مبادرة اعرف حقك-الترقية من معلم لمعلم أول - من الآخر-د.عبدالرحمن المنياوي

[الاستاذ:ايمن]

المشاركة الأصلية كتبت بواسطة د.عبدالرحمن المنياوي

مبادرة اعرف حقك
الترقية من معلم لمعلم أول - من الآخر
#د_عبدالرحمن_المنياوي
--------------------------------------------

كثر الكلام واللغط في الحكاية دي والناس معاها حق وكتير جدا بيستشهد بحالات مشابهة وبصراحة الأكاديمية والوزارة في القصة دي بالذات تحدت المنطق والواقع وكسرت كل المعايير .. وعشان أنا كنت من أوائل الناس اللي عاشت القصة دي من كام سنة بسبب أحقيتي بدري للترقية بحكم إني حاصل على الماجستير ثم الدكتوراة .. وتواصلت مع الوزارة والأكاديمية لدرجة إن الوزير السابق بعت مستشاره مخصوص للمنيا عشان مشكلتي ومجلس الوزراء خاطب المديرية عندنا والوزارة عشان الحل .. وفي النهاية تأخرت ترقيتي بسبب تعليمات غير منطقية سببها عدم التنسيق بين الأكاديمية والوزارة والمحافظات ..

وعشان أحل اللغط وأشرح أسباب المشكلة دي لازم أوضح بعض الأمور الهامة:

قانون الكادر 155 لسنة 2007 والمعدل بالقانون 93 لسنة 2012 مسح خالص موضوع الدرجات المالية (الثالثة والثانية وخلافه) واستبدلها بالدرجات الوظيفية (معلم مساعد ومعلم ومعلم أول وهكذا) .. وبكده يبقى مفيش حاجة اسمها درجات مالية للمعلمين وده كلام نهائي .. والوزير في البيان الرسمي الأخير أكد ده .. طيب أمال ايه حكاية الدرجات المالية والناس اللي بتترقى على تاريخ الدرجة والأحكام القضائية والكلام اللي بيتقال لنا في المديريات التعليمية؟ الموضوع بسيط جدا .. قبل تطبيق الكادر كان المعلمين بينطبق عليهم موضوع الدرجات المالية ودول اللي تم تعيينهم أصلا على القانون 47 ودول اسمهم (المعلمين القدامى) وكل من كان على درجة مالية كان لازم يترقى على حساب نظام الكادر الجديد .. وده سبب رسوب وظيفي لناس كتير والوزارة مع الأكاديمية بدأت تحاول تحل مشكلة الرسوب الوظيفي ولو بشكل لم يرض الكثيرين بس المهم كانت خطتها إنها تنهي مشكلة الترقية على الدرجات المالية للمعلمين المترقون حتى 2009 وده اللي خلى الأكاديمية تتعامل مع الترقية وفقاً للحصول على درجة المالية حتى مرحلة الترقيالت بالعام السابق والتي اشترطت حصول المعلم على الدرجة المالية في 2009 ماعدا الثالثة يكون حصل عليها في 2007 ..

تبقى لهم مشكلة إن فيه ناس من المعلمين القدامى حصلت على آخر ترقية لها وفقاً للكادر في 2010 ودول عددهم لا يتجاوز أصابع اليدين في كل إدارة تعليمية فقررت الأكاديمية هذا الشهر ترقيتهم بمعنى أنها مرحلة ترقية استثنائية .. تفصل بين المعلمين الذين تم تعيينهم على القانون 47 (القدامى) وبين المعلمين الذين تم تعيينهم على القانون 155 (الجدد) ..

طيب مين هم (المعلمين الجدد) ؟ دول المعلمين اللي اتعينوا على قانون الكادر 155 يعني اللي بدأوا حياتهم في وظيفة معلم مساعد .. طيب ودول بيتعاملوا معاملة الدرجات المالية ؟ المفروض لا طبعا داحنا كادر خاص زي الجامعة كده معيد ومدرس مساعد ومدرس وأستاذ مساعد وأستاذ متقدرش تسأل المدرس المساعد درجته المالية ايه .. أمال ليه جاتنا درجات مالية واصبح تاريخ التعيين بتاريخ الدرجة والكلام ده ؟؟ أقول لك السبب ببساطة .. التنظيم والإدارة وده الجهة اللي بتصدر الدرجات المالية ماكانش عندها من 2007 توضيح وظيفي محدد لوظائف المعلمين .. وموضوع المعلمين القدامى ودرجاتهم عمل عندها لغط كبير .. لأن التنظيم والإدارة مصدرة للوزارة درجات مالية مش وظيفية والوزارة لما بتعين حد جديد بتبعت للتنظيم والإدارة تطلب درجات مالية مش وظيفية وده الخطأ اللي سبب اللغط الكبير .. لأن الجامعة لما بتطلي تعيين حد بتطلب من التنظيم والإدارة درجات وظيفية مثلا نطلب 100 درجات مدرس مساعد و200 درجة معيد ..

