كل ما تريد معرفته عن طب بنها.مرجع شامل للنظام الجديد

[ArabianPDA]

السلام عليكم ورحمه الله وبركاته

أزيكم أولا .. ؟
مبروك علي المجموع،مبروك علي الكليه،مبروك علي دخولكم مرحله جديده تماماً بكل ما تعنيه الكلمه و مبروك انكم هتاخدوا اللقب ومش هيتقالكم من انهارده غير يا دوك

طبعاً لأن طب بنها بالذات فيه خلاف كبير بينها وبين طب شبين وكتير بيترددوا دي ولا دي
حبيت اعمل موضوع وخصوصا ان دفعتي هيا اول دفعه اتطبق عليها النظام الجديد الي هيتطبق ع السنين الجايه بأذن الله

[ArabianPDA]

تاريخ الكليه..ترتيبها العالمي..هيا فين اصلاً
•تعتبر كلية طب بنها تاسع كلية طب من حيث تاريخ إنشائها وقد خطت الكلية خطوات واسعة تفوق عمر إنشائها في جميع المجالات المتطورة لمسايرة العصر الحديث.
وتضم الكلية :
قاعة اجتماعات مجلس الكلية: وتوجد بالدور السابع وتم تجهيزها بأجهزة الصوتيات المتقدمة.
مكتبة الكلية: وتقع بالدور الثامن ويوجد بالمكتبة خدمة الانترنت وأجهزة الكمبيوتر وماكينات للتصوير وتحتوي المكتبة علي أحدث المراجع والدوريات العربية والأجنبية .
قاعة الامتحانات الكبرى: وهي مكيفة وتتسع لعدد ( 350 طالباً ) وافتتحت عام 1999 بالدور الأرضي .

مركز التعليم الطبي : بالدور السابع ومجهز بكافة الوسائل التعليمية والصوتية والضوئية الحديثة.
المدرج الكبير الأول الذي يتسع لخمسمائة طالب وطالبه.
المدرج الكبير الثاني. يتسع لخمسمائة طالب وطالبه



المستشقيات الجامعية ببنها تضم 19 قسما إكلينيكيا بخلاف الوحدات المتخصصة مثل

1- وحدة الغسيل الكلوي التي تحتوي على ثلاثين ماكينة غسيل كلوي تعمل ثلاث دوريات طوال الأربع والعشرين ساعة لخدمة المرضي في محافظة القليوبية والمحافظات المجاورة.
2- وحدة المنظار الشعبي بقسم الصدر للتشخيص والعلاج وأحدث وحدة لوظائف التنفس وأبحاث الحساسية.
3- وحدة مناظير الجهاز الهضمي التي تعمل طوال الأربع والعشرين ساعة لحقن دوالي المرئ وحالات النزيف وأيضا جراحة المناظير لاستئصال المرارة بالمنظار وتوجد أيضاً
4- وحدة جراحة مناظير النسا والتوليد
5- وحدة التكاثر البشري وأطفال الأنابيب
6- وحدة البيولوجيا الجزيئية: وتقوم بجميع تحليل PCR والأبحاث الخاصة فى مجال التكنولوجيا الحيوية والبيولوجيا الجزيئية
7- وحدة السموم الأكلينيكية
8- وحدة قلب الأطفال
9- وحدة جراحة مناظير الجهاز الهضمي والبطن
10 - وحدة المناعة الإكلينيكية ووحدة كيمياء الغدد الصماء .
11 - وحدة الأشعة المقطعية بالكمبيوتر.
12- وحدة رعاية الحالات الحرجة: التي تضم 36 سريراً للعناية المركزة مزودة بالمونيتور وأجهزة التنفس الصناعي
13- وحدة الرعاية المركزة للقلب بقسم القلب ووحدة العناية المتوسطة بقسم الباطنة العامة .
14- وحدة قسطرة القلب و أحدث جناح لعمليات القلب المفتوح.




