محتار تدخل طب ولا أسنان ولا صيدلة ؟ الجواب عندنا

[medoash]

المشاركة الأصلية كتبت بواسطة Ahmed_Alex1

طيب لو محتار بين طب بشري وطب اسنان ؟
يعني طب بشري : مشكلتها 7 سنين وعاوز بعدهم 5 ماجستير وجيش يكون سنك 30 مثلا .. لكن فى المقابل مهنة قيمتها عالية وبتعمل حاجة عظيمة ، وتخصصات كتير اوي ومجالات واسعة، وكمان بعد فترة البهدلة دي لو سافرت بتاخد مرتب اعلى من الاسنان والصيدلة ولو فتحت عيادة وربنا كرمك بتبقى حاجة جامدة

طب اسنان : مشكلتها تخصص واحد محدود وحتفضل طول واقف علي رجلك والام ظهر ومهنة مرهقة لكن مميزاتها اسرع واخف كدراسة ومش محتاجة سنين كتير وماديا حلوة

انا بصراحة ميال لطب بشري أكتر بس قلقان من طول المدة وخايف لا اندم بعد كدة لأن محدش جرب اى كلية
انا عاوز اسألك
* هو وظيفة طب الاسنان مملة ؟ يعني حاسس انها يا حشو وخلع و تركيبات وانتهينا على كدة وحتعيش طول عمرك تعمل نفس الشغل وخلاص ، مش حاسس ان فيه مجال انك تكبر ،فأيه النظام؟
* انا بشوف اطباء اسنان مكتوب على عيادتهم ماجستير كذا ، طيب مدام فى طب بشري و فى طب اسنان حتعمل دراسات عليا يبقى اختار الكلية اللى فيها مجالات اكتر منا كدة كدة حذاكر!! ولا فرقت فأيه ولا ايه رأيك؟
* انا اسف فى السؤال ده واتمني ما تفهمنيش غلط بس عشان اكون سألت فى كل اللى نفسى فيه انا بحس انك فى تخصصات طب بشري بتعمل حاجة أكبر قيمة من طب اسنان (يعني تعالج واحد مكسور مش بيتحرك وتخليه يتحرك طبيعي ولا تعمل حشو عصب لضرس واحد؟) فهل ده احساس صح ولا ايه وارجوك بدون تحيز؟
الفكرة انى ميال لطب بشري اكتر بس خايف لا ازهق او اتعب من المدة واقول يارتني دخلت اسنان
وخايف ادخل اسنان لا اقول انا كدة ضيعت تخصصات كتير وكان ممكن ابقي حاجة احسن
وكدة كدة فى الكليتين حتتعب وتجتهد عشان توصل لحاجة حلوة فشغلك
معلش انصحني زي أخوك

تمام بص مبدئيا انا مش هدافع عن كلية معينة عشان انا فيها .. انا كاتب الموضوع وكاتب مميزات وعيوب كل كلية من وجهه نظرى وانا قلت ان الكليات التلاتة متقاربة والفروق بينهم بسيطة والفروق البسيطة دى هى اللى بتسبب حيرة لكتير من الناس فى اختيار الكلية اللى عاوزها .

بص فى شوية معلومات عاوز اصلحهالك .
اولا ماجستير فى كلية طب مش هياخد خمس سنين ولا حاجة يعنى بياخد حدود 3 سنين
ثانيا انت لو معملتش ماجستير فى طب هتبقى ممارس عام يعنى دكتور اى كلام يشتغل فى اى عيادة فى منطقة فقيرة لكن عشان تبقى دكتور محترم على الاقل لازم تعمل ماجستير فى تخصص معين عشان تشتغل فيه والناس تثق فيك اما فى اسنان الماجستير مش مطلوب عشان تبقى دكتور محترم يعنى انت دارس كويس معظم التخصصات عشان تشتغل فيها علاطول دا باستثناء ماجستير التقويم اللى انا شايفه ضرورى عشان تبقى دكتور تقويم كويس

ثالثا عشان تشتغل برا مش هتعرف تشتغل غير فى دول الخليج وهناك تخصص طب الاسنان الاكثر ربحا ماديا والاكثر طلبا لان هناك دكاترة الاسنان قليلين ومعندهمش كفاءة ويا سلام لو معاك ماجستير تقويم هتعدى هناك اما بقية دول العالم الكبرى زى امريكا والمانيا واستراليا وغيرها مش هتعرف تشتغل هناك سواء كنت خريج طب او خريج اسنان غير اما تعمل معادله والمعادلة دى بتستغرق على الاقل تلات سنين

رابعا تخصصات الطب كلها بتهدف الى علاج الانسان وتخفيف الامه هتلاقى تفاوت بين التخصصات يعنى من اول دكتور التجميل اللى بيحسن من العيوب الخلقية ودكتور الكسور اللى بيصلح الكسور عشان يتحرك وفى اللى بيصلح الابصار عشان يشوف كويس وفى اللى بيعالج الاسنان عشان يقدر ياكل ويبقى منظرة كويس لغاية اللى بيعمل عمليات فى القلب عشان يحيي باذن الله انسان على شفا الموت ... انت ممكن تشوف تفاوت كبير بين التخصصات بس فى الاخر الانسان مش هيقدر يعيش بغياب اى تخصص منهم والا مكانش هيعملوا كلية او قسم للتخصص دا.

خامسا اللى عاوز هيبقى حاجة جامده هيبقى سواء فى اسنان او طب واللى عاوز يبقى دكتور تعبان بيعمل حاجات تقليدية هيبقى سواء كان اسنان وطب .. يعنى ممكن تدخل طب وتتخرج وتفتح عياده وتشتغل عادى واحد يجيلك عنده مغص تديله علاج واحد ابه تعبان تديله علاج على الماشى يعنى دكتور على ما تفرج وممكن تبقى دكتور كبير وتعمل ماجستير ودكتوراه وتبقى الناس عارفاك وممكن تبقى جراح مشهور وهكذا
كذلك اسنان ممكن تطلع دكتور تقليدى يحشى حشوات عادية يخلع او تركيبات عادية وممكن تاخد كورس زراعه اسنان ويبقى عندك كلينيك محترمة ومشهورة لزراعه الاسنان فقط وممكن تعمل ماجستير ودكتوراه وتبقى جراح تجميل وجه وفكين وهكذا


الفكرة المهمة بقى اللى عاوز اوصلهالك انك فى طب كدا كدا هتشتغل فى تخصص واحد بس يعد اما تتخرج اما اسنان هتشتغل فى تخصص واحد برده بس بتحدده من اول دراستك يعنى فى النهاية الاتنين تخصص واحد فى الاخر هتشتغله مع اختلاف التوقيت

وعلى ذلك المبدأ اللى انا مؤمن بيه واللى انا على اساسه دخلت اسنان قلت ما دام انا كطالب مش فارقة معايا اشتغل دكتور جلدية من باطنة من عيون من اسنان طب منا ادخل اسنان وخلاص ابسطلى ولو انا مجتهد هطلع دكتور كبير سواء فى طب او اسنان

اما بقى لو انا كنت مثلا معجب تخصص معين وليكن تخصص الباطنة ومش شايف نفسى الا فيه يبقى انا ادخل طب علاطول واتوكل على الله واسعى انى اقدر اتخصص فى التخصص دا ...

بس دى كل الفكرة وانا معاك لو محتاج استفسارات تانى