طيب مين اللي بيرشح وبيطلب جوه كل إدارة ؟ ج: الموظفين الإداريين اللي لغاية انهارده مش فاهمين الفرق بين الدرجة الوظيفية والدرجة المالية وتلاقي كل موظف له فهمه الخاص للقانون ومحدش اجتمع على تفسير واضح لقانون 155 ناس تقول هتترقوا بعد 8 سنوات من الثالثة وناس تقولك 6 وناس 5 عشان قانون 155 وناس تقول لأ 5 من الكادر وناس لأ 8 من الكادر .. والحالة بقت قرف .. وده اللي خلى محافظات كتير تعلن ضم فترة المعلم المساعد لتاريخ الدرجة المالية ومحافظات رفضت الضم ده وناس كتير رفعت قضايا ضم مدة وكسبتها والأحكام بقى ألزمت كتير من المديريات بالضم .. وكل الناس دي كان هدفها الترقية مش الأقدمية .. وللأسف الأكاديمية ركنت كل ده على جنب لأنها لم تكن صريحة منذ البداية ..

طيب إيه رأي الأكاديمية في المعلمين الجدد وترقيتهم ؟ ج: المعلمين الجدد واللي بنسميهم بمعلمي القرارات 53 و 74 و 244 و 280 وهكذا دول معلمين تعينوا على قانون الكادر ومافيش لهم ترقيات على أساس الدرجة المالية .. ترقيتهم بتتحسب من بعد مرور 5 سنوات على دخول الكادر لوظيفة معلم يعني بعد 5 سنوات من 2011 وبكده فإن الأكاديمية ستشرع بترقية هؤلاء المعلمين في مراحل الترقيات بالعام المقبل 2016 .. وليس كما كانت تفعل مع المعلمين القدامي بإدخالهم مرحلة الترقيات على أساس الدرجة المالية ..
يعني من السنة دي محدش هيكتبلك في صحيفتك درجة مالية ولا هيتعامل معاك بالدرجة المالية تاني .. بس الموضوع هياخد وقت لغاية ما الإداريين ومسئولوا الإحصاء بالمديريات يفهموا ..

طيب ليه فيه ناس من المعلمين الجدد هيدخلوا ترقيات دلوقت ؟؟ ج: اللي هيدخل من المعلمين الجدد ترقيات حالياً هم المعلمين الحاصلين على ماجستير ودكتوراة أثناء الخدمة لأن القانون بيسمح لهم بالترقية بدري عن زمايلهم سنة للماجستير وسنتين للدكتوراة .. ودول عندهم مشكلة برضه حيث أن حملة الدكتوراة منهم هيستفيدوا بسنة واحدة بس للتخفيض ده أما السنة التانية فدي هيحاربوا بقى عشان يحصلوا عليها الترقية الجاية من معلم أول لمعلم أول أ ..

طيب ليه فيه ناس اتحركت لرفع قضايا وناس كان ليهم مواقف محترمة للضم وتعميمه بدون قضايا مثل النقابة المستقلة بالجيزة وعلى رأسها المحترم أ.شعبان إبراهيم ؟؟ الناس دي تعبت وحاربت لأن الأكاديمية كانت بترقي بالدرجة المالية وماكانتش واضحة في تصرفاتها ومفهمه الناس ليه بترقي بالدرجة المالية .. والناس بعد ماجابت أحكام وحصلت على قرارات ضم .. الأكاديمية طلعت تقول معلش أصل انا كنت بارقي القدامى وانتوا مش مخاطبين بالترقية دي .. احنا خلاص هنبتدي نمشي صح ونرقي بالكادر والدرجات الوظيفية ..

طيب وأحكام الضم عملت لنا ايه وسنين الجيش والخدمة العامة وكل ده ؟؟ كل ده رسمياً انضم لفترة المعلم المساعد وتحتسب لك أقدمية في المعاش والتأمينات وفلوس الدرجة المالية .. لكن انت كمعلم جديد محكومة ترقيتك بمرور 5 سنوات من معلم .. وبكده فإن احتساب فترة المعلم المساعد من عدمها وضمها هي وسنين الحصة أصبح غير ذي جدوى في الترقية إلا في بعض الحالات النادرة اللي القاضي استغل عك الأكاديمية والوزارة وقال في حكمه على أن يتضمن الضم الترقية ..

