خبـــــــــر ......... غيــــــــــر سار ...... عمليات (( التطفيش )) بدأت بالفعل

[محمد عبد العظيم وسية]

خبر غير سار ..........

مضطر أن أقوله لكم ....
بل ومضطر إلى أن أتكلم معكم باللهجة العامية ..

(((( فاكرين مشهد الديكتاتور من مسرحية تخاريف محمد صبحي ..... لما قال :

أنا عايز معايا حكومة واعية .. حكومة تلعب بالبيضة والحجر ...
ادو الناس في الأول علاوة يفرحوا بيها ــــــــ بعد كده هنرجع منهم أضعاف أضعافها .. زودولهم فواتير الكهربا وفواتير الغاز ــــــــ احنا الحق يتقال شعبنا جميل .. يتسرق ويسقف .

وتقريبا والله أعلم دا اللي بيحصل ..


وإليكم الخبر الغييييييييييييييييير سار

بدأت عندنا فعلا لجان من الوزارة عمليات (((( التطفيش )))))

إيه بقا عمليات التطفيش .... إعادة إحصاء العجز والزيادة في كل مدرسة وكل من كان وكيلا أو ناظرا سيعود إلى مادته الأصلية وسيرشح للطلاب ــ والمصيبة الأكبر .. ان سلطة المديرية بقت مطلقة .. بمعنى .. أنك لازم تسد العجز على مستوى المديرية كلها يعني المحافظة كلها وليس على مستوى الإدارة ...
يعني ممكن تروح تتنقل على الحدود يا ريس .........
ايه مش عاجبك والا ايه ؟؟؟؟؟؟؟ ما انت اخدت الكادر .. والبلية لعبت معاك ....

لا ودلوقتي كمان جاري من الوزراة التفكير في تقليل العدد اللي نجح .. يعني اللي عليه جزاءات ومشاكل ومش عارف ايه .. مش هياخد الكادر ..

تعرفوا الكلام دا بتاطع التطفيش انا كنت بسمعه بقالي كام سنة .. لكن اللي دفعني اني اكتب الموضوع ان فعلا بدأ امبارح في مدرسة أعدادي عندنا وشالوا كل المدرسين الزيادة وطفشوهم
واللي مش عاجبه يشرب من البحر أو يعني ممكن يخبط دماغة في الحيطة ..

والمصيبة الأكبر فعلا من كده ... ان المدارس هتخسر أولادها .. لان كل واحد فينا هينقل وهوه مجبر

فطبعا عمره ما هيبدع في مجاله ...

وإليكم الطامة الكبرى ............ هذا معناه بداية الانهيار الفعلي للمعلمين والتعليم في مصر .

معلشي ــ بس فيه نقطة بسيطة ...

ويارب تكون صح ..

أنا فكرت وقولت ـــــــــ ما يمكن الموضوع دا بتاع التطفيش يمكن يبقى زي قانون المرور ــ ياخدلوا يومين كده وهوجة عرابي وبعد كده ينفض والانجليز يحتلوا البلد ـــ وترجع ريما ..

بس والله مش عارف ربنا يلطف بينا كلنا ...

ويا جماعة .. اللي عنده زي كده في محافظته يقول على طوووووووووول ...

احنا هنا أسرة واحدة ــ والله لا تقل عن أسرتي الحبيبة في مدرستي العسكرية .

[suzuky2009]

فى المنصورة ايضا تم التطفيش

[محمد عبد العظيم وسية]

المشاركة الأصلية كتبت بواسطة suzuky2009

فى المنصورة ايضا تم التطفيش

أجمل حاجة يا سوزوكي ــ ان اول مشاركة ليك معانا تبقى تطبيقة سياسة التطفيش

عموما شكرا على مرورك الجميل

وأهلا بيك معانا في بيتك الثاني منتدى البوابة .

[ممدوح مصطفى الانصارى]

شكرا يا غيور يا شهم .
ما يحدث ليس فى كل المحافظات ولاكنه اجتهاد شخصى لترزية القوانين والحاقدين من القيادات التعليمية الغير مستفيدة .
لا تقلق اخى الكريم . وانا اتوقع *** من جانب المعلمين تجاه هؤلاء المطفشين وبامر الله احنا اللى هنطفشهم .
سؤال يا خوية محمد؟ هى ثورة عرابى كانت هوجة ؟ ولا التعبير على سبيل التقريب لما يحث فى ارض الواقع؟
تقبل خالص احترامى وتقديرى

[مستر// فيكتور بخيت]

يا جماعة الكلام ده مش جديد الحكاية من البداية عملية خصخصة للتعليم

عندنا مليون معلم ونصف مليون ادارى لن تنفع معهم حكاية المعاش المبكر انما ينفع معهم نظام التطفيش والعكننة وقلة الذوق

والكلام ده سبق وقلته من شهرين حيث قلت ( ما هو قادم هو الاسوء على الاطلاق)

المهم الحل هو ان لا نعطيهم فرصة لتطفيش الناس وخاصة الوكلاء الذين بدأو فى مغادرة مدارسهم فعلا

لذا ارجو من كل زميل ان يكون صبورا وطويل البال حتى يتغير الحال

[اسامه القزاز]

