أنا حزينه

[الأستاذة / أم أمل]

أخوانى أعضاء فريق الأسطوانات التعليمية

الحقيقة أنا حزينه لعدة أسباب

- أننا لا نعمل بروح الفريق يعنى كل واحد لوحده بحس ان اللى بيعمل حاجه

بيعملها وخلاص لان هذا هو المطلوب وبس من غير ما يسال احنا وصلنا لحد فين

- كمان أحنا بندخل يوميا مفيش أى تجاوب ولا تفاعل مع الموضوعات عملت موضوعين

واحد للاقتراحات والثانى لمجموعة الباوربوينت عشان نقول لهم الشغل الجديد

كيف يتم عمله لتلاقى الأخطاء فى اسطوانه اللغة العربية

وأرسلت لهم بأنهم يدخلو ويشوفو التعليمات الجديدة

- مش عرفين ايه اللى تم وايه اللى لسه كل واحد بيعمل لوحده

فيه أيه أنه اللى مش عارف شيء يسأل عليه ويتعلمه فيه أيه أن اللى خلص شغله

أساعد اللى لسه فيه أيه لو أقول رأى أو أقتراح شيئ أفضل من اللى بنعمله

ونسمع له كلنا

أحنا بعمل لوجه الله واتمنى أنه يحتسب عند الله علم ينتفع به

والله العظيم أنا حاسه أنى تعبت من كثرة الرسائل اللى ببعثها اليكم وكنت

فاكرة أنى لما أطالب بقسم ده هيسهل العمليه لكن للاسف مفيش حد

بيدخل والا اذا كان هياخذ شغل أو هيضع شغل وده بناء على الحاح منى

فى الرسائل الخاصة

فيه حاجات كثيرة مطلوب أخذ رأيكم فيها لكن لم اجد أحد بالرغم من دخولكم

يوميا المنتدى

لابد من وضع طريقة للاتصال والتعاون فيما بيننا ونكمل اللى ناقص لان نجاحنا

كفريق يعتبر نجاح لكل واحد فيكم وأعتبرونى أقل واحد فى الفريق ومستعده

لتنفيذ أى طلب يطلب منى

أتمنى اننا ننجح لوجه الله تعالى

ياريت يبقى فيه موضوع فى قسم الفريق ندخل نشارك فيه لما ندخل المنتدى القسم

ده بتاعنا أحنا ربنا يعلم أحنا طلبنا أنه يكون لنا قسم خاص عشان نحافظ على المادة العلمية

والشغل اللى بتتعبو فيه

وأنا تحت أمركم ولو الخطأ فيا أنا أنا على أستعداد لسماع النصيحة وناخذ برأى الأغلبية

ولو فيه حد أجدر منى فى تحمل المسئوليه أنا مستعده أنى أتنحى عن ذلك العمل

المهم أننا نعمل بروح الفريق

وأنا معكم فرد فى مجموعه

كنت بسمع الناس بتقول أن العمل الجماعى فى مصر لا ينجح

يا ترى ده حقيقى ولا

ياريت أشوف رأيكم وتفاعلكم فى المنتدى

أختكم فى الله أم أمل

[mfa1]

