الثانويه العامه بين النصائح والواقع هام جدا

[lolododo2010]

السلام عليكم ورحمه الله وبركاته

انا اختكم الكبيره رايحه رابعه طب بشري وكذا بنت طلبت نصائح فحبيت بدل ما يكون الموضوع ع الخاص فالفيس بوك اني اعملكم موضوع بحيث اكبر عدد من الطلبه يشوفه ويستفاد انا ليا موضوع تاني كنت عملاه من 3 سنين اول ما دخلت الكليه وكنت خارجه ليسه من الثانويه العامه بس انا كنت نظام الثانوي قديم كنت متكلمه عن افضل الكتب وطرق المزاكره وكده فلو حد حب يشوفه يشوفه ولكني لا اعرف مدي افادته الان بعد تغير نظام الثانويه الي نظام العام الواحد
نبدأ موضوعنا الجديد بقي علي بركه الله

الكلام ده موجه لاي طالب او طالبه داخله تالته ثانوي عام ركزوا معايا كويس وياريت تعملوه ملف ورد وتحطوه ع الديسكتوب ولما العزيمه تقل افتحوه تاني واقروا الكلام وارجعوا لحماستكم مره تانيه

1- مبدئيا كده خلينا متفقين ان الكلام النظري مهما طلع او نزل هو كلام نظري ونسبه تنفيذه فالواقع اكيد مش هتبقي بنفس نسبه قوله لان احنا واحنا بنفذ الكلام المجرد بتتداخل عوامل اخري نفسيه واجتماعيه ويوميه الواقع المتغير يوميا بياثر علي انتاجيه الفرد بمعني انتي النهارده تعبانه صحيا مزاكرتك ممكن تقل او تكاد تنعدم فمتعلقيش لنفسك حبل المشنقه ساعتها !!! كل يوم بظروفه صحتك قويه بتذاكري كويس انتاجيتك كويسه طرئت عليكي ظروف وادائك قل متستسلميش لفكره انا فشلت انا خلاص مجهودي ضاع الكلام ده لا يسمن ولا يغني من جوع اعرفي ان الانتاج يتناسب علاقه طرديه مع كل العوامل والظروف اللي بتمري بيها

2- وكمان اولياء الامور الله يكرمكم بلاش تعملوا ضغط عصبي علي اولادكم ففتره الثانويه العامه واولياء الامور فالنقطه دي بينقسموا كذا قسم النوع الاول : وده اللي بيبقي واضع امال كبيره جدا علي ابنه ده جميل بس وظف ده صح مينفعش تحمله فوق طاقته 24 ساعه وتقعد تفكره بالثانويه العامه وبلاش تهولهاله وكانه مسجون فيها شجعه بدل ما تخوفه وتبقي انت ضغط عليه عصبي ونفسي

2: نوع بيقارن ابن عمك دخل طب بنت عمتك جابت 99 فالميه عايزك تفوقهم وتعديهم وتبدأ تقارن بينه وبينهم وتبقي عايزه كده وتتلاشي من قدام عنيك مستوي ابنك

3: نوع بيخوف ويهول وخلاص من غير دعم نفسي

4: نوع بيطنش ابنه تماما

5: النوع الافضل هو انك تابع ابنك شجعه لما عزيمته تقل ماتقارنوش بحد حاول تقويه وتقنعه انه قدها وانها مش نهايه المطاف ساعده تابع اكله ومزاكرته وعلاقاته ابعده عن اصدقاء السوء والمشتتات ادعم ابنك بكل السبل ومتحسسوش انه فمصيبه حسسه انها سنه زي اي سنه بس لو اجتهد فيها شويه هيرسم مصيره ومستقبله حتي لو انت خايف وقلقان متظهرش ده عليك المفروض انه يستمد قوته من قوتك

3- قبل ما نتكلم عن نصائح دراسيه فيه نقطه كتير من الطلبه بيفتقدوها يقولك هو انا هقدر اجيب المجموع الفلاني انا قدراتي قليله انا كنت بجيب المجموع الفلاني وكلام محبط اصلا بيبدأ بيه سنته اولا السنه دي انت حساباتك متصفره يعني دي سنه مش تراكميه ومجموعك هيبقي علي حسب اداءك فالسنه دي وبس فصفر الاعدادات بتاعه نفسك انك اللي هتزرعه هتحصده

