عاجل لكل واحد عايز يعرف الاجراءات و الفلوس و كل حاجه لازمه لقدرات عماره جامعه حلوان

[Asa7be Wawa]

بسم الله الرحمن الرحيم

انا حقولكم على كل حاجه انا عملتها و المعلومات اللى عرفتها على مدار الثلاث الايام اللى فاتت

أولا انت بتاخد كورس فى الجامعه ده ب300 جنيه ثلالث حصص فيه كورس حيبدأ يوم 4-7 و ده أخر واحد ده بالنسبه للكورس ممكن طبعا تاخده بره بس الجامعه مش مسئوله عن اللى انت خدته و اللى حيجيلك.. بالمناسبه الكورس و دفع الكلام ده فى جامعة اللى فى الزمالك فنون جميله

بالنسبه للتقديم للأمتحان حتروح جامعة القاهرة مكتب التنسيق حتاخد من هناك الاستماره بتاعة الطلب ديه بتدفع فيها 35 جنيه بس و الحاجات المطلوبه :

2 صورة لرقم الجلوس + لازم تجيب الأصلى معاك

1 صوره شخصيه ليك فقط ! مش أكتر ...بس علشان الأطمئنان ممكن تجيب 4 ليطلبوا منك و لا حاجه

بعد لما تدفع 35 جنيه و تقدم الورق المطلوب حيديك1- أستمارة زرقاء عليها صورتك و مختومه + 2-كتيب أصفر ملوش أى لزمه

بعدين حتروح الكليه اللى فى الزمالك فنون جميله و تقدم :

الأستماره الزرقاء ديه + 250 جنيه مصاريف الامتحان + 30 جنيه لكتاب الارشادات فى الرسم و فيه الجزء النظرى (مهم جدا )

و تقدم صوره برضو لرقم الجلوس الاصلى

بعدها حتحدد ميعاد امتحانك , الامتحانات من يوم 7-7 من الساعه 9 الى 3 أو من 3 الى 6

و حيديك وصل أحمر ده اللى حندخل بيه الأمتحان ان شاء الله

و أى استفسار انا موجود لقسم عماره

ملحوظه انا فى تالته زيكم و مقدم زيكم بلاش أستفسارات صعبه

ملحوظه أهم : التقديم للامتحان مستمر لغايه ليله الامتحان ان شاء الله

[Markkonii]

بالنسبة لكورس الكلية ، انت اخدوا الثقافة العامة؟ اصل ناس امتحانوا بيقولوا ان الثقافة جات من بره و (غششوهم)

[Asa7be Wawa]

المشاركة الأصلية كتبت بواسطة markkonii

بالنسبة لكورس الكلية ، انت اخدوا الثقافة العامة؟ اصل ناس امتحانوا بيقولوا ان الثقافة جات من بره و (غششوهم)

الثقافه العامه اللى هى النظرى نبه علينا حاجات بسيطه و قال لنا بتيجي سهله و واضحه و فى حاجات فى كتاب الارشادات ممكن تساعدنا ,و على فكره فى جامعه حلوان الأمتحان لسه مبدأش اصلا حيبدأ 7-7

[elyasmina]

هو الكورسات دى لاى حد عايز يدخل كلية الهندسة ولا للى عاوز عمارة بس؟

[Asa7be Wawa]

المشاركة الأصلية كتبت بواسطة elyasmina

هو الكورسات دى لاى حد عايز يدخل كلية الهندسة ولا للى عاوز عمارة بس؟

الكورسات ديه للى عاوز عماره من فنون جميله عماره مش هندسة عماره , اللى بيدخل هندسه و عاوز عماره مش عايز كورسات و لا امتحان قدرات اصلا

[DarkPrince]

انا معظم الامتحانات القديمة اللي شوفتها بلاقي انه مش بيسأل ف النظري خالص

غير كده بيقول بدون استعمال المسطرة ازاي ده انا اصلاً كل رسمي بالمسطرة

[Asa7be Wawa]

المشاركة الأصلية كتبت بواسطة darkprince

انا معظم الامتحانات القديمة اللي شوفتها بلاقي انه مش بيسأل ف النظري خالص

غير كده بيقول بدون استعمال المسطرة ازاي ده انا اصلاً كل رسمي بالمسطرة

الامتحانات القديمه ديه لما كانت فى ثانويه عامه دلوقتى الأمتحان مستقل فى الكليه و فيه نظرى و لازم المسطره

[fathkareem]

اجدعان هوا طريق الجامعة سالك
انا عايز اروح بس في قلك ايه رايكم
و بعدين انا مضيع رقم الجلوس و معايا اثبات حالة من المدرسة و صور من رقم الجلوس بس انما مفيش اصل ايه العمل

[Asa7be Wawa]

المشاركة الأصلية كتبت بواسطة fathkareem

اجدعان هوا طريق الجامعة سالك
انا عايز اروح بس في قلك ايه رايكم
و بعدين انا مضيع رقم الجلوس و معايا اثبات حالة من المدرسة و صور من رقم الجلوس بس انما مفيش اصل ايه العمل

بص جامعة القاهره كان فيها قلق لغايه امبارح اما فنون جميلة الزمالك مفيهاش حاجه

بالنسبه لرقم الجلوس روح بالصوره و اثبات الحاله و ربنا يسهلها

[3toor]

طيب بالنسبة للى مدخلش الامتحان و كتب فنون جميلة عمارة فى الرغبات ايه موقفه ؟؟؟؟؟

[ياسر المزين]

المشاركة الأصلية كتبت بواسطة 3toor

طيب بالنسبة للى مدخلش الامتحان و كتب فنون جميلة عمارة فى الرغبات ايه موقفه ؟؟؟؟؟

عادى مفيش مشكلة اذا كان مفيش رغبة

[hussam21]

250 جنيه مصاريف الامتحان دول غير 300 جنيه مصاريف الكورس يعنى انا المفروض ادفع 550 جنيه ؟

[waledmagdykefafy]

لوسمحت ممكن أعرف هى بتاخد مجموع كام

[ياسر المزين]

المشاركة الأصلية كتبت بواسطة waledmagdykefafy

لوسمحت ممكن أعرف هى بتاخد مجموع كام

بتاخد مجموع من 89% الى 93% حسب التنسيق

[.Maha.]

سؤال النحت بيكون عبارة عن ايه بالظبط لأن ف دمياط هما محدش عارف السؤال دة عبارة عن ايه وبيتدرس ازاي ؟ وبالتالي مش عارفة آخد كورس للامتحان :/