كل ماتريد ان تعرفه عن كلية العلوم ومقرراتها واقسامها ومجالات شغلها ودراستها اللع

[MOHMAED _ 2010]

هام لطلبة الثانوية العامة
****************************
البوست الشامل عن كلية العلوم ، كل ما تريد ان تعرفه عن كلية العلوم واقسامها وموادها ومجالات شغلها والدراسات العليا اللى ممكن تحضرها منها
****************************
اقسام كلية العلوم جامعة القاهرة: 24 قسم منهم 7 اقسام متاحة لطلبة علمى علوم فقط ، 8 اقسام متاحة لطلبة علمى رياضة فقط ، 9 اقسام مشتركة لطلبة علمى علوم ورياضة ، التخصص فيها بيكون من سنة تانية ، وطبعا فى اقسام بتحتاج تقدير عالى ، وقبل ما اتكلم علي الاقسام عاوز اقول انه فى سنه اولي بدرس 5 مواد اساسيه 3 منهم اجباري وهم ( رياضة - كيمياء - فيزياء).
ومادتين اختياري بيأهلوني للقسم اللي انا عايز ادخله في سنة تانيه وهم (فلك - جبر - احصاء - ميكانيكا - جافا - نبات - حيوان - حشرات - جيولوجيا - جيوفيزياء - بيوفيزياء - بيولوجي).
مواد اختياريه لطلبة عملي رياضه فقط (جبر - احصاء - ميكانيكا - جافا).
مواد اختياريه لطلبة علمي علوم فقط (حيوان - نبات - حشرات - بيولوجي - بيوفيزياء).
مواد اختياريه مشتركه لطلبة علمى علوم ورياضة (جيولوجيا - جيوفيزياء - فلك).
وبدرسهم فى الترم الاول 1 والترم التانى 2 يعني: (كيمياء 1) دى ترم اولى ، و (كيمياء 2) يعني كيمياء بتاعت الترم التانى وهكذا فى كل المواد الاجبارية ومعظم المواد الاختيارية.
ملحوظة: فى 4 مقررات اسمها متطلبات جامعة (انجلش + حقوق انسان + كمبيوتر + مادة رابعة اختيارية من المواد دى "ثقافة بيئية ، تاريخ وفلسفة ، مبادئ قانون ، مبادئ الإدارة والمحاسبة" ) ودول لازم تاخدهم فى اى سنة من الاربع سنين بس كنصيحة خدهم فى سنة أولى بتاخد 2 ترم أول و2 ترم تانى.
****************************
اولا: 8 اقسام لطلبة علمى رياضة فقط
****************************
1) علوم حاسب منفرد: بتاخد فى سنة اولى الترم الاول جبر واحصاء وفى والترم التانى جافا وميكانيكا بتدرس مبادئ البرمجة من النظم العددية والخوارزميات وخرائط التدفق ، المتغيرات والجمل ، وهيكليات التحكم: الجمل الشرطية (أدوات الربط والتعبيرات المنطقية والصيغ)، والحلقات ، الدوال و مكتبات الدوال. التكرارية. المصفوفات. المؤشرات و النصوص. الهياكل وشغلها واسع اوى فى الكمبيوتر والسوفت وير ورغم ان حاسبات و معلومات فيها سوفت وير ولكنها احسن لأنها بتدي المواد التطبيقيه في الواقع لكن في علوم حاسب بتاخد نظري كتير ولازم تاخد كورسات بره عشان تبقى كويس ، وشروطه: تختار جبر واحصاء ترم اول وجافا وميكانيكا ترم تانى وتنجح فى رياضة 2 وجافا ، ولو اتخرجت بتقدير عالى تقدر تاخد منحة iti بس اتاكد بردو ان موضوع المنحة ده لسه موجود ، وشغله: web developer, web designer, java developer, , mobile app developer, php and data base designer, etc ، مواده:http://sareg.sci.cu.edu.eg/pdfs/plans/27_3.pdf
****************************
2) رياضيات منفرد: يعني رياضه باحته وتطبيقية يعنى لو بتحب الرياضه جدا ادخله لكن انت كويس فيها مش بتحبها يبقي فكر فى حاجة بتحبها ، قسم الرياضيات تقريب الوحيد اللى عدد مقرراته يٌعتبر الأقل مقارنة بأقسام الكلية التانية ومعظم المواد اللى هتدرسها فى القسم مش صعبة ولكن بتتطلب بذل مجهود من الطالب و نسيان موضوع لم المنهج فى أخر شهر ده ، كل اللى بتتطلبه الرياضيات هو أن الطالب يكون مجتهد ، مش شرط يكون عبقرى زى آينشتين علشان يدرس رياضيات أو يستمتع بعلومها ، شغله: معامل الابحاث او تاخد سنتين تربيه وتبقي مدرس ، شروطه: تاخد جبر واحصاء وتنجح رياضة 2
مواده: http://sareg.sci.cu.edu.eg/pdfs/plans/27_1.pdf
****************************
3) رياضة/فيزياء: قسم خاص يدرس الرياضيات والفيزياء والتجارب والقوانين والعلاقات الرياضيه والدوائر الكهربائيه ، شغله: مدرس او في معامل الابحاث بس و شروطه اخد جبر و اختار ماده من (احصاء - فلك - جيولوجيا - جيوفيزياء)
مواده: http://sareg.sci.cu.edu.eg/pdfs/plans/27_14.pdf
****************************
4) رياضة/احصاء: نفس الكلام بس بتاخد نص دراستك رياضه ونصها التانى احصاء ، وشروطه: انجح رياضة 1 & 2
مواده: http://sareg.sci.cu.edu.eg/pdfs/plans/27_12.pdf
****************************
5) رياضة/علوم حاسب: نفس الكلام بس نص المواد من رياضه و نصها من علوم الحاسب ، شروطه: انجح فى رياضة 2 وجافا.