4- نقطه كمان مش مظبوطه معاكم هي نقطه انكم بتحملوا نفسكم فوق طاقتها يعني بالجداول الهلاميه اللي بتبقي حاطين فاليوم نقط لو بقدرتك الاستعابيه انت فالواقع زي ما قلت الواقع يفرق عن الكلام النظري هتخلصها فاسبوع فقدامك حل من اتنين يا تعمل جدول عقلاني واقعي حسب قدرتك انت ويومك انت ووقتك انت بتنظيم وترضي حتي لو نفذت 50 الميه منه او انك ماتعملش جدول من الاساس وتمشي كل يوم بظروفه بس باداره واعيه وتنظيم انا كنت بعمل النقطه التانيه لاني كنت بحس ان الجدول ما هو الا سور وعائق عملته لنفسي نفسيا حتي اصاب بالاعاقه النفسيه ومقدرش انجز حاجه من الاخر متحملش نفسك فوق طاقتها وكل واحد عارف اخره ايه وقدراته اليوميه ايه وطاقته الاستيعابيه

5/ لو هتعمل جدول بلاش الله يكرمك تقعد انت وصاحبك فقاعده تانيب ضمير تعملوا جدول ثنائي قدرتك غير قدرته وظروفك غير ظروفه كمان بلااااااااااااااش المزاكره الثنائيه افشل نظام ع الاطلاق انك تزاكر مع حد صحيح العمل الجماعي رائع ولكن ليس بمصر ولا علي المزاكره من وجهه نظري الطلاب عقليتهم ليسه صغيره وفيها شويه انانيه يعني يبقي صاحبك ولما تجيب احسن منه يزعل !!! حتي لو نفسيته سليمه الرغي وتضييع الوقت وخروجات الاصحاب والفاجعه الكبري الاحباط النفسي المتبادل !! فيستحسن يبقي علاقتك مع صحابك فحدود المعقول حد محتاج معونتك فشرح او حاجه وانت باستطاعتك خلاص ساعده وربنا هيعينك لكن تروح درسك وترجع علي بيتك من غير تضييع وقت ولا تركن علي ما ترجع من الدرس ساعتين ولا تضيع وقت قبل الدرس

6/ تنظيم الوقت ده اغلي شئ بقدر المستطاع زي ما قلنا ماتنظرش الي المثاليه فيضيع منك الواقع !!! يعني حاول ميعديش عليك يوم متكونش مزاكر فيه وكل طالب وطبيعته فيه اللي بيحب يزاكر الماده اللي صابح عليه درس فيها (انا كنت كده ) فيه اللي بيقسم اليوم علي

كل ماده فيه اللي بيزاكر فاليوم مادتين كل واحد واللي يناسبه وزي ما الملابس زوقي غير زوقك فالمزاكره اللي بيريحني غير اللي بيريحك ولكن يبقي هدفك الاخير هو الإتقان

7/ من اول السنه اسأل من هم اكبر منك فمنطقتك عن افضل المدرسين المشهود لهم بحسن الشرح والمتابعه ( قلت الافضل ولم اقل الأشهر !!!! ) لان ممكن مدرس يبقي مشهور ويبقي همه مادي انت بالنسبه له ال 80 ولا 100 جنيه ومالوش دعوه انت تجيب ايه

انا كنت من اوائل مدرستي بفضل الله وروحت لمدرسين من المدرسه مشهود لهم باتقان عملهم صحباتي استغربوا ازاي منزلش الاماكن للمدرسين المشهورين علي نطاق الجمهوريه وبيروحلهم بالالاف لكن بفضل الله ربنا كرمني فالثانويه العامه بالمدرسين دول بيتابعوني اكتر من بنتهم حليت مش فاهمه نقطه معينه تصحيح كل اخطائي كنت بالنسبه ليهم كائن متكامل الابعاد مش مجرد كرسي او 100 جنيه زيي زي اللي هيجيب 1 فالماده ومش هيزاكر !! والحمدلله مجموعي فاق المائه بالمائه فمش شرط تروح للاشهر ولكن روح للي مشهود عنه بالاتقان والمتابعه

