احتياجات الانسان 10

[DPT-Blue Phoenix]

السلام عليكم و رحمة الله و بركاته

بسم الله الرحمن الرحيم


" الحاجات 10 للانسان "


اى انسان عشان يعيش مرتاح و سعيد و متزن فى حياته فى اشياء لا بد من وجودها فى حياته بشكل دائم و الاشياء دى بيطلق عليها الحاجات 10 لو الانسان عرف يوفق بين حاجاته هيعيش طول حياته متزن و سعيد و ناجح باذن الله ..


و هما :-


1- ‏البقاء_و_الامان : دى اهم حاجة و اول حاجة الانسان محتاجها لانها هتهدد بقائه كفرد او تموته يعنى لازم الانسان يحس بالامان و ان مفيش حاجة بتهدد بقاؤه و صحته و ما الى ذلك ..
فتلاقى الانسان بيعمل اى حاجة عشان يرجع لمنطقة الامان و يحس بالامان ..
شوف الانسان الخايف القلقان ان حد يموته مثلا او يتشرد او او او بيكون عامل ازاى و ممكن يعمل ايه ؟!



2- ‏الضمان_و_الاستمرارية : انك عايز تضمن بقائك دا و تضمن انه مستمر فى الزمن يعنى مثلا تلاقى الشعب المصرى بتاعنا الحلو بدل ما يجيب كيلو فاكهة مثلا يجيب 20 كيلو ههههه و يعين الى يقدر يعينه و الباقى يترمى و يحوش فلوس فى البنوك و يشترى اراضى و حاجات عشان يضمن بقائه فى المستقبل ليه و للى يهموه ..

3- ‏الشعور_باننا_نحب_و_نتحب : لازم تعرف ازاى تحب .. تعرف تحب ربنا الاول و تحب نفسك لازم تحب نفسك زى ما ربنا خلقك تعرف تحب شكلك و اسرتك و بلدك و تحب شغلك و كليتك و بعدين تحب الناس تخيل كدا لو انا معنديش تفاح مثلا و عايز ادى للناس تفاح تيجى ازاى لازم احب ربنا و الرسول صلى الله عليه و سلم اتعلم احب و احب نفسى و بعدين هقدر ادى حب للناس لما تقول لحد انا بحبك اكتر من نفسى ههههههههه دا كذب لان الانسان الى بيقول كدا بيبيع كلام بيضر نفسه و الشخص الى بيقوله كدا جرب تحب كدا الحب الاسرى و حب الاصدقاء و ما الى ذلك ..

4- ‏التقدير : لازم الانسان يقدر نفسه حتى شوف اى عيل صغير بيعمل كل حاجة عشان يجذب انتباه اهله و كدا و يحس بالتقدير حتى لو كلمة معنوية فمهم اننا نقدر نفسنا و نحس بالتقدير من الناس ..
(( و قل اعملوا فسيرى الله عملكم و رسوله و المؤمنون)) شوف ربنا بيقدرنا بيقولنا اشتغل انت بس و انا شايفك و الرسول صلى الله عليه و سلم شاهد عليك و المؤمنون انت عايز تقدير اكتر من كدا بس عايزين ربنا يشوفنا و احنا بنعمل خير مش معصية ,,
اى شخص بيقلل منك دا بيقول الى جواه هو بيقول ادراكه و فكره الذاتى عنك لا اكثر ولا اقل ؟! انما احنا افضل مخلوق ربنا خلقه فى احسن تقويم و سخرله السماء و الارض و ما بينها ايه التقدير الى يكون اكتر من كدا .
#‏مثال : عملوا تجربة على طفلين صغيرين لسه مولودين ال2 اكلوهم و شربوهم لكن فى واحد منهم ادولهم حب و تقدير و احضان و بتاع ..
وزن الطفل دا زاد و الطفل التانى مات تخيل بقى لما الانسام ميقدرش نفسه و ميحسش بالتقدير من الاخرين ليه بنحبس نفسنا فى حاجات كلها غلط حتى الفشل نتائج حتى الغلط ممكن يتعدل ..
بس الارادة على راى دكتور مصطفى محمود اذا فكرت فى المتاعب اسرعت اليك المتاعب و اذا فكرت فى اللذات اسرعت اليك اللذات مثل التنويم المغناطيسى تقول انا نمت فتنام فسحر الارادة الملتهبة يصنع كل شىء ..

5- ‏الانتماء : لازم اكون منتمى لحاجة تعرف لازم تكون منتمى لاسرتك لمهنتك حتى تلاقى مش عارف نقابة الصيادلة و نقابة العلاج الطبيعى و ما الى ذلك لازم الانسان يحس بالانتماء تعرف لو محستش بالانتماء لكليتك و اسرتك و بلدك هتكره المجتمع و تكون عرضة لما يسمى بالانوميا الاجتماعية و معناها انك تحس ان المجتمع دا ملوش لازمة يعنى و افخر بوطنك و دينك و لغتك و افخر باسمك و لغتك و مهنتك كل دى انتماءات لازم يكون ليك اصحابك بتحبهم و تنتمى ليهم نفس الكلام ..

6- ‏استقلال_الشخصية : انت بتكون منتمى اه لكن ليك شخصيتك المتفردة متفكرش تكون انسان تانى استقل بشخصيتك كل انسان فريد من نوعه فى منه واحد بس و ربنا خلقه لرسالة معينة حب نفسك زى ما انت و استقل بشخصيتك و اكتشف قدراتك و نميها .. كل انسان عنده مواهب فطرية لما بينميها بتبقى اسمها مهارة و سعتها بتظهر و غالبا مهارتك بتكون فى الحاجة الى بتحبها و انت اكتر واحد بتكون عارف نفسك ..

7- ‏الانجاز : شوفانت اعمل الى انت بتحبه و حس بالانجاز فى الى انت بتحبه مش الى الناس عايزاه تمام اعمل الى انت نفسك فيه و انجز فيه خلص كتاب نفسك تخلصه و حس بالانجاز اعمل هواية انت بتحبها و حس بالانجاز و ما الى ذلك لحظة الانجاز دى لحظتك انت فاعمل الى بتحبه مش الى هما عايزيه .. تعرف لما تنجز فى حاجة بتحبها هتحس ان حياتك مليانة حاجات حلوة و هتحب حياتك حتى هات نوتة و اكتب فيها حاجات كويسة عملتها عشان لما تحبط ترجع ليها تانى و تفتكر ان دا انت انت عمرك ما هتكون صفر انت عملت كتير حلو و زى ما عملت قبل كدا ممكن تعمل تانى و 3 و 100 ..

8- ‏الرضا_و_الاستمتاع : بعد ما تنجز حاجة مهما كانت صغيرة .. حاجة انت بتحبها ارضى بيها و استمتع باللحظة دى و نام و انت مرتاح و حاسس انك عملت حاجة فى يومك ..

9- التغيير : لازم تغير من نفسك للاحسن و قولنا نغير تغيير تدريجى عشان متحسش بالروتين الروتين بيقضى على الانسان لازم يكون فى دائما تغير مستمر للافضل باذن الله ..

10- ‏المعنى : اخيرا لازم يكون لحياتنا معنى لدرجة ان بيقولوا ان 62% من الناس الى مش حاسة ان فى معنى لحياتهم بينتحروا .. عدم وجود المعنى بيضيع الفرد .. فانا هسالك ايه معنى حياتك ايه معنى الحياة بالنسبالك ايه معنى كليتك ؟! ايه معنى الصحة بالنسبالك ؟!

علماء النفس بيقولوا (( من اجل المعنى يغوص الانسان فى اعماق المحيطات و يتسلق اعالى الجبال - لولا وجود المعنى لضاعت الاحلام و لولا وجود الاحلام لضاع الانسان .. تخيل انا مش حاسس ان حياتى ليها معنى بالتالى مش هيكون لى هدف و بالتالى انا مليش لازمة مش هقدر نفسى مش هحس انى محبوب مش هحس انى بقائى ليه معنى هكون عايز انتحر شوف الحكاية بتمشى ازاى التدرج فى الفكر ضياع ))

مشكلة الحاجات العشرة ان اى واحد بيضيع بيتحول للى قبله لحد ما نوصل للبقاء و الامان فنبقى عايزين نموت ..



الى عايز يقرأ بقى اساسيات فى التنمية المفهوم الذاتى و العادات ..
المفهوم الذاتى ..
http://www.thanwya.com/vb/showthread.php?t=635400
العادات
http://www.thanwya.com/vb/showthread.php?t=635416

و السلام عليكم و رحمة الله و بركاته

[aalaaabdelhamed]

جزاااااااك الله خييرا موضوعات حضرتك رائعة

[DPT-Blue Phoenix]

المشاركة الأصلية كتبت بواسطة aalaaabdelhamed

جزاااااااك الله خييرا موضوعات حضرتك رائعة

شكرا و جزاكم الله كل خير

[اية عبد اللطيف]

جزاك الله خيرا

[DPT-Blue Phoenix]

المشاركة الأصلية كتبت بواسطة اية عبد اللطيف

جزاك الله خيرا

و جزاكم مثله ان شاء الله