مواده: http://sareg.sci.cu.edu.eg/pdfs/plans/27_13.pdf
****************************
6) رياضه/فلك: بدرس مواد رياضه و مواد فلك و شغله في مصر في مرصد حلوان ، وشروطه: اختار وانجح جبر وفلك.
مواده: http://sareg.sci.cu.edu.eg/pdfs/plans/27_15.pdf
****************************
7) فلك منفرد: بتدرس تاريخ الفلك ، وأرصاد العين المجردة ، النظام الشمسي ، الظواهر الفلكية، حركات الكواكب والنجوم الظاهرية ، والحشود والنجوم وأنواعهم ، المادة بين النجمية ، والمجرات ، نشأة الكون بصفة عامة ، التعرف علي السماء ليلا ، خرائط النجوم ، الكواكب والكويكبات النجمية وطرق التعرف عليها وغيرها كتير ، وهى زي رياضه فلك و نفس المواد الاختياريه ونفس الشغل ، شروطه: النجاح فى فلك 1 & 2
مواده: http://sareg.sci.cu.edu.eg/pdfs/plans/27_8.pdf
****************************
8) فضاء منفرد: هو هو فلك منفرد ونفس الشروط والمواد الاختياريه بس الفرق ده فلك وده علوم جويه ، شروطه: النجاح فى فلك 1 & 2
مواده: http://sareg.sci.cu.edu.eg/pdfs/plans/27_9.pdf
****************************
ثانيا: 7 اقسام لطلبة علمي علوم فقط
****************************
9) كيمياء/كيمياء حيوي: بيدرس العمليات الحيويه في جسم الانسان زي البروتين والفيتامينات والكربوهيدرات والاحماض النوويه والانزيمات والهرمونات والاورام وشويه بسيطه كده في البيولوجي بتاع الخليه وعلم الوراثه و المناعه وتدرس فيها جميع التفاعلات الكميائيه الخاصه بالكائن الحى وجسم الانسان وتدرس فيها الكيمياء العلاجيه زى المسكنات وخافضات الحرارة ومضادات البكتيريا والفطريات والفيروسات والطفيليات وهى من اقوى الفروع فى الكمياء وتتخصه من بيولوجى ، وشغله: في معامل التحاليل وشركات الادوية والمستحضرات الطبية وغيرها ويستحسن تاخد دبلومه التحاليل الطبيه او دبلومة الكيميا الحيوية ، وشروطه: تختار ماده حيوان و ماده تانيه من (فلك - بيوفيزياء - جيولوجيا - جيوفيزياء - نبات - حشرات) و اجيب جيد في كيمياء 1 & 2 وتقدير عام جيد.
مواده: http://sareg.sci.cu.edu.eg/pdfs/plans/28_19.pdf
****************************
10) كيمياء/كيمياء ميكروبيولوجي: تدرس فيه كل فروع الكيمياء السابقة (حيويه وعضويه وتحليله وفزيائيه ) وايضا تدرس فيه كل فروع الميكروبيولوجى السابقة (البكتريا والفطريات والطحالب والفيروسات) وحياتها وكل حاجه و تأثير الميكروبيولوجي على الانسان والامراض اللي بيسببها والانزيمات والسموم الميكروبية والهرمونات النباتية ، وشغلها بقي موجود بردو في التحاليل وشركات الادويه وشركات الكيماويات ، وشروطه: لازم تاخد ماده نبات و ماده تانيه بقي من (فلك - بيوفيزياء - جيولوجيا - جيوفيزياء - حيوان - حشرات ) وانجح في نبات 1 & 2 وكيمياء 1 او 2
مواده: http://sareg.sci.cu.edu.eg/pdfs/plans/28_21.pdf
****************************
11) كيمياء/حيوان: يدرس ما يتعلق بالمملكه الحيوانيه وعلي رائسها الانسان فيدرس الفسيولوجى اي علم وظائف الاعضاء والامبريولوجى اي علم الاجنه والهيماتولوجى اي علم امراض الدم والسيريولوجى اي علم المناعه والاناتومى اي علم التشريح والباراسيتولوجى اي علم الطفيليات والبيولوجي بتاع الحيوان والفيسيولوجي وتشريح و الفقاريات و اللافقاريات وعلم الوراثه والانسجه والاجنه والمناعه ، وشغله: فى التحاليل الطبيه اذا حضر دراسات عليا في الطفيليات او في الهيماتولوجى اي امراض الدم وممكن يشتغل في اطفال الانابيب اذا حضر دراسات عليا في علم الاجنه وممكن يشتغل في اي مركز من مراكز البحوث المختلفه وغيرها و شركات الادوية وغيرها ، وشروطه: اني انجح حيوان واخد اى ماده تانيه من (فلك - بيوفيزياء - جيولوجيا - جيوفيزياء - نبات - حشرات).
