تيران وصنافير موضوع سياسي لطرح الآراء

[المصري أشرف]

أعلم إن في حلقك الغصه التي في حلوقنا جميعا بعد المؤتمر
الإقتصادي ومذكرات التفاهم التي ملأت أدراج المكاتب ولم
تفعل حتي تاريخه .. ونحتسبها جميعا في طي النسيان
لكن تلك الزياره من الملك سلمان بهذا الكم من الحضور
والإتفاقيات المباشره مع الشركات المنفذه وأرجو ملاحظه
ذلك إن الإتفاقات ليست مع الحكومه بل مع شركات التنفيذ
ولاحظ ذلك في إتفاقات الإسكات وشركات لم نكن نسمع
بها من قبل .. ربنا ييسر الأمور ويصلح الأحوال إن شاء الله
شكرا للمرور الكريم أستاذ / رضا الجوهري

[المصري أشرف]

أرجو من الساده المشرفين عدم نقل الموضوع من قسم قضايا سياسيه
لكونه موضوع سياسي في المقام الأول وأطرح الموضوع للنقاش العام
لأراء أعلم أنها خبيره تتسم بالعقل والإتزان .. لتوضيح الموضوع أمام
فكر غض مازال يتكون من شباب يحتاج نقل الخبره ممن هم مثلنا
في هذا المنتدي وكامل شكري وتقديري لحضراتكم ..
تيران وصنافير .. من زاويه أخري لم تطرق
***************************
كلنا قرأنا آراء مع أو ضد تحديد هويه الجزيرتان .. لكني أبتعد قليلا
بزاويه لم يتطرق إليها أحد .. وهي هدم الحلم الإسرائيلي
( دوله إسرائيل من النيل للفرات )
أليس فرض السيطره المصريه السعوديه علي المضيق والجزيرتان
هما هدم للمشروع الإسرائيلي ببعض المعاونات العربيه في فتح
معبر وميناء من البحر المتوسط للبحر للأحمر .. عن طريق خليج العقبه
مرورا بمضيق تيران الذي تستغل إسرائيل وقوعه تحت سيطره القوات
الدوليه بسيناء نظرا لعدم وضوح الهويه لتلك الجزر .. أليس في وضع
العسكريه المصريه بخبراتها علي مدي التاريخ والأمكانيات الماديه
السعوديه في تطوير تلك القدرات العسكريه هي مكسب كبير
تتضائل ( مع أهميته ) معه هويه تلك الجزر الغير مأهوله
لوأد الحلم الصهيوني التوسعي وتحجيم هذا الكيان

.
.

[المصري أشرف]

المشاركة الأصلية كتبت بواسطة المصري أشرف

http://www.misr5.com/550528/%D8%AC%D...A%D9%8A%D8%B1/

وثيقه جمال حمدان التي يقر بملكيه السعوديه للجزر

-------------------------------------------------

[الفيلسوف]

نيويورك تايمز: "تيران" و"صنافير" سعوديتان.. الصحيفة الأمريكية تنشر وثيقة تؤكد الحقيقة التاريخية بانتقال الجزيرتين إلى السيطرة المصرية عام 1950.. وإسرائيل حذرت من إعادتهما فى عام 1982

http://www.youm7.com/story/2016/4/11...5#.VwxQF9QrJkg

[الفيلسوف]

بالصورة.. محمد البرادعى: تيران وصنافر جزر سعودية

http://www.el-balad.com/2133709

[محمد المصرى0]

عار على الحكومه

[المصري أشرف]

المشاركة الأصلية كتبت بواسطة محمد المصرى0

عار على الحكومه

----------------------------------------------

المشاركة الأصلية كتبت بواسطة المصري أشرف

من المتوقع إنه في تلك الفتره .. سيمرح الخرفان قليلا

[المصري أشرف]

شكرا علي الإضافات الأستاذ الكريم / الفيلسوف

[المصري أشرف]