الكليه موجوده خلف مستشفي بنها الجامعي..بمعني.
لو انت من بنها اركب اهرام او اشاره وانزل عند الاشاره هتلاقي المستشفي خش في الشارع الي جنبها عدل وهو مميز بناس بيحششوا كده
لو من المنوفيه الي اعرفه بيركبوا موقف وبعدين اشاره او اي عربيه رايحه بنها "اسمه الكوبري برضه"

[Dr/Reem2011]

هههههههههههههههههههههههه
موضوع مميز بس السؤاااااااااااااااااااااال
انت جيبت المعلومات دي كللها منين؟؟؟؟؟

[Dr/Reem2011]

انا حاسه انك شويه هتقوووول الكليه مبنيه بكام طوبه وكل طوبه فيها كام خرم!!!!!!!!!!!!
هو انتوا كانوا بيدوكوا ايه في الكليه دي بالظبط؟؟؟؟؟؟؟؟؟؟

بس برضو طب شبين هي البريمو

[ArabianPDA]

الدراسه..والمواد

بالنسبه لأول يوم عشان بجد بيبقي فيه رهبه وهتحس ان المكان غريب عليك
الشعور ده عاادي وهتحسه اسبوع وحتي المدرج هتبقي قاعد فيه حاسس انك مش مرتاح هنا
عادي جداً
أول يوم اعمل حسابك تروح هناك وتوصل الساعه 8 لأن اتحاد الطلبه غالبا بيعمل حفله لكل دفعه جديده
وهتستلم بره ورق كتيييير بيقولك تعمل ايه وخريطه للكليه من اسر الكليه برضه يوضحلك احسن الكورسات وحجات كتير.
هتخش اول يوم اتعرف علي الناس ويبقي احسن لو ليك ناس تعرفهم اصلا اتكلم معاهم عادي في الساحه وبعدين هتلاقي الناس بتجري ع المدرج اجري معاهم
ومتفكرش ان الي هيحجز مكان يبقي ليه لاااااا اصلا اسبوع ومحدش هييجي الكليه تاني
البنات بس هما الي بلاقيهم احيانا في المدرجات الي قدام بالذات بالحجز لكن الولاد عادي
والمدرج كبييييير علي العدد الي داخل وهو بتاع 400 تقريباً في الدفعه
بيبقي التقسيم مدرج بنات ومدرج ولاد ومدرج قدام بنات وورا ولاد

هتخش هيخش وراكم "دكتور" انسوا كلمه استاذ دي خااااااالص
هيكلمكم بالعربي عادي جدااااا ويقلكم كلمات تهنئه ليكم وغالبا هتكون دوك نجلاء الي هتديكم جنرال اناتومي "تشريح عام" ودي بجد من اروع الناس الي هتتعاملوا معاهم بجد
وعلي فكره..
طب بنها طب عائله اوووووي الدكاتره هيعرفوكم ويصاحبوكم مش نظام الخشونه الي في كليات تانيه ومفيش حاجه اسمها سحب كارنيه الا في حالات نادره جداااا
بالنسبه للكارنيهات هتتصوروا صوره ع الكمبيوتر عشان الكارنيه العام ومحتاجين 4 صور غير بتوع التقديم عشان كارنيه كل قسم الي هياتخد بيه الغياب.

خلو بالكم المحاضرات مفيهاش غياب بس السكاشن عليها غياب ومهمه

لما تخلصوا اول يوم هاتو الكتب الي الدكاتره الي دخلوا حددوها أو لو هتاخدو كورسات مفيش مشاكل
ودي المكتبه بتاعتنا

المنور في الصوره ده عم بكر
هتسمع الاسم ده كتير بصوا كتب تلاقي مساطر تلاقي كروت شحن تلاقي طباعه تلاقي لو طلبت اييييييه عند بكر هتلاقيه

هتحتاج ايه اول ما تخش الكليه؟
بالطو ابيض.
بس ولا فورسبس ولا بايسبس احنا مش بتوع الحجات دي
هو البالطو ومش كله هيجيبه كمان

في البدايه السكاشن هتمشي مع المحاضرات
وكل سكشن هتاخدوه في معمل القسم
ودي الاقسام


المشرحه "سكشن الاناتومي"