مواده: http://sareg.sci.cu.edu.eg/pdfs/plans/28_22.pdf
****************************
12) كيمياء/نبات: يدرس كل ما يتعلق بالمملكه النباتيه بداية من تشريح النبات ومناعه وفسيولجى وسلوك وتقسيم و وراثه والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب وعلم الوراثه والشكل الظاهرى للنباتات مغطاة البذور، تركيب الزهرة، التلقيح والاخصاب وتكوين البذور، دورة حياة مغطاة البذور، البذور والإنبات، تركيب البذرة، العوامل التى تؤثر على الإنبات والتغيرات التى تحدث خلال الإنبات، نموذج لبذور وبادرات النباتات ذوات الفلقتين والفلقة الواحدة: الشكل الخارجى للنبات:نشأة الجذر ووظائفه - مناطق الجذر المختلفة وتحورات الجذر ، البراعم : نشأتها ووظيفتها وتركيبها) ، (نشأة الساق - الفرع - طبيعة التحورات) ، الأنواع المختلفة للاوراق ووظيفتها – توزيعها- الإفتراق الزاوى - تركيب الأوراق – التحورات) ، علم التشريح النباتى: تركيب الخلية النباتية . مكونات البروتوبلازم و مكونات الخلية غير البروتوبلازمية ، الجدارالخلوى ، النقر، الأنسجة النباتية ، الأنسجة الإنشائية، الأنسجة المستديمة، الأنسجة الوعائية المركبة ، وشغله: في معامل الابحاث والتحاليل وشركات الادويه وغيرهم ، وشروطه: تاخد نبات و ماده تانيه من (فلك - بيوفيزياء - جيولوجيا - جيوفيزياء - حيوان - حشرات).
مقرراته: http://sareg.sci.cu.edu.eg/pdfs/plans/28_20.pdf
****************************
13) كيمياء/حشرات: بدرس البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات و علم بيئه الحشرات و علم الطفيليات والوبائيات و لتحاليل الطفيليه والفيسيولوجي بتاع الحشرات ومكافحه الافات و لسيطره عليها والمناعه والميكروبيولوجي والباثولوجي للحشرات وعلم السموم الشكل الخارجى والداخلى والأداء الوظيفى للحشرة ، أنماط الحياة ، التأثيرات البيئية والدورة الفصلية ، أشكال التأثيرات المتبادلة فى الآهلات الحيوية المجموعات الهامة للحشرات (الجراد والصراصير، القمل، الذباب، الفراشات وأبو دقيق، الخنافس، الدبابير والنحل، البراغيث ) ، الحشرات النافعة ودورها فى تلقيح النباتات ونشر البذور ، المنتجات التجارية المشتقة من الحشرات ،الحشرات المفترسة والمتطفلة ودورها ، أهمية الحشرات ككانسات ، مركز الحشرات الهامة فى النظام البيئي وغيرها كتير ، وشغله: في معامل التحاليل و الشركات الادويه ومعامل البحوث الزراعيه وغيرها ، وشروطه: اختار حشرات وحيوان.
مواده: http://sareg.sci.cu.edu.eg/pdfs/plans/28_24.pdf
****************************
14) بيوفيزياء منفرد: البيوفيزياء هي علم قائم بذاته و مختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية ودراسة للقوانين الفيزيائية التي تؤثر في الجزيئات الحيوية والعمليات الحيوية ندرس بها الكهربية خلال الجسم الحيوىو الجهاز العصبى والخلية العصبية ، الجهد الكهربى للأعصاب ، رسم العضلات والقلب والمخ والعين ، فيزياء الأشعة السينية التشخيصية ، استخدامات الانويه المشعه فى أجهزه القياس الإشعاعى الأساسية وتطبيقاتها الوقاية من الإشعاع ، وحدات الوقاية الإشعاعية وحدودها فى الطب النووى تطبيقات الحرارة والبرودة ، حفظ الدم والأنسجة والجراحه بالتبريد ، وإستخدام الضوء فى الطب فلها تطبيقات في الطب حيث توفر تفسيراً للعلاقات الوظيفية بين أجزاء الجسم وفي دراسة نظام المناعة ضد الامراض وتم اعتماد أربع تخصصات رئيسية وهى: البيوفيزياء الجزيئية والبيوفيزياء الطبية و البيوفيزياء النظريه و البيوفيزياء البيئية والمدرستين المتخصصتين واللتيان لهما النصيب الكبير من الاهتمام والتطور هما البيوفيزياء الجزيئية والبيوفيزياء الطبيه ، وشغله: موجود في المستشفيات والمعاهد الطبيه زي الاورام ومعاهد الليزر وبحوث الاشعاع والبحوث النوويه والاشعاعات واثرها علي الخلايا وغيرها ، شروطه: انجح بيوفيزياء 1 & 2 وماده من (حيوان - بيولوجي).
