سين و جيم من طلاب الفرقة الاولى

[Ahmed_Alex1]

طيب لو محتار بين طب بشري وطب اسنان (جامعه اسكندرية)؟
يعني طب بشري : مشكلتها 7 سنين وعاوز 5 ماجستير غير الجيش يكون سنك 30 .. لكن مهنة عظيمة ، وتخصصات ومجالات كتير، وبعد كدة لو سافرت بتاخد مرتب اعلى من اسنان وصيدلة ولو فتحت عيادة وربنا كرمك بتبقى حاجة جامدة

طب اسنان : مشكلتها تخصص واحد محدود وحتفضل طول الوقت واقف علي رجلك ومهنة مرهقة لكن مميزاتها اسرع واخف كدراسة ومش محتاجة سنين كتير وماديا حلوة

انا بصراحة ميال لطب بشري أكتر بس قلقان من طول المدة وخايف لا اندم بعد كدة لأن محدش جرب اى كلية
وبصراحة خايف لا ادخل اسنان وانا كنت ممكن اطلع حاجة أعظم فى طب بشري وابقى ضيعت فرصة ، يعني رأيي انك تعالج واحد مكسور وتخليه يمشى أعظم من انك تعمل حشو ولا تركيبة لواحد والامثلة كثيرة ..

وكمان نسبة كبيرة من طلبة طب بتقعد تشتم في كليتها ، عكس طلبة طب اسنان بيشكرو فيها وبيشجعو الطلبة عليها ، وتلاقى ناس من طب بتعقدك والواحد خايف يخش وبعدكدة يتعقد ويقول كلام الطلبة دول ويندم واللى يقولك حتلاقى بتاع اسنان ولا صيدلة فاتح عيادة ولا صيدلية وشغال وبيقبض ومتجوز ومخلف وانت قاعد تذاكر ومعملتش اي حاجة فى حياتك،الواحد مش عارف هل الكلام ده بجد ولا لأ، انا عاوز اخش طب بس مقلق من الكلام ده
ايه رأيك بأمانة؟