم انى

وجاء الى

وذهب فقالهم

وهم يسمعون

وفى النهاية

اطلب من حضرتك طلب يا شيخ امى بتتفرج على حضرتك دلوقتى ممكن توجهلها كلمة تلبسنى النقاب

طيب متجبيها نلكمها

هتيها نلكمها فى المكالمة نفسها

ياريت

روحتلها هى اتجننت

اخدت الموبيل

فضل يكلمها

وقالها لازم تكونى احسن ام فى الدنيا

وتلبسيها النقاب وتشجعيها



وفضل يشكر فيها وانتى ام فاضلة ولابسه النقاب

ولو مكنتش البذرة طيبة الشجرة مش هتكون طيبة وكدة يعنى

وعاوزك ان شاء الله انهردة تنزلى تشتريلها النقاب

حاضر ان شاء الله

قفلت وامى مكلمتنيش

يا امى ايه رأيك

الموقف ده غير كتيييييير اوى

يمكن مش عشان خليتها تتطلع على الهوا او تتكلم

ولكن هى حست انى عوزاه بجد

خلاص اخدت نقاب مرات عمى

هى مرضتش تعطينى نقابها

برده لسه مازال هناك بعض الذبذبة

لبسته ونزلت






ومن هنا بدأ احساس ملكى رهييييييييب

مازال مختلط ببعض التضايق من تصرفات امى

الى نظرتلى بغضب وانا نازله وباستهزاء

اصحابى والمفاجأة

روحت طبعا كل الناس لامونى

ولكن لا اخشى فى الله لومة لائم

وكلهم نبذونى لفترة واكثرهم ستى

ولكن بعد قليل من الزمن تغير كل شئ

ادخل المسجد

تنادى عليه

وتقبل رأسى

وتقولى ربنا يبارك فيكى

واختى انتقبت بعدى باسبوع

ومن ثم صديقتى امس

وباقى صديقاتى فى مشوارهم نحو النقاب

ارتفع شأنى وسط اصدقائى ومدرسينى واهلى جميعا

والحدود بقت فى مكانها والى كنت بتضايق منه انه ممكن مدرسينى يتعاملوا معى بى حدود انتهى

دخلت اشهر مسجد فى بلدى

واذا بكل معلماته

يأتين الى بانفسهن ليهننأننى

ومن ثم ادخل فيفرح بى عماتى

وينادو نى لاجلس معهم

اخى عند اول يوم فى النقاب

سألنى متى سأخرج

وقال لى انا هاجى اوصلك عشان امشى معاكى وانتى منتقبة

وانا جايه من الدرس اول يوم

الاقيهم واقفين فى البلكونة هم وابى يشاهدنوننى وينادون بعضهم حتى يأتوا ليرونى وانا فى اول يومم بالنقاب



امى بعد فترة كنت بحكيلها اساتذتى قالولى ايه
قالتلى كنتى قوليلهم

الحمد لله الذى هدانا لهذا

غريب بس حصل!

ويستمر الاحساس الملكى دومى

واحساس بالذة الرائعة


بان تملكين الكون

وشعارى

اريد قصرا لا يهدده زوال اريد عيشا ليس يقطعه ممات

اريد زوجا مثل يوسف فى الجمال واريد انها را بقصرى جاريات

وعندما ينازعنى البعض

نبح الكلاب لكن ماضر السحاب

هبت رياح والجبال راسخات




هاااااااا

لسه مش عاوزة تنتقبى

كسرى الحواجز

واصدقى النية

وعليكى بالدعاااااااااااااء

وباذن الله هنفضل مع بعض فى الموضوع ده

كل واحدة عندها مشكلة

سواء بداخلها او اهلها

نتكلم هنا باذن الله لنحلها معا

وتذكرى

عاوزة زوج


الله قادر

ما عند الله لا ينال الا برضاه

ولا تنسى

ومن يتق الله يجعل له مخرجا ويرزقه من حيث لا يحتسب


بالله لا تترددى

والان اريد ان ارى ارائكم ومشاعركم

لا تبخلوا عليه بها رجااااااء


مين هتفرحنى وتقولى انا هكسر الحواجز وهتحدى كل شئ

ومحتاجة مساعدة

على فكرة لو مادية حتى مش هبخل

اسألكم الدعاء لى

اشهد الله انى احبكن فى الله

[/quote]

[dodo didi]

السلام عليكم ورحمة الله وبركاته

اولا مرسى اوى ع الموضوع ده

بس لكل واحد رأى يحترم ان بصراحة مبحبش النقاب او مش معنى انه مبحبوش انا اقصدى انه ممكن يعمل اضرار

يعنى ممكن النقاب يأثر ع العين اذا كنتى بتحطى عليه بيشة او اى حاجة تغطى عينيك فده بيأثر فعلا وانا سالت ع الموضوع ده دكاترة العيون

وممكن كمان يعمل ضيق ف النفس وغيره ..........

انا عن نفسى بقول ان الدين الاسلامى مش نقاب ولا حجاب ده فكر وشريعة مبنمشى عليها

انا الحمد لله محجبة وملتزمة بشريعة ربنا كويس

[شعبان رجب]

الحجاب مادة نجاح وسقوط بالنسبة للبنت لان الحجاب فرض ومش اى حجاب
انا كنت عايزة اسلم على اختى الغيورة على الدين وحشتينى ونتمنى الا تغيبى علينا ونسالك الدعاء واختى العضوة نبيل خلف سامحينى انا مش عارفة اسمك جزاكى الله خير على كلامك وربنا يثبتنا ويثبتك وقوللنا اخر الاخبار
والسلام عليكم