ريماس ( قصه بقلمى الخاص )

[تامر الطويل]

ريماس

حبيبتى وإللى بتحبه
...00000000000

ديما كان كله فاكر إن الحب الصامت ضعف وقله حيله بس معايه الحب الصامت كان حياه وقوة
الحب الصامت كان إحساس جميل بيخلينى ديما احس إنى عايش حتى ولو فى صمت جمب البنت اللى حبتها !!
كنت ديما بحاول اسعدها على قد ما اقدر والكل كان مستغرب إزى قادر احب واحده طول الفترة دى فى صمت
كله كان عارف انى بحبها الا هى !!
إعتبرتنى صديق مجرد صديق بتحس ديما وياه بالراحه
والشعور ده رغم قسوته عليا كان ديما بيخلى قلبى يفضل يدوق بعد ماكنت فاكر انه مات !!
وانا معاها بس عرفت معنى الحب رغم انها عمرها ماحست بيا وكانت ديما بتجرحنى من غير ماتقصد لما ألقيها بتكلم ادهم المعفن مش عارف بس بتحبه على ايه ده عامل زى عود القصب المسوس

00000
البدايه
00000

يدخل امير محل بيبيع دباديب ويدور على دبدوب معين وسط المجموعه ولما يشوفه صاحب المحل يقرب منه ويقوله

صاحب المحل / ايوة يا باشا نورتنا والله ،،
أأمرنى ياباشا عندنا افخم انواع الدباديب والهدايه فى عيد الحب
عايز حاجه معينه ؟؟
امير / ايوة عايز دبدوب
صاحب المحل / طلبك عندى ياباشا افخم دبدوب واحسن دبدوب عندى فى المحل مبطلعوش غير للناس الغالين العزاز عليا
امير / إنت هتشتغلنى هو إنت تعرفنى!!
بص بقه انا عايز أعفن دبدوب عندك فى المحل ده
وياريت يكون جربان ومش بيستحمى نهائى ورحته تقرف الكلب
صاحب المحل / ايه يا باشا مالك !!
انت جاى تشترى ولا تتريق علينا !!
انا كل حاجتى نضيفه وبعدين ايه جربان دى
امير / ياعم والله ولا بتريق ولا حاجه ده طلبى وهديك إللى إنت عايزة المهم يكون دبدوب معفن
عندك ولا اشوف عند حد غيرك
يبصله صاحب المحل بإستغراب ويقول فى سرة
هو يوم باين من اوله بركاتك ياحماتى بوشك الفقرى
انتى كنتى بتدعى ليا ولا بتدعى عليا ويرجع يبص ل أمير ويقوله
عندى ياباشا ثانيه واحده وطلبك يكون عندك
0000000000000000000000000
ويمشى صاحب المحل وينده لصبى من صبيانه اللى شغلين عنده فى المحل ويقوله
0000000000000000000000000
صاحب المحل / بص بقه ياله يامحمود خد اى دبدوب من اللى عندنا دول وروح على اى خرابه وبهدله خالص خليه يبقه معفن والكلب الاجرب نفسه يقرف يقرب منه
محمود / مش وقت هزار يامعلم خلينى اشوف الزباين
صاحب المحل / هزار ايه ياض اسمع الكلام وروح اعمل اللى قولتلك عليه
محمود / يعنى اروح ابهدل الدبدوب واجى ومش هتكلمنى
صاحب المحل / ماتغور بقه ياضى انت مابتفهمش
محمود / طيب خلاص انا ماشى اهوة
هو المعلم اتجنن ولا ايه !!
وانا مالى اربط الحمار ماطرح مايحب صاحبه
00000000000000000000000000000
وبعد ربع ساعه بالتمام والكمال يجى محمود ومعاه الدبدوب بعد ما بهدله خالص وخلاه زباله يخده منه صاحب المحل ويقرب من امير وهو ماسك الدبدوب من ودانه وبعده عنه على قد ما يقدر ويقوله
00000000000000000000000000000
صاحب المحل / إتفضل ياباشا طلبك اوسخ دبدوب عندنا ماهى الناس مقمات برضو ا
امير / الناس مقمات إتريق ياعم إتريق
عايز كام خلصنى انا مش فاضيلك
صاحب المحل / 189جنيه و75قرش ولو عايزنا نلفه لحضرتك لفه هديه يبقه الحساب كله 199 جنيه و85 قرش

