العلاج الكهربى Electrotherapy

[DPT-Blue Phoenix]

توعية_بدور_العلاج_الطبيعى
#كل_ما_تريد_معرفته_عن_العلاج_الكهربى

السلام عليكم و رحمة الله و بركاته
بسم الله الرحمن الرحيم

- موضوع طويل بس وافى ان شاء الله

-اول تعريف لينا للكلية هنتكلم عن اساليب العلاج ال3 الصراحة انا كنت عايز اكلمكم على مثلا الاختبارات العضلية و كدا مثلا علم الامراض لكن دا الى حد ما عدم تنظيم من الكلية لأن المفروض انى بدرس الاساسيات و الاختبارات قبل العلاج يعنى العلاج الكهربى مش وقتها خاااااالص انت محتاج تكون خلصت تشريح خلصت فسيولوجى علم الامراض و ميكانيكا حيوية و غيره كتير لكن مش مهم

#العلاج_الكهربى
#Electrotherapy

1- اول سؤال ممكن يجى فى دماغ اى حد هو ليه اسمه العلاج الكهربى ؟!

- اسمه العلاج الكهربى لأن فى بداية العلاج كان هو العلاج بالكهرباء المباشرة يعنى من الاخر بنوصل حاجة زى الكبلات الصغيرة كدا اسمها ((الالكترودات)) على المريض فى نقاط معينة فى الجسم و دى بيكون ليها اثر علاجى لما بنغير فى شكل موجة التيار الكهربى او شدة التيار او مدة التيار او التردد كل دا بيدى اثر علاجى مختلف و بالتالى من الكلام دا اكيد هنعرف ان فى انواع كتير اوى للعلاج بالكهرباء ...

-و النقط الى احنا بنحط فيها دى بنعرفها منها نقط الابر الصينية مش بنعالج بابر انما بنحط الالكترودات دى فيها او نقاط الحركة و دى نقط اتصال العصب بالعضلات و نوعين تانيين من النقاط

2-طيب هو الكهرباء دى بتوجع كدا و يقعد المريض يتعذب و يصوت و يكون بيموت فى الجلسة ؟!

فى نوع واحد من الكهرباء بس الى فيه شوية وجع كدا يعنى ايه وخز كدا اقل من ضربة حقنة مش منظر اصلا لأن الكهرباء الى احنا بنستعملها دى شدتها ميللى او ميكرو امبير يعنى واحد على الف او واحد على مليون امبير حاجة لا تذكر ؟!

3- طيب هل حصل تطور فى المجال دا ؟!

اه حصل تطور كبير فى المجال و ظهرت اجهزة علاج حديثة جدا و لما العلم اتقدم و بدأنا نعرف توليد ما يعرف بالطيف الكهرومغناطيسى دخلناه فى العلاج عن طريق تحويل الطاقة الكهربية للاشعاعات كهرومغناطيسية و بنستخدمها فى العلاج سواء بنستعمل اثر الموجة دى نفسها فى العلاج او اثرها الحرارى او تفاعلها مع حاجة فى الجسم و كدا ....

4- طيب ممكن برده توضح التيار الكهربى دا او الكهرباء المباشرة بتعمل ايه فى الجسم مش فاهمين برده ؟!

-احنا كلنا اخدنا فى الاحياء ((السيال العصبى)) و هو عبارة عن تيار كهربى بيمشى فى الاعصاب نتيجة عدم الاتزان بين الايونات داخل و خارج العصب او نتيجة تولد بعض المواد الكيميائية فبتتولد الكهرباء دى و بالتالى لما بنمرر تيار كهربى فى الجسم بنأثر على كهرباء الجسم و بنعمل علاج بطرق معينة ....

-فى بعض الحالات الى الاعصاب مش بتوصل فيها كويس و العضلة مش بتتحرك لأن العصب هو الى بيدى امر للعضلة انها تتحرك لو العضلة مثلا فضلت فترة طويلة متتحركش تتشل او يحصلها ضمور فاحنا نحركها بالتيار الكهربى لحد ما العصب يبدأ يوصل تانى دى بعض الامثلة .....

-من ضمن النظريات المتطورة جدا جدا جدا نظريات الالم ببساطة مش الالم دا اشارات كهربية ماشية فى الجسم و لازم توصل للمخ فالمخ يدرك و يبدأ الاحساس احنا بقى بنقطع طريق الاشارات دى قبل ما توصل للمخ و بالتالى يقل الالم او يخف و بدون اثار جانية...

