قطوف لغوية من منهج الصف الثالث الثانوى

[احلام جميلة]

اسم التفضيل للمبدع
مستر حسن محمد حسن

اسم التفضيل
محمد أذكى من عمر.
الطائرة أسرع من القطار.
المحيط أوسع من البحر.
- (أذكى – أسرع – أوسع) ... أسماء تفضيل.
- اسم التفضيل هو كلمة بنستخدمها لما يكون في حاجتين مشتركين في نفس الصفة بس في واحدة منهم أكتر من التانية وحابين نبين ده في الكلام.
- اسم التفضيل صفة وممنوع من الصرف.
- اسم التفضيل بيكون على وزن (أفعل) ومؤنثه (فعلى)... زي (أحسن) مؤنثه (حسنى) ... (أعلى) مؤنثها (عليا).
- أسماء التفضيل الشاذة اللي مش على زون (أفعل) هي (خير – شر).
-إعراب اسم التفضيل.
بنعرب اسم التفضيل حسب موقعه في الجملة.... بس احنا قلنا اسم التفضيل صفة ... وأسهل حاجة تعربها هي الصفة .... وقلنا ده في درس الحال قبل كدة ...بمجرد ما تعرف الصفة وصفت أيه .. هتقدر تعربها.
- إعراب الكلمة بعد اسك التفضيل.
- الكلمة بعد اسم التفضيل لو كانت معرفة بيكون إعرابها دايما مضاف ... والكلمة المعرفة ممكن تكون (معرفة بال – اسم إشارة – اسم موصول ... الخ).
أمثلة: - (هو أفضل من عرفت) – (أحمد أحسن الناس خلقا) – (أنت أسرع هؤلاء) ...... هنا ( من – الناس – هؤلاء) كلهم في محل مضاف إليه .
- الكلمة بعد اسم التفضيل لو نكرة ... بيكون إعرابها إما تمييز وإما مضاف إليه... المهم النكرة بعد اسم التفضيل ليها شكلين...شكل سهل يتلاحظ وشكل تاني حويط وده اللي هنرغي فيه حبة وهيبقى سهل بردو بإذن الله (.
- الشكل الأول: -
محمد أفضل خلقا.
محمد أفضل ولد.
انت أشد استغلالا من غيرك.
لا بد أن تستغلني أشد استغلال.
هو أكثر علما.
علمه أكثر علم.
ببساطة خالص النوع ده لو فيه الألف اللي بتدلل ع النصب يبقى تمييز لو ما فيش الألف يبقى مضاف إليه ... عشان كده (خلقا -استغلالا -علما) تمييز ... أما (ولد -استغلال -علم) مضاف إليه ...داء شكل واضح وسهل :-) ندخل ع الجد بقي.
-الشكل التاني :- الشكل ده الكلمة ما ينفعش يبقى آخرها الألف اللي بتدل ع النصب عشان الكلمة بيبقى ءاخرها تاء مربوطة أو الف مقصورة ( الياء اللي بتتنطق الف زي كبرى مستشفى معنى ) .. فبالتالي الكلمة النكرة اللي احنا شاكين فيها مش قادرين نعرف هي تمييز ولا مضاف إليه مثلا يعني :-
1-" السلام عليكم " أسمى تحية.
2-"السلام عليكم " أسمى معنى.
3-إن " 57357 " أفضل مستشفى.
4-أن " 57357" أفضل مهارة.
5-" في الحلال " أجمل رواية.
6-" في الحلال " أجمل غاية.
7-يجب أن نجعل مصر في أفضل صورة.
تايه انت دلوقتي ... عارف ( .. المهم اطمن أنا مألفلك طريقة كويسة وسهلة هتعجبك
( طريقة حرف الجر في ) في الأمثلة الجاية دي :-
1- شيماء أكثر حلاوة ... ينفع نقول شيماء أكثر في الحلاوة ؟ .. الجملة لايقة و معقولة ... خلاص يبقي تمييز .
2- شيماء أجمل فتاة ... ينفع اقول شيماء أجمل في الفتاة ؟ ... لا مش لايقة خالص ... خلاص يبقي مضاف إليه .
7-يجب أن نجعل مصر في أفضل صورة..... ينفع نقول (يجب أن نجعل مصر في أفضل في الصورة) .... لأ مش لايقة .... يبقي (صورة) مضاف إليه.
الخلاصة :-
لايقة >> تمييز .
مش لايقة >> مضاف إليه .
طبق الطريقة دي على باقي الأمثلة هتلاقيها زي الفل .
و أصل كل الطرق أن وجه التفضيل تمييز و المفضل عليه مضاف إليه . دي أو فهمتها تبقى تماااام.
لو طبقنا طريقتي ع الأمثلة اللي فوق هتلاقي إن :-
- (تحية – مستشفى – رواية –صورة) مضاف إليه.
- (معنى – عناية – غاية)
-آخر حاجة عن الموضوع ده :-
- لو اسم التفضيل معرف ب( ال ) النكرة اللى بعده تمييز من غير تفكير.
مصر الأفضل دولة.
انت الأفضل رجلا.
انت الأعلى خلقا.
(دولة -رجلا -خلقا) كلهم تمييز.
-شروط صياغة اسم التفضيل.
اسم التفضيل ليه نفس الشروط اللي ذكرناها في درس أسلوب التعجب وهي ( ثلاثي – تام – متصرف – قابل للتفاوت – مثبت – مبني للمعلوم – ليس للوصف الذي علي وزن أفعل ومؤنثه فعلاء )
هما سبعة شروط بس كررهم مع نفسك كذا مرة هتلاقي نفسك حفظتهم ... المهم يلا بقي نشرحهم واحدة واحدة .. عشان عارف ان أصلا معظمكم مش فاهم حاجة
- ثلاثي: يعني من تلات حروف ... ما ينفعش مثلا الفعل يكون (كرم – استطاع – انسجم).
- تام: يعني الفعل مش ناسخ ... يعني ما ينفعش (كان–أصبح–صار).
- متصرف: يعني ييجي منه مضارع وماضي وأمر ... يعني ما ينفعش (عسى–ليس).
- قابل للتفاوت: يعني يقبل التفضيل ... يعني ما ينفعش (مات – فنى –عدم) لأنه ما يقبلش.
- مثبت : يعني مش منفي ... يعني ما ينفعش ( ما ذهب – ما نجح ) .
- مبني للمعلوم : يعني ما يكونش مبني للمجهول ... يعني ما ينفش مثلا ( يُقال – يُري ) .
- ليس الوصف منه علي وزن أفعل الذي مؤنثه فعلاء : بعبارة أوضح يعني ما ينفعش يكون لون أو عيب .... لأن أحمر مؤنثه حمراء فما ينفعش .... ولأن أعمي مؤنثه عمياء فما ينفعش وكذلك أعرج.
-حالات اسم التفضيل وأحكامها.
اسم التفضيل ليه أربع حالات هنذكرها ... كلهم مهمين بس في واحدة منهم مهمة جدا ودي تالت حالة هنذكرها... المهم الأربع حالات هما :-
1- مجرد من ال والإضافة .... ودا حكمه إنه ملازم للإفراد والتذكير .
(حسام أكبر من محمد)-(شيماء أجمل من ولاء)-(أسئلتي أصعب من غيرها) .... هنا اسم التفضيل لا هو معرف بال ولا هو جه بعدها مضاف إليه ... فبالتالي لازم يلازم الإفراد يعني يبقي مفرد مش جمع ولا مثنى ... ولازم يلازم التذكير يعني يبقي مذكر مش مؤنث.
2- مضاف إلى نكرة ... دا حكمه إنه ملازم للإفراد والتذكير والتنكير.
(خالد أفضل قائد)-(سميرة أذكى طالبة)-(أنتن أجمل فتيات)...اسم التفضيل بعده مضاف إليه بس نكرة ... فبردو لازم يلازم الإفراد ويبقى مفرد ... ويلازم التذكير ويبقى جمع.
3-معرف بال .... دا حكمه إنه يطابق المُفضَّل في الإفراد والتثنية والجمع والتذكير والتأنيث.
(هي العليا شأنا) - (هما الأعليان شأنا) - (هن العلييات مكانة) إلخ إلخ ... هنا اسم التفضيل معرف بال ... فلازم في الحالة دي إنه يطابق الحاجة اللي انت فضلتها .. لو هي مذكر يبقي اسم التفضيل مذكر .. لو مؤنث يبقي مؤنث ... لو مفرد يبقي مفرد إلخ .... وطريقة الجمع والتثنية شرحناها في درس (مهارات التثنية والجمع للأسماء).
4-مضاف إلي معرفة ... دا حكمه إنه يجوز يلازم الإفراد والتذكير والتنكير ويجوز إنه يطابق المفضل زي ما بيطابقه المعرف بال .
(الوالدة أعلى أو عليا الناس مكانة)-(الوالدتان أعلى أو علييا الناس مكان )- ( الوالدات أعلى أو علييات الناس مكانة) إلخ إلخ.
- كام سؤال
1- أنت الاعلي خلقا.
اجعل الجملة للمثنى والجمع بنوعيهما.
المثني المذكر : - أنتما الأعليان خلقا.
ما بنحذفش الياء اللي في آخر اسم التفضيل لما نثني .. لاحظ دا كويس عشان هنحذفها في الجمع المذكر .
المثني المؤنث : - أنتما العلييان خلقا.
دا بداية الجد .. بص با زيدي اللي حصل حاجتين بساااط جدااا ... كلمة ( عليا ) لما بنثنيها أو نجمعها الألف المقصورة اللي في الاخر دي بنقلبها ياء .. تمام ؟ دي اول خطوة اوعي ابدا تنساها .. بعد كدة بنضيف علامة الرفع للتثنية ( الف و نون ) فتبقي علييان .... كبرى .. الالف المقصورة اللي في الاخر هنقلبها ياء وبعد كدة نضيف علامة التثنية ( الف ونون ) فتبقي كبريان و هكذا .
الجمع المذكر : - انتم الأعلون خلقا.
تم حذف الياء اللي في آخر كلمة أعلي هنا وبعد كدة ضفنا علامة الجمع في الرفع.
الجمع المؤنث : - أنتن العليياتُ خلقا .
نفس النظام قلبنا الالف المقصورة لياء و ضفنا علامة الجمع المؤنث السالم.امشي ع الخطوتين دول بس كدة وهتجيب اي اسم مقصور .. اقلب و ضيف بس كدة.
2- صوب الخطأ :-
كنتم شباب العلم الأفضل مكانة.
التصويب هيبقي (الأفضلين) لأنه معرف بال فلازم يطابق... بس المشكلة في اللي عرف كدة وقال (الأفضلون) ... فووق يا ابني ... ركز ع الإعراب (الأفضل) هتبقي خبر كان منصوب .. فلما تجمعها هتبقى منصوبة بالياء,
هي الأسمى خلقا.
التصويب (السميا) .... نظام مطابقة.
3-
- أحب الطالب الأكثر اجتهادا .
- أحب الطالب أكثر اجتهادا .
- أحب الطالب أكثر من الطالبة .
- في الأولى... كلمة ( الأكثر ) وصفت ايه ؟ مين اللي اكثر أجتهادا ؟ الطالب صح .. طب و كلمة ( الأكثر ) معرفة و كلمة ( الطالب ) معرفة بردو ... خلاص تبقي ( الأكثر ) نعت منصوب بالفتحة .
- في التانية ... كلمة (أكثر) وصفت ايه؟ مين اللي أكثر اجتهادا؟ الطالب هنا بردو ... بس المرادي كلمة ( أكثر ) نكرة أما ( الطالب ) معرفة ... كدة كلمة (أكثر) حال منصوب بالفتحة .
- في التالتة.. كلمة ( أكثر ) وصفت ايه ؟ مين اللي أكثر ؟ حبي للطالب هو اللي أكثر .. هنا وصفنا الفعل .. قلنا طالما وصفت الفعل تبقي نااائب عن المفعول المطلق ... هنا دا نوعه نائب عن صفة المصدر .. أصل الجملة ( أحب الطالب حبا أكثر من الطالبة ) .