امير / نعم يا اخويا انت اهبل ولا فاكرنى داقق عصاقير عايزنى ادفع 200 جنيه علشان دبدوب معفن وايه الضمير اللى انت فيه ده 199 جنيه و85قرش عندك ضمير قوى ياأخويا
صاحب المحل / انت هتستعبط ياروح أمك
انا من الاول شكلك مش مريحنى واله يامحمود اقفل المحل علينا ياله وهات العيال اللى عندك وتعلولى
ويبص لأمير بغضب وعنيه كلها شرار ويقوله
وحياه حماتى اللى عمرى ما حلفت بيها لانى مش طايقها اساسا لأوريك بهدله ألعن من إللى شافها الدبدوب الغلبان ده يامعفن
امير / عيب كده يامعلم انا كنت اقصد 200 جنيه شويه على الدبدوب الجميل ده
صاحب المحل / طب هات يا اخويا الفلوس ناس مابتجيش غير بالعين الحمراء
امير / اتفضل يامعلم دول كل اللى حيلتى 38 جنيه وربع سبلى منهم 10جنيه اركب بيهم تاكسى علشان برستيجى
ماأنت برضو ما يرضكش اروح للحته بتعتى وانا متبهدل من ركوب الاتوبيس
صاحب المحل / اه انت ناوى تسوق الهبل على الشيطنه
وقعتك سوده زى وشك
اقفل الباب ياله يامحمود
امير / براحه بس يامعلم ،، طيب نتفاهم ، ، ياعم سيب القميص هتكرمشه
00000000000000000000000000
وعلى الجانب التانى وفى بيت نور الدين صاحب امير
قاعد نور الدين يلعب بلاى إستيشن مع اصحابه واخر روقان وشويه ويرن جرس الموبيل بتاعه
00000000000000000000000000
نور الدين / الووو مين معايه
امير / انا امير يانور تعلالى حالا عند محل الدباديب اللى فى اخر الشارع بتعكم
نور الدين / مالك ياامير فى ايه ؟؟
امير / مش وقت أسئله خالص انا فاضلى دقيقه واحده والراجل بتاع الدباديب وصبيانه يخلصوا عليا ، ، بسرعه وحياه ابوك ده فيهم واحد غبى فاكرنى اسرائيلى وبيقولى طلع البرشام اللى هتبعته للمساد
0000000000000000000000000
وبعد 5 دقائق بالظبط يجى نور الدين صديق امير على المحل يدخل يلاقى امير متعلق من قفاه فى السقف والمعلم وصبيانه وقفين حوليه بالشوم
0000000000000000000000000
نور الدين / ايه اللى انت عمله فى امير ده يامعلم هو عمل ايه بالظبط
صاحب المحل / صحبك ياسيدى بيستقردنى فاكرنى خرنج
امير / لا لا لا انا كنج كونج ،، مش هاين عليك تكمل الاغنيه ياضلالى
نور الدين / يخرب بيتك ياامير انت كنت بتعاكس بنت الراجل ده
ولاعملت ايه
صاحب المحل / بيعاكس بنتى يانهار ابوة اسود
امير / الله يخرب بيتك انت جاى تولعها بنت مين يا اهبل اللى بعاكسها ،، إوع تصدقه يامعلم أنا معرفش الواد ده أصلا
نور الدين / امال ليه الراجل ده معلقك التعليقه السوده دى ،، بتشم الهواء
امير / لاء يااخويا راكب مراجيح ،، واله ماتتكلمش خالص ‘‘ هات 200 جنيه
نور الدين / 200 جنيه ليه انت فاكرنى ورثت
امير / مش وقت بخل خالص دلوقتى هات الفلوس
نور الدين / بقولك ايه يامعلم هو مفيش باب خروج غير الباب اللى واقف عليه رجلتك ده
صاحب المحل / انت ناوى تهرب انت كمان
إمسكوا الواد ده وعلقوة جمب صحبه
نور الدين / تعلق مين انت مش عارف انا مين وابويا مين د أنا أوديك فى ستين داهيه
صاحب المحل / فى ايه بس ياباشا انا بطالب بحقى مش اكتر الواد ده بهدلى دبدوب وساعه الحساب قال ايه مش عايز يدفع
نور الدين / الكلام يكون براحه مش بقله القيمه والبهدله اللى مبهدلهاله دى
صاحب المحل / انا اسف ياباشا
هو والد حضرتك بيشتغل ايه ؟؟
