حوار مع متفوق/ة ف المنتدى ...

[THE CodeR]

اولاً انا مجموعي 94.27% ومجبتش 95% ولكن نور الايمان طلبت وانا اجبت

"ﺍﻳﻪ ﺍﻛﺘﺮ ﻣﺎﺩﺓ ﺑﺘﺤﺒﻬﺎ ﻭ ﻟﻴﻪ ؟"
اكتر مادة بحبها الرياضيات بعدها الفيزياء ، لا الرياضيات بتعبر عن تفكير الانسان في ابسط صورة ليه وطبعاً فيها تشغيل دماغ كتير وانا مش غاوي حفظ علي اي حال ( حتي تقريباً قوانين الرياضة نفسها مش بحفظها )

"ﺍﻳﻪ ﺍﻛﺘﺮ ﻣﺎﺩﺓ ﺑﺘﻜﺮﻫﻬﺎ ﻭ ﻟﻴﻪ ؟"
اكتر مادة بكرهها هي الفرنساوي .....لاني بكرة اللغات ماعدا العربي لانه لغتي ولانجليزي لاني محتاجه غصب عني فمينفعش اكرهه ....اضافة لاني بكره الحفظ علي اي حال
والعربي مش بحبه كمادة دراسية لاني لما اطلعت علي قصايد شعر كتيرة وكده لقيت ان الشعر اللي عندنا بالنسباله ركيك وفي حاجات احلي بكتييييييييير جداً منعرفش عنها حاجة ...مثلاً لو قارناه بمناهج الكويت او السعودية فعلاً هنكتشف ان اللي عندنا نكش فراخ بالنسباله ....في الكويت بيدرسوا علم العروض في العربي وفي السعودية بيدرسوا "عفت ذات الاصابع فالجواء" قصيدة في غاية الروعة لحسان ابن ثابت ... وفي الكويت القصيدة بتاعت صوت صفير البلبل ودي من روائع الادب العربي واحنا قاعدين ندرس المقامة الحلوانية ونصوص تانية اقول وصف ليها انها تافهة وركيكة ( الا قليل منها)

"ﻧﻔﺴﻚ ﺗﻄﻠع ﺍﻳﻪ ﻭ ﻟﻴﻪ ؟"
ده سؤال اجابته طويلة جداً بس عموماً نفسي اكون دكتور في الفيزياء في جامعة القاهرة ( اشمعني القاهرة؟ ) عشان انا هدفي اني اعمل تغيير في عقول الشباب بشكل كامل وشايف ان الموقع ده افضل موقع عشان اعمل اللي في دماغي

"ﺑﺘﺄﻳﺪ ﻣﻮﺿﻮﻉ ﺍﻟﺴﻬﺮ ؟"
مش بحب السهر وان كنت بسهر كتير

"ﺑﺘﺬﺍﻛﺮ ﻋﻠﻰ ﺣﻮﺍﻟﻰ ﻛﺎﻡ ﺳﺎﻋﺔ " ﻣﺎﺗﺨﺎﻓﺶ ﺍﺣﻨﺎ ﻫﻨﺎ
ﺍﺧﻮﺍﺗﻜ ﻤﺶ ﻫﺎﻧﺤﺴﺪﻙ " ؟"
بصراحة ده سؤال بتسئله طول السنة واجابته محددة
في الطبيعي ايام الدراسة مذاكرتي لما اصفيها من الدلع واللكاعة بتصفصف علي ساعتين او تلات ساعات غالباً بعمل فيهم واجب الدرس بتاع تاني يوم ....اما الرياضيات فعشان انا بحب اطول واشتغل بدماغي ممكن اخد فيها تمن ساعات مثلاً

"ﺍﻳﻪ ﺍﻛﺘﺮ ﻭﻗﺖ ﺑﺘﺤب ﺗﺬﺍﻛﺮ ﻓﻴﻪ ؟"
بعد العشاء بالذات احلي وقت بالنسبالي لغاية الفجر

"ﺍﻳﻪ ﺍﻛﺘﺮ ﻣﺸﻜﻠﺔ ﺑﺘﻮﺍﺟﻬﻚ ﺍﺛﻨﺎﺀ ﺍﻟﻤﺬﺍﻛﺮﺓ ؟"
معنديش مكاااااااان للمذاكرة ودي كارثة فظيعة ومؤثرة جداً ....يعني مرة عالسرير ومرة عالكنبة ومرة عالارض ...بس بعد ما انتقلت للعيش عند عمتي لقيت مكان مناسب للمذاكرة (السرير برضه)