صدقتنى يا اخى الحبيب محمد لما قلتها كتير ومحدش مصدقنى النتيجة يوم ... والكارثة وراها جايه ولسه الكوارث بس اما تقبض اول زيادة هيشغلونا ( أنفار ) -- تصدق يا استاذ محمد انى مدرس من 1993 شفت العذاب اللى محدش شافه ابدا انا من المنوفية واتعينت فى البحيرة على بعد 3 ساعات مواصلات -- 3جنيهات لمدة 8سنوات متتالية ورغم ذلك كنت راضى واعمل بمنتهى القوه لأن التلميذ ملوش ذنب -- لسه باقى الظلم اوعى تكون زهقت منى الآن اعمل منذ 7 سنوات فى آخر حدود ادارتى المدرسة اللى محدش راضى بيها ابدا -- وبرده الحمد لله انجازات متواصلة بفضل من الله وحده الأولى على الإدارة وعلى المحافظه . فى النهاية اقولك سيبها للمولى عز وجل -- وهى دنيا وستنتهى ومش هناخد منها حاجة الا العمل الصالح .

[محمد سالم سباع]

فعلاً الكلام ده بدأ عندنا فى الدقهلية

[ملاك لكل زمن]

أخى العزيز أستاذ احمد وسية
العجز والذيادة فى مدرستنا من سنتين ولابد أن يكمل كل مدرس نصابه القانونى
فهذا الكلام ليس جديد وخصوصا فى محافظة الدقهليه
ويتم التطفيش إصلاً لكل مدرس أستلمت التعيين متأخر عن زملائه

والله المستعان

[الأستاذة هدى]

امبارح انتظرنا الفرج من الشرقية فى موضوع حوافز ال75% واليوم جاءنا منها خبر ((((التطفيش )))) هى كده حكومتنا بتعمل اللى يضر الشعب هوى انما الخير لسه يستنى ويستنى نكون خرجنا ع المعاش !!!!!!!!!!!! والان نكون واقعيين هيطفشوا مين قبل مين؟؟ يعنى المدرسين اللى خرجوهم برة مدرستهم اختاروهم على أى أساس؟ هل هم الوكلاء حتى لا يكون فى المدرسة كبيرة العدد أكثر من 3 وكلاء كما قالت اللائحة التنفيذية؟؟ والا المدرسين الأحدث تعيينا أم ماذا ؟؟ رجاء الافادة يا استاذ محمد أفادك الله..........

[رمضان كريم]

وفعلا تم ذلك فى مدارس نوسا البحر - مركز اجا - دقهلية
وايضا مدرسة السلام بقرية السلام بفيشا بنا طفشو ا المدرسين الجداد ونقلوهم مدارس ابعدمن مكان اقامتهم

[محمد عبد العظيم وسية]

المشاركة الأصلية كتبت بواسطة ابلة هدى

امبارح انتظرنا الفرج من الشرقية فى موضوع حوافز ال75% واليوم جاءنا منها خبر ((((التطفيش )))) هى كده حكومتنا بتعمل اللى يضر الشعب هوى انما الخير لسه يستنى ويستنى نكون خرجنا ع المعاش !!!!!!!!!!!! والان نكون واقعيين هيطفشوا مين قبل مين؟؟ يعنى المدرسين اللى خرجوهم برة مدرستهم اختاروهم على أى أساس؟ هل هم الوكلاء حتى لا يكون فى المدرسة كبيرة العدد أكثر من 3 وكلاء كما قالت اللائحة التنفيذية؟؟ والا المدرسين الأحدث تعيينا أم ماذا ؟؟ رجاء الافادة يا استاذ محمد أفادك الله..........

أختي الفاضلة أستاذة هدى .

الموضوع باختصار مادي واقتصادي من الدرجة الأولى..

الوزارة عايزه تلغي عقود المدرسين المتعاقدين في الأماكن النائية ..

يعني ياعيني كل المتعاقدين هيباتوا في الشارع ... واحنا نسد مكانهم احنا مين بقا .. الأحدث تعيينا ..

والحكومة اللي تلم المكسب

خد باليمين وهات يا معلم بالشمال .

[M.Sherif]

قال رسول الله صلي الله عليه وسلم
(لا يأتي زمان إلا والذي بعده شر منه)

[ahmed alaraby]

اخى الكريم اود ان اطرح امامك مثال واترك الحكم لضميرك : فى مدرسة ثانوية صناعية للبنات يوجد عدد 29 وكيلة ثقافية وفنية من كل التخصصات وهم من اصحاب المرتبات الكبيرة والا عمل لهم على الاطلاق سوى التوقيع حضور وانصراف ولازال امامهم سنوات على المعاش وعندما يطلب منهم تدريس اى عدد حصص تجد القمسيون جاهز فما رأيك فى مثل هؤلاء ؟

[mesioo]

الموضوع حقيقى لان المقررة بدات تا خذ بيا نات المدرسين

[nahoous]

ياجماعة فى بلدنا الحبيب مصر غالبية المسئولين ينقبوا على أى شئ يعكر صفو المدرس دول ناس عايزين الإباده
حسبي الله ونعم الوكيل
لا بيدوروا على شرح لمدرس ولا مستوى طالب ولا اى شئ ايجابي دايما بيدوروا على الهيافات