نور الدين / والله يامعلم هو بقاله سنه فى ليبيا إدعيله يرجع بالسلامه ألا أنا سمعت إن القذافى مش عارف شعبه وبيقولهم من أنتم يبقه اكيد مش هيفتكر ابويا وهيقول عليه جاسوس
صاحب المحل / وله يامحمود علقلى الواد ده جمب صحبه
دول عايزين يجننونى
نور الدين / بس ،، بس فلوسك اهيه مفيش داعى لقله القيمه
امير / نزلنى بقه يامعلم فلوسك وصلتك ‘‘ ربنا يهدك
000000000000000000000000
ياخد صاحب المحل الفلوس ويبص لصبيانه ويقولهم نزلوة
وفعلا ينزلوا امير
000000000000000000000000
امير / خليهم يلفولى الدبدوب بقه لفه انما ايه تمام
صاحب المحل / لفوله الدبدوب وخلصونى ريحته قلبت المحل الله يقرفه
قولى صحيح يااستاذ هو انت ليه خلتنا نبهدل الدبدوب بالشكل الغريب ده ؟؟
امير / خليك فى حالك ‘‘ مش انت اخدت فلوسك ‘‘خلصنى بقه اتأخرت
نور الدين / إتأخرت على ايه بس ياامير وايه الدبدوب المعفن ده ياعم ؟؟
امير / هقولك بعدين ‘‘ بس دلوقتى يالا بينا هتأخر عليها وممكن تزعل
00000000000000000000000
ويخرج امير ونور الدين من محل الدباديب وساعتها يوقفه نور الدين ويقول ل أمير
00000000000000000000000
نور الدين/ ياعم قولى بقه ايه حكايه الدبدوب المقرف ده ،، وقولى انت رايح فين ؟؟
امير / خلاص ياعم هقولك
ده دبدوب ريماس قلتلى أشتريه علشان هتديه للواد المعفن اللى بتحبه ادهم ( ربنا يخده ) فى عيد الحب
بس انا بهدلت الدبدوب وخليته زباله ‘‘ ويبقه بقه يورينى هيخده ازى منها
نور الدين / يانهارك اسود ،، انت ايه يابنى مافيش فايده فيك
مش احنا اتكلمنا فى الموضوع ده قبل كده بدل المرة مليون
ريماس مش بتحبك بتحب الواد ادهم وانت بالنسبه ليها مجرد صديق
ده حتى انت عمرك ما قولتلها حقيقه مشاعرك نحيتها ،، بس فالح مقضيها جرى وراها فى كل حته وهى مبهدلاك بطلباتها
امير / بحبها يانور حتى لو هى مش بتحبنى كفايه عليا انى اكون قريب منها حتى لو كانت بتجرحنى فى كل مرة بتجيب فيها سيرة الزفت ادهم ده
نور الدين / طيب وليه العذاب ده كله ماتقولها وخلاص انك بتحبها
امير / اقولها بحبك مرة واحده كده
نور الدين / امال هتقولها ليها على كذا مرة ،، انت عايز تجننى
امير / هو انت فاكرنى طول السنين دى ماحولتش اقولها انى بحبها
انا حولت اكتر من مرة وكنت بسهر ليالى طويله احفظ فى كلمه بحبك علشان اول ما اشوفها اقولها ليها بس مش عارف ليه فى كل مرة اشوفها وتبقه الكلمه على لسانى واجى قصادها واتلخبط واتكلم فى اى حاجه تانيه
نور الدين / صدقنى يا امير سكوتك ده هيضيعها منك لازم تصارحها بحبك
أمير / اصارحها بحبى ازى بس وهى بتحب ادهم
رغم ان الكل عارف انه بيلعب بيها وانه يعرف بنات كتير عليها وهى بالنسبه ليه مجرد تسليه
وعلشان كده انا قررت افضل جمبها واحرسها من ادهم الزفت ده
واكون معاها فى كل مرة تروح تقبله ولو حتى من بعد
نور الدين / انت مجنون وانا مش ناقص جنان
انا مروح بقه لو احتجتنى ابقه كلمنى سلام
امير / استنا بس يانور انا عايزك
نور الدين / عايز ايه تانى ؟؟
امير / شايف الورده الحمراء اللى فى جنينه الفيلا دى
نور الدين / ايوة شايفها مالها
امير / انا عايزها علشان اديها هديه ل ريماس فى عيد الحب
نور الدين / انت هتستعبط ياامير انت عايزنى ادخل جنينه الفيلا واسرق ليك ورده انت عبيط ياله