أختي الفاضلة الأستاذة /أم أمل
يسعدني المشاركة في موضوعك و تقبلي رأيي المتواضع
أنه لا حزن على عمل نقوم به لوجه الله و نبتغي فيه الخير للكل
روح الفريق و إن وجدت لا أعتقد تكون قوية على الأثير في شبكة النت لبعد المسافة و بعد معظم أهم لغات التفاهم و التواصل و منها النظر و العين و غيرها فنحن نريد أن نعمل عمل جماعي و نحن غير مجتمعين في مكان واحد و لا نرى بعضنا و كلنا نفس بشرية متنوعة لها ما لها و عليها ما عليها فهي تحتاج لمايسترو يوحد اللحن و الإيقاع و ينظم التناغم و التفاعل فيما بين الأعضاء ككل و ذلك هو حضرتك لا خلاف على ذلك لكن من يكون محور العمل و قلبه هو القائم على تجميع العمل و وضعه بالأسطوانة التجميعية لأنه هو الذي يصمم واجهة الأسطوانة و يقوم بعمل تبويبها و يعرف واجهتها و ما تحتاج لما يوضع في الآسطوانة من موضوعات و ما يناسب حجم الأسطوانة سواء ستكون cd أو dvd فهو يقوم بعمل تصميم لها على الورق و يعرف أقسامها و أبوابها و كم تتحمل كواجهة تفاعلية أو مجلدات داخلية و ملفات و عليه فيجب على القائم على هذا العمل أولاً من بداية التصميم أن يلقي الضوء على الأسطوانة و تصميم مبدأي لها و كم تتحمل من الموضوعات و يعرض المطلوب و يعرض على بقية أعضاء الفريق امداده بتلك المواد و يكون قد سبق أن عرض مطالبه حتى يتثنى لهم تجهيزه و يعمل هو في تصميم هيكل الآسطوانة و ينتظر امداده بالمواد لكي يضعها في مكانها المعد مسبقا منه لها و ذلك يكون في البداية كعرض شامل لكل أفكار العمل و ما يتطلب من مواد مع عرض كامل للعمل و كل ما يخص العمل بشرح واف حتى يفهم كل فرد دوره في العمل من البداية و يستعد له و يساهم به فأنا أرى المجهود مشتت و غير مركز
1- عرض العمل ككل كواجهة و معلومات كافية عنه
2- المتطلبات و المواد و العناصر ككل حتى يتثنى التجهيز لها و يحدد لكل فريق من فرق الدعم المتطلبات منه مثلاً فريق الجرافكس مطلوب منه كذا و كذ و إلخ..)
3 يقوم كل فرد في الفريق بوضع المادة الجاهزة في مكان التفاعل بين فريق الدعم
4- يعرض القائم على التجميع في نفس المكان ما تم إنجازه و المتبقي و المطلوب كتابة
أشكر لك اهتمامك باللإسطوانة و خروج العمل لحياة و نفع الناس به و كلنا فريق دعم لك و للخير وفقك لله لحب الخير و العطاء أنت أهله

[وردانى]

استاذة ام امل
احنا فريق عمل كلامنا فعل
اقترح عمل اجتماع يومى الساعة 10 مساء كل يوم
وتسليم كل مجموعة خطة زمنية محدد الوقت والمهام والاشخاص
عند بداية العمل وتسليم العمل النهائى لمدير الفريق
وفقنا الله واياكم

[مجدى مختار]

الأخت الفاضلة أم أمل
أنتم بدأتم عملا الهدف منه هو نشر العلم بطريقة صحيحة وهذا شيء عظيم وأظن أنَّ من كُلف بأمر ما تأخر عنه وإن كان هناك بعض التقصير من حيث الموعد أو سرعة التنفيذ يعني لكل واحد ظروفه وأظن أنَّ المجموعة كلها ساهمت من قبل بأعمال في المنتدى ولا يريد واحد منهم مقابلا من أحد إنما الأمر لله فعملك لن نتأخر عنه ولا تظني بأنَّ الناس أهملوا ولكن لنأخذ أعذارهم ولا تنسي أننا في الدراسة بمعنى أنَّ الوقت قليل بعد قضاء المدرسة والعمل الخارجي ومع ذلك لن نقصر إن شاء الله تعالى.
وجزاكِ الله خيراً وكل من ساهم من هذا الفريق
كل عام أنتم جميعاً بخير .

[مجدى مختار]

استفسار
هل ممكن الاسطوانة تجمع كلها وترفع أم أنها ستظل أجزاء متفرقة كما رأيناها ؟
كذلك هناك موضوعات للغة العربيَّة لم تكتمل كالقصة والقراءة المتعددة .