مواده: http://sareg.sci.cu.edu.eg/pdfs/plans/28_10.pdf
****************************
15) جيولوجيا منفرد: الجيولوجيا هي علم دراسه الارض وأصل الارض وطبقات الارض ،الحاضر مفتاح الماضي ، تقدير عمر الأرض النسبي والمطلق ، الجدول الزمني لتاريخ نشأة الأرض ، الحفريات والتحفر بالتفصيل ، التبلور ، حالات المادة الصلبة ، عناصر التماثل البللوري ، المحاور البللورية ، ثبات الزوايا البينية ، النظم الكاملة للتماثل ، الأنظمة السبعة ، التوأمة وعناصرها ، الخواص الفيزيائية للمعادن، تقسيم المعادن ، مجموعات المعادن النارية والمتحولة والرسوبية بالتفصيل ، التعرف المنهجي علي المعادن ، وشغله: في شركات البترول والمياه وجهاز شئون البيئه وقطاع الاثار كله شغل صحرا و سفر و مكن نشتغل جيولوجين في مكاتب في ناس بتحب شغل المكاتب ، شروطه: اختار مادتي جيولوجيا وحيوان وتقدير جيد جدا في جيولوجيا 1 & 2 و جيد جدا تقدير عام والقسم بياخد 10 طلاب فقط.
مواده: http://sareg.sci.cu.edu.eg/pdfs/plans/28_7.pdf
***************************
ثالثا: 9 اقسام مشتركه متاحة لطلبة علمي رياضه و علمي علوم
***************************
16) كيمياء منفرد: الكيمياء عضويه وغير عضوية وحراريه وكهربيه وتحليليه وكيميات كتير بتدرس كل انواع الكيميات بكافه تخصصها انالتيكال وثيرمو والكترو واروماتيك وكيمياء حيويه وكوانتم كل اللي نفسك فيه ، وستريو وبروتين كربوهيداات ، وشغله: فى معامل التحاليل وفي كل شركات مصر مافيش شركه من غير كيميائي من ادويه واسمده ومستحضرات التجميل والشيبسي والبيبسي وغيرها ، شروطه: اختار اى مادتين واجيب جيد في كيمياء 1 & 2 و تقدير عام جيد جدا
مواده: http://sareg.sci.cu.edu.eg/pdfs/plans/27_6.pdf
****************************
17) كيمياء/جيولوجيا: بيدرس نص مواده جيولوجيا والنص التاني كيمياء وميزته انه يقدر يشتغل بالاتنين الكيميا والجيولوجيا يعني ماسك العصاية من النص والجيولوجيا زى مااتكلمنا عنها هي علم دراسه الارض وشغل فى صحرا او اوفس نشتغل اوبيريشن وده بقي اللي بيعمل الخرايط مش الجغرافيه لأ خرايط تانيه هتعرفوها قدام ، وشغله: فى معامل التحاليل وشركات الأدوية والمستحضرات الطبية والأسمنت والاسمده والبترول والمياه وجهاز شئون البيئه وقطاع الاثار وغيرها ، وشروطه: اختار جيولوجيا و اي ماده تانيه ومتوسط التقدير فى جيو 1 & 2 جيد وتقدير عام جيد
مواده: http://sareg.sci.cu.edu.eg/pdfs/plans/27_23.pdf
****************************
18) كيمياء/فيزياء: قسم يدرس نص مقرراته كيمياء ونصها فيزياء ، وشغله: زي اي قسم بيدرس كيمياء في معامل التحاليل وشركات الادويه والاسمده وغيرها ، وبيشغل في الفيزيا في معامل الابحاث وشركات الالكترونيات والقسم ملهوش شروط اختار اي مادتين واطلع تانيه وادخله علي طول.
مواده: http://sareg.sci.cu.edu.eg/pdfs/plans/27_18.pdf
****************************
19) فيزياء/فلك: القسم ده زي فلك منفرد بس باخد شويه فيزيا مع مواد الفلك ، بندرس فيه النجوم وازاي بتولد ومرورها بعدة مراحل حتى أنفجارها وكيفية تسمية النجوم ، وايضاً هانعرف كل حاجة تخص كواكب المجموعة الشمسية من تركيب التربة والغلاف الجوي الخاص بكل كوكب والاقمار التي تدور حول كل كوكب ، وبنعرف في القسم انواع كل التلسكوبات وازاي بنستخدمها في الرصد الفلكي بأنواعه ، وبنعرف الاقمار الصناعية وكيفية دورانها في مدارات حول الشئ التي اطلقت من أجله ، هندسة سماوية: بندرس فيها الانظمة المختلفة اللى منها بنعرف مواقع النجوم والكواكب بالنسبة للكرة الأرضية ، وازاي فصول السنة بتحدث وبندرس فيه التقويم وازاي بنحسبه ، ميكانيكا الفضاء: بتدرس انواع المدارات اللي بتدور فيها الاقمار الصناعية وخواصها وازاي القمر الصناعي بيدور فيها و امتى يكون في الفضاء ، الفلك الفيزيائي: بندرس فيها الفلك من الاتجاه الفيزيائي يعني ازاي النجوم بتولد وبتعيش فترة شباب الي ان تنتهي بالانفجار ، وبتدرس حركة الكواكب والمجرات ، شغله: فى مرصد حلوان او القطامية او باحث بمركز الاستشعار عن بعد او بالمركز القومي للبحوث الفلكية واي مركز في مصر فيه فيزيا وهيئة الطاقة الشمسية والمركز القومي للفلزات ، وشروطه: اني اختار ماده فلك واي ماده تانيه.