طيب واحنا نعمل ايه دلوقت ؟؟ ولا حاجة الأكاديمية والوزارة كانت سبب في رسوب وظيفي لآلاف المعلمين قبلك بالـ5 والـ10 سنوات والموضوع عدّى .. وانت لم يحدث لك رسوب بل تم تطبيق القانون بشكل صحيح معك .. قانون الكادر اللي انت اتعينت عليه .. بالمناسبة أنا مش بادافع عن الأكاديمية والوزارة أنا باقولكم بس خدوا بالكوا إن ترقيتكم المفروض تبقى السنة الجاية .. لاحسن الأكاديمية تطلع في دماغها إنها تأخركوا سنة او اثنين وساعتها هتعرف يعني ايه ظلم الرسوب الوظيفي ..

أتمنى إن الموضوع يكون أفادكم وغطى حالة اللغط اللي عندكوا ..

#د_عبدالرحمن_المنياوي

بارك الله فيك على هذا التوضيح و كل الكلام اللى حضرتك قلته تمام ومظبوط وانا اتطلعت عليه قبل كده وفاهم القصة دى
لكن عندنا فى اسيوط امتحنا كادر المعلمين فى عام 2009 وظهرت النتيجة وتم تغيير وظيفتنا على الكادر من معلم مساعد الى معلم فى 1/4/2010 والكلام ده قبل ما يطلع قرار التثبيت ولكن لم نصرف بدل معلم على الكادر الا فى 2011 لكن صرفناه باثر رجعى من 1/4/2010 معنى كده اننا على درجة معلم من ذلك التاريخ بغض النظر عن قرار الدرجة المالية لذلك عند فتح باب الترقى لهذا العام وجدنا اسماءنا على موقع الاكاديمية بكل مدرسة وبالتالى تم ملء البيانات وطباعة كشوف مستحقين الترقى وعند الذهاب للادارة قامت ادارة الاحصاء بالادارة بتغيير تاريخ الحصول على معلم ليتمشى مع تاريخ التثبيت لكل الدفعة صاحبة قرار 53 فهل لسه فاكرين دلوقتى يغيروا تاريخ الحصول على معلم بعد 5 سنوات من الحصول عليه ؟؟؟؟!!!
ولذلك فقد قام بعض المعلمين بارسال فاكس للمديرية والوزارة للشكوى من هذا التغيير

[tareksmssms]

ح[size="7"]حاصل على الدرجة الثانية فى 1/7/2010 ثم معلم اول فى 11/2011 المفروض على كلام حضرتك يادكتور استحق الترقية لانى من المعلمين القدامى
لكن للاسف لم يدرج اسمى واخرين فى الترقية هذا العام
ارجو التوضيح وماذا نفعل للحصول على حقنا
[/size]

[sirnon]

لو سمحت انا الان على درجة معلم طبقا للقرار 423 الصارد فى " تاريخ القرار" 11/11/2013
وضميت سنة جيش و اصبح تاريخ السريان 22/9/2010
امتى من حقى الترقى من معلم الى معلم أول
مرفق صورة من الصيحفة الالكترونية.

وشكرا لحضرتك

[د.عبدالرحمن المنياوي]

المشاركة الأصلية كتبت بواسطة sirnon

لو سمحت انا الان على درجة معلم طبقا للقرار 423 الصارد فى " تاريخ القرار" 11/11/2013
وضميت سنة جيش و اصبح تاريخ السريان 22/9/2010
امتى من حقى الترقى من معلم الى معلم أول
مرفق صورة من الصيحفة الالكترونية.

وشكرا لحضرتك

تترقى على معلم أول بعد مرور 5 سنوات من ترقيتك على معلم .. يعني في 2018 .. موضوع الدرجة لم يعد الفيصل في الترقيات ..

[sirnon]

المشاركة الأصلية كتبت بواسطة د.عبدالرحمن المنياوي

تترقى على معلم أول بعد مرور 5 سنوات من ترقيتك على معلم .. يعني في 2018 .. موضوع الدرجة لم يعد الفيصل في الترقيات ..

مشكور على مجهودك وتعبك

[د.عبدالرحمن المنياوي]

المشاركة الأصلية كتبت بواسطة tareksmssms

ح[size="7"]حاصل على الدرجة الثانية فى 1/7/2010 ثم معلم اول فى 11/2011 المفروض على كلام حضرتك يادكتور استحق الترقية لانى من المعلمين القدامى
لكن للاسف لم يدرج اسمى واخرين فى الترقية هذا العام
ارجو التوضيح وماذا نفعل للحصول على حقنا
[/size]

أخي المحترم المعلمين القدامى بيعاملوا معاملة خاصة عند دخولهم الكادر أول مرة فقط .. ولكن بعد دخولهم الكادر أصبح يسري عليهم القانون 155 المعدل بالقانون 93 .. وهو الترقية بعد مرور 5 سنوات على الوظيفة الأدنى ..