¨°o.o (أولى طب عين شمس..........أدخل برجلك اليمين)o.o°¨

[romel2007]

الاناتومي دكتورة كاريمان
البايو دكتور رشوان
الهيستو دكتورة ابتهاج
الفسيولوجي دكتورة ابتسام
الجدد احسن كتير من السابقين
انت يا دكتور نيورو اولي ؟

[DR.Neuro]

المشاركة الأصلية كتبت بواسطة romel2007

الاناتومي دكتورة كاريمان
البايو دكتور رشوان
الهيستو دكتورة ابتهاج
الفسيولوجي دكتورة ابتسام
الجدد احسن كتير من السابقين
انت يا دكتور نيورو اولي ؟

شكرا جدا يا دكتور طمنتنى :D

أه أنا أولى يا ريت أتعرف بحضرتك وأتشرف بيك على الايميل

[د/ ماجدولين]

ندى يا قمرى أستنى من رسالة ع الخاص النهاردة أو بكرة بالكتير....أوكى
بس معلش عشان الموضوع مش يخرج عن محتواة والمشرف ........أوكى يا عسل
********************************************

انا شايف ان romel اسم مخطط حربي مش مخططة و لا انتي شايفه ايه

سووووووووووورى يا دكتور...بس أنا لما قرأت الكلام دة

انا كان ليا واحدة زمياتي كانت جايبة في تانية 94 و كملت و دخلت صيدلة

أفتكرت أن حضرتك مش ولد من غير ما أشوف النيك نيم......متآسفة بجد
معلش مرة تانية

يعني عندنا في عين شمس الي بيجيبوا امتياز في حدود 200 الي 220
و في القاهرة بيكونوا في حدود ال500

لأ. خير أن شاء الله
*********************************
طيب يا جماعة نبتدى بقى
وطبعا أن شاء الله الدكتور روميل هيتابع معانا:D
ومفيش بقى داعى للأحراج عشان أقولكوا
أن كل دورى فى الموضوع دة هو أنى بعملة كوبى وبست من منتدى تانى
كتر خيرى الصراحة:D:D
يللا بقى..............نبدأ

[د/ ماجدولين]

طبعا قبل البداية يا جماعة
أحب أنبة ان الموضوع هيبقى مكمل لموضوع الدكتور أنس

http://www.thanwya.com/vb/showthread.php?t=59638

******************************

أهلاً بيكم يا جماعة فى سنة أولى نورتوا طب عين شمس
أنا عارف انكم بلا منازع كلكم أوائل سواء كنتوا من مصر أو من الكويت " زى كده" أو من الإمارات أو السعودية أو أى دولة ( بدون ما حد يزعل كلكم أوائل)

بس أنا عايز انبهكم لحاجة مهمة جداً انهى احتفلاتك بسرعة
....... الموضوع خلاص انتهى على كده
الثانوية مرحلة انتهت :D
و الكلية لا تعترف بمجاميع الثانوية و لا مجهودك بتاع الثانوية لكن بتعترف بحاجة واحده بس و هو انك بتعملها ايه؟؟؟؟؟؟؟؟

لازم تعرف كويس جداً ان ميهمكش ابداً ممكن يقعد جنبك و احد جاب 100% فى الثانوية
.... أهم حاجة من هيدي للكلية؟؟؟؟؟؟؟؟؟؟؟
و احب اضرب مثل عندى زميلي من الإمارات جايب 100% فى الثانوية فى أولى جاب جيد
وانا الحمد لله امتياز بالرغم أنى كنت جايب أقل من كده فى الثانوية مع العلم إن منهج الكويت و الإمارات و احد فى حين ان فى زميلة معانا من الكويت كانت اقل منى بي 0.6% و جابت اعلى منى فى الترتيب طبعا انا احترمها جدا على مجهودها و انا معجب بى اللى عملته
(ما لناش دعوة بقى بالأخوة العرب المهم الفكرة تكون وصلت:D)
حبيت بس اذكركم بالمقدمة دية لأن الإعداد النفسى خطر و أساسى

