النقل بين المحافظات،، هل يحتاج لتدخل الأمم المتحدة؟؟

[أبو إنجى]

لا تستغرب من العنوان يا عزيزي ،، إقرأ الموضوع وستعلم أن العنوان صحيح!!!!!


معلم أول ثانوي تخصص لغة إنجليزية،،، (((اللى هو أنا )))تعيين 1999
- المحافظة المعين بها ((الجيزة))،،، المنشأ والأصل والسكن ابا عن جدا(( القليوبية))
-ايه اللى وداني هناك،،، التوزيع أيام الجنزوري والعمل بقانون(( اللي مش عاجبه يسيبها لغيره))
- مرت السنوات وكبرنا وولادنا كبروا،، والحاجة الوحيدة اللى ما بتكبرش المرتب،، 1650 جنيه،،،تخيلوا
-كل ما نحاول ننقل ونرجع لبلدنا ونعيش وسط ولادنا يقولوا يوجد عجز،، ونقعد سنة ورا سنة
-شهر 6 اللى فات عملت طلب النقل كالمعتاد وربنا سهل ومشي لأول مرة لحد ما وصل الوزارة.
-بعد شهر من وصوله بالسلامة لتنسيق الإعدادي والثانوي بالوزارة رحت اسأل(( ها هارجع بلدي)) قالوا لأ يا حبيبي ترجع ازاي هي لعبة،، هو انت من المرضي عنهم أصحاب الوساطات والمحسوبيات،،،، لازم يطلع عين أبوك وعين اللى جابوك،،، وبرده مش هاتنقل!!!!!!! ليه يا جماعة،،، قالوا لازم الجيزة تتنازل عن الدرجة أو القليوبية توفر لك درجة،،،،طيب هو دا شغلي!!!! قالوا لا طبعا بس إحنا بنقولك على الطريق المختصر علشان تخلص نفسك!!!!!!!!!! طيب ودا عند مين!!! قالوا السادة المحافظين!!!! ههههههه بقى أنا هاعرف أول للمحافظ،، دا أنا ما أقدرش أوصل لمدير الادارة بتاعنا إلا بطلوع الروح!!!!!!!!!!
-عملت نفسي أبو العريف،، قلت يا واد سيبك منهم ،، أحنا فى عصر الديمقراطية والثورات وحقوق الانسان والكلام العسل دا،،،،،دخلت على النت وهاتك يا شكاوى(( لوزير التعليم - للتنظيم والادارة - لمجلس الوزراء - لرئيس الجمهورية)) وانا مالى إيدي انهم هاينقلوني في ساعتها،،،، وتمر الايام والاسابيع والشهور،،، واقصي رد على الشكوى هو (( تم استلام الشكوى)) وبعدها لا حياة لمن تنادي!!!!!!

-قعدت اسأل كل اللى اقابله ،،، ناس قالت لى روح للتنظيم والادارة وقدم طلب علىى استمارة 23د،، دورت عليها قالو مش موجودة،، والنقل حسب الدرجة،،، وناس قالت لو لك واسطة فى التنظيم والادارة هاينقلك!!
-وناس بتقوللي شوف حد من اللى بيشرب شاي بالياسمين وهاينقلك!!!!

-لما أكون عمري 40 سنة،، وعندي 4 أولاد،، ومرتبي 1650 جنيه،، ومافيش دروس،، دروس ايه وانا بطلع من بيتي 5 صباحا علشان ألحق المدرسة وبرجع المغرب 140 كيلو متر ذهابا وإيابا،،،تقدروا تقولولي أعمل أيه!!!!؟؟؟؟؟؟

قولولي بس أعمل أية؟؟؟ أروح أعتصم في مكتب الوزير ،، ولا أروح أموت نفسي قدام مكتبه وخلاص ولا أعمل أيةّّّّ؟؟؟؟ أنا مستعد أعمل أي حاجة والله؟؟؟؟
أروح للأمم المتحدة ولا مجلس الأمن ؟؟؟؟حتي دول أوصلهم ازاي؟؟؟؟

ولو قلنا بلدنا عايمة على بحر من الكوسة والفساد والمحسوبيات بيزعلوا!!!!