مواده: http://sareg.sci.cu.edu.eg/pdfs/plans/27_16.pdf
****************************
20) فيزياء/علوم جويه: كوبي بيست من اللي فوقيه ، بس الفرق هنا انك بتدرس كل حاجة تخص الأرصاد الجوية بس مش انت اللي بتشتغل فى النشرة الجوية بتاعة الساعة تسعه ديه لا انت اللي بتجبلهم الداتا اللي هما بيقولوها وانت بقى بتدرس طبقات الغلاف الجوي و ازاي الرياح بتتحرك وهكذا ، بجانب انك ليك فرصه انك تشتغل في برج المراقبه في المطار علشان تشوف حالة الجو هاتسمح للطائرات تقلع ولا لأ
مواده: http://sareg.sci.cu.edu.eg/pdfs/plans/27_17.pdf
****************************
21) فيزيا منفرد: قسم عشاق الفيزياء ودراسته فيزيائيات كهربيه وحراريه والدراسة فالقسم عايزة انك تكون معتمد علي نفسك شوية بالذات في مواد منفرد ، وانه ما يعتمدش فقط على المنهج الجامعي و يشتغل مع نفسه في البحث الخارجي ، والقسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية ، وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او شغل اكاديمي زي باحث في احد الجامعات الاجنبية او سيرن او وكالات الفضاء بتحتاج فزيائين او المفاعلات النووية بس كل دة خارج مصر لازم تدرس ماجيستير ودكتوراه و ايضا لازم تدور علي منحة عشان تدرس ماجيستير ودكتوراه برة لان الفيزياء من العلوم التقيلة اللى محتاجة تدرسها بره وعلي الاقل عشان تاخد منحة للدراسة فالخارج لازم تكون جايب جيد جدا ، ولو الدنيا قفلت فى وشك تعرف تبقي مدرس فيزياء ، شروطه: تختار اى مادتين وانجح فى فيزياء 1 & 2 وتقدير عام جيد.
مواده: http://sareg.sci.cu.edu.eg/pdfs/plans/27_4.pdf
****************************
22) جيوفيزياء: هي تطبيق لقوانين الفيزياء علي الجيولوجيا اللي هي علوم الارض وهو يدرس الاعماق الارض من الناحيه الفزيائيه وهتدرس فى سنة اولى فى اول مقررين جيوفيزياء 1 & 2 مقدمة عامة للجيوفيزياء ومبادئ أساسية عن Gravity & Magnetic فى الترم الاول و Electric & Seismic فى الترم التانى ، والجيوفيزيائى اللي هي بيشوف الاستجابه الكهربيه او المغناطيسيه للارض و استخدم موجات السزميك والالكترك والجرافيتي والماجنتيك او غيؤهم عشان اعرف فين المكان الغريب اللي في استجابه مختلفه عن اللي حوليه ، شروطه: اختار جيولوجيا وجيوفيزياء واجيب فيهم جيد والقسم بيدخله 15 طالب فقط الاعلى فى التقدير العام وحطينه رغبة اولى ، وشغله: التنقيب قبل ما احفر عشان اطلع الحاجه سواء فى شركات البترول او المياة او المعادن او الابار او الاثار او اى حاجة من تحت الارض.
مواده: http://sareg.sci.cu.edu.eg/pdfs/plans/27_11.pdf
****************************
رابعا: الاقسام الخاصة وهما قسم علوم البترول الجيولوجية وقسم البيوتكنولوجي فقط ، والتخصص فيهم بيكون من سنة اولى ، يعنى مش محتاج تقدير عشان تدخل القسم ، بس هتحتاج تقدير عالى عشان تشتغل ، والقسمين بدون شروط ومفتوح العدد لاى طالب يدفع المقابل المادى له و حاصل على مجموع كلية العلوم لاى جامعة مصرية.
****************************
23) علوم البترول الجيولوجية: القسم موجود فى كليات العلوم جامعات القاهرة والاسكندرية والمنيا والاسماعيلية وبورسعيد والمنوفية والمنصورة واسيوط وغيرهم وفى بعض الجامعات القسم ببلاش وفى البعض الاخر بمصاريف ، فى القاهرة ب 8 الآف جنية + 10% زيادة سنوية وتدفع 4 الآف جنية فى الترم مع تطبيق الزيادة كل سنة وبتدرس فى سنة اولى كيميا وفيزياء ورياضة وجيولوجيا وجيوفيزياء 1 & 2 وبتتخصص من سنة اولى فى القسم ومبتكونش مهندس بترول بتبقي جيوفيزيائى او جيولوجي ، مشكلة القسم ان شغله صعب تلاقيه ولدرجة ان فى ناس تقولك معكش واسطة متدخلوش لانك مش هتلاقى شغل ، فى اسكندرية القسم قوي اوى عن القاهرة لانه بينزلك تدريب فى شركات البترول من سنة تانية وبياخد اعلى ناس فى الانجلش بتاع ثانوي وبيعملك انترفيو وبيكون ليهم مبنى خاص بيهم ومعامل خاصه بيهم، عكس القاهرة بيدخل القسم اى حد هيدفع ومفيهوش اى ميزة من اللى موجوده فى الاسكندرية لا مبنى خاص ولا معامل خاصة ولا اى حاجة سوا المقررات اللى بتدرسها وفقط وفى انك مش محتاج تقدير عشان تدخله وبتدرس مقررات جيولوجيا وجيوفيزيا ودى يعتبره الميزه الوحيده للقسم ، والفرق بينه وبين قسم جيولوجيا وجيوفيزياء فى المقررات اللى بيدرسها كل قسم وهى كالاتى:
علوم البترول: (24) مقرر جيوفيزياء + (21) مقرر جيولوجيا + { (6) مقررات رياضة + (5) مقررات كيمياء + (5) مقررات فيزياء + مقررين انجلش } دول 23 مقرر ملهمش علاقة بتخصصك ولا بمجال شغلك بتدرسهم عشان اللايحة وبس.