امير / فيها ايه بس ما الورد كتير اهوة فى الجنينه
نور الدين / بلاش استعباط ياامير انا مش هدخل جنينه الفيلا ولا هسرق اى ورود لو قتلتنى ،، وانت عارفنى لما اقفل مستحيل اغير كلامى
امير / خلاص براحتك مش مهم انا هكلم مريم خطبتك واقولها على موضوع نسمه اللى كل يوم تقابلها وتتفسح معاها علشان بصراحه البنت صعبانه عليا وانا
نور الدين / إنت قولتلى اى ورده بالظبط اللى هجبها ليك
امير / الورده الحمراء دى
نور الدين / منك لله انا رايح اجبها اهوة ،، بس امانه عليك لو حصلى حاجه او إتمسكت وصيتك البلاى استيشن اللى عندى فى البيت اوع حد يقرب له ،، ده عليه اقساط
امير / متخفش هخلى بالى منه بس انجز انت انا كده هتأخر على ريماس
نور الدين / ربنا يخدك انت وهى
000000000000000000000000000
ويمشى نور الدين براحه يدخل جنينه الفيلا ويقطف الورده الحمراء ويجرى بسرعه من الفيلا ولسه هيخرج من البوابه يهجم عليه بواب الفيلا ويمسكه من قفاه ويقوله
000000000000000000000000000
البواب / على فين ياحرامى انت فاكرها جنينه من غير بواب وقعتك سوده
نور الدين / والله انا ما اخدتش غير الورده دى ، ، سبنى والنبى
واوعدك انك متشوفش وشى هنا ابدا
البواب / اسيبك وده يصح برضوا ،، دإنت هتاخد ضرب لحد ما يبانلك اصحاب
00000000000000000000000000
وساعتها يدخل امير ويبص للبواب ويطلع كارنيه الكليه ويقوله
00000000000000000000000000
امير / الرائد امير مباحث سرقه الورد
البواب / مباحث ايه ياباشا ؟؟
امير / مباحث سرقه الورد ده فرع جديد لسه فتحينه قدام كشك عم كمال بتاع الورد
ايه فى حاجه
البواب / لاء ياباشا ربنا يوفقكم هو انا اقدر اتكلم
امير / الحيوان ده عمل ايه
البواب / الواد ده دخل الفيلا وسرق الورده دى ياباشا
امير / سرقت ورده يانهارك اسود منقط
وقعتك سوده انت فاكرها سهله دى جريمه يعاقب عليها القانون
طلع الورده ياله
نور الدين / اتفضل ياباشا الورده
امير / اتحفظ عليه يابواب لحد ما اسلم الورده للقسم وارجعلك تانى ،، اوع يهرب منك
البواب / تمام يافاندم ماتخفش انا هربطه فى الشجرة
نور الدين / ايه ياامير انت هتسبنى ولا ايه
امير / امير باشا ياحيوان انا بقه هوريك النجوم فى عز الضهر
سيبه يابواب انا هخده معايه لحد القسم وهسلمه بنفسى
البواب / تمام ياباشا ربنا ينصركم على كل الحراميه يارب
000000000000000000000000000
ويخرج امير ونور الدين من الفيلا واول ما يخرجو بره يجروا هما الاتنين
وبعد ما تعبوا من الجرى يقفوا يخدوا نفسهم ويبص امير ل نور ويقوله
عملناها يانور واخدنا الورده
يبصله نور بغضب ويمسكه من قميصه ويقوله
غور ياله انا من النهارده مش عايز اعرفك
ولو عايز تقول لمريم خطبتى انى ماشى مع البنت نسمه روح قولها
جاتك القرف انت واللى عايز يعرفك ويسيبه نور الدين ويمشى
يبصله امير وهو ماشى ويقوله انت زعلان ليه بس يانور ما احنا اخدنا الورده خلاص
000000000000000000000000000
ويمشى امير على برج القاهرة المكان اللى اتفق مع ريماس انه يقابلها فيه ويديها الدبدوب اللى هتديه هديه ل ادهم فى عيد الحب
ويوصل امير ويلاقى ريماس وقفه مستنياه واول ما تشوفه تقوله
000000000000000000000000000