قسم الفسيولوجي


قسم الهستولوجي
"طبعا وقت التصليحات بس القسم برضه معفن"


قسم البايو "الكيميا"


وكل مجموعه بتتقسم علي ايام محدده انت اول ما تخش خش علي موقع الكليه وشوف انت رقم كام وفي جروب ايه
هما غالبا أ ب ج د
أ ب ولاد
ج د بنات
وبيبقي الموضوع بالتبادل يعني يوم الاربع أ تشريح ب هستولوجي ج بايو كده يعني
التشريح بتاخد سكشنين في الاسبوع
البايو سكشن واحد
الهستولوجي سكشن واحد
الفسيولوجي سكشن كل اسبوعين

[ArabianPDA]

خلصنا من أول يوم..
المواد بقي
بصو يا جماعه احنا في طب بنها "طب متميزه موووت طبعا" شغالين بنظام الترم
يعني هتاخد حبه الترم الاول تنساهم وتاخد حبه الترم التاني
عندكو 4 مواد
اناتومي Anatomy تشريح
فسيولوجي physiology وظائف اعضاء "ماده عثل عثل عثل"
هستولوجي Histology علم الخلايا
بايوكيميستري Bio كيميا عضويه طبيه

انا هتكلم بالتفصيل عن الترم الاول لأن ده الترم الي بجد هتتعبوا فيه الترم التاني هيكون عضمكم نشف وهتمشوا في الكليه لوحدكم حلو اوي


التشريح:
عليكم الترم الاول 3 برانشات
جينيرال اناتومي .. هتدرسوا فيه حجات كتيييييييير يعني حته من كل حاجه في التشريح
انوع العضلات..الغضاريف.المفاصل.العضم.انواع الحركه في الاناتومي.الجهاز الدوري

وهو بياخد شهر في دراسته وهايف موت بس فيه ملحوظه
نصيحه ذاكره كويس لسبب "هو مش مهم"
بس بييجي منه في نظام الترم درجات كتير بتاع 17 درجه من 67.5
وبجد هيفيدكم قدام ومنه هتنموا حصليتكم اللغويه الطبيه اوووووي
فهات قاموس اطلس اليكتروني بجد رووووووعه بس العادي سيبك من الطبي
وفيه قاموس مطبوع ب 30 جنيه بتاع دوك جاب الله بس بحبوش عن نفسي

الكتاب بتاع القسم هو كتاب دوك عبد الونيس الاودن الاب الروحي للقسم
بتاع 120 صفحه
هيكرهوك في عيشتك بس صدقني كله بيعدي

امبريولوجي embryology علم الاطفال وازاي اتخلقت وكده:
هو هايف وسهل جداااااا بس الاسماء عشان كلها لاتيني هيرخم معاك
ونصيحه اوعي تذاكره من كتاب القسم ذاكره من مذكره دوك ماجد
كتاب القسم جرنان للاسف وهيتعبك عشان تجيب درجات

الابر Upper limb :
التشريح الي بجد بقي وجارات وايد مقطوعه ويجيبولك جثث بقي الشغل الي بجد

الابر الي هو الدراع كلها وخد معاها الصدر كل ده اسمه في التشريح upper limb
هو سهل جدااااااااا بس عايز مثابره عشان اسماء العضلات كتييييير
بتاع 40 عضله وكل واحده بتعمل ايه وجايه منين ورايحه فين فعايز ترتيب افكار
ونصيحه ذاكره من سامح دوس بجد كاااااااامل وكتاب قمه في وضوح المعلومه

النظام هيبقي هتبدأ بالجنرال وبعدين بعد ما تخلصه عدل هتمتحن امتحان بينضاف للمجموع عليه
وبعدين هتشتغلوا الامبريولوجي مع الابر بالتوازي
وهتمتحنوا عليهم الاتنين قبل الفاينال "امتحان الي عليه درجات كتيييير فعلاً"

الفسيولوجي :
اجمل مواد طب واحلاها والماده الي بجد لما تزهق هتقول ما اقرا حبه فسيولوجي
مع انه ماده عملاقه اد الاناتومي بس رائع دي اقل كلمه توصفه