جيوفيزيا منفرد: (29) مقرر جيوفيزياء + (8) مقررات جيولوجيا.
جيولوجيا منفرد: اول مقررين جيوفيزياء + (52) مقرر جيولوجيا.
كيميا/جيولوجيا: اول مقررين جيوفيزياء + (28) مقرر جيولوجيا + (22) مقرر كيمياء.
مواده: http://sareg.sci.cu.edu.eg/pdfs/plans/27_26.pdf
****************************
24) بيوتكنولوجي: القسم موجود فى كليات علوم وفى كليات زراعة ببلاش ولكنه فى القاهرة وبعض الجامعات خاص ب 9 الاف جنيه في السنة + 10% زياده سنويه والقسم متاح لطلبة علمي علوم ورياضه ، هتتعرف علي التعامل اكثر مع العامل الوراثي في النبات والحيوان والانسان وده مدخل مهم لعلاج كثير من الامراض زى السرطان أما بالنسبه للنبات فأهميته إنه ممكن تتدخل لزياده الانتاج وكذلك الحيوان ويدرس التكنولوجيا الحيويه زى ال DNA وتحاليله وكل ما يتعلق بيه سنة أولى: بتتدرس مواد أساسية لعلوم كلها زي رياضة 1 & 2 ، فيزيا 1& 2 وفيزيكال وأورجانك وكيميا 1 والمتطلبات وبيولوجي بتدرس فيها نبات وحيوان ، سنة تانية: بتدرس كلها كيميات ومادة إسمها genetics و molecular biology & biostat ، تالتة و رابعة: كله بيكون دراسة جينات ووراثة و DNA ، شغله: في معامل التحاليل وبالذات اللي فيها تقنيات تحاليل DNA ومراكز البحوث المختلفه وشركات الادويه والشركات الصناعيه زي الالبان والمؤكولات وفي المستشفيات لعلاج الامراض الوراثيه واستخدامات تطبيقات البيوتكنولوجي في الصناعه والزراعه وغيرها
مواده: http://sareg.sci.cu.edu.eg/pdfs/plans/27_29.pdf
****************************
ايه موضوع الساعات المعتمده ده ؟
****************************
بص يا سيدى انت دلوقتى مثلا بتاخد مادة الرياضه ، بتاخد كل اسبوع محاضره وبتاخد سكشن ، المحاضره بتبقى ساعتين والسكشن 3 ساعات فاحنا بنحسب حاجة اسمها الساعات المعتمده للماده كالاتى ان اى محاضره الساعتين بتوعها بيتحسبوا بساعه معتمده ، وان اى معمل او سكشن الساعتين او 3 ساعات بتوعهم بيتحسبوا بساعه واحده معتمده فكده تعالى نحسب الساعات المعتمده بتاعة الرياضه ، محاضره ساعتين = ساعتين معتمدتين ، سكشن تلات ساعات = ساعه واحده معتمده ، يبقى مادة الرياضه كده ب 3 ساعات معتمده ، لو حسبتها فى الخمس مواد هتلاقى انك بتاخد فى التيرم الاول 15 ساعه معتمده بس كده ، يعنى هى طريقه لتحويل المواد الى ساعات معتمده ، ولو اخدت متطلبات جامعة المتطلب الواحد = ساعتين معتمدتين (لان مفيهاش عملى هما نظرى بس) ، ولما تيجى تطلع تانيه مش هيقولك انت معدى كام ماده عشان تطلع تانيه لا هيقولك انت معدى كام ساعه معتمده بس اهم حاجة تكون نجحت فى 18 ساعة معتمدة من مجموع ساعات الترمين "من غير المتطلبات" عشان تطلع سنة تانية (الكلام ده على سنتنا احنا السنة دى كان فى كلام من ادارة الكلية انهم هيزيدوا)
****************************
طب وايه نظام الدراسه؟
****************************
عندنا كل ماده من 100 درجه متقسمه كالاتى 10 درجات على الميدتيرم وبيكون بعد حوالى شهر ونص من بداية الدراسة ، و 30 درجه على العملى وده بيبقى بعد العملى بحوالى 3 اسابيع ، و 60 درجه على الفاينال وده الامتحان اللى فى اخر الترم خالص وبيكون الاسبوع اللى بعد العملى علطول ، بس ال 30 درجه بتوع العملى بالنسبه للرياضه لانها ملهاش عملى بيبقى فيه ميد تيرم تانى ب 20 درجه و10 درجات على الكويزات الى هى امتحانات صغيره بتتعمل فى السكاشن بتاخد كل اسبوع فى المواد دى محاضره وسكشن او محاضره ومعمل.
