دفعة ثانوية عامة 2016

[Duke Tefa]

المشاركة الأصلية كتبت بواسطة شرف الزملكاوى14

السلام عليكم
انا دفعة 2015 اللى قبلكم ( لو لسه فاكرنى يعنى "انا كنت معاكم هنا فى اول السنة" ) وأحب فى الظروف العصيبة اللى تمر فيها الثانوية العامة الايام دى انى احكيلكم تجربتى فى الموضوع ده علشان تطمنوا كده ان شاء الله وتبقوا مرتاحين.. وانا اسف والله انى هطول عليكم (الكلام ده خصوصا للناس اللى حاسة انها متأخرة كتير او مذاكرتش حاجة او معدش وقت والكلام ده )

انا الحقيقة كنت بادىء السنة مجتهد وكده ( وده حال تقريبا معظم الطلبة بيبقوا داخلين متحفزين وكده ) .. يعنى تقريبا لحد شهر 12 كده .ومن اول الشهر ده والله مريت باصعب 3 شهور فى حياتى شهر 12 و 1 و 2 .. تقريبا مذاكرتش فيها حاجة .. حصلت ظروف كتير يعنى بارادتى وخارجة عن اردتى .. المهم فجأة لقيت نفسى فى شهر 3 ( يعنى بالظبط من سنة ) لا عارف حاجة ولا ذاكرت حاجة واللى ذاكرته نسيته .. فيعتبر لو بدأت هبدأ من الصفر .. لكنى الحمد لله مستسلمتش واصريت انى هذاكر مهما حصل لانى لو استسلمت مثلا فميش امل خاالص اما لو حاولت فلسه امل .. وقربت من ربنا كتيييير فى الشهور دى وبقيت بدعى ربنا والله فى كل الاوقات وخصوصا فى وقت السحر .. اخر ساعة فى يوم الجمعة (قبل الغروب) .. م الاخر فى كل الاوقااات .. وبجد والله لازم تعرف ( إن الله على كل شىء قدير ) .. احنا ممكن نعرفها معنى اه .. انما واقع والله لازم نبقى موقنين بيها .. المهم علشان مطولش عليكم .. عملت اللى عليا ف الـ 3 شهور دول وانا ثقة فى الله .. والله فى النتيجة ربنا اكرمنى بمجموع لم اكن اتخيله .. الحمد لله

فبالنسبة بقى للناس اللى كانت مقصرة او مذاكرتش جزء او اى حاجة .. انت والله لو بدأت من الوقتى وعملت اللى عليك فى الايام الجاية دى .. بفضل الله تقدر تحقق اللى انت عاوزه

وفى الاخر كده ,, حط الكلام اللى جاى ده فى قلبك
- أنا عند ظن عبدى بى
- قال ابن القيم والله لو هم أحدكم بإزالة جبل وهو واثق بالله لأزله
وانصحك تسمع الفيديو ده (ان شاء الله هيريحك كتير )
https://www.youtube.com/watch?v=qcyYp_6lCBE

بالطبع فاكرينك يا دكتور وانت في حد ينساك
وجزاك الله كل خير