عارف يعنى إييه جسر برى بين مصر والسعودية !!؟؟ ... انا اقولك يعنى إييه ... بغض النظر عن كل التحليلات وكلام الخبراء اللى قالوا كلام صح ومحترم جداً بجد .. ومع توجيه الشكر لكل معترض سواء كان إعلامى أو نخبوى أو شخص عادى ، تجاوز النقطة دى ببساطة ومر عليها مرور الكرام ، وكأن مصر والسعودية بيتكلموا عن إنشاء كوبرى مشاه فى كفر جوة مركز تابع لمحافظة من محافظات الصعيد الجوانى !!!
-

جسر برى بين مصر والسعودية بيعدى فوق بحر مفتوح يعنى رفع مستوى العلاقات بين البلدين لمستوى غير مسبوق تصل لدرجة التوأمة ، مع زيادة عملية التبادل التجارى بين البلدين بدرجة من الصعب توقعها فى الوقت الحالى !

-

جسر برى بين مصر والسعودية .. فى سابقة لم تحدث من قبل هو دحض وتكذيب لكل المهاترات والأكاذيب عن سوء العلاقات بين مصر والسعودية والخلافات اللى بينهم فى بعض الملفات ، واللى أكدتها كلمة الرئيس السيسى فى حضور خادم الحرمين الشريفين اثناء توقيع الإتفاقيات الإقتصادية ، لما قال إنه فيه توافق فى الرؤى بين مصر والسعودية فيما يخص الملفات الأمنية فى المنطقة زى الملف الليبى واليمنى والسورى ... !! الملف السووووووورى يا إسمك إييه انت .. هه !؟
-

جسر برى بين مصر والسعودية .. يعنى ربط حركة التجارة العالمية بمليارات الدولارت بين قارتين ، وتكون سيناء هى محور هذا الربط ... وخليكم فاكرين إن المؤتمر الإقتصادى إتعمل فى شرم الشيخ .. ومؤتمر الكوميسا إتعمل مرتين برضوا فى شرم الشيخ فى سنتين متتاليتين ... يعنى الفكرة ماكانتش وليدة اللحظة .. لكن الربط الإقتصادى للدول الأفريقية بسيناء شغال من فترة .. وهو ده سبب مشروعات تعمير سيناء ، وإمدادات المياه لسيناء ، ومدينة الإسماعيلية الجديدة وتطوير طريق السويس اللى شغال على قدم وساق ، والأنفاق اللى تحت القناة اللى إتعملت فعلا واللى لسة بتتعمل وهــ تخلص فى خلال سنة ونص .. ألخ ألخ !!

-

جسر برى بين مصر والسعودية .. يعنى تدفق سياحى أسبوعى ودائم من كل دول الخليج .. يعنى إنتعاش سياحى لسيناء .. يعنى تدفق نقدى للعملة الصعبة .. يعنى فنادق ومنتجعات سياحية بتشتغل .. يعنى فرص عمل لقطاع كبير من المصريين من أول العامل الى بيشتغل فى المصنع اللى بــ يورّد زجاجات المياه المعدنية .. لغاية الموظف اللى بيشتغل فى الفندق .. وبين العامل ده والموظف ده ، حلقة كبيرة وسلسلة من فرص العمل فى كافة القطاعات زى القطاع الإستثمارى وقطاع البنوك وقطاع الصناعات الصغيرة والقطاع العقارى ألخ ألخ ألخ .. وحط فى إعتبارك إنه فيه 2 مليون سائح سعودى بيروحوا البحرين سنوياً عن طريق الجسر البرى اللى بين البلدين !!