5- طيب و الاشعاعات و المغناطيس و الموجات الصوتية و الليزر دا ممكن يعمل ايه ؟!

-بعض الاشعاعات زى الاشعة فوق البنفسجية بتحول الكوليسترول الى فى الجسم بعد سلسلة من التفاعلات لفيتامين D3 و دى نعالج بيها الامراض الجلدية و دا يفيد الجلد و دى تفاعل كيميائى و بعض الاجهزة زى الليزر ليها اثر حرارى و ت*** البكتيريا و كدا و نتخلص بيها من حب الشباب و كدا و مثلا بيستخدم لراحة العمود الفقرى و غيره مثلا عندنا اجهزة حرارية زى الاشعة تحت الحمراء او الموجات القصيرة او الميكروية او الموجات فوق الصوتية كلها ممكن نستخدمها فى مشاكل العضلات او العظام و دى بنستفيد من اثرهم الحرارى لأن الحرارة و البرودة ليهم اثر علاجى على الجسم بس لو فهمنا نستخدمهم ازاى و برده الاشعاعات ليها اثار تانية ....

-موجات الصوت برده او حاجة تانية اسمها الارتجاع البيولوجى ليها فايدة موجات الصوت مثلا تفتت الدهون و ليها استعمالات تانية بما انها اهتزازات فى الوسط

--------- دى بقى حد يقول انتم بتعالجوا (((بالمغناطيس))) ازاى بس ؟! هقولك على حاجة هقولك مين فينا مش بيسمع عن ((الهيموجلوبين مثلا)) و نعرف ان ((فى حديد فى الجسم صح ؟!)) اكيد اكيد طيب لما انا اعمل تأثير بالمغناطيس على الحديد مش ممكن يجذبه و المغناطيس فى الدم فيسرع من الدورة الدموية ؟! اممممممم و فى بعض الامراض بتبقى اصلا هى مشكلة فى قصور الدورة الدموية فتتعالج ؟! اااااااااه

-طيب مش اخدنا فى الفيزياء ان قطع المجال المغناطيسى بيولد تيارات كهربية مستحثة فى الجسم ؟! ااااااااااه طب ما انا ممكن اولد كهرباء فى الاعصاب بالطريقة دى فهمت ؟!!!!!!!!! حاجة غريبة ايه الكلية دى زمانك بتقول كدا صح ؟!

6-طيب ايه اهم استعمالات العلاج الكهربى فى العلاج :-

أ- تقوية العضلات و مشاكل الشد العضلى المزمنة
ب-مشاكل العظام و المفاصل
ج- حاجة اسمها الاستسقاء او تجمع السوائل فى منطقة من الجسم
د-تسهيل الحركة
ه- مشاكل الاعصاب
و-بعض الامراض الجلدية زى حب الشباب و الاكزيما و الصدفية
ز- ضمور العضلات

-و استخدامات تانية كتير جدا جدا جدا منها حالات فى النساء و التوليد و مضاعفات ما بعد الجراحة و الحد منها و مشاكل الجهاز التنفسى و الدورى و الهضمى و طبعا مشاكل الجهاز الحركى سواء عظام اعصاب عضلات او ملحقاتها زى الاوتار الى بتريط العضلة بالعظام او الاربطة الى بتربط العظام ببعضها او السوائل الزلالية الى موجودة فى المفاصل لو قلت و تعمل خشونة و غيرها كتير ؟!

-اخييييييييييييييييرا مميزات انه فعال جدا جدا جدا جدا و اثره اسرع من الادوية و كمان فعلا فى مشاكل الجهاز الحركى مش زى الادوية الكيميائية و بدون اثار جانية و دى حط تحتها مليون خط مين فينا مش بياخد الدواء الكيميائى و يتعب اكتر

[dr_buffon]

مشكور على المعلومات المبسط الجميلة يا دكتور

[DPT-Blue Phoenix]

المشاركة الأصلية كتبت بواسطة dr_buffon

مشكور على المعلومات المبسط الجميلة يا دكتور

لا شكر على واجب يا دكتور ربنا معانا جميعا ان شاء الله و الهدف الاستفادة و ربنا يسهل