[احلام جميلة]

اسلوب التعجب
للمبدع
مستر حسن محمد حسن

أسلوب التعجب
يا لروعة الربيع !
ما أجمل السماء !
ما أمكر اليهود !
كيف فعل هذا !
أعظم بمحمد نبيا !
لله دره فارسا !
- التعجب هو أنك تنبهر بحاجة أوي سواء الحاجة دي حلوة أو وحشة .... زي الأمثلة اللي فوق دي .
- أسلوب التعجب بينقسم لنوعين :-
1- أسلوب تعجب قياسي : ودا ليه أوزان معينة بييجي عليه هنتكلم عنها بالتفصيل .
2- أسلوب تعجب سماعي : ودا مالوش أوزان معينة ... لكن ليه كام شكل سهل تعرفهم .
- أسلوب التعجب القياسي
دا ليه وزنين بس وهما :-
1- ما أفعله !
2- أَفْعِلْ به !
- إعراب ( ما أفعله ! )
ما : ما التعجبية اسم مبني في محل رفع مبتدأ .
أفعل : فعل ماض جامد مبني علي الفتح .
الهاء : ضمير مبني في محل نصب مفعول به .
المتعجب منه هنا بيتعرب مفعول به
- إعراب ( أَفْعِلْ به ! )
أفعل : فعل ماض جامد أتي على صيغة الأمر للتعجب .
به : الباء حرف جر زائد ، والهاء ضمير مبني في محل رفع فاعل .
المتعجب منه هنا بيتعرب فاعل
- ندخل علي الأسئلة بقي :-
1- ما أجمل الربيع فصلا !
ما : ما التعجبية اسم مبني في محل رفع مبتدأ .
أجمل : فعل ماض جامد مبني علي الفتح .
الربيع : مفعول به منصوب وعلامة نصبه الفتحة .
فصلا تمييز منصوب وعلامة نصبه الفتحة .
2- أعظم بالعلم سلاحا !
أعظم : فعل ماض جامد أتي على صيغة الأمر للتعجب .
بالعلم : الباء حرف جر زائد ، والهاء ضمير مبني في محل رفع فاعل .
سلاحا : تمييز منصوب وعلامة نصبه الفتحة .
3- الربيع ما أجمله !
الربيع : مبتدأ أول مرفوع بالضمة .
ما : ما التعجبية اسم مبني في محل رفع مبتدأ ثان .... باقي الإعراب معروف .
4- ما كان أجمل الربيع !
ما : ما التعجبية اسم مبني في محل رفع مبتدأ .
كان : زائدة لا محل لها من الإعراب
أجمل : فعل ماض جامد مبني علي الفتح .
الربيع : مفعول به منصوب وعلامة نصبه الفتحة .
ما أعظمهما سلاحين العلم والإيمان !
سلاحين : تمييز منصوب وعلامة نصبه الياء .
العلم : بدل منصوب وعلامة نصبه الفتحة... ينفع تحطها بدل الضمير ( هما ) وهتفضل الجملة سليمة وشرحناها في درس البدل ....... تعالي انت هنا بس ياللي قلت ( العلم ) مفعول به ... و ( هما ) اللي متصلة بـ( أعظمهما ) مش عاجبك يعني ؟ ها ؟! ... ( العلم ) مش هو المتعجب منه ... المتعجب منه هو ( هما ) في ( ما أعظمهما ) .
-كام ملحوظة :-
1- فعل التعجب فعل ماض جامد .
2- النكرة المنصوبة بعد أسلوب التعجب بـ(ما أفعله – أفعل به ) بتتعرب تمييز منصوب .
3- ( كان ) الزائدة ... بتيجي مع صيغة ( ما أفعله ) ومش بتأثر ع الاعراب .
- شروط الفعل في صيغ التعجب القياسية :-
مش أي فعل ينفع نتعجب بيه ونحطه علي وزن ( ما أفعل ) أو ( أفعل به ) ... لا دي ليها كذا شرط ... ولو شرط واحد ما اتحققش ما ينفعش نحطه بالصيغة دي .. والشروط دي هي :-
( ثلاثي – تام – متصرف – قابل للتفاوت – مثبت – مبني للمعلوم – ليس للوصف الذي علي وزن أفعل ومؤنثه فعلاء )
هما سبعة شروط بس كررهم مع نفسك كذا مرة هتلاقي نفسك حفظتهم ... المهم يلا بقي نشرحهم واحدة واحدة .. عشان عارف ان أصلا معظمكم مش فاهم حاجة
- ثلاثي : يعني من تلات حروف ... ما ينفعش مثلا الفعل يكون ( أكرم – استطاع – انسجم ) .
- تام : يعني الفعل مش ناسخ ... يعني ما ينفعش ( كان – أصبح – صار ) .
- متصرف: يعني ييجي منه مضارع وماضي وأمر ... يعني ما ينفعش ( عسي – ليس ) .
- قابل للتفاوت : يعني يقبل التفضيل ... يعني ما ينفعش ( مات ) لأنه ما يقبلش ؟
- مثبت : يعني مش منفي ... يعني ما ينفعش ( ما ذهب – ما نجح ) .
- مبني للمعلوم : يعني ما يكونش مبني للمجهول ... يعني ما ينفش مثلا ( يُقال – يُري ) .
- ليس الوصف منه علي وزن أفعل الذي مؤنثه فعلاء : بعبارة أوضح يعني ما ينفعش يكون لون أو عيب .... لأن أحمر مؤنثه حمراء فما ينفعش .... ولأن أعمي مؤنثه عمياء فما ينفعش .
- ممكن نتعجب من حاجة غير مسموح بيها لكن بشكل غير مباشر .
- لو كان الفعل غير ثلاثي أو جامد أو لون نقدر نتعجب منه بإننا نجيب صيغة تعجب لحاجة ينفع نتعجب بيها ثم المصدر الصريح أو المؤول للحاجة اللي بنتعجب بيها مثلا :-
- ما أكثر استخدامك للهاتف !
- ما أفضل أن تجتهد !
- ما أشد حمرة الشفق !
- أجمل بأن اصبح الحق واضحا !
- أجمل بإصباح الحق واضحا !
- لو كان الفعل منفي أو مبني للمجهول .. بنجيب صيغة تعجب لحاجة مسموح بيها ثم نجيب بعدها مصدر مؤول .... مثلا :-
- ما أسوأ ألا تذاكر !
- أبشع بأن يُصدَق الكاذب !
- أسلوب التعجب السماعي .
ودا زي :-
- لله دره فارسا !
- يا له جنديا !
- يا لك من قائد !
- كيف استطعت أن تهرب !
- النكرة المنصوبة بعد أسلوب التعجب ( لله دره – يا له ) تكون تمييزا منصوبا .
( فارسا – جنديا ) : تمييز منصوب بالفتحة .
- النكرة ممكن تتسبق بحرف جر زائد .
( قائد ) تمييز مجرور لفظا منصوب محلا .

[احلام جميلة]

أسلوب الاختصاص

للمبدع مستر حسن محمد حسن
1- نحن المصريين خير أجناد الأرض .
2- أنتم شباب مصر مجتهدون .
3- عليكم أيها الأباء مسئوليات كثيرة .
4- يجب علينا العرب استرجاع أرضنا فلسطين .
5- علمتكم شباب اليوم أمل كل غد .
أسلوب الاختصاص ... يعني ايه الاختصاص في النحو .... إن ضمير المتكلم أو المخاطب ييجي بعده الكلمة اللي بيعود عليها ... وبيكون إعراب الكلمة مفعول به لفعل محذوف وجوبا تقديره أخص ... تعالي بقي نمسك الأمثلة بتاعتنا واحد واحد :-