نجي بقى للكلية عموما كدا مع قفز على مقدمات
انت هتاخد
anatomy تشريح (250 درجة)
-physiology وظائف جسم " شبه الأحياء كده بتاعت الثانوية بس بدون اميبا و حشرة ذبابة فاكهة و لا الهبل ده كل"(250 درجة)
- biochemistry كيمياء غدارة اقصد حيوية (150 درجة)
- و هستولوجى يعني انسجة " وحدة الخلية بتاعت الثانوية على تفلطح بقى "(150 درجة)
- كمبيوتر اكيد انتو مذكرينه من قبل ما تدخلوه(50 درجة)
- E اكيد هتقولوا ايه الهبل ده صدق او لا تصدق هتاخد انجليزي و فى الغلب مش termnology كمان " مصطلحات طبية " مما يزيد الطينة بلة (50 درجة)
المؤسف ان المادتين السابقتين اكيد قلتوا " الهبلتين" دول فى المجموع وبيأثروا جامد جداً فى الترتيب لو عايز امتياز و متعملش زي صحبك اللى تأثر بالإنجليزي و وجايبلى 36 من 50

نبدأ اعمل ايه :-

1- هتحضر محاضرات الأولى فى الكلية و ده اساسى علشان كلنا " اقصد تانية كمان "
(الولد دة فى تانية يا جماعة فهو بيكلم عنة وعن زمايلة كمان:D)
عايزين نعرف فكر رؤساء الأقسام
2-الكتب اللى هيقولوا عليها رؤساء الأقساء تجبها " السمع و الطاعة " لأن فى الغالب هى اللى هتذاكر منها من الآخر
(الحقيقة يا جماعة أنا ليا تحفظ ع الجزئية دى
لأن فى ناس كتييييييير قالولى أنى أجيب الكتاب اللى أرتاحلة حتى لو مش كان كتاب القسم
بسأنا كتبت الحتة دى للأمانة فقط)
3- بالنسبة للنشاطات الأسر انا لى تحفظات كبيرة عليها لأنى بصراحة مش مؤيدة لهذه الموضيع و بحس انها مجرد مضيعة للوقت و فى الآخر انت حر ده مجرد رأى شخصى و لك تماماً انك تعمل الى انت عايزه ... بس نصيحة لو حاجة خاصة بالكلية ككل اكيد لازم نشترك بغض النظر عن عدم اهتمامى بالأسر

نيجي بقى اذاكر ازى:
============
تجاوز موضوع انك المصطلحات غريبة و مش قادر تترجمة و كده كل ده كلام فاااارغ بمعنى الكلمة .....انت جواك عارف انك هتعرف تترجم و هتفهم كله اسبوع و لو طولت هيبقى يعني شهر مش مشكلة خالص لسه الكلية بتكون مريحة
أحب أوصفلكوا المراحل اللى هتعشوها بتفصيل كل مادة مع مراعات ان هذه التفاصيل فى حاجات هتتغير بسبب تغير رؤساء الأقسام بالكامل
(وطبعا الدكتور روميل تفضل مشكورا بتوضيح هذة الجزئية)

**************************************
نكمل بقى بعدين يا جماعة مع كل مادة بالتفصيل
عشان مش أطول عليكوا
فى رعاية الله

[أميرة الورود]

موضوع جميل اختي ماجي وكملي علشان نستفيد كلنا
و اهه هانت فاضل شهر تقريبا وندخل
هي الدراسة هتبدأ عندنا امتى بالظبط؟

[romel2007]

المشاركة الأصلية كتبت بواسطة د/ ماجدولين

سووووووووووورى يا دكتور...بس أنا لما قرأت الكلام دة

أفتكرت أن حضرتك مش ولد من غير ما أشوف النيك نيم......متآسفة بجد
معلش مرة تانية

لأ. خير أن شاء الله

حصل خير يا دكتورة ماجدولين و لو عنديك اي اسئلة او استفسارات اكتبي و انا هارد بإذن الله و ربنا معاكم كلكم

دكتور نيورو انا هاضيفك عندي و اتشرف بمعرفتك .

[DR.Neuro]

شكرا جزيلا للدكتورة ماجدولين ...

على الاضافة القيمة .. ومنتظرين الباقى ..

د.رومل .. أنا أكثر شرفا بمعرفتك .. جعلنى الله وإياكم من الذين يدخلون الجنة زمرا ..