8/ خلاص روحت لمدرس كويس ظبطت وقتك دروس مدرسه (حسب نظام كل عام ومستجداته تستطيع اداره وقتك ) ناتي لنقطه المزاكره انت مش محتاج القدرات الخرافيه وعصاه الساحر حتي تحصل علي اعلي الدرجات انت لو بس زاكرت مزاكرتك العاديه بتاعت كل سنه بس من غير وهم الخوف والاحباط والرهبه الغير مفسره الا انك بتحطم نفسك هتجيب مجموع عالي جدا انا كنت صاحبه مبدأ ايه فرق امتحانات الثانويه العامه عن الاعداديه ما الاتنين شهادتين الفرق انت والجبال والعوائق النفسيه اللي بتحطها علي نفسك والخوف الغير مبرر

زاكر مزاكرتك العاديه زود مجهودك قدر المستطاع بس ياريت الحماسه الزائده اول العام متضيعكش كتييييير جدا بدأوا عامهم زي المتسابق الفاشل فسباق الجري بيبدأ باقصي سرعه وفالاخر ايه النتيجه مجهوده بينعدم وبيخسر !! لكن المتسابق الشاطر هو اللي بيبدأ سباقه بقدره معقوله وبيزود سرعته فالاخر فبيكسب بالطبع

يعني اهم حاجه المزاكره اول باول باتقان وقبل الامتحانات ب 3 اشهر زود مجهودك كما تريد ان تصل فيه اللي عايز طب وفيه اللي عايز معهد.. ده هيبذل مجهود وده هيبذل مجهود كما تريد ان تحصد ازرع مش معقول هتزرع شوك وتحصد ورد !!!

9/ اهتم بحياتك اليوميه متعدده الاركان يعني صلاتك وردك من القران (بركه وتوفيق الله اهم من كل ما سبق فاحرص علي طاعه الله بشتي الطرق ) تضرع الي الله بالدعاء بدلا من غلطه فادحه تضيع الاف الطلاب وهو انهم عندما يتسلل الخوف الي قلوبهم تجدهم يلجأون الي س و ص وع ول لطلب النصائح ويضيعون الوقت الكثيييير في مقابل انهم كان من الممكن انهم يصلوا ركعتين ويلجأوا لربنا يقروا قران ويشحنوا روحانيتهم وطاقتهم . نومك لازم يكون مظبوط ومعتدل من 6 الي 8 ساعات . الاكل لازم يكون صحي وبلاش اكل بره (سموم بتقلل التركيز ) وطبعا لما دخلت الطب عرفت ان فيه طلبه بتلجأ لبرشام وحقن عشان تسهر او تزود التركيز وعرفنا مدي ضررها وانها بتدمر الطالب ده صحيا وبتبقي شبه الادمان انه تركيزه مابيجيش الا عليها وشويه شويه متنفعوش وتضره اوعوا تلجأوا ليها نهائيا الشاي والقهوه بقدر انهم مضريين وبيعملوا انيميا لكن احسن من البرشام والحاجات دي !!! حذار

10/ لو فاكر انك هتسجن نفسك فسجن الثانويه العامه هتجيب الفول مارك تبقي غلطان لما طاقتك تقل متقولش انا فاااااااااااااشل وتبدأ طريق الفشل بعينه كل واحد عامل زي البطاريه لما بتستخدم بتفضي ولازم تنشحن اشحن بطاريتك سواء روحانيا او افصل يوم واخرج او حتي يا سيدي افصل يوم من المزاكره ونام اعمل اي شئ انت بتحبه يشحن طاقتك (ولكن حذاري ان تتمادي وتنحدر الي تضييع الوقت بحجه انا برفه عن نفسي او باخد وقت فري ) لا مانع انك لو من النوع اللي بيزهق تخلي ساعه او ما شابه رياضه فيه ناس الجزء الفري بتاعها نوم كل واحد واللي بيحبه المهم ما تضغطش علي نفسك قوي عشان متجيش فالاخر وتخسر زي المتسابق الفاشل اللي اتكلمنا عنه فوق

11/ صحابك متضيعش وقتك معاهم خروج وفسح او مزاكره ثنائيه او تسمع لشريط الاحباطات بتاعهم لو حد قالك انا مزاكرتش قوله ربنا يعينك وغير الموضوع وخلي بالك من النقطه دي كويس مزاكرتك متطلعش سرها بره مبقولكش كون اناني لو حد عايز مساعدتك ساعده لكن لا ضرر ولا ضرار سر مزاكرتك مع نفسك وبس انت قائد نفسك

12/ ابعد عن السلبيات والخوف قدر المستطاع ومتقللش من قدراتك قدام نفسك انت عندك عقل وخلايا عصبيه زي اللي هيطلع الاول بالظبط بس الفرق فحسن الاداره والاستغلال