- المثال الأول ( نحن المصريين خير أجناد الأرض .)
هنا كلمة ( المصريين) جت بعد ضمير متكلم ( نحن ) و الضمير دا بيعود علي الكلمة دي ... يبقي إعراب ( المصريين ) مفعول به منصوب وعلامة نصبه الياء .
- المثال الثاني ( أنتم شباب مصر مجتهدون . )
هنا كلمة ( شباب ) جت بعد ضمير مخاطب ( أنتم ) و الضمير دا بيعود علي الكلمة دي... يبقي إعراب ( شباب ) مفعول به منصوب بالفتحة .
- المثال الثالث (عليكم أيها الأباء مسئوليات كثيرة . )
هنا كلمة ( أيها ) جت بعد ضمير مخاطب ( كم ) و الضمير دا بيعود علي الكلمة دي ... يبقي إعراب ( أيها ) اسم مبني علي الضم في محل نصب مفعول به والهاء للتنبيه .
كلمة ( الأباء ) نعت مرفوع بالضمة .
- المثال الرابع ( يجب علينا العرب استرجاع أرضنا فلسطين . )
هنا كلمة ( العرب ) جت بعد متكلم ( نا ) والضمير دا بيعود علي الكلمة دي .... يبقي إعراب ( العرب ) مفعول به منصوب وعلامة نصبه الفتحة .
- المثال الخامس ( علمتكم شباب اليوم أمل كل غد . )
كلمة ( شباب ) جت بعد ضمير مخاطب ( كم ) و الضمير دا بيعود علي الكلمة دي ... يبقي إعراب ( شباب ) مفعول به منصوب وعلامة نصبه الفتحة .
كام ملحوظة :-
- الاسم المختص بيكون حاجة من تلاتة ( معرف بال ) – ( معرف بالإضافة ) – ( أيها أو أيتها ) .... حاجة تاني غير التلاتة دول ما ينفعش تبقي مختص .
- المختص دايما بيكون مفعول به لفعل محذوف وجوبا تقديره ( أخص ) .
- المختص فضلة ... يعني ما يجيش إلا لما الجملة تخلص احتياجاتها الأول .
كام سؤال :-
1- ( نحن العرب . ) - ( نحن العرب أقوياء . ) ، أعرب كلمة ( العرب ) في الجملتين .
( نحن العرب . ) ... ( العرب ) ما ينفعش تبقي مختص ... لأن الجملة محتاجة خبر ، وما فيش حاجة تقوم بدور الخبر غيرها .. عشان كدة إعراب ( العرب ) خبر مرفوع بالضمة .
( نحن العرب أقوياء . ) ... ( العرب ) هنا تنفع تبقي مختص ... لأن فيه حاجة تقوم بدور الخبر غيرها وهي كلمة ( أقوياء ) ... فيبقي إعراب ( العرب ) مفعول به منصوب وعلامة نصبه الفتحة .
2- ( أنتم أيها الشباب أمل مصر . ) .
( أيها ) اسم مبني علي الضم في محل نصب مفعول به لفعل محذوف تقديره أخص ،والهاء للتنبيه .
هو هنا الضمير عاد علي ( أيها الشباب ) ؟! ... أها عاد عليه ... هنا واحد من الشباب بيكلم الشباب .. فتفضل اختصاص بردو .
3- ( يجب علينا نحن أن نجتهد . )
اوعي تغلط وتعرب ( نحن ) مختص ... احنا قلنا المختص تلات حاجات بس وهما كلمة معرفة بال او كلمة معرفة بالإضافة أو أيها و أيتها ... لكن ( نحن ) دي ضمير ما ينفعش تبقي مختص ... اومال إعرابها إيه ؟ بص يا زيدي ... ( علينا نحن ) ... مش ( نا ) دي ضمير متكلم .... و( نحن ) بردو ضمير متكلم وجه وراها علي طول ..... تبقي توكيد لفظي .... يبقي إعراب ( نحن ) ضمير مبني في محل جر توكيد .
- حذف أداة النداء
الأصل في أداة النداء إنها تكون موجودة .. بس أحيانا بيتم حذفها لأسباب بلاغية .. و ده بيكثر في بداية الجمل و القطع . ( أبنائي الأعزاء عليكم واجب مقدس ..... الخ ) – ( شباب الوطن , بلدكم في حاجة إليكم ... الخ ) ( أيها الطلاب الأعزاء , اجتهدوا تفلحوا ...... الخ ) وهكذا ... كلمات ( أبنائي – شباب ) منادي مضاف منصوب بالفتحة ... ( أيها ) منادى مبني على الضم في محل نصب و الهاء للتنبيه .
ملحوظة :-
1 - نحن أيها العرب نسعى الي التقدم ... اعراب ( أيها ) أي اسم مبني على الضم في محل نصب مفعول به لفعل محذوف تقديره أخص ... و الهاء للتنبيه .
2- البعض بيقول ما احنا ممكن نقدر أداة نداء محذوفة هنا اصل الجملة مثلا ( نحن يا أيها العرب نسعى إلي التقدم ) .. و كدة يبقي الاعراب ( أيها ) : منادى مبني على الضم في محل نصب و الهاء للتنبيه ... الاعراب ده صحيح ماشي .. بس الرأي اللي قلناه في ( 1 ) أقوى .. و الرأي اللي في ( 1 ) هو اللي في منهجك .
3- من ( 1 ) و ( 2 ) نقدر نحط قاعدة بس دي بالنسبة لمنهجك بس .. " لا يمكن تقدير أن أداة نداء محذوفة اذا سبق المنادي المفترض ضمير مخاطب أو متكلم و يكون اعراب المنادى المفترض حينها مختصا . " .
ركز ع القاعدة اللي في ( 3 ) جدا عشان ما تغلطش في منهجك .. و يلا نشوف تدريب عليها :-
1- ما أجملكما أحمد وعمر ... ما إعراب ( أحمد ) ؟
( أحمد ) مفعول به لفعل محذوف تقديره اخص ... لأن ( أحمد ) جت بعد ضمير مخاطب ( كما ) في كلمة ( أجملكما ) .. جت بعد ضمير مخاطب بيعود عليها ... تبقي اسم مختص ونعربها مفعول به منصوب بالفتحة لفعل محذوف تقديره أخص .
ملحوظة :- الضمير ( كما ) في ( ما أجملكما ) بيتعرب مفعول به بردو بس دا لأسلوب التعجب .. و الضمير ( كما ) هو المتعجب منه .. أما ( أحمد ) هو الاسم المخصوص .. ركز ع دي عشان هتفيدك جدا في الاستخراجات
2- ما أجملهما أحمد وعمر ... ما إعراب ( أحمد ) ؟
) أحمد ) بدل منصوب بالفتحة ... أحمد جت بعد ضمير غائب ( هما ) ما جتش بعد ضمير مخاطب ما ينفعش ( أحمد ) تبققي اسم مختص كدة صح ؟ اااه ... يبقى الاعراب الصحيح بدل منصوب بالفتحة ... كمان ينفع نحط ( أحمد وعمر ) مكان الضمير ( هما ) ويفضل المعني الثابت ( ما أجمل أحمد وعمر ) فتبقي بدل ... بدل مطابق تفصيل بعد إجمال ... مش بعض من كل
3- ما أجملكما أنتما .... ما إعراب ( أنتما )
أنتما ضمير مبني في محل نصب توكيد .. جت بعد ضمير مخاطب ( كما ) و ( أنتما ) ضمير مخاطب بردو صح ؟ اه ! يعني ضمير مخاطب اتكرر مرتين ورا بعض تبقي توكيد لفظي بس كدة