-

جسر برى بين مصر والسعودية .. يعنى دعم بشكل مباشر للمنطقة اللوجيستية فى محور التنمية فى منطقة قناة السويس ، وبالتالى تحويل محور التنمية وبالتبعية طبعا كل مدن القناة إلى ما يشبه سنغافورة كمنطقة تجارية لوجيستية بسبب تكامل حركة السفن العالمية مع حركة التجارة البرية الدولية

-

جسر برى بين مصر والسعودية .. يعنى قلب للصورة الأمنية ومخطط إسرائيل الكبرى وبدل ما يتم حصارك عن طريق مخطط الربيع العبرى ، إنت النهاردة بتعكس الأية وبتعمل حركة إلتفاف خلف خطوط العدو .. لأ وكمان بتحمى سيناء بالتنمية الإقتصادية والتجارية وبناء مجتمعات عمرانية من أى تهديد مستقبلى بإجتياح سيناء أو ما شابه ذلك .. يعنى من الأخر كدة .. مصر بتحمى المجال الحيوى بتاعها واللى بيتعمل ده مالوش معنى غير إن الساحة بيتم إعدادها "لحرب محتملة".. أو بتتحضر لتلافي حرب محتملة... والإختيار التانى هو الأرجح بكل المقاييس !

-

جسر برى بين مصر والسعودية .. يعنى مصر تتحكم فى الملاحة فى خليج العقبة ومضيق تيران بشكل كامل واللى يعتبر ممر استراتيجي حيوي في نطاق المجال الحيوي للأمن القومي الإسرائيلي و ده فى حد ذاته تهديد للأمن القومى الإسرائيلى

-

جسر برى بين مصر والسعودية .. مع حجم التدفقات الإستثمارية ، ومشاريع النهوض بالإقتصاد القومى ، كل ده يتيح لمصر الفرصة للخروج من شرنقة الإقتصاد الريعى القائم على عوائد السياحة وقناة السويس فقط .. لأن الحاجات دى هــ تبقى جزء من الإقتصاد المصرى الكلى .. وليس كل الإقتصاد المصرى .. وهناك فرق !!

-

جسر برى بين مصر والسعودية مع حزمة المشروعات الإستثمارية ، هو فائدة إقتصادية للسعودية مبنية على نتاج عوائد الإستثمار المرتفعة فى مصر .. وفى نفس الوقت رسالة قوية للغرب جائت فى وقتها تماما بإن السعودية مش هــ تسيب مصر تقع ، وخصوصا مع تنامى الدعاوى بفرض عقوبات إقتصادية من جانب الإتحاد الأوروبى .. وكمان إن السعودية بتتجه لعدم الإعتماد على مدخلات النفط فقط .. يعنى هــ تضربلى سعر البترول .. مش مهم .. أنا عندى عوائد إستثمارية فى مصر !!

-

أصدقاؤنا ..
الجسر البرى بين مصر والسعودية مش مجرد كوبرى هــ يتم إنشائه بين بلدين .. لكن ده مشروع إستراتيجى كامل متكامل يترتب عليه نتائج سياسية وإقتصادية لها مردود عنيف على السياسات الدولية فى منطقة الشرق الأوسط !!

-

وعلشان نبرز الصورة بشكل كامل ، خلّونا نقول إن مخطط إفشال المشروع بدأ من إمبارح بالفعل بمجرد الإعلان عنه .. وإنتشار الحديث عن تنازل مصر عن جزيرتى تيران وصنافير لصالح السعودية واللى هم أصلا جزر سعودية تقع فى المياه الإقليمية السعودية ولكن تحت السيادة المصرية فى وجود القوات الدولية ، لأن الجزيرتين تخضعان لإتفاقية السلام كامب ديفيد .. فــ بلاش نمشى وراء هذا الهراء الفكرى (ومن الممكن إستبدال حرف الهاء فى كلمة الهراء الفكرى بحرف الخاء على فكرة) .. لأن موضوع ان الجزيرتين مصريتين او سعوديتين ده موضوع محسوم من تاريخ تأسيس المملكة من سنين طويلة .. أما خضوع الجزيرتين للسيطرة أو للسيادة المصرية فــ بيرجع لسنة 1950 .. يعنى من ايام الملك فاروق ... وهناك فارق كبير بين ملكية الأرض وبين السيادة على الأرض !!