جُزيتم الخير كله

[Dr|shereen]

اوكى يا دكتورة

[د/ ماجدولين]

موضوع جميل اختي ماجي وكملي علشان نستفيد كلنا
و اهه هانت فاضل شهر تقريبا وندخل
بس متفكرنيش
هي الدراسة هتبدأ عندنا امتى بالظبط؟

وأنا بقول التوبيك منور لية؟؟؟؟!!!!!!!
أتارى أميرة الورود معانا
يااااااة أخيرا أفتكرتى أنك معانا هنا فى المنتدى:D
نورتى يا قمرى التوبيك والمنتدى كلة
بصى يا عسل
على حسب آخر المعلومات
الدراسة الرسمية 20 سبتمبر
بس أنا سمعت كدة والله أعلم أن طلبة الفرقة الأولى
بيروحوا من قبلها
بأسبوع عشان يتعودوا ع الجو
بس الصراحة الكلام دة مش داخل دماغى
بس أن شاء الله لما أتأكد أكييييييييييد مش هقولك
**************************

حصل خير يا دكتورة ماجدولين و لو عنديك اي اسئلة او استفسارات اكتبي و انا هارد بإذن الله و ربنا معاكم كلكم

شكرا ع مساعدة حضرتك يا دكتور
*************************

شكرا جزيلا للدكتورة ماجدولين ...

على الاضافة القيمة .. ومنتظرين الباقى

شكرا للمرور
والباقى هينزل دلوقتى أهة
لو النت مش فصل أو الكهربا قطعت أو الكمبيوتر هنج
أو حصل زلزال أو مجلس الشورى ولع تانى:D أو...........أو...........أولخ
*********************

اوكى يا دكتورة

ماشى يا سكر..........أتمنى أنى أكون عند حسن ظنك

[د/ ماجدولين]

نبدأ كلامنا بالفسيولوجى
المحاضرات فى مدرج المحلاوى و السكاشن فى قسم الفسيولوجى
-علشان المادة دى هتحتاج تشترى جهاز ضغط ( محلات بيع الأجهزة الطبية أمام الكلية )
و البالطو و كارنيه المادة (هنبقى نقول على حكاية كارنيهات المواد دى بعدين
أصل عين شمس بعيد عنكوا بتحتاج حوالى عشر كارنيهات)
-المادة دى هتمتد معاك لسنة تانية كمان