عليكم 4 برانشات:

1.General Physiology :
كله من الثانوي وحجات سهله جداااااا بجد يعني النقل النشط والماء في الجسم حجات هبله يعني
وبييجي منه في الامتحان

2.Blood:
هتاخد فيه الدم والدم بيتكون فين وازاي وايه عيوب الدم الي ممكن تبقي موجوده وازاي تعرف دمك نوعه ايه والمناعه ومواضيع جميله واحلي ما فيه العملي
هتعملوا تجارب راااااائعه فيه وسلهل جدا ودرجاتها مضمونه

3.Auto-Nervous system:

هتدرسوا فيه الجهاز العصبي اللا اردي وبيحصل ازاي الفعل المنعكس وحجات يمكن هتكون رخمه بس بالتكرار هتعدي والدكاتره عندنا شاطرين في توصيل المعلومه

4.Nerve and Muscle:
رخم وطويل
وعيبه بيتضغط في الآخر
وغالبا نصه هيتذاكر قبل الامتحان لأول مره بس عادي


هستولوجي:
ارخم مواد طب وسئيله وهتلاقي كله بيكرهها
هتدرس الخلايا وشكلها وحجات عنها ورخامته انه حفظ بس مفيش اي فهم

هتدرسوا 5 برانشات:
1.Micro techniques :
هتدرس ازاي تعمل سلايد وتشوفها ع الميكرسكوب وايه انواع الميكرسكوبات
كلام رغي كده

2.Cell Biology:
هتدرس ايه هيا الخليه وبتتكون من ايه وازاي الخليه بتتغذي وهتاخد عضيات الخليه عضيه عضيه بالتفصيل وبتعمل ايه وشكلها ايه
EM يعني تحت ال Electron Microscope
LM تحت الميكرسكوب الضوئي Light Microscope

3.مش فاكر اسمه بس هو بتاع الانقسامات وازاي الخليه بتنقسم وايه هو التحور في الخلايا الMutation وهتدرس حالات عمليه عليها وازاي بتحصل

4.Epithelium :
هتدرس ايه هو الابيثليم وانواعه وموجود فين وتصنيف الانواع وهتاخد حجات عن الjunctions وهيا يعني اماكن مزنوقه بين الخلايا القريبه

5.CT نسيج ضام :
هتاخدوا انواعه وتركيب كل نوع وغالبا بيتحذف منه شويه

المهم في الهستو هو الرسم الرسم مهم جداااااا ولازم تحضروا السكاشن عشان يعلموا ترسموا ازاي


البايو:
ماده سهله وصغيره واسهل حتي من كيميا الثانوي بكتير
العملي بتاعها عباره عن تجارب هتعمولها في المعمل مليون مره وهيديكو في الامتحان محلول تقول ايه ده .. بس كده
وعلي فكره
التجارب بيسيبوكوا ممكن بعد ما تعملها تخلي زميلك يتأكدلك عااااااادي وحتي تسأل الدوك عادي

عليكم 4 برانشات:
1.Physical Chemistry:
هتدرس انواع المحاليل والBuffer يعني لو كميه حمض دخلت جسمك جسمك بيعمل ايه والعكس صحيح
وانواع الانتقال وهو سهل جداااااا ودوك عوض دوك عسل بجد وهيسهلكوا الموضوع

2.Carbohydrate:
برانش سهل اوووووي في اوله بس آخره رخم وهو بيتكلم عن النشوايات
انواعها ووظائفها وهيا موجوده فين وانواع السكر وموجود فين
واهم حاجه تحفظ الصيغ وتكررها كتير

3.lipids:
الدهون هتدرس كل حاجه الدهون هيا موجوده فين وانواعها وبتخش في تركيب ايه
وغالبا نص الصيغ بتتحذف بس لازم تحضر او تخلي حد يقولك ايه الملغي

4.Minerals :
المعادن هتدرسوا المعادن الي جوه الجسم و90% منه بيتلغي وهتاخدوا 3 معادن بس والدوك هتحددهم وقتها وبيتاخد آخر حاجه