****************************
طب هى الجداول بتنزل امتى وازاى بعرف جدول محاضراتى؟
****************************
لا انت اللى بتختار موادك وانت اللى بتعمل جدولك وانت اللى بتختار ايام اجازاتك فى سنة اولى هما بس بينزلولك فى كتاب اسمه دليل الطالب وعلى موقع الكلية المواعيد المتاحة لكل ماده انت بتختار المواعيد اللى انت عايزها وتظبط جدولك وتسجله على موقع الكليه وبتطبعه وبتمضى عليه وتخلى اى دكتور فى الجامعة يمضيلك عليه وتصوره نسخة تسلم الاصل للشئون والنسخه التانية تخليها معاك وطبعا احنا هنساعدكوا فى عمل الجدول ده متقلقوش ، بالنسبة لطلبة بترول بتمضى من د/ محمد فؤاد منسق القسم وبعدين تختمه من قسم الجيوفيزياء وتصوره 3 نسخ مش نسختين عشان النسخة التالتة هتسلمها لسكرترية قسم الجيوفيزياء.
****************************
طب التقديرات ايه ؟
****************************
النجاح من 60 ، مقبول من 60 - 64 ، جيد من 65 - 74 ، جيد جدا من 75 - 84 ،
امتياز من 85 - 100
****************************
السمر كورس (الترم الثالث):
****************************
هو فصل دراسى للطالب الذى رسب فى مادة او مادتين او ثلاث مواد خلال السنة الدراسية الواحدة ، وذلك بمقابل مادى 600 جنية للمقرر الواحد ابو 3 ساعات اى ما يعادل 1800 جنية لثلاث مواد بتسعة ساعات معتمدة يدرس فيها الطالب المقرر(ات) لمدة 5 اسابيع بمعدل محاضرتين وسكشنين فى الاسبوع الواحد للمقرر الواحد ، ويبدأ الفصل الصيفي بعد اسبوعين من اعلان النتيجة مع العلم ان النتيجة اعلنت هذه السنة بعد الامتحانات بيومين فقط ، وتعتبر ادارة الكلية الفصل الصيفي فصلا اختياريا للطالب ، وهو كذلك ولكنه فى الواقع يعتبر اجبارى للطالب الذى يرغب فى التخرج من الكلية فى 4 سنوات فقط وليس اكثر.
ملحوظة: السمر كورس للمقرر الواحد كان منذ 4 سنوات ب 50 جنية ثم اصبح ب100 ثم 400 فى سنوات 2012 ، 2013 ، 2014 ثم هذه السنة 2015 اصبح ب 600 جنية للمقرر الواحد صاحب الثلاث ساعات المعتمدة اى بمعدل 200 جنية للساعة المعتمدة الواحدة ، تفاصيل: http://www.albawabhnews.com/1384199
****************************
اعمل ايه عشان منزلش سمر كورس واضطر ادفع فلوس اد كدا او انى اتخرج متاخر؟
****************************
بص هقولك انت ادامك 3 اختيارات:
1) انك تذاكر اول باول فتنجح صافى وبتقدير كمان.
2) متذاكرش اول باول فتنزل فى مادة او اكتر وساعتها هتضطر تنزل سمر.
3) متذاكرش اول باول فتنزل فى مادة او اكتر وتختار انك متنزلش سمر وساعتها هتتاخر فى التخرج عن اربع سنوات.
ليه بقى؟ لان المادة اللى انت نزلتها دى مش هينفع تاخدها فى سنة تانية لان كل الساعات اللى عندك مليانه يا اما تاخدها ومتاخدش بدالها مادة من مواد سنة تانية وساعتها بردو هتضطر تاخد المادة دى فى السمر كورس بتاع سنة تانية او تاجلها هى كمان لسنة تالتة وهكذا.
وطبعا فى خيار رابع ودول للعباقرة اللى بيذكروا قليل ويجيبوا تقديرات بسهولة.
وفى حاجة كمان فى مادة بتوقف مادة تانية بعدها او اكتر ، يعني ايه بتوقف؟ يعني مينفعش تاخدها الا لما تنجح في الاولانية اللى بتوقفها مثال: رياضة 1 بتوقف رياضة 2 ورياضة 2 بتوقف رياضة 3 وهكذا حتى رياضة 6 فى اقسام رياضة ، مثال كمان فى بايو تكنولوجي وفى قسم بترول رياضة 2 مش بتوقف رياضة 3 وبس ، لا دى بتوقف رياضة 3 وفيزياء 3 والمادتين دول بيوقفوا مادتين تانيين فتخيل بقى لو انت جيت نزلت فى رياضة 1 واخدتها ترم تانى فهتضطر بعد ماتنجحها انك تاخد رياضة 2 فى السمر كورس ب 600 جنية ولو اخترت انك ما تدخلهاش فى السمر هتاخدها فى سنة تانية ترم اول وساعتها مش هتعرف تاخد رياضة 3 وفيزيا 3 اللى بيتوقفوا عليها فهتاخدهم فى سنة تانية الترم التاني وده معناه انك هتاجل مادتين كمان من سنة تانية لسنة لتالتة اللى هما بيتوقفوا على نجاحك لفيزياء 3 ورياضة 3 ، دوامه هتدخلها ومش هتخرج منها الا بعد 5 او 6 سنين من الكلية لمجرد انك مش قادر تدفع لكلية المفترض انك داخلها بالمجموع مش بالفلوس.