[احلام جميلة]

الفاعل و نائب الفاعل



للمبدع مستر حسن محمد حسن

- الفاعل يعني ايه فاعل ؟ ... طيب بجد كدة دا سؤال يتسأل بردو ؟ فاعل يعني عمل الفعل ... يعني قام بالفعل ... بس كدة؟ اه بس كدة ... طيب بس زود حتة كمان و قول " إن الفاعل هو من قام بالفعل او اتصف به . " ... فلو وصفت الفاعل هتوصفه باسم فاعل .
- نائب الفاعل : دا لو وصفته هيديك اسم مفعول .. و بييجي بعد الفعل المبني للمجهول .
ملحوظة : اسم الفاعل مكسور ما قبل الاخر .
نوضح بأمثلة بقي أحسن :
1- لا يمكن العيش بدون هواء.
2- لا يوجد هواء .
1- ( لا يمكن العيش ) تعالي نتخيل جملة و نوصف ( العيش ).. هنقول ( العيش ممكن ) ... الحرف اللي قبل الأخير مكسور . تبقي ( ممكن ) اسم فاعل ... تبقى كلمة ( العيش ) في الجملة الاصلية ( لا يمكن العيش ) فاعل مرفوع بالضمة .
2- ( لا يوجد هواء ) ... لو جينا نوصف ( هواء ) في جملة من تخيلنا هتبقى مثلا ( لا هواء موجود ) .. موجود اسم مفعول يبقى كلمة ( هواء ) في الجملة الأصلية ( لا يوجد هواء ) نائب فاعل مرفوع بالضمة .
طريقة أسهل
- انت كدة عرفت أصل القاعدة و ده اللي يهمني ... بس تحسها طريقة صعبة يا اخي و رخمة كدة و فيها تخيل واحنا بنسرح لوحدينا يعني ... تعالى أقولك طريقة أسهل .
- مش الفاعل بييجي بعد فعل مبني للمعلوم ... أما نائب الفاعل بييجي بعد فعل مبني للمجهول ؟ اه ... انا بقي هخليك تعرف أي فعل اذا كان مبني للمعلوم ولا مبني للمجهول مهما كان الفعل ده رخم ... ازاي بقي ؟ ... بص يا زيدي :-
1- الفعل المبني للمجهول : هو كل فعل ... المضارع بتاعه اتحقق فيه حاجتين انه يكون مضموم الأول و انه يكون مفتوح ما قبل الآخر .... لازم الاتنين يتحققوا مع بعض .... زي الفعل ( يوجد ) – ( يُفترَض ) – ( يُشرَب ) ... الخ الخ .
2- الفعل المبني للمعلوم : هو كل فعل ... المضارع بتاعه ما ينفعش يكون مضموم أوله و مفتوح ما قبل آخره في نفس الوقت ... لازم الاتنين ما يتحققوش مع بعض .. بس لو واحدة بس اتحققت يبقي مبني للمعلوم عادي ..... زي ( يجد ) – ( ينبغي ) – ( يمكن ) – ( يجب ) – ( يشتعل ) .
- الفعل الملازم للبناء للمجهول .
في أفعال بتبقى على شكل المبني للمجهول دايما و رغم ده بييجي بعدها فاعل مش نائب فاعل .. و دي أفعال مشهورة و اسمها الأفعال الملازمة للبناء للمجهول و هي : ( حُمَّ – جُنَّ – سُلَّ – دُهِشَ – أُولِعَ – اُمتُقِع – غُمَّ – ذُهِيَ – فلج ) .... مثال ( جن الولد ) ... ( الولد ) هنا اعرابه فاعل مرفوع بالضمة .
- في أفعال ظاهرها انها ملازمة للبناء للمجهول بس هما مش كدة و بييجي بعدهم نائب فاعل زي ( اُستُشهِدَ – تُوفيَ )

[احلام جميلة]

اطلالة على المنصوبات
للمبدع حسن محمد حسن

الحال
- أتى الولد مسرورا .
- هرب الطالب خائفا .
- تبسم الطفل ضاحكا .
- نجا الجندي زاحفا .
- مات الجندي شهيدا .
يعني ايه الحال ؟ .... الحال كلمة نكرة منصوبة بتبين هيئة صاحبها ... الحال كلمة نكرة منصوبة وصفت كلمة معرفة ... الكلمة المعرفة دي بقى النحاة بيسموها ( صاحب الحال ) ... و ( صاحب الحال ) اعرابه حسب موقعه في الجملة ... يعني فاعل او مفعول به أو مبتدأ ... الخ الخ .
وحسب تعريف الحال اللي قلناه من شوية ... يبقي اعراب ( مسرورا – خائفا – ضاحكا – زاحفا – شهيدا ) كلهم حال منصوب بالفتحة .
- أنواع الحال :-
1- مفرد : يعني كلمة واحدة بس اللي بتتعرب حال .... زي ( رأيت الولد طويلا ) .. ( دخل المدرس علينا باسما ) ... ( أحب الفتاة رقيقا قلبها ) ..... الكلمات ( طويلا – باسما – رقيقا ) حال منصوب بالفتحة .
2- جملة :- و في الحال الجملة لازم يكون فيه رابط بيربطها بالجملة اللي فيها صاحب الحال و الرابط بيبقي حاجة من تلاتة ( واو الحالية – ضمير مستتر او بارز بيعود علي صاحب الحال – الواو و الضمير مع بعض ) ... تهت شوية انت صح ؟ هشرحهملك في الأمثلة و لا تشغل بالك أنت .. المهم طالما الحال جملة يبقي أكيد في حال جملة اسمية و حال جملة فعلية ... و هما كالتالي :-
- حال الجملة الاسمية : بيبقي عبارة عن مبتدأ و خبر في محل نصب حال ... زي ( أحب الفتاة قلبها رقيق ) هنا جملة ( قلبها رقيق ) في محل نصب حال ... الرابط في الجملة دي هو الهاء في ( قلبها ) .... و زي ( لن نغفل و العدو يمكر لنا ) هنا جملة ( العدو يمكر ) في محل نصب حال .. و الرابط هو واو الحالية بس ..... و زي ( جاءنا الطلاب و هم مسرورون ) ... هنا جملة ( هم مسرورون ) في محل نصب حال ... و الرابط هنا واو الحالية و الضمير ( هم ) .
- حال الجملة الفعلية : يعني بتبدأ بفعل .. و بتبقي الجملة الفعلية في محل نصب حال ... زي ( أتي الولد يجري ) ... هنا جملة ( يجري ) في محل نصب حال ... طب الرابط هنا ايه عشان انا مش شايفه ؟ .. الرابط هنا هو ضمير الفاعل المستتر بتاع ( يجري ) .... ( وفد الأطفال إلينا تعلو البسمة وجوههم ) ... هنا جملة ( تعلو البسمة وجوههم ) في محل نصب حال .... و الرابط هنا هو الضمير ( هم ) في كلمة ( وجوههم ) .
3- شبه جملة :- هنا شبه الجملة بتبقي في محل نصب حال ... وقلنا شبه الجملة بتبقي عبارة عن ( جر و مجرور – ظرف و مضاف اليه – ظرف بس ) .... ( رأيت العصفور علي الشجرة ) و ( رأيت العصفور فوق الشجرة ) .... هنا ( علي الشجرة - فوق الشجرة ) شبه جملة في محل نصب حال .
- تعدد الحال :-
هو ينفع الحال يتعدد ... ينفع ييجي كذا مرة ورا بعضه ... اها ساعات ده بيحصل ... ساعات المتكلم بيبقي عايز يوصف الكلمة بكذا صفة زي ( شاهدت القمر جميلا ساطعا منيرا ) .... كل الكلمات دي ( جميلا – ساطعا – منيرا ) كلمات نكرة وصفوا كلمة معرفة اللي هي ( القمر ) ... تبقي كل كلمة من دول حال ... ( جميلا ) حال أول منصوب بالفتحة .. ( ساطعا ) حال ثان منصوب بالفتحة .. ( منيرا ) حال ثالث منصوب بالفتحة .
- تقدم الحال :-
- ( جاء مجتهدا الطالب ) – ( بدرا طلع القمر ) – ( خائفا هرب الولد ) ....... الكلمات دي ( مجتهدا – بدرا – خائفا ) كلمات نكرة وصفت كلمات معرفة اللي هي ( الطالب – القمر – الولد ) ... تبقي الكلمات دي ( مجتهدا – بدرا – خائفا ) تعرب حال منصوب بالفتحة ... حيلك حيلك استني بس دا في الجملة دي كلها الحال جه قبل صاحب الحال .. دا ينفع ؟! .. اها ينفع الحال يتقدم علي صاحب الحال و دي كانت أمثلة علي الحكاية دي .
- من المهم تعرف ان لما الحال يتقدم على صاحب الحال .. ينفع ساعتها صاحب الحال ييجي نكرة و ينفع ييجي معرفة .... ايه بجد ؟! ... اها بجد ينفع صاحب الحال ييجي نكرة .. طالما الحال اتقدم عليه مثلا زي ( جاء مجتهدا طالب ) .... ( جاء ) فعل ماض مبني على الفتح ... ( مجتهدا ) حال منصوب بالفتحة ... ( طالب ) فاعل مرفوع بالضمة .
- الفرق بين الحال و نائب المفعول المطلق .
- من الطرق المشهورة جدا عشان تعرف فين الحال في أي جملة انك تسأل عنه بـ( كيف ؟ ) مثلا ... ( جاء الولد ماشيا ) ... لو سألنا ( كيف جاء الولد ؟ ) هتجاوب هتقول ( ماشيا ) .... يبقي ( ماشيا ) حال ... طريقة بسيطة و سهلة جدا .. بس مش بحب استعملها وما بشجعش علي استعمالها لأنه مش كل حاجة بنسأل عنها بـ( كيف ) تبقي حال .. و بالتالي فيه نسبة خطأ .. هوضح لك ازاي بتبقي غلط .. بص يازيدي معايا ع الكلام ده :-
- ( تطورت البلاد سريعا )
كتير هيعربوا سريعا حال .. كيف تطورت البلاد ؟ سريعا .. بس هي مش حال دي حاجة اسمها نائب المفعول المطلق ...
طب ايه الفرق بينهم الفرق بسيط جدا .
1-الحال بيصف الفاعل أو المفعول بس ولا يصف الفعل ابدا .. ( أحب الولد ذكيا ) .. مين اللي ذكي ؟ الولد هو اللي ذكي .. يعني ( ذكيا ) وصفت المفعول به ( الولد ) ... خلاص تبقي ( ذكيا ) حال منصوب بالفتحة .
2 - نائب المفعول المطلق : لايصف إلا الفعل فقط .. ما بيصفش أي حاجة تاني .. ( تطورت البلاد سريعا ) ... ايه هو اللي سريع ؟ .. التطور هو اللي سريع .. يعني ( سريعا ) وصفت الفعل .. خلاص تبقي ( سريعا ) نائب عن المفعول المطلق منصوب بالفتحة .
وبس كدة يازيدى ... تمام ولا ؟
- حاسك مش تمام اوي عايز تظبط سنة تاني لسا , صح ؟ .. خلاص خد دي كمان :-
1- ( نام الولد كثيرا )
ايه اللى كثير ؟ النوم طبعا صح ؟ طالما وصفت الفعل تبقى ( كثيرا ) نائب عن المفعول المطلق منصوب بالفتحة .
2- ( نام الولد جالسا . )
مين اللي جالس ؟ الولد صح ؟ ما وصفتش الفعل و وصفت كلمة معرفة معرفة و هي نكرة ... تبقى ( جالسا ) حال .
- النائب عن المفعول المطلق يصف الفعل فقط و لا يصف غيره .
- الحال لا يصف الفعل ابدا .
- الخلاصة :-