[ArabianPDA]

الامتحانات
كليتنا فيها 5 انواع امتحانات لسنه اولي

1.امتحانات المدرج ودي غالبا كله بيغش من بعضه فيها
وبتبقي عشان الدوك يجبر الناس تحضر وممكن يعملها مفاجئه!
بس غالبا مبتحصلش محصلتش غير مره واحده

2.امتحانات اعمال السنه:
بتبقي علي كل برانش كبير وبيبقي عليها نصيب من اعمال السنه بس مش كل اعمال السنه
اعمال السنه منهم ابحاث وحجات كتير يعني وحضور سكاشن وكده

3.امتحانات العملي:

بتبقي كالتالي.
التشريح:بتخش علي جارات وعضم "يعني ايه جارات:الجارات علب ازاز فيها اعضاء محفوظه وهما معلمين كل حاجه برقم" بيقولك مثلا اتعرف علي العلامه 5 و g
وبتخش علي 12 وقفه كل وقفه يا جار يا عضمه ما عدا آخر وقفه بتبقي علي الجينيرال اناتومي وفيها 3 عضمات
بيتعلم بعلامه علي حاجه في العضمه بس خلي بالك
عضم الابر بتقول ايه العضو الي علي العضمه في الحته دي
لكن عضم الجينيرال بتقول ايه الGeneral feature هنا وهتفهموا الكلمه دي في الجينيرال
وفي السكاشن بيقولولكم كل حاجه والجارات الي بتمتحنوا عليها هيا الي في المشرحه مفيش غيرها وهتاخدوها علي اسطوانه متصوره HD عشان تراجعوها في البيت براحتكم لو بتحبوش خنقه المشرحه

فسيولوجي:بتخش علي امتحانين في العملي!
شفوي وعملي
عملي بتعمل فيه تجربه من التجارب الي عليك والي هتاخدها مرتين مره في الشرح ومره في سكشن المراجعه قبل الامتحان وليك الحق تحضر في اي من المجموعتين
لأن السكاشن عشان تبقوا في الصوره في الفسيو الجروب نفسه ليه يوم آه ويوم لأ

يعني جروب ب مثلا
بيقسموكوا نصين نص الاسبوع ده ونص الاسبوع الي جاي هياخد نفس الحاجه والجروب من ب الي خد الحاجه في الاسبوع الي قبل قبليه هياخد حاجه جديده في الاسبوع الي بعد النص التاني من ب وكده يعني

الشفوي هو مش شفوي شفوي بس الدوك بيخش يسالك أسئله عن التجربه وحبه نظري يشوفك فاهم ولا لا بس متذاكرش كل النظري ذاكر الي هيقولوك ذاكره بس وأسأل قبل الامتحان في القسم اذاكر ايه؟

هستولوجي:هتخشوا علي شرايح من حجات شفتوها في السكشن وبرضه بتاخدوها علي اسطوانه في البيت
وبتكتب كومنتين ع الصوره ... يعني ايه كومنت
يعني عرفت منين انت دي الحاجه الي انت كاتبها والكومنتات بتبقي موجوده عند مكتبه السعيد قبل الامتحان تاخدها تحفظها تخش تقفل

البايو:قلته قبل كده هيا تجربه بتخش تعملها ولو مش عارف تعملها خلي حد صاحبك شاطر يعملها ولو قفلت خلي الدكتوره تعملها
وبتحصل مش هزار

4.الشفوي:
اهيف نوع امتحان ومعرفش ليه كله خايف منه بالعكس
الدوك بتوعنا بالذات طيبين اووووووي وغلابه واي كلمه هتقولها هيدوك الدرجه عن تجربه هتخش يسالك سؤالين تلاته وعموما الشفوي بيبقي بعد النظري ف بتبقي كده كده مذاكر

5.الفينال:
كل الي فات حماده وده حماده تاني خااااااااالص

ده امتحان بتخش وعليه نص درجه الماده "ويمكن اكتر"