13/ ابذل قصاري جهدك او حتي فوق جهدك بس تيقن ان اللي ربنا كاتبهولك هيكون واللي هيكون هيكون افضل شئ ليك فارض بما قسم الله لك

14/ الكليه مش نهايه الكون فيه اللي بيحلم بطب وربنا عارف انه لو دخلها ممكن يموت ناس او يبقي فاشل او اهله ميقدروش علي مصاريفها ايا كان السبب ارض باللي ربنا هيكتبهولك واقنع بيه واعرف انه اكيد الافضل وايا كانت الكليه اللي هتخشها حاول تكون افضل واحد فيها بمزاكرتك ومجهودك

15/ فيه ناس بتبقي مقطعه نفسها مزاكره طول العام وتيجي يحصلها ظروف او تمرض فالاخر والعكس صحيح فتجيب درجات عكس المتوقع كله بمشيئه الله توكل علي الله ولا تتواكل

واخيرا يارب اكون قدرت اغطي كل النقط اللي انتوا محتاجينها

وادعولي بالتوفيق ... فاعوامي الدراسيه الجايه واني اكون دكتوره صالحه ربنا ينفع بيا الناس

ربنا يحقق لكل واحد حلمه

[امل رافت محمد حسين]

ربنا يكرمك ياااااااااااااارب
بس ممكن تكلمينا ع الكتب والمذاكرة والمراجعه وطرقهم ازاى ؟؟؟؟

[lolododo2010]

المشاركة الأصلية كتبت بواسطة امل رافت محمد حسين

ربنا يكرمك ياااااااااااااارب
بس ممكن تكلمينا ع الكتب والمذاكرة والمراجعه وطرقهم ازاى ؟؟؟؟

بالنسبه للكتب والمزاكره هحاول ابعتلك لينك الموضوع اللي انا كنت كاتباه اول ما خلصت الثانوي لكن لو تقصدي اساليب المزاكره وكده ممكن اكتبلكم أي استفسار انتوا عايزينه
هل ينفع احط لينك الموضوع القديم هنا ولا لا ؟!

[lolododo2010]

معرفتش ابعتهولك خاص ده لينك الموضوع القديم للافاده
http://www.thanwya.com/vb/showthread...69#post4732069

[مى 147]

بجد روعه شكرا ربنا يكرمك

[lolododo2010]

المشاركة الأصلية كتبت بواسطة nana 33

بجد روعه شكرا ربنا يكرمك

ويكرمكوا جميعا ان شاء الله

[رفيقة الامل]

المشاركة الأصلية كتبت بواسطة lolododo2010

معرفتش ابعتهولك خاص ده لينك الموضوع القديم للافاده
http://www.thanwya.com/vb/showthread...69#post4732069

الف شكررررررررررررررررررررررررررر جدااااااااااااااااااااااااااااااا يادوك
ربنا يجازيكى خيييييييييييييييييييييييير

[lolododo2010]

المشاركة الأصلية كتبت بواسطة رفيقة الامل

الف شكررررررررررررررررررررررررررر جدااااااااااااااااااااااااااااااا يادوك
ربنا يجازيكى خيييييييييييييييييييييييير

لا شكر علي واجب أي سؤال انا فالخدمه سواء علي الرسائل الخاصه او فالموضوع او الفيس بوك
بالتوفيق

[Duke Tefa]

جزاكي الله كل خير

[ران نيتشان]

جزاكى ربي خيراا ...يارب نكون زيك وافضل يارب انا ومن يتمنى ذالك

[smsmzeros]

حمد الله عالسلامه يا دوك

موضوع قيم جدا ومفيد
جزاكم الله خيرا

[lolododo2010]

المشاركة الأصلية كتبت بواسطة ران نيتشان

جزاكى ربي خيراا ...يارب نكون زيك وافضل يارب انا ومن يتمنى ذالك

ربنا يوفقكم ويحققلكم كل احلامكم اتعبوا عشان توصلوا لحلمكم وهتوصلوله ان شاء الله

[lolododo2010]

المشاركة الأصلية كتبت بواسطة smsmzeros

حمد الله عالسلامه يا دوك

موضوع قيم جدا ومفيد
جزاكم الله خيرا

الله يسلمك يارب يفيد كل طالب وربنا يعينهم جميعا