1- نائب المفعول المطلق بييجي في الجملة الفعلية بس ... و بالتالي مش محتاج تعرف تفرق بينه و بين الحال غير في الجملة الفعلية اللي بتتكون من فعل و فاعل و مفعول .
2- بتشوف الكلمة اللي انت شاكك فيها و تشوف هي وصفت ايه :-
- لو وصفت الفاعل او المفعول تبقي حال منصوب .
- لو وصفت الفعل تبقي نائب عن المفعول المطلق منصوب .
- الفرق بين الحال و النعت و الخبر و المفعول به الثاني :-
- ( الحال – النعت – الخبر – المفعول به الثاني ) كل الحاجات دي ينفع تيجي صفة .... صفة مثلا زي ( طويل – جميل – سيء – منافق – عادل – أجمل – أفضل – أكثر .... إلخ إلخ ) ... فمثلا الحال و النعت لاااازم يكونوا صفة .... أما الخبر و المفعول به الثاني فساعات بيبقوا صفة مثلا زي ( الولد مبتهج ) – ( وجدت الولد مبتسما ) ... ( ذكي ) خبر مرفوع بالضمة ... ( مبتسما ) مفعول به ثان منصوب بالفتحة .... يبقي الحاجة المشتركة بين الاربعة دول انهم كلهم بييجوا صفة .... نفرق بينهم ازاي بقي ؟ .... الفرق بينهم بسيط جدا .. بيظهر لما تعرف هي الكلمة وصفت ايه ... ركز معايا بقي عشان هيبقي أسهل حاجة تعربها هي الصفات دي ... الفرق بينهم كالتالي :-
- الحال : الحال كلمة نكرة منصوبة أو نقول صفة نكرة منصوبة وصفت كلمة معرفة ... زي ( أحب الفتاة رقيقة ) ..... كلمة ( رقيقة ) وصفت ايه ؟ .... وصفت ( الفتاة ) ... كلمة ( رقيقة ) نكرة و كلمة ( الفتاة ) معرفة ... تبقي ( رقيقة ) حال منصوب بالفتحة .
- النعت : كلمة نكرة وصفت كلمة نكرة أو كلمة معرفة وصفت كلمة معرفة ... زي ( أحب فتاة رقيقة ) ... كلمة ( رقيقة ) وصفت ايه ؟ ... وصفت ( فتاة ) ... كلمة ( رقيقة ) نكرة و كلمة .. ( فتاة ) نكرة بردو ... تبقي كلمة ( رقيقة ) نعت منصوب بالفتحة ....... مثال تاني (جاء الجندي الشجاع ) .. كلمة ( الشجاع ) وصفت ايه ؟ ... وصفت ( الجندي ) ... كلمة ( الشجاع ) معرفة و كلمة ( الجندي ) معرفة بردو ... تبقي ( الشجاع ) نعت مرفوع بالضمة .
- المفعول به الثاني :- كلمة نكرة منصوبة بتوصف كلمة معرفة قبلها ... بس الكلمتين دول جم بعد فعل بينصب مفعولين ... مثلا زي ( وجدت الله رحيما ) – ( ظن اللص الحارس نائما ) .. الكلمتين ( رحيما – نائما ) وصفوا ايه ؟ .... وصفوا ( الله – الحارس ) ... ( رحيما – نائما ) دول نكرة أما ( الله – الحارس ) معرفة ... اوعي تتسرع بقي و تقول دول حال ... تؤتؤ غلط ... دول جم بعد فعل بينصب مفعولين ( وجد – ظن ) .... عشان كدة بنعرب ( رحيما – نائما ) مفعول به ثان منصوب بالفتحة .... و للزيادة ( الله – الحارس ) مفعول به أول .
للتذكير :- من أشهر الأفعال اللي بتنصب مفعولين ( علم – وجد – دري – رأي - ظن – زعم – خال – حسب – اعتبر - جعل – اتخذ – تخذ – صيّر – ترك ) و اتكلمنا عنهم بالتفصيل في درس ظن و أخواتها .
- الخبر :- كلمة بتوصف المبتدأ و مهما تدور علي خبر غيرها ما تلاقيش ... و ممكن الكلمة دي تبقي نكرة زي ( الولد مبتهج ) و ممكن تبقى معرفة ! ....معرفة ؟! اها معرفة .. هو ينفع الخبر ييجي معرفة ؟ اها ينفع ييجي معرفة و اتكلمنا عن ده في درس المبتدأ و الخبر ... و ده كان كلامنا عنه :-
" - ( جيشنا الأقوى و لا يستطيع أحد أن ينكر ذلك أبدا ) .. يلا وريني إعرابك كدة ؟ ماشي .. ( جيشنا ) جيش مبتدأ و نا ضمير مبني في محل جر مضاف إلىه .. ( الأقوى ) نعت مرفوع بالضمة .. ( الواو ) حرف استئناف .. استني بقي عندك شايف اللي انت عملته ( جيشنا الأقوى ) المفروض كدة الجملة خلصت .. وبالرغم من ده انت ما عرفتنيش الخبر فين .. انت جبتلي مبتدأ ونعت .. ما فيش خبر ... ما ينفعش جملة من غير خبر أبدا .. تعإلى بقي نصحح غلطة عندك .. الاصل في الجملة الاسمية ان المبتدأ يبقي معرفة و الخبر يبقي نكرة ... بس دا ما يمنعش أن الاتنين يبقوا معرفة .. المبتدأ و الخبر ينفع الاتنين يكونوا معرفة ؟! ااه صحح المعلومة دي بقي .. يبقي ( جيشنا الأقوى ) لو الجملة خلصت كدة ... يبقي ( جيشنا ) مبتدأ والضمير في محل مضاف إلىه .. ( الأقوى ) خبر مرفوع بالضمة .... عارف لو كانت الجملة ( جيشنا الأقوى انتصر ) .. كانت هتبقي ( جيشنا ) مبتدأ و ضمير في محل مضاف إلىه .. ( الأقوى ) نعت مرفوع بالضمة .. ( انتصر ) فعل ماض .. والفاعل ضمير مستتر ..و الجملة الفعلىة في محل خبر ... هنا في المثال التاني أعربنا ( الأقوى ) نعت .. لان في حاجة تقوم بدور الخبر غيرها ... أما في المثال الأول اعربنا ( الأقوى ) خبر لاننا لو اعربناها حاجة غير كدة مش هيبقي في خبر في الجملة وده ما ينفعش ... الخبر أولى بالإعراب من أي حاجة سواء كانت نعت ولا بدل ولا ولا .. حط دي حلقة في ودنك ماتنسهاش أبدااا . "
- الحال مشتق و جامد
من المعلومات اللي بتبقي غلط عند كتير ... ان الحال بييجي مشتق بس ... و ما ينفعش ييجي جامد أبدا ... دا مش صح خالص .. طالما كلمة بتدي معني الوصف ...تبقي ينفع تيجي حال ونعت الخ الخ و تتعامل معاملة الصفة عادي .. فما تستبعدش ان كلمة تكون حال او نعت عشان هي جامدة و مش مشتقة لأن ده غلط .... أمثلة ( طلع القمر بدرا ) ... بدرا هنا حال لأنها بمعني مكتملا ..... ( أحب الجندي أسداً في المعركة ) ... أسدا حال لأنها بمعني شجاعا .
- معلومات سريعة
- من أغلب الكلمات اللي بتكون حال (جميعا – معا – قاطبة – كافة – طوعا - سويا – وحد+ضمير ـ أولا ـ ثانيا ـ عامة ـ عمدا – فجأة – بغتة - خطأ ـ سهوا- عوضا ).
- جميعا حال .... أجمعين توكيد.
- ( جاء الرسول للناس كافة ) .... كافة حال منصوب بالفتحة ..... أما ( جاء الرسول للناس كافتهم ) ..... كافتهم: كافة توكيد مجرور بالكسرة .. و هم ضمير مبني في محل جر مضاف إليه .
- معا : حال منصوب بالفتحة ... مع : ظرف منصوب بالفتحة .
- من أهم الكلمات اللي بتتعرب حال ... كلمة ( وحده – وحدك – وحدهم .... الخ الخ ) : وحد حال منصوب بالفتحة .. والضمير مبني في محل مضاف إليه

[احلام جميلة]

أسلوب النداء

- النداء .. يعني ايه نداء ؟ ... النداء هو انك تدعو حاجة عشان تفولها جملة ... الحاجة اللي ناديت عليها دي هي المنادى ... و الجملة اللي انت عايز تقولها دي اسمها جملة جواب النداء و جملة جواب النداء من الجمل اللي ليس لها محل من الاعراب .
- بكدة نقدر نقول إن :-
1- المنادى : هو اللي انت وجهت ليه دعوة أو ببساطة ناديته .
2- جملة جواب النداء : هي الجملة اللي انت عايز تقولها للمنادى .. و زي ما قلنا جملة جواب النداء لا محل لها من الاعراب
دي حاجات لازم تبقي عارفها و فاهمها مقدما قبل ما نبدأ ... يلا بقي نبدأ بسم الله .
- مكونات أسلوب النداء :
أسلوب النداء بيتكون من تلات حاجات :-
1- أداة النداء . 2- المنادى . 3- جملة جواب النداء .
- نتكلم عن كل مكون لوحده :-
1- أداة النداء : أداة بتسبق المنادى بتتلخص في ( يا و أخواتها ) .. هم ستة حروف ( يا - الهمزة – أي - أيا - هيا – وا ) .
بنستخدم ( أي – الهمزة ) لنداء القريب .... أما ( أيا – هيا ) لنداء البعيد .
و بنستخدم ( يا ) لنداء القريب و البعيد ...و بنسخدم ( وا ) في الندبة ... الندبة دا أسلوب هندرسه بشكل خاص بعدين .
- المنادى : قلنا هو اللي انت وجهت ليه دعوة أو ببساطة ناديته .
- أنواع المنادى :-
1- منادى مضاف :- دا بيبقي المنادى منصوب .. وبييجي بعد المنادى مضاف اليه .. ( يا طالبي العلم , وفقكم الله ) - ( يا محب الخير , أقبل ) - ( يا مدرسات المدرسة , اشرحن الدروس جيدا ) ... الإعراب :- ( طالبي ) منادى مضاف منصوب بالياء .. ( محب ) منادى منصوب بالفتحة ... ( مدرسات ) منادى منصوب بالكسرة .
2- منادى شبيه بالمضاف :- هنا بردو بيبقي المنادى منصوب .. زي ( يا طالبين العلم , وفقكم الله ) – ( يا محبا ً الخبر , أقبل ) – ( يا ساعيات في الخير , جزاكن الله كل خير ) ... الإعراب :- ( طالبين ) منادى منصوب بالياء ... ( محبا ) منادى منصوب بالفتحة ... ( ساعيات ) منادى منصوب بالكسرة .
3- منادى نكرة غير مقصودة :- المنادى هنا منصوب بردو... بيبقي زي ( يا مصريين , وفقكم الله ) - ( يا عاملا , أتقن عملك ) ..... الإعراب :- ( مصريين ) منادي منصوب بالياء .. ( ) منادى منصوب بالفتحة .
4- منادي نكرة مقصودة :- المنادي هنا بيبقي مبني علي علامة رفعه في محل نصب ... زي ( يا مصريون , وفقكم الله ) – ( يا عامل , أتقن عملك ) – ( يا ولدان , أديا واجبكما ) .. الإعراب :- ( مصريون ) منادي مبني علي الواو في محل نصب .. ( عامل ) مناددى مبني على الضم في محل نصب .. ( ولدان ) منادى مبني على الألف في محل نصب
5-منادى علم مفرد :- المنادى هنا عبارة اسم علم ( اسم شخص – مدينة – دولة .. الخ ) ... بيكون مبني علي علامة رفعه في محل نصب ... زي ( يا محمدان , اكتبا الدرس ) - ( يا مصر , سنجعلك أعظم دولة ) - ( يا محمدون , اتقوا الله ) .... ( محمدان ) منادى مبني على الألف في محل نصب .. ( مصر ) منادى مبني على الضم في محل نصب ... ( محمدون ) منادى مبني على الواو في محل نصب .
- في كتير منكم بيحتار ازاي يفرق بين ( النكرة الغير مقصودة ) و ( الشبيه بالمضاف ) ... بص يا زيدي .. المنادى الشبيه بالمضاف لازم بييجي بعده ( فاعل – نائب فاعل – مفعول به – شبه جملة ) وبعد الحاجات دول ييجي بقي جملة جواب النداء زي ( يا جميلا شكله , لا تغتر ) – ( يا مذموما خلقه , اتق ربك ) – ( يا طالبا العلم , أطع معلمك ) – ( يا ساعيا في الخير , جُزيت خيرا ) ... أما النكرة الغير مقصودة ما بيبقاش فيه فاصل بينها و بين جملة جواب النداء .. [ و لو جه فاصل بيبقي نعت و ده قليل و مش في منهجك ] ... فالنكرة الغير مقصودة هتبقي زي ( يا جميلا , لا تغتر ) – ( يا مذموما , اتق ربك ) – ( يا طالبا , أطع معلمك ) – ( يا ساعيا , جزيت خيرا ) .
- نداء ما فيه ( ال )
لو جينا ننادي كلمة ( الرجل – المعلم – الطالب ) مش هينفع نقول (يا الرجل – يا المعلم – يا الطالب )
لأن النطق رخم .. أكيد حسيت ده .. عشان كدة بنناديهم بعد ( يا أيها ) أو ( يا هذا أو أيهذا ) فبقينا نقول ( يا أيها الرجل ) – ( يا أيها المعلم ) – ( يا هذا الطالب ) .
- إعراب ( يا أيها الطالب , اجتهد )
( يا ) حرف نداء لا محل له .. ( أيها ) أي منادي مبني علي الضم .. الهاء للتنبيه لا محل لها .. ( الطالب ) نعت مرفوع بالضمة ... ( اجتهد ) فعل أمر مبني على السكون و الفاعل ضمير مستتر تقديره أنت .. وجملة جواب النداء ( اجتهد ) لا محل لها .
- الكلمة بعد ( يا ايها – يا هذا ) .. الأصل انها لو كانت الكلمة مشتقة تبقي نعت او بدل و النعت أقوى .. لو كانت الكلمة جامدة تبقي نعت أو بدل و البدل أقوى ... و في اختلاف على ده كبير ,, وده كان أفضل الأراء .
- لكن اللي في منهجك أن أي كلمة بعد ( أيها – أيهذا أو يا هذا ) تبقي نعت مرفوع .
- كام ملحوظة بقى :-
1- نوع المنادي في ( يا أيها – يا هذا – أيهذا ) نكرة مقصودة و بيكون اعراب ( أيها – هذا ) منادى مبني على الضم في محل نصب
2- ( أيهذا ) هي هي ( يا هذا ) بس قبل اسم الاشارة ( هذا ) .. مرة استخدمنا أداة النداء ( يا ) فبقت ( يا هذا ) ..و مرة استخدمنا أداة النداء ( أي ) فبقت ( أيهذا ) .. وبكدة يبقي اعراب ( أيهذا ) أي حرف نداء لا محل له .. ( هذا ) اسم اشارة مبني ع الضمة المقدرة في محل نصب منادى .
- حذف أداة النداء
الأصل في أداة النداء إنها تكون موجودة .. بس أحيانا بيتم حذفها لأسباب بلاغية .. و ده بيكثر في بداية الجمل و القطع . ( أبنائي الأعزاء عليكم واجب مقدس ..... الخ ) – ( شباب الوطن , بلدكم في حاجة إليكم ... الخ ) ( أيها الطلاب الأعزاء , اجتهدوا تفلحوا ...... الخ ) وهكذا ... كلمات ( أبنائي – شباب ) منادي مضاف منصوب بالفتحة ... ( أيها ) منادى مبني على الضم في محل نصب و الهاء للتنبيه .
ملحوظة :-
1 - نحن أيها العرب نسعى الي التقدم ... اعراب ( أيها ) أي اسم مبني على الضم في محل نصب مفعول به لفعل محذوف تقديره أخص ... و الهاء للتنبيه .
2- البعض بيقول ما احنا ممكن نقدر أداة نداء محذوفة هنا اصل الجملة مثلا ( نحن يا أيها العرب نسعى إلي التقدم ) .. و كدة يبقي الاعراب ( أيها ) : منادى مبني على الضم في محل نصب و الهاء للتنبيه ... الاعراب ده صحيح ماشي .. بس الرأي اللي قلناه في ( 1 ) أقوى .. و الرأي اللي في ( 1 ) هو اللي في منهجك .
3- من ( 1 ) و ( 2 ) نقدر نحط قاعدة بس دي بالنسبة لمنهجك بس .. " لا يمكن تقدير أن أداة نداء محذوفة اذا سبق المنادي المفترض ضمير مخاطب أو متكلم و يكون اعراب المنادى المفترض حينها مختصا . " .
ركز ع القاعدة اللي في ( 3 ) جدا عشان ما تغلطش في منهجك .. و يلا نشوف تدريب عليها :-
1- ما أجملكما أحمد و محمد ... ما إعراب ( أحمد ) ؟
الاجابة
( أحمد ) مفعول به لفعل محذوف تقديره اخص ... لأن ( أحمد ) جت بعد ضمير مخاطب ( كما ) في كلمة ( أجملكما ) .. جت بعد ضمير مخاطب بيعود عليها ... تبقي اسم مختص ونعربها مفعول به منصوب بالفتحة لفعل محذوف تقديره أخص .
ملحوظة :- الضمير ( كما ) في ( ما أجملكما ) بيتعرب مفعول به بردو بس دا لأسلوب التعجب .. و الضمير ( كما ) هو المتعجب منه .. أما ( أحمد ) هو الاسم المخصوص .. ركز ع دي عشان هتفيدك جدا في الاستخراجات
.................................................. .................................................. ..............................
2- ما أجملهما أحمد و محمد ... ما إعراب ( أحمد ) ؟
) أحمد ) بدل منصوب بالفتحة ... أحمد جت بعد ضمير غائب ( هما ) ما جتش بعد ضمير مخاطب ما ينفعش ( أحمد ) تبققي اسم مختص كدة صح ؟ اااه ... يبقى الاعراب الصحيح بدل منصوب بالفتحة ... كمان ينفع نحط ( أحمد و محمد ) مكان الضمير ( هما ) ويفضل المعني الثابت ( ما أجمل أحمد و محمد ) فتبقي بدل ... بدل مطابق تفصيل بعد إجمال ... مش بعض من كل
.................................................. .................................................. ...............................
3- ما أجملكما أنتما .... ما إعراب ( أنتما )
أنتما ضمير مبني في محل نصب توكيد .. جت بعد ضمير مخاطب ( كما ) و ( أنتما ) ضمير مخاطب بردو صح ؟ اه ! يعني ضمير مخاطب اتكرر مرتين ورا بعض تبقي توكيد لفظي بس كدة
- نتكلم بقى عن ( بَنىَّ ) و أمثالها .
1- يا بني , اجتهد في دروسك .
2- يا بني , اجتهدوا في دروسكم .
تعالي نعرب ( بني ) كدة :-
1- ( بني ) منادي مضاف منصوب بالفتحة .. و ياء المتكلم مبنية في محل جر مضاف اليه ..... منادي مضاف ؟! .. هي مش نكرة مقصودة ؟! اه مش نكرة مقصودة .. ( يا بني ) هي هي يا ابني ... و كمان ياء المتكلم اللي في الاخر مضاف اليه .. اضافة دي و لا مش اضافة يا متعلمين يا بتوع المدارس ؟ .. يبقي المنادى هنا مضاف .
2- ( بني ) منادي مضاف منصوب بالياء لأنه ملحق بجمع المذكر السالم .. و ياء المتكلم في محل جر مضاف إليه ... هي ( بني ) جمع ؟ احلف كدة طيب ؟ ههههههههه اه و الله العظيم جمع جمع .. طب بقت بني ازاي ؟ .. هقولك ركز معايا يا زيدي .. عارف كلمة ( بنين ) .. ضيفها لياء المتكلم كدة ... تبقي ( بنيني )... طب نحذف النون للإضافة تبقي ( بنيي ) ... اليائين هيبقوا حرف واحد مشدد فهتبقي ( بَنيَّ ) .. والاعراب ( بَنيَّ ) منادى مضاف منصوب بالياء .. وياء المتكلم في محل جر مضاف إليه .
و من الاخر كدة اللي يهمك هو ده
بُني بضم الباء .. كلمة مفرد مضافة لياء المتكلم .
بَنيَّ بفتح الياء .. كلمة ملحقة بجمع المذكر مضافة لياء .
ما إعراب ( بني) في :-
1- يا بني ، اجتهد . .... بني : منادي مضاف منصوب بالفتحة والياء في محل جر مضاف اليه .
2- يا بني ، اجتهدوا .... بني : منادي مضاف منصوب بالياء وياء المتكلم في محل جر مضاف اليه .
و طبعا التشكيل بيبان من السؤال مش بيدهولك .