بص عادي ذاكر ومش اول امتحان تشوفه

بيبقي أسألته كالتالي:
Enumerate
يعني اذكر 1 2 3 من غير شرح علي هيئه نقط
يعني فايده العضم 1 كذا 2 كذا كده يعني

MCQ
الي هو الاختياري زي بتاع الثانوي

Mention And Write short Note about
يعني اكتب كل ما تعرفه عن الي هيقوله
وهنا بتدش كل حاجه تعرفها وكله عليه جزء من الدرجه

Complete
اكمل .. هيجيبلك جمله ويقولك كمل

Compare
قارن بين كذا وكذا وسهل وكله بيبقي موجود في الكتاب

Define
عرف كذا .. التعريف بس


وفيه أسأله خاصه بكل ماده زي البايو فيه علل وحجات زي كده بس ده الاساس يعني

[ArabianPDA]

التقديم وكده..
طبعا بعد نتيجه التنسيق هتاخد بطاقه الترشيح بعد ما تطبعها
وتروح بيها ومعاك 8 صور و400 جنيه "معرفش كام دلوقتي"وتروح شئون الطلبه ورا المدرج كده هتخش جنب المدرج وهتلاقي الجامع خش هتلاقي سلم اطلع عليه الدور التاني هو ده شئون الطلبه قدم الورق وهيدوك وصل خده وروح الخزنه في مدخل الكليه ودي صورتها عشان محدش يتلغبط


هتدفع وخليه يركز معاااااك انا السنه الي فاتت دفعت 800 عشان الي بيستلم مخدش باله مني فخلي بالك

وبعدين سلم الوصل ومبروك..

[ArabianPDA]

بالنسبه للكورسات :
من الغريب ان كل الاوائل عندنا بياخدوا كورسات !
فأنا لو هنصح نصيحه لوجه الله الي عايز ياخد ياخد في التشريح وفي الهستولوجي
وبجد ده هيريحه جدااااااا وهيساعده جدا ومش مهم الترم التاني ياخد بس الترم الاول ده هيديه خبره فظيعه بجد لأن دوك الكورس بيتعامل انه عايز يديك الدرجه من غير ما تتعب

بالنسبه عشان نظام الكليه علي بعضها وتفهم ليه انا عايز اجيب درجه اصلاً

احنا في كليه الطب 6 سنين عندنا حاجه اسمها مجموع تراكمي من 6350
ده مجموع ال6 سنين منهم 400 في الترم الاول..
طبعا انسوا جو ال99 والهبل ده في الكليه 92 و 91 تخش بيها الترتيب كمان
وللي مش عارف

احنا نظام جديد في الامتيازات
a+= امتياز اكتر من 90
a=امتياز من 85 ل 90
b=جيد جدا
وكده بقي
بس ده نظام اول سنه كان يتطبق علينا ..

المهم
في التعيين "يعني تبقي معيد او نايب" بياخدو اول 40 ممكن اول 60 علي حسب عدد الدفعه
والفرق بين النايب والمعيد ان المعيد بيبقي في الكليه يعني في الحجات الاكاديمك "اناتومي-فسيولوجي-...." وممكن ياخد تخصص كلينيكال بعدين
النايب بيبقي في المستشفي وده مماثل للمعيد بس شغله كلينيكال اصلا

المعيد او النايب بقي اولا بيبقوا بعد كده اساتذه جامعه
ثانياً مرتباتهم اعلي بكتيييييييير من الدكاتره العاديين وكفايه الاسم

فالموضوع محتاج تعب
وصدقوني الكليه هبله بس عايز تركيز وانك متخسرش حياتك برضه

ولكل دفعه جروبين ع الفيس جروب رسمي وجروب غير رسمي
الرسمي عليه الدكاتره وكله

الغير رسمي ده عشان تضي وقت فراغك وتعرف مواعيد الكورسات يعني اكثر تحرر شويه

بالنسبه لكلمه كلينيكال واكاديمك عشان هتسمعها كتير بعدين

كلينيكال هيا السنين الي بعد 3 يعني رابعه خامسه كده ودي هتدرس فيها في المستشفي

الاكاديمك دي دراسه نظريه في الكليه اول 3 سنين

تم بحمد الله

[ArabianPDA]

