أولى و ثانية طب ... أول خطوة ... و خطوة بخطوة

[عاشق البلانكو الابيض]

الفسيولوجيا الطبية

Medical Physiology

يعني ايه ؟؟

معناها علم وظائف الأعضاء

و الحقيقة كل المواد اللي احنا اتكلمنا عنها قبل كده بتخدم المادة دي بشكل كبير جدا ... ليه بقى ؟؟

لأن الفسيولوجي - بتفكرني بالفيزياء - علم تفسيري ... بمعني أن كل مهمتها مش بس الملاحظة و تعديد الوظائف اللي بيقوم بيها عضو معين .. لا .. دي كمان بتفسير ازاي العضو ده بيقوم بوظائفه و ازاي لو اتغريت البيئة المحيطة اللي حوليه الوظيفة بتاعته ح تتأثر

هي واحدة من أجمل العلوم اللي بتعتمد على العقل .. و أنك تفهم و أنك تفكر

بس لينا هنا وقفة بسيطة ... مش معنى أن دورها التفسير فهي بتفسر كل حاجة .. بمعنى آخر لازال حتى الآن بنعجز عن تفسير بعض الظواهر الطبيعية اللي بتحصل في الجسم

و مش معنى أننا مش عارفين لها تفسير أنها مش بتحصل

و مش معنى أنها مش منطقية بالنسبة لينا أنها مش حقيقة .. لا .. ظواهر بتحصل و موجودة و المنطق بتاعنا هو اللي عاجز عن تفسيرها

و بناءا على طبيعة المادة دي ح يقابلك كتير أوي الكلام ده ... Factors affecting , Physiological role , Mechanism , not yet well known

العوامل المؤثرة ، الدور الفسيولوجي ، آلية العمل ، ليس معروفا إلى الآن