بس كدة خلصنا .. اشوفكم في الدرس الجاي
سلام عليكم .

[احلام جميلة]

أسئلة على الصغيران مهمة

بالضد تظهر الأشياء " . وضح لماذا أكثر الكاتب من مطابقاته في هذا النص ؟
جـ : أكثر الكاتب من مطابقاته في هذا النص ؛ ليبرز مدى معاناة الطفلين الشديدة ، ولبيان حاجتهما للرعاية ، ولتوضيح دور المجتمع الهام في نبذ وترك الإهمال في معاملة الأطفال . ما المرحلة التي يمثلها الكاتب في تطور النثر ؟
جـ : يمثل النص مرحلة الازدهار في تطور النثر الحديث من حيث اتساع الأغراض ، والعناية بالفكرة ، وحيوية اللفظ والتحرر من الصنعة ، وروعة التصوير ، وواقعية الموضوع .
س9 : بم يمتاز الخيال عند الرافعي ؟
جـ : يمتاز الخيال عند الرافعي بالعذوبة والجمال وقوة العاطفة والدقة في وضع الصورة في المكان المناسب ، ويميل فيه إلى الابتكار مثل قوله : [المنازِلَ عن يمينِهِ وشمالِهِ أطفالٌ مذعورةٌ ] ، ويظهر في صوره أثر الثقافة الدينية الواضحة مثل قوله : [يا من لا إله إلا هو] وقوله : [وكانت لها هيئة أم وضعت الجنة تحت قدميها] ، كما أن في صوره تأثر بالقدماءمثل قوله : [ويتلفَتَّانِ كما تتَلَفَّتُ الشاةُ الضالَّةُ عن قطيعِها] ، وفي بعض الأحيان نجد الغموض في بعض صوره مثل قوله : [ارتفع سواد مقبل كأنه روح ليلة مظلمة ] .

[رفيقة الامل]

هو جمع سوداء اسودة
ولا غلط

[student 8]