المشاركة الأصلية كتبت بواسطة Dr/Reem2011

هههههههههههههههههههههههه
موضوع مميز بس السؤاااااااااااااااااااااال
انت جيبت المعلومات دي كللها منين؟؟؟؟؟

مش قاعد فيها بقالي سنه اهو

[Free angel]

المشاركة الأصلية كتبت بواسطة arabianpda

بالنسبه للكورسات :
من الغريب ان كل الاوائل عندنا بياخدوا كورسات !
فأنا لو هنصح نصيحه لوجه الله الي عايز ياخد ياخد في التشريح وفي الهستولوجي
وبجد ده هيريحه جدااااااا وهيساعده جدا ومش مهم الترم التاني ياخد بس الترم الاول ده هيديه خبره فظيعه بجد لأن دوك الكورس بيتعامل انه عايز يديك الدرجه من غير ما تتعب

بالنسبه عشان نظام الكليه علي بعضها وتفهم ليه انا عايز اجيب درجه اصلاً

احنا في كليه الطب 6 سنين عندنا حاجه اسمها مجموع تراكمي من 6350
ده مجموع ال6 سنين منهم 400 في الترم الاول..
طبعا انسوا جو ال99 والهبل ده في الكليه 92 و 91 تخش بيها الترتيب كمان
وللي مش عارف

احنا نظام جديد في الامتيازات
a+= امتياز اكتر من 90
a=امتياز من 85 ل 90
b=جيد جدا
وكده بقي
بس ده نظام اول سنه كان يتطبق علينا ..

المهم
في التعيين "يعني تبقي معيد او نايب" بياخدو اول 40 ممكن اول 60 علي حسب عدد الدفعه
والفرق بين النايب والمعيد ان المعيد بيبقي في الكليه يعني في الحجات الاكاديمك "اناتومي-فسيولوجي-...." وممكن ياخد تخصص كلينيكال بعدين
النايب بيبقي في المستشفي وده مماثل للمعيد بس شغله كلينيكال اصلا

المعيد او النايب بقي اولا بيبقوا بعد كده اساتذه جامعه
ثانياً مرتباتهم اعلي بكتيييييييير من الدكاتره العاديين وكفايه الاسم

فالموضوع محتاج تعب
وصدقوني الكليه هبله بس عايز تركيز وانك متخسرش حياتك برضه

ولكل دفعه جروبين ع الفيس جروب رسمي وجروب غير رسمي
الرسمي عليه الدكاتره وكله

الغير رسمي ده عشان تضي وقت فراغك وتعرف مواعيد الكورسات يعني اكثر تحرر شويه

بالنسبه لكلمه كلينيكال واكاديمك عشان هتسمعها كتير بعدين

كلينيكال هيا السنين الي بعد 3 يعني رابعه خامسه كده ودي هتدرس فيها في المستشفي

الاكاديمك دي دراسه نظريه في الكليه اول 3 سنين

تم بحمد الله

انا طب عين شمس بس قولت اتعرف يعنى

بس بالنسبة للكلام اللى باحمر ده
هو انتوا دفعتكوا كاااااااااااام؟؟!!!!!

[ArabianPDA]

المشاركة الأصلية كتبت بواسطة free angel

انا طب عين شمس بس قولت اتعرف يعنى

بس بالنسبة للكلام اللى باحمر ده
هو انتوا دفعتكوا كاااااااااااام؟؟!!!!!

290/300 كده
اصل عندنا التعيين كتيييير شويه

[Free angel]

المشاركة الأصلية كتبت بواسطة arabianpda

290/300 كده
اصل عندنا التعيين كتيييير شويه

احنا دفعتنا 1200 وبيعينوا 300

[ArabianPDA]

المشاركة الأصلية كتبت بواسطة free angel

احنا دفعتنا 1200 وبيعينوا 300

هيا نفس النسبه
بس احنا اسهل عشان اغلب الدفعه مبتذاكرش فالترتيب سهل

[Free angel]

بس صغنين اوى ده الجروب عندنا 400