-

لان لو كان لدوله حق الاداره علي ارض في فتره زمنيه .... بيتيح للدوله المطالبه بحق سيادتها عليها .... يبقي المفروض مصر تطالب بحقها في غزه .... و تبقي حلايب و شلاتين سودانيه مش مصريه ... بس اللى ميعرفش يقول عدس

-

وعلى فكرة .. الخبراء اللى بــ يحاولوا يبيعولنا فكرة ضياع الجزيرتين من ارض مصر ... همّ همّ نفس الخبراء اللى ماكناش ليهم صوت في توزيع عطايا المأسوف علي شبابه مرسي العياط و هو بــ يبقشش علي السودان بحلايب .... و رفح و العريش لحماس .. و همّ همّ برضوا اللى كانوا موافقين علي قرار تسميه محور قناه السويس بــ اقليم قناه السويس التابع للرياسة مباشرة و تتصرف بها كما تشاء و ليس لأحد الحق مراجعتها .. و همّ همّ اللى كانوا موافقين علي تحويل أصول مصر بما فيها قناة السويس و ماسبيروا و باقي اصول الدولة الى صكوك تمهيداً لبيعها .. و هم هم اللى شككوا في قدرة الحكومة علي جمع 8 مليار دولار لحفر قناه السويس و تنميه محورها .. و همّ همّ اللى شككوا و قالوا ان القناه القديمه هــ تنهار و كل خبراء الجيولوجيا في العالم بيحذروا مصر .. و همّ همّ اللى قالوا استحالة القناة تتعمل من أصله .. و همّ همّ اللى قالوا إن الدولة مش هــ تعرف أصلا تسدد اول دفعة من فوايد شهادات القناة .. و همّ همّ اللى دلوقتي صعبان عليهم جزيرتين أصلا سعوديتين ..

-

وناهينا طبعا عن خبراء الأحياء المائية والبحرية والكونية المريخية اللى هــ يطلعوا يتكلموا عن خطورة إنشاء الجسر البرى ده وتأثيره على البيئة والأحياء البحرية والجوية والملوخية اللى بالتقلية .. و ده طبعا كله مقدمات لأى ردود أفعال دولية فى الفترة القادمة .. لأنهم مش ممكن يسيبوا مصر تفلت من تحت إيديهم .. أو تهدد البيبى بتاعهم فى المنطقة ... وخصوصاً إن المشروع ده مش هــ يتم بين يوم وليلة !!

-

القصة مش سهلة وهــ يدخل فيها أطراف كتيرة زى أميريكا وإيران وتركيا وطبعا السعودية ومصر ... والموضوع هــ يتم محاربته بجنون لأن إسرائيل مش هــ تسمح بتهديد المجال الأمنى الحيوى بتاعها .. بس مصر قدها وقدود .. وكل ما بيتم الترتيب لمصر بحاجة ... مصر بترد ب*** وبطعنة فى الصميم ، .. و ده اللى شوفناه بوضوح فى زيارة الملك سلمان لمصر .. و زى ما قولنا قبل كدة إذا كان اللعب أصبح على المكشوف ، وإذا كانت الحرب هى حرب بقاء .. فــ إحنا للمرة المليون قدها وقدود بإذن الله
.

#‏تحيا_مصر
#‏لن_ينطفىء_نور_مصر
#‏مصر_أم_الدنيا_وهتبقى_قد_الدنيا
#‏مصر_قلب_النظام_العالمى_الجديد
#‏تحيا_مصر_ماحدش_تانى
#‏السيسي_صاين_أرضه
#‏الشعب_يدعم_الرئيس
#‏كلام_في_الصميم

.

[Mr. Bayoumy Ghreeb]

تسلم ايد اللي كتب و اللي نقل هذا المقال

[aymaan noor]

جزيل الشكر والتقدير لحضرتك على هذا المجهود القيم

تم دمج موضوعات حضرتك الخاصة بجزيرتى تيران و صنافير

فى موضوع واحد منعا للتشتت و تيسيرا على الأعضاء للمتابعة

جزاك الله خيرا و بارك الله فيك