****************************
اجابات لبعض الاسئلة الشائعة:
****************************
1) الحد الادنى لكلية العلوم السنة اللى فاتت من علمى علوم 82.9 وكانت جامعة الوادى الجديد ومن علمى رياضة 58.4 وكانت علوم رياضة العريش
2) مفيش حاجة اسمها تخلص كلية علوم وتكمل بعدها طب او صيدلة او هندسة او تاخد دبلومة الفارما بتاعة الصيادلة ، بس فى دبلومه الميكروبيولوجي ، ودبلومه الكيمياء الحيويه ودبلومه التحاليل الطبية ، ممكن تعمل كدا بس تكمل جامعة خاصة فى بعض الجامعات الخاصة بتيح ده مش كلها ويحذفولك المواد المشتركة اللى انت اخدتها ، طيب وعلى ايه ما تدخل جامعة خاصة من الاول لو انت مش حابب علوم.
3) اى قسم من اللى فوق فيهم ناس متخرجة ومش لاقيه شغل وفيهم ناس اتخرجت واشتغلت على طول ، فلازم تبقى عارف ان موضوع الشغل ده رزق والرزق بتاع ربنا فمتشغلش بالك غير بحاجة واحدة وهى اجتهادك فى دراستك وكورساتك وتدريبك.
4) اى قسم كيمياء سواء منفرد او مزدوج تعرف تشتغل منه شغل الكيمياء و85% من شغل الكيمياء فى مصر بيكون فى معامل التحاليل بمرتب 800 - 1200 جنية كحد اقصى وحلو للبنات ، وميديكال ريب "مندوب ادوية طبية"بمرتب 1200 - 3500 جنية كحد اقصى ومش حلو للبنات، ومتاح طبعا الشغل فى المصانع والشركات ، وعلى حسب المصنع او الشركة دى كويسه ولا متواضعه بس هتلاقى من 1000 - 6000 جنية ، علوم حاسب بتبدا بمرتب 1000 جنية وبيوصل ل11 الف انت وتطويرك لنفسك واجتهادك فى الكورسات ،وكل الارقام دى مش من تاليفي ولكن من خريجين شغالين فى المجالات دى بقالهم سنين.
5) اكتر حاجة اجمع عليها الخريجين انها غلطة كبيرة عملوها هى انهم منزلوش تدريب ومخدوش كورسات من وهما بيدرسوا فى الكلية فلازم بجانب الدراسة تحضر مؤتمرات وتاخد كورسات ودورات بس خلى بالك عشان فى دورات كتير بتكون نصب وهدفها الربح فقط.
6) الفرق بين النظام الجديد نظام الساعات المعتمدة المتطبق فى القاهرة والاسكندرية وغيرها وبين النظام القديم المتطبق فى جامعة حلوان وعين شمس وغيرها هى ان النظام الجديد بيحاسبك بالساعات المعتمدة زى ما اتكلمنا فوق وبه سمر كورس زى ما اتكلمنا عن تفاصيله فوق بردو ، اما النظام القديم فبيجاسبك بالمواد لو نزلت فى مادتين تطلع بيهم السنة اللى بعدها بدون اى تكاليف اضافية ولو نزلت فى ثلاث مواد بتعيد السنة.
7) اى قسم ممكن تشتغل منه مدرس ولازم تاخد سنة تربية زى فى تربية شبين بتدرس 16 مادة 8 مواد ترم اول و8 ترم تانى وكل المواد تربوي وملهاش شروط.
8) خبر سئ بس لازم تبقى عارفه وهو الغاء تعيين اوائل الجامعات بداية من دفعة 2014 http://alwafd.org/تحقيقات-وحـوارات/8...ل-قطار-التنمية
9) شروط الاقسام ممكن تتغير من جامعة لجامعة ومن سنه لسنه مثال: قسم كيمياء منفرد خد السنة اللى فاتت من تقدير عام جيد جدا والسنة اللى قبلها من تقدير عام جيد ، بتختلف على حسب اقبال الطلبة على القسم من سنة للتانية.
10) بالنسبة للتحويل سواء من جامعة تطبق نظام الساعات المعتمدة للنظام القديم او العكس او لنفس النظام ، فى جامعات مش بتقبل التحويل لمجرد انك نظام قديم ، وفى بتقبل بس بيعيدوك السنة كلها ، وفى بتقبل ويحذفولك المواد اللى انت خدتها زى اللى عندهم ويشيلوك المواد اللى مختهاش ، فاسئل فى شئون الجامعة اللى هتحول لها لانها هى الجهة الوحيدة المسئولة واللى عندها علم بكل الاجراءات اللى هتم فى حالة التحويل ولو عايز تفاصيل اكتر شوف ده: https://www.facebook.com/permalink.p...76848759153372
11) مجالات عمل خريجى علوم: http://goo.gl/KAFcS
12) كل ما يخص شغل التحاليل الطبية: http://goo.gl/6ou3fh
13) الدبلومات المتاحة لجميع اقسام علوم: http://goo.gl/eZc2lz
التقديم للطلبة الحاصلين ع تقدير تراكمى جيد على الاقل وفى بعض الجامعات بتشترط جيد جدا ، التقديم فى أغلب الجامعات بينتهي 30 أغسطس والأوراق بتكون: 4 صور شخصيه + بيان درجات الأربع سنين وفي جامعات بتاخد صوره المؤهل + صوره بطاقه + صوره شهادة الميلاد.
14) اهم كورسات التخصصات: http://goo.gl/S6eN2a