ريماس / بقه كل ده تأخير ياامير انا وقفه بقالى ساعه
امير / ما انت متعرفيش انا عملت ايه لحد ماجبتلك الدبدوب ده
اظاهر الواد ادهم ده فقر ،، ماتيجى اروحك وخلاص وسيبك منه
ريماس / ادهم ده روح
امير / طلعت روحه
ريماس / جبت الدبدوب اللى قولتلك عليه
امير / ايوة اتفضلى اجمل دبدوب لقيته عن الراجل بتاع الدباديب
ريماس / ربنا يخليك يا امير يارب وارضلك كل اللى عملته معايه مع خطبتك
امير / مع خطبتى ،، بقولك ايه ياريمووو
ريماس / ايه ياامير مالك فى ايه ؟؟
امير / هو انت مش بتحسى
ريماس / هههههه ليه بس
امير / اتفضلى ياريمووو دى هديتى ليكى فى عيد الحب
ريماس / الله بجد جميله قوى الورده دى يا امير تسلملى ياجميل
امير / انا اخترتهالك من بين مجموعه ورود كتيرة لما عرفت ان الورده الحمرء دليل على الحب وخده بالك الحب
ريماس / ربنا يخليك ليا يارب يااجمل صديق فى الدنيا
امير / بقولك دليل على الحب تقوليلى يااجمل صديق والله انتى شكلك عبيطه
ياريموووو انا ،، انا ،، انا،،
ريماس / انت ايه بس ماتتكلم
00000000000000000000000
ويظهر ادهم زى القضا المستعجل ويقطع كلمنا مع انى كنت خلاص هقولها انا بحبك ،، منه لله ،، ويزقنى ويقولها انا اسف ياقمرى اتأخرت عليك
00000000000000000000000
امير / على فكرة اللى ما يحترمش ميعاد الانسانه اللى بتحبه يبقه مش بيحبها
ادهم / انا مسألتكش عن رئيك انا بكلم حبيبتى
ريماس / ولا يهمك ياعمرى انا لسه واصله حالا
امير / لسه واصله حالا انتى هتستعبطى ما انتى لسه من دقايق قيلالى انك وصله بقالك ساعه
ريماس / كنت بهزر معاك يا امير
اتفضل ياادهم هديتى ليك فى عيد الحب
ادهم / هو عيد الحب النهارده وانا مستغرب ليه الحبيبه مالين البلد ومحلات الدباديب والورود شغاله على ودنه
انا اسف ياريمووو انا مش جبتلك هديه
امير / طبعا وانت فاكر اى حاجه غير البنات اللى بتكلمها
ادهم / عجبك كلام الاخ ده ياريماس انا قولتلك قبل كده متجبهوش معاك ده انسان رخم
ريماس / خلاص بقه ياادهم ده بيهزر معاك
صح ياامير
امير / اه بهزر معاك ياظريف
ريماس / افتح بقه هديتك وقولى رئيك فيها دأنا اخترتهالك من بين هدايا كتير
ادهم / اكيد جميله لانها منك يا
ايه القرف ده
ريماس / فى ايه ياحبيبى هى الهديه وحشه
ادهم / بالعكس ياقمر دى جميله قوى دى حتى ريحتها فظيعه
ريماس / هتفسحنى فين بقه ياادهم
ادهم هنطلع البرج الاول وبعدها على الملاهى انا عارفك بتحبيها
ريماس / الله انا بموت فيها
امير / هتطلعوا البرج ،، بس انا بخاف من الاماكن العاليه
ادهم / ومين قالك اصلا انك جاى معانه
يالله بينا ياريماس
ريماس / سلام بقه ياامير نتقابل بكرة فى الكليه
00000000000000000000000000000
ويمشى ادهم وريماس على برج القاهرة وانا واقف محتار نفسى اطلع وراهم علشان احمى ريماس من ادهم وفى نفس الوقت خايف من الاماكن المرتفعه وبسم الله ماشاء الله ده مش اى ارتفاع ده برج
وبعد تردد كبير انتصر الحب على الخوف اللى جوايه ومشيت على برج القاهرة اطلعه
وهناك وقدام الاسانسير فضلت واقف والناس ورايه تزقنى وانا ايه صامد ومش راضى اتحرك وفاجاه جالى راجل طيب كان واقف فى الطابور وقالى
0000000000000000000000000000
راجل طيب / مالك بس ياابنى مش راضى تدخل الاسنسير ليه ؟؟
امير / اصلى بخاف من الاماكن المرتفعه ياحاج
راجل طيب / ولما انت بتخاف من الاماكن المرتفعه جاى تهبب ايه هنا
امير / انا جاى علشان اخلى بالى من ريماس