physiology
=======

اكبر مادة هتعيشوا فيها و نصيحة هى حلوة و شيقة.... بس و حياتك متغرقش فيها:D
فى مواد تانية مهمة بردة
هى عليها 250 بس معلش برده تعرف تجيب درجات فيها بإذن الله
نيجى نقسمها بقى
*هتاخد Blood أول حاجة و يبقى حظك الجميل جدا لو قررت الدكتورة ابتسام
" رئيسة القسم الجديدة" ان يدخل د.شكرى يشرح الجزء الأول علشان هيترجملك و هيفهمك
انا عارف انه بيمشى بسرعة 1/2 صفحة إلى صفحة كاملة فى المحاضرة
بس هتعرف ان ده معدل بطيييئ جداً علشان كده بقى لو عايز تطلع من الأوائل اقرأ الموضوع كامل " ال Chapter بالكامل "
سيبك من اللى هيدوة فى المحاضرة متذكرش جزئيات و تترك الباقى حاول تكون بتلم
اسبق مفيش مشاكل و افهم الجديد لما يجوا يشرحوه و الكلام ده غاية فى الأهمية
* هتفاجئ انك مش هتاخد Blood بس هيفتحوا عليك باب نار جديد :D و هو ال Autonomic و هو جزأ جميل جداً و يعنى الجهاز العصبى الذاتى و سهل هتظبطه بسهوله ان شاء الله
المصدر بتاعها هيكون مذكرات د. عبد الحميد لو موجودة
أو الدكتور اللى هيخش و غالبا د. محمود عبد العزيز و هينزلكم مذكرة و مهم جداً انك تبقى عارف اهم جزأ هو الجزأ الأخير بتاع ال Receptors فى الأتونوميك و المقارنات خطر خطر خطر صدقنى مش عايز اقولك ان سؤال اخر السنة فى الأتونمك هو واحد من المقارنات اللى فى الأخر
من دلوقتى انا قلتها.... برده اطلع على كتب دكتور شكرى بتفيد
* و المفاجئة الكبري انك هتفاجئ برده انهم فتحوا عليك باب Nerve و Muscle
و ده هيكون قبل اتونمك جزأ حلو انا شخصياً مبستطلفوش بس مهم و اهم جزأ هو حاجة اسمها Action Potential و Local Potential افهمهم صح فى ال Nerve بعد كده عندك كمان Frank Starling Law
على قد ماتقدر افهمه جامد و القوانين التانية فى(muscle) المسل " اتعمدت اكتبه بالعربى " علشان القراية بتاعتعتها
* ثم تفاجئ " هى المفاجئات مبتخلصش:D" انهم خلصوا Blood سكاشن و محضرات و طالبين منك امتحان معرفش من كام ....امتحان سهل " نصيحة ذاكر من كتاب العملى من أول السنة كده كل سكشن هيدهولك" اريحلك و اكتب ملاحظات اللى هيقلوها الدكاترة فى السكشن هتهمك كتير بس لو لقتهم زاغوا فى المنهج و بيكلموك كلام كبير و ملوش لازمة
فكك مش هيجي كلمة منه هتعرفه انت بعدين*
المفاجئة الصارخة هنفتح عليك النار بمفاجئتين من العيار الثقيل Git:D:D:D و Cvs و احذر الإثنين ال Cvs اهم جزأ فى الفسيولوجى و هيكون احب جزأ ليك فى الفسيولوجى مع الblood الإثنين مهمين جداً و كمان ال Git اللى كان مفاجئة سنتنا و دخل نصف السنة و ده بسبب ان د. ابتسام بتحب ال Git :D:D احذرو السؤال جه فى ال Git ب 8 درجات كارثة بمعنى الكلمة اخر السنة لولا ان العبد لله استعد كويس لل Git لكان لبس :D
دة غير صعوبة Mcq بتاع ال Git بتاع اخر السنة و بالإضافة إن Git هو الجزأ المفضل لدى د/ ابتسام ....(.الجى اى تى) يعنى الجهاز الهضمى اما (السى فى اس)" Cardiovascular" يعنى الجهاز الدورى " قلب و اوعية دموية" يهمك قوية انك تعرف التفصيل الدقيقة ( فاهم يعني ايه دقيقة)
تفاصيل السى فى اس علشان هتتسأل فيها فى نصف السنة والجى اى تى برده التزم باللى هيتقال فى المحاضرة
* المفاجأة الصارخة (لأ كدة كتيييييير بجد)
خلال ما أنت بتستعد لإمتحان نصف السنة هتفاجاً ان الكلية مستمرة محاضرات بالرغم من أنه هيبقى فاضل 3 ايام على امتحان و هيتقال كلام هيدخل فى الإمتحان
" ده اللى عمله د. شكرى "
و بكده نكون خلصنا فسيولوجى نص السنة
ونصيحتى
تفادى الأخطاء تجنب الإجهاد خليك متحمس:D
هتدخل فى امتحان Mcq يعنى اختيار من متعدد من 40 عايزين 40 إن شاء الله
(يااااااااااااااااااااارب)
النصف التانى هنكمل بقى الكرديوفاسكولار Cvs و الجى اى تى و لما ينتهى الجى اى تى
هيفتح فى شرح Respiration و توقعوا ممكن الجى اى تى يتبدل مع التنفس و يدخل التنفس فى نص السنة و ممكن يتغير كل الكلام دة محدش عارف علشان كده
احضر و اعرف ايه اللى هيحصل

ملحوظة:- الrespiration مش معنى إنه إتاخد فى الآخر يعنى مش مهم ده مهم جداً و توقعوا على الاقل كده 30درجة اخر السنة ( مفيش حاجة مش مهمة)
طبعاً فى جزأ Biophysics زبطوا كدة من اى مذكرة فى المكاتب
ولو مذكرة د. عبد الحميد موجودة حلو و Biostaticts واحسن لك ظبطها مع المحاضرتين بتوعهم وسهل جداً هم 6 أو7 و رقات هتحفظهم حيجلك سؤال ب 3-4 درجات Essay ودمتم مضمونين

هيجيلك امتحان برده فى ال Cvs بعد ماتكونوا مشيتوا فية كويس هو عملى برده زى الأولانى
كون مستعد له فى شهر 3 غالباً

اثناء هذه المده هتكمل نص السنة التانية و هتيجى على شهر 4 فى اخره هتمتحن عملى او ما يشبه العملى او ما لا يشبه العملى:D
المهم هتخش تبع مجموعتك على مجموعة من دكاترة هتعرف قد ايه هما طيبين خااااااااااااااالص و بيحبوا الطلاب:Dو مش عايزين ينقصوا نهائى
اوعى اوعى اوعى تفكر فى الحاجات دى
ممكن يقولوك تعمل تجربة من التجارب اللى هتتدرسها بس اهم حاجة تبقى إجابتك جاهزة لما يسألك الدكتور
و طريقتك فى العملى مهمة كمان
العملى من 40:D

و فى الآخر هتخش امتحان نظرى من 120 خمسين على Mcq و 70 على Essay
متفكرش و تشغل بالك هعرف أكتب و لا لأ فى آخر السنة
هتكتب بس اهم حاجة
ذاااااااااااكر
كأنك بتذاكر لثانوية عامة و اطلع على اسألة من أول السنة يا ريت


البقية تأتى ايدى تعبتنى بس الفسيولوجى مواله كبير و مهم و
لو جبت فيه درجة عليه اضمن انك من الأوائل

[DR.Neuro]

شكرا جزيلا على الموضوع...

