انا تعبانه جدا وعايزه افضفض معاكم

[سمسمه الشطوره]

السلام عليكم ورحمة الله وبركاته


عاملين ايه ؟؟
يارب تكونوا كويسين

انا مخنوقه جدا وتعبانه جدا جدا وعندي حالة ملل واكتئاب من المذاكره
ومش عارفه ايه اللي بيحصلي الايام ديه ؟
انا مليش نفس للمذاكره ومليش نفس اروح المدرسه انا مبقتش اروح غير يوم واحد في الاسبوع وده بياثر علي درجاتي
الموضوع ده مش مشكله اوي
المشكله اني عندي اكتئاب فظيع من المذاكره بنام كتييييييير جدا يعني اصحي من النوم افتكر المذاكره انام تاني ومهما انام مش بشبع نوم
ولما اقول لحد كدا يقولي ارهاق ,, ارهاق ايه بس انا مش بتعب خالص ده حتي مبروحش المدرسه
انا مكنتش كدا في الترم الاول خالص كنت بذاكر كويس ومجتهده بس قرب الامتحانات بدات الحاجات ديه تحصلي ولغاية دلوقتي بس الترم التاني ده زادت اوي اوي
انا ضايعه ضايعه الترم ده مش عارفه هدخل الامتحان اعمل ايه في التاريخ انا مش مذاكره حاجه والعربي مش بفتحه والكيميا كنت بحبها دلوقتي مش بكره ادها طيب فاضل ايه تاني الرياضه والاحياء كويسه فيهم وباقي المواد زفت
انا حاسه ان كل ده بيحصلي من حقد اصحابي عليا انا لو جوبت في الفصل علي اقل سؤال يقلولي انتي بتذاكري انتي بتدحي ويفضلوا يقروا لاخر اليوم ولما اقولهم اني مش بذاكر يفتكروني بقولهم كدا عشان ميحسدونيش
والله انا بجدحالي ميعلم بيه الا ربنا دانا حتي مبقتش اضحك خالص وبقيت اتخانق كل شويه علي اقل حاجه
قلولي اعمل ايه ؟
هنا في ناس خلصوا ثانويه واكيد مروا بالحاله ديه عايزه اعرف عملوا ايه ؟؟
اخر حاجه عايزه اقولها اني خايفه يبقي عندي نفس البرود ده في تانيه ثانوي وانا طموحي عاليا ببص لكليات كبيره والبرود ده مينفعش اعمل ايه في الخوف ده بقي ؟؟
معلش انا طولت عليكم بس استحملوني مانا مليش غيركم يعني انا هروح اشتكي لمين ؟؟
منتظراكم .........

[عاشق الليل الساهر]

أنا فعلا مرت عليا الحالة دى بس فى تانية ثانوى أنا دلوقتى تالتة

بس الى ساعدنى فى إنى أتجاوز الازمة دى هى والدتى كانت دايما تشجعنى وتقولى مش

مهم تذاكر كم كبير ذاكر إلى تقدر عليه ولما تزهق بطل مذاكرة وبص فى أى مادة بتحبها

ولو ملكش نفس أخرج شوية اتمشى

وفعلا أنا عملت كده لحد ما الحمد لله عديت من الحكاية دى . انتى بتحسى بضغط دلوقتى عشان الامتحانات

قربت وعندك شعور بالذنب من عدم المذاكرة لكن مش لازم تذاكرى جامد دلوقتى قد ما هو لازم انك تعدى

من الحالة دى عشان كده ابدأى خفيف خفيف حتى لو نص ساعة وبعدين امسكى أى مادة بتحبيها

حتى لو كنتى مذاكراها كويس دا أحسن ما الوقت يضيع على الفاضى ولو زهقتى إتصلى بواحدة صحبتك

إرغى معاها انتوا - البنات - بتموتوا فى الرغى وبعدين إرجعى كملى حتلاقى نفسك أحسن

وبإذن الله ربنا يوفقك

أتمنى أكون أفدتك

[سمسمه الشطوره]

عندك حق انا فعلا بحس بالذنب اني مذكرتش من الاول بس والله غصب عني

عموما هي فكره حلوه وانا دلوقتي حالا حقوم انفذها ويااااارب

متشكره جدا جدا
وان شاء الله ربنا يوفقك انت كمان وتحقق كل اللي بتتمناه

[princees gehad]

بصى انا مش هاقعد انصح فيكي لكن انا اقولك على فكرة حلوة جدا امسكي امتحان ثانوية عامة وحليه عارفة بتقولي دلوقتي انا مش عارفة حاجة في اي حاجة مش مهم اول ماتحطي نفسك في وضع الامتحان هترجعي للمذاكرة وتحسي انك مقصرة وارجو انك تقرأي قران كتيير لان ده بجد اكتر حاجة بتدي حماس وباذن الله ربنا هيوفقك وهيوفقنا كلنا وباذن الله نكون زمايل في كلية الطب

[جهاد14]

معلش دوسي على نفسك شوية دكل الباقي شهرين اتعبي فيهم وان شاء الله ربنا هيكون معاكي وامسكي ورقة وقلم وشوفي اللي نقصك ايه واعملي جدول لكن عاهدي ربنا سبحناه وتعالى انك هتمشي عليه

[منه الله(منمن)]

عاااادى جدا فترة وهتروح لحالها لسه كان عندى نفس حالتك

هو خوف من الامتحانات مش اكتر

بس حاولى مش تكسلى نفسك

[سمسمه الشطوره]

[QUOTE=princees gehad;4380124]بصى انا مش هاقعد انصح فيكي لكن انا اقولك على فكرة حلوة جدا امسكي امتحان ثانوية عامة وحليه عارفة بتقولي دلوقتي انا مش عارفة حاجة في اي حاجة مش مهم اول ماتحطي نفسك في وضع الامتحان هترجعي للمذاكرة وتحسي انك مقصرة وارجو انك تقرأي قران كتيير لان ده بجد اكتر حاجة بتدي حماس وباذن الله ربنا هيوفقك وهيوفقنا كلنا وباذن الله نكون زمايل في كلية الطب[/
QUOTE[

انا حنفذ الفكره وان شاء الله تجيب نتيجه معايا
ويارب نبقي زمايل في كلية الطب
ربنا يخليكي يا قمر وميحرمنيش منك

المشاركة الأصلية كتبت بواسطة جهاد14

معلش دوسي على نفسك شوية دكل الباقي شهرين اتعبي فيهم وان شاء الله ربنا هيكون معاكي وامسكي ورقة وقلم وشوفي اللي نقصك ايه واعملي جدول لكن عاهدي ربنا سبحناه وتعالى انك هتمشي عليه

عارفه بقي المشكله ايه ؟
اني بقول لنفسي الكلام ده واحاول اقنع نفسي بيه وبعمل جداول كتيييييييير عشان اعمل بجدول واحد من اللي بعمله لا يمكن
شفتي بقي حالة الكسل والاكتئاب اللي عندي
شكرا يا جهاد علي مشاركتك ربنا يخليكي يا قمر

المشاركة الأصلية كتبت بواسطة البشمهندسة منمن

عاااادى جدا فترة وهتروح لحالها لسه كان عندى نفس حالتك

هو خوف من الامتحانات مش اكتر

بس حاولى مش تكسلى نفسك

يارب يابشمهندسه الحاله ديه تروح

احسن بجد تعباني اوي
و شكرا علي مشاركتك يا عسل