[Nasr Fouad]

شوف بدل
واحد يكون من الجيزة و متعين في محافظتك و على نفس درجتك و ده ممكن يتم عن طريق المنتدى هنا او الفيس او اي منتدى اخر
نحاول نتصرف بدل ما نقعد نولول بكلام ما لوش لازمة و على فكرة الكوسة موجودة اه لكن عدد الشرفاء اضعاف اضعاف بتوع الكوسة
الا اذا كان كل هدفنا تشويه البلد و اللي فيها دا يبقى موضوع تاني!!!!

[machmach]

المحافظين فى كل محافظة همة الى منعين نقل الدرجات زى ميكون ورسوهاعن اهليهم لية يلعبوا فى ارزاق الناس ربنا يدههم على بيعملوة فى الناس

[عمران جابر مهني]

كلامك سليم انا نفس مشكلتك من 2009 وان نقل من الفيوم الي المنيا بدون درجة ولفيت علي كل الوزارات بدون فايدة

[أبو إنجى]

المشاركة الأصلية كتبت بواسطة nasr fouad

شوف بدل
واحد يكون من الجيزة و متعين في محافظتك و على نفس درجتك و ده ممكن يتم عن طريق المنتدى هنا او الفيس او اي منتدى اخر

لحد هنا وكلامك كويس ومعقول
أيه لازمة الحتة الجاية دي بقي،،، وليه تغلط وتقول ((نولول))،،، والحتة الوطنية بقي وسمعني نشيد بلادي بلادي!!!!
يا حبيبي لو انت بتعاني اللي انا بعانية ماديا ونفسيا وجسديا،،، ما كنتش هاتكتب حرف واحد ،، بس اللى ايده فى المية!!!!!!!
نحاول نتصرف بدل ما نقعد نولول بكلام ما لوش لازمة و على فكرة الكوسة موجودة اه لكن عدد الشرفاء اضعاف اضعاف بتوع الكوسة
الا اذا كان كل هدفنا تشويه البلد و اللي فيها دا يبقى موضوع تاني!!!!

ياريت يا استاذ ناصر تبقي تحط نفسك مكان اللى بيتكلم وتقدر حجم المشكلة وبعدين ترد،،، وتختار الكلام المناسب مش نولول ونشوه البلد و........هكذا ,,,كل سنة وانت طيب بمناسبة عيد الاضحي

[أبو إنجى]

المشاركة الأصلية كتبت بواسطة عمران جابر مهني

كلامك سليم انا نفس مشكلتك من 2009 وان نقل من الفيوم الي المنيا بدون درجة ولفيت علي كل الوزارات بدون فايدة

حاجة تجنن والله يا مستر عمران،،،، نعمل أية بس

[عمران جابر مهني]

المشاركة الأصلية كتبت بواسطة أبو إنجى

حاجة تجنن والله يا مستر عمران،،،، نعمل أية بس

يا ريت لما ربنا يفرجها بحل تتصل بيا مع خالص الشكر

[Nasr Fouad]

كل عام وانتم بخير بمناسبة عيد الاضحى المبارك نسأل الله عز وجل ان يعيده علينا وعليكم وعلى الامة الاسلامية بالخير والبركات

[Nasr Fouad]

المشاركة الأصلية كتبت بواسطة أبو إنجى

ياريت يا استاذ ناصر تبقي تحط نفسك مكان اللى بيتكلم وتقدر حجم المشكلة وبعدين ترد،،، وتختار الكلام المناسب مش نولول ونشوه البلد و........هكذا ,,,كل سنة وانت طيب بمناسبة عيد الاضحي

معلش سامحني انا كنت متحامل عليك شوية لان استفذتني عبارة ( بلدنا عايمة على بحر من الكوسة )
مرة تانية باكرر اسفي و كل عام و انتم بخير

[machmach]

نفسى حد يقول الحل اية وبلاش الكلام الى ملوش لزمة عاوز كلام مفيد حل يعنى

[Nasr Fouad]

المشاركة الأصلية كتبت بواسطة machmach

نفسى حد يقول الحل اية وبلاش الكلام الى ملوش لزمة عاوز كلام مفيد حل يعنى

يا اخي ما قلنا تشوف بديل من المحافظة اللي بتعمل فيها و بيعمل في محافظتك و يكون على نفس درجتك و دا ممكن تتعرف عليه عن طريق المنتدى هنا او الفيس او اي منتدى اخر
ما فيش حل غير كده
نقول كمان تشوف بديل..................
كويس كده ولا نقول تاني ؟؟!!