"ﻣﻜﺎﻥ ﺍﻻﻣﺬﺍﻛﺮﺓ ﻋﻨﺪﻙ ﻣﻨﺎﺳﺐ ؟"
مذاكرة السرير مش حلوة اوي لان الطبيعي ان البني ادم يذاكر بورقة وقلم علي الاقل في الرياضة والسرير لا يتيح ذلك بصورة مثالية

"ﺍﻳﻪ ﺍﺧﺒﺎﺭ ﺍﺻﺤﺎﺑﻚ ﺑﻴﺸﺠﻌﻮك ﻭ ﻻ ﺍﻳﻪ ؟"
ممممم يعني مش دايماً بس لما كنت انشغل بموضوع علمي خارج المهج كان صحابي اللي في كليات بيشجعوني عليه وكده ..... بصراحة قليل اوي اللي كان يشجعني علي منهجي

ﺍﺭﺗﺎﺣ ﺷﻮﻳﺔ ﻛﺪﺍ ﻭ ﺧﺪ ﺩﻭﻭﻝ
*" ﺍﻳﻪ ﻫﻰ ﻫﻮﺍﻳﺎﺗﻜـ ؟"
هواياتي كتيييييييييير ومنها : القراءة (الفيزياء والرياضيات وبعض مواضيع التاريخ والشعر ) والكمبيوتر واشتغلت فترة في البرمجة وبحب الرسم وكتابة الشعر (محدش يطلب حاجة انا لسه مبتدئ ) والرياضة و.... تقريباً كده هوايتي اي حاجة كويسة والحمد لله

*" ﺍﻳﻪ ﻃﻤﻮﺣﻜـ ؟ ﻭ ﺍﻳﻪ ﻫﻮﺍ ﺣﻠﻤﻜـ ؟"
عندي 3 اهداف محددة كنت عاملهم في توقيعي لفترة كده
1- حلمي اني اوفر للعرب والمسلمين كلهم الدرجة او السلمة الاولي من كل العلوم الاساسية زي الفيزياء والرياضيات والكيمياء واللغة و.... بحيث تكون القاعدة الاساسية اللي يحتاجها اي طالب علم بالعربي ومن ثم اوفر كتب متخصصة ليهم بحيث يصبح ان اللي عايز يتعلم مش هيحتاج غير اجتهاد وعزيمة
2- بعد ما احقق اول هدف بفكر في شئ يقوي شوكة المسلمين سواء كان سياسي او اقتصادي او عسكري ... اياً كان يعني
3- بعد الهدف التاني احلم ان شاء الله ان اكون ساعداً من السواعد التي ستمتد لتحرير القدس إن شاء الله ولي في ذلك نظرة
"اقـتـﺮﺍﺣﺎﺗﻜـ ﻋﺸﺎﻥ ﺍﻟﺘﻌﻠﻴﻤـ ﻑ ﻣﺼﺮ ﻳﺘﻐﻴﺮ ؟"
ده مشروعي ان شاء الله
التعليم في مصر عامل نجاحه الاساسي هو المدرس...وبما ان المدرس اصبح في الدرس فقط فأنا لو وفرت مدرس بيشرح صح بطريقة مسلية للطلاب هبقي كده كسبتهم
باختصار بفكر في نظام تعليم الكتروني موازي لنظام التعليم الحكومي بس يكون الالكتروني مشتمل علي المنهج الدراسي لكن مشروووووح بطريقة صح علمياً
في هذه الحالة ممكن لما الطالب يفهم هو بيدرس ايه هيستفيد من ثانوي بعيداً عن هو دخل كلية ايه
وموضوع الكلية ده بقي بيحتاج تغييرات جذرية في النظام الحكومي عشان يتصلح
وكنت مرة في الوزارة ( صحابي عملوا مظاهرة قدام الوزارة ودخلوني ) وكلمت الاستاذ محمد سعد مساعئ الوزير تقريباً والاستاذة نسيبة وكيلة وزارة التربية والتعليم ووضحتلهم وجهة نظري فيما يخص التعليم وده تحقق جزئياً في النظام الجديد

*"ﺍﻳﻪ ﺍﻟﻠﻰ ﻧﻔﺴﻜـ ﻳﺘﻐﻴﺮ ﻑ ﻣﺼﺮ ؟"
نفسي المصري يبطل يفتي ويتكلم بدون علم ....
ولو سكت من لا يعلم لقل الخلاف وساد الهدوء

لو ينفع اختار العضو اللي بعدي هختار اينشتاين ... عايز اسمعه هذا العبقري