[محمد محمود بدر]

معنى ان حضرتك حزينه دا شئ يزعلنا كلنا
احنا مقصرين ؟ نعم :
لكن لا تدعى الاحباط يدخل الى نفسك ممكن التقصير اللى مننا يكون من كتر ضغط اشغال تانيه علينا
انما لا تيأسى فالموضوع جيد وبعون الله سوف نفعل قصارى جهدنا للخدمة لوجه الله
واشكر لك حسن تعاونك مع الجميع ومع العلم ان رسائل حصرتك الكثيره شرف لنا جميعا او على الاقل شرف لى شخصيا

[samir aly]

التقصير غير متعمد من الجميع ولكل واحد عزره وأرجوا أن نتقبل أعذار وظروف بعضنا
ولكم الشكر جميعا

[خادم المسلمين1]

المشاركة الأصلية كتبت بواسطة وردانى

استاذة ام امل
احنا فريق عمل كلامنا فعل
اقترح عمل اجتماع يومى الساعة 10 مساء كل يوم
وتسليم كل مجموعة خطة زمنية محدد الوقت والمهام والاشخاص
عند بداية العمل وتسليم العمل النهائى لمدير الفريق
وفقنا الله واياكم

فعلا اقتراح جميل

وبرضه نلتمس الأعذار لكل أعضاء الفريق الأيام دى أيام دراسة ودروس

المهم نحاول نتواجد دائما ولو كل يوم نصف ساعة نتابع مع باقى اعضاء الفريق

[أ/محمد ابراهيم]

اقتباس:
المشاركة الأصلية كتبت بواسطة وردانى
استاذة ام امل
احنا فريق عمل كلامنا فعل
اقترح عمل اجتماع يومى الساعة 10 مساء كل يوم
وتسليم كل مجموعة خطة زمنية محدد الوقت والمهام والاشخاص
عند بداية العمل وتسليم العمل النهائى لمدير الفريق
وفقنا الله واياكم

اقتراح جيد اخوانى الافاضل
ولكنى ارى ان يكون الاجتماع ثلاثة ايام اسبوعياً لنترك فرصة للجميع للعمل
يتم عمل موضوع مثبت فى القسم يكون بعنوان " اجتماع السادة اعضاء الفريق للتشاور
تقوم الاستاذه ام امل بوضع الموضوع وتثبيته على ان تنوه فى بدايته عن مواعيد الاجتماع والثلاث ايام التى اقترحتهم
ويبدأ الفريق فى التشاور من خلال هذا الموضوع فى نفس الوقت
على ان يكون زمن الاجتماع مفتوح اى لا نحدد مدة محددة حسب ما تنتهى المناقشه
وذلك يؤدى الى انه اذا تغيب عضو لعذر ما يستطيع الدخول الى الموضوع ومتابعة كل ما تم فى الاجتماع
بارك الله فى حضراتكم

[الأستاذة / أم أمل]

المشاركة الأصلية كتبت بواسطة مجدى مختار

استفسار
هل ممكن الاسطوانة تجمع كلها وترفع أم أنها ستظل أجزاء متفرقة كما رأيناها ؟
كذلك هناك موضوعات للغة العربيَّة لم تكتمل كالقصة والقراءة المتعددة .

ان شاء الله ستكون أسطوانه مجمعه كامله

اما بخصوص موضوعات القراءة والقصة

انا طلبت من الاستاذ محمد صلاح اكمال الناقص

وجزاك الله خيرا لتعاونك مستر مجدى مختار

[الأستاذة / أم أمل]

جزاكم الله خيرا جميعا بس ياريت لما تدخل المنتدى

تدخل القسم هنا وتتفاعل معاه

ونشوف ايه المشاكل اللى ظهرت وكيفية حلها

لاننا فريق واحد

تحياتى لكم جميعا

[مجدى مختار]

بارك الله في الجميع
وجزاكم خيراً
وتقبل منا جميعاً صالح الأعمال.

[samir aly]

أنا خلصت جزء من التاريخ للصف الأول الاعدادي بور بوينت أرجو أن ينال اعجابكم وياريت أي عمل آخر يتم تكليفي به يكون لغة عربية http://www.4shared.com/file/aTdpXDLY/___online.html

[الأستاذة / أم أمل]

جزاك الله خيرا مستر سمير وجارى التحميل