راجل طيب / ومين ريماس دى كمان
امير / دى البنت اللى بحبها اصلها طلعت البرج مع واد رخم اسمه ادهم هى بتحبه وانا خايف عليها
راجل طيب / دى قصه حب ملخبطه خالص
امير /دى البنت الوحيده اللى قلبى دق ليها وعشقها
راجل طيب / ولما انت بتحبها بالشكل ده ،، ليه ماقولتلهاش انك بتحبها
امير / هو كل واحد هيشوفنى هيقولى نفس الكلام
راجل طيب / خلاص انا هفضل معاك امسك فى ايدى وغمض عنيك وانا هطلعك لحد عندها
امير / طيب بس اوع اقع والنبى
راجل طيب / تقع منين يااهبل ده اسنسير اوضه ومقفوله
امير / ماشى بس والنبى خلى بالك منى
امى عيزانى
000000000000000000000000000000
ويخده الراجل من إديه ويطلع بيه فوق البرج وهناك يسحبه الراجل بالعافيه وهو ماسك فى باب الاسانسير ومش راضى يسيبه ويقول له
000000000000000000000000000000
الراجل الطيب/ فين بقه ريماس وادهم بتوعك دول
امير / وانا هشوفهم ازى بس وانا مغمض كده
الراجل الطيب / وانت مغمض ليه ماخلاص طلعنا فوق البرج ماتفتح بقه وسيب هدومى فضحتنا
امير / يعنى افتح على ضمانتك
الراجل الطيب / ايوة فتح على ضمانتى
امير / يالهووووى احنا فين
الراجل الطيب / احنا فين ايه بس
انت لازم تشوفلك حل وتتعالج من خوفك من الاماكن المرتفع دة
امير / طيب طيب بس المهم دلوقتى نلاقى ريماس والزفت اللى معاها
ماتدور معايه ياحاج انتى هتفضل تبصلى كده
الراجل الطيب / وانا ادور ازى يا اهبل !! هو انا اعرفهم اصلا
000000000000000000000000000000
ويدور امير على ريماس وادهم يلقيهم واقفين وبيبصوا من التلسكوب وبيضحكوا وادهم ما سك ادين ريماس يبص للراجل الطيب ويقوله
000000000000000000000000000000
أمير / قرب منهم وقعته سوده ادهم الكلب ده بيوزعنى تحت علشان يمسك إديها فوق
الراجل الطيب / وانا مالى انا ماتقرب منهم انت
امير / ما انا مش هعرف اقرب منهم من غيرك ما انت عارف
الراجل الطيب / طيب امشى معايه وسيب رقبتى بقه خنقتنى
0000000000000000000000000000000
ويقرب امير والراجل الطيب من ريماس وادهم واول مايقرب تبصله ريماس بإستغراب وتقوله
0000000000000000000000000000000
ريماس / انت طلعت ازى يا امير مش انت بتخاف من الاماكن المرتفعه
امير /مقدرتش اسيبك لوحدك مع الكابتن ده
ادهم / ليه بقه هو انا هكلها ،، عجبك اللى بيقوله الاستاذ يا ريماس
ريماس / ماتزعلش ياادهم ،، امير مش يقصد صح ياامير
امير / لاء بقه انا اقصد ،،
ادهم ده بيضحك عليكى ياريماس ده يعرف بنات اكتر من عدد شعر راسه
الرجل الطيب / صباح الخير ياجماعه حد يستلم الاخ ده احسن ده بهدلى هدومى وقرفنى لحد ماطلع هنا
ريماس / لو سمحت ياامير امشى دلوقتى
امير / امشى اروح فين ياريماس مقدرش اسيبك مع البنى ادم ده لوحدكم
ادهم / لاء بقه د انت عايز تتربى
الرجل الطيب / استنى ياعم ،، لو هتضربه بجد خليه يسبنى الاول
ريماس / بس ياادهم ،، لو سمحت ياامير امشى حالا من هنا
امير / حاضر ياريماس انا همشى بس خلى بالك منه
ده بجد بيخدعك وانا خايف عليكى
00000000000000000000000000000000
ويبص امير للراجل الطيب ويغمض عنيه ويقوله
000000000000000000000000000000000
امير / يالا بينا ياعم نزلنى تحت
الرجل الطيب / انزلك تحت ليه هو انا العبد اللى اشترهولك ابوك
امشى يلا من هنا يقطع الحب وسنينه
امير / انت سيبنى ورايح فين ياحاج ،، إستنى بس ،، طيب أنا هنزل إزى دلوقتى ،، خد بس ياحاج ،، خد الله يخرب بيتك