وفعلا معظم الناس بتأجل فسيو عشان تقيل جدا .. أتقل مادة فى أولى ..

ومعظم _أو كل _ الناس بتاخد فيه دروس ..

أنا أخويا كان مأجله برضه :D بس يارب أنا لأ
آه صحيح ..

ممكن الموقع دة ؟!!!!

لو مفهاش تعب لحضرتك

[DR.Neuro]

خلاص شكرا د.فداء الحبيب:D

عرفت الموقع

[د/ ماجدولين]

خلاص شكرا د.فداء الحبيب :D

عرفت الموقع

فداء الحبيب
امممممممممممم.......يبقى حضرتك سجلت
ع العموم أهلا وسهلا بحضرتك معانا
أنا أساسا كنت هستأذن أحد المشرفين
عشان أعرف بالموقع ع المنتدى
كنت فاكرة أن الحكاية مخالفة للقوانين
بس لاقيت طلبة صيدلة...........ماشاء الله
ع العموم أنا هكلم ع الموقع
حتى عشان طلبة السنين القادمة
بصوا يا جماعة
دة موقع أسمة بلاطى
http://www.bala6y.org/vb/
هذا الموقع....خاص فقط بطلبة طب عين شمس فقط
جميع أعضاؤة بما فيهم المشرفين
من طلبة الكلية
بس على فكرة مفيش حد هيقدر يشوف التوبيكات كاملة
ألا أذا سجلت عضوية فى المنتدى
وطبعا لازم تكون طالب فى الكلية عشان تسجل عضوية
وأثناء التسجيل هتتسأل كدة سؤالين هبلين للتأكد من أنك طالب بالكلية
**********************
أن شاء الله بكرة هبقى أكمل باقى التوبيك ع المنتدى دة
لأنى دلوقتى لازم أقوم
دمتم فى رعاية الله

[DR.Neuro]

المشاركة الأصلية كتبت بواسطة د/ ماجدولين

فداء الحبيب
امممممممممممم.......يبقى حضرتك سجلت
ع العموم أهلا وسهلا بحضرتك معانا
أنا أساسا كنت هستأذن أحد المشرفين
عشان أعرف بالموقع ع المنتدى
كنت فاكرة أن الحكاية مخالفة للقوانين
بس لاقيت طلبة صيدلة...........ماشاء الله
ع العموم أنا هكلم ع الموقع
حتى عشان طلبة السنين القادمة
بصوا يا جماعة
دة موقع أسمة بلاطى
http://www.bala6y.org/vb/
هذا الموقع....خاص فقط بطلبة طب عين شمس فقط
جميع أعضاؤة بما فيهم المشرفين
من طلبة الكلية
بس على فكرة مفيش حد هيقدر يشوف التوبيكات كاملة
ألا أذا سجلت عضوية فى المنتدى
وطبعا لازم تكون طالب فى الكلية عشان تسجل عضوية
وأثناء التسجيل هتتسأل كدة سؤالين هبلين للتأكد من أنك طالب بالكلية
**********************
أن شاء الله بكرة هبقى أكمل باقى التوبيك ع المنتدى دة
لأنى دلوقتى لازم أقوم

دمتم فى رعاية الله

طيب دمان هى فتحت بقى :D

أنا برضك حابب أقول على الموقع حبيبى..


بحبه وهافضل طول عمرى أحبه ..


وبرضك هو مخصص لطلبة عين شمس ..

متصاحب على كلية الطب كلهم فيه ..

http://forum.shamsawy.net

ومنتدى كلية الطب أهو


http://forum.shamsawy.net/index.php?showforum=42


ودة رابط موضوع الدفعة بتاعتنا وفيه دكاترة بيخشوا يتابعونى

http://forum.shamsawy.net/index.php?...pic=1124350240

بس لسا الموضوع على نياته لغاية اما العبد لله_اللى هو أنا _ يشد حيله شوية


وشكرا ...

[طبيب عالمى قادم]

انا رايح اولى طب عين شمس ارجو عدم تخويفى انا لسه على الباب