حسبى الله و نعم الوكيل

[ترانيم2]

المشاركة الأصلية كتبت بواسطة jung ji-hoon

الحياة الجامعية صعبة و متعبه بكل المقاييس وبما انى فى تربية انجليزى فانا بعانى بجد و شبهى كتير زى مثلا الدكاترة اللى كل كلامهم انجليزى و مش هاين عليهم يفسروا حاجة بالعربى و زى مادة الالمانى اللى برده بيتكلم المانى طول المحاضرة و احنا مش فاهمين .. الدكاترة اللى بيطلبوا مننا شيتات من غير ما يعرفونا ازاى تتحل و اول ما حد يجيب الاجابة كلنا بننقل من غير ما نكون فاهمين حاجة .. و الامتحانات المفاجأة كأنها عقاب لينا يعنى عشان دكتورة عايزانا عباقرة من غير ما نفهم حاجة .. الدكاترة كلهم شبه بعض محدش حاول يتعامل معانا بطريقة انسانية اكتر او متحضرة اكتر .. اللى بيشتموا و اللى بيعاقبوا مش مقدرين احنا بنعانى ازاى عشان نوصل .. و الغياب اللى بيتاخد فى المحاضرات يعنى حتى لو مش بتفهم و بتروح تضيع وقت لازم تروح عشان الغياب ولو بتموت من التعب لازم تروح عشان الغياب و لو حظك الغياب اتنده و كنت غايب خلاص ضاعت اعمال السنة عليك .. فكرة انك تعد 3 ساعات فى محاضرة و كله كلام كلام و خلاص متعبه للدماغ جدا .. بس رغم كل دا مش هنسى اخونا الكبير اللى بيساعدنا بكل حاجة دكتور البحيرى اللى مش بس بيدينا كورس فى مادة وخلاص لا بيساعدنا فى كله هفضل ادعيله طول حياتى و هيفضل مثال يحتذى بيه للدكتور الناجح .. الكلية انا مش بكرهها وبحب ابقى فيها بس فكرة ان الحمامات مفيش حد ينضفها و اقل ما يقال عنها انها مستودع قذارة حاجة تجيب الاشمئزاز بجد الاهتمام كله بحمامات الدكاترة و بس و مقفوله علاطول مش فاهمة ليه كده احنا كلنا متساويين فى الموضوع دا ‏‎‎‏ .. المدرجات اللى مش نضيفة .. كل واحد صغير او كبير لو اتنفست معاه يقولك هسقطك و معرفش ايه نفسى ااكدلهم ان المستقبل بإيد ربنا مش بإيدكوا .. المكتبة اللى كل الدفعات بتروحلها تجيب منها و الزحمة مش بتخلص و الناس اللى فيها اسلوبهم بعيد كل البعد عن الاحترام ‏.. مش عارف ليه برده و كمان ممكن متديش الكتاب للى مضايقها ! .. الدكتور اللى لو شاف بنت بتضحك ممكن ياخد الكارنيه على مزاجه و لازم تتأسفله و تترجاه يسامحها !! .. انا كنت متخيل ان كلية التربية اسم على مسمى بس اتضح انها بعيدة كل البعد عن اسمها .. انا مش عارف ربنا كاتبلى ايه بس لو انا بقيت مدرس ودا مرجح او دكتور و دا غير مرجح انا هبقى المدرس او الدكتور اللى أتمنيت اشوفه فى هيئة التدريس ..

موضوع رائع
تلخيص لواقع معظم الطلاب لكن بامانة الامر مش بالسوء ده ..
المشكلة اللى حضرتك حاسس بها هى عدم القدرة ع التأقلم
لان طبعا حضرتك خرجت من المرحلة الثانوية بقيود معينة وكمان
نمط معين فى الحياة المدرسية وكتب دراسية واعتماد ع مدرسين المدرسة وبرضه
الدروس الخصوصية .. اصعب سنة فى الجامعة هى السنة الدراسية الاولى
وبالنسبة لقسم انجليزى اكيد لازم صعوبة وعدم فهم كامل فى البداية لان دى
لغة مختلفة وتبدأ تتعمق فيها وبعد فترة هتتغلب على اى صعوبة
وتقدر تمسك زمام الامور بس الامر بالتدريج وبالطبع مرحلة الجامعة هى مرحلة
الاعتماد على النفس فى كل شئ .
وزى ما فيه عيوب انت لاحظتها هتلاقى فيه مميزات كتيرة اوووى
بالتوفيق ان شاء الله
بالتوفيق ان شاء الله