000000000000000000000000000000000
وساعتها يسيبه الراجل الطيب ويمشى ويقعد امير على الارض ويغمض عنيه ويترعش وفاجاه يلاقى إدين مسكته ومشيه بيه لحد الاسانسير ونزلته لحد تحت أول مايحس أمير إنه وصل تحت يقول للشخص اللى وصله ألف شكر ياحاج أنا كنت متأكد إنى مش ههون عليك ،، إنت ساكت ليه ياحاج !!
إوع تكون زعلت منى لما قولتلك الله يخرب بيتك ،، انا كنت اقصد الواد ادهم
ويفتح أمير عنيه يلقيها ريماس يبصلها امير ويقولها
000000000000000000000000000000000

تتبع حالا

[تامر الطويل]

000000000000000000000000000000000
امير / انا كنت متأكد انك هتصدقينى وتسيبى الواد الكداب ده
ريماس / من النهارده مش عايزة أشوفك تانى يا أمير ولما تشوفنى فى أى مكان ياريت ماتكلمنيش يعنى من الاخر إعتبرنى مش موجوده
امير / بس إحنا من الابتدائى مع بعض وعمرنا ماإفترقنا عن بعض ابدا
إزى عايزانى إعتبرك مش موجوده وانتى ديما صورتك فى قلبى
ازى عايزانى انساكى وانا مش فاكر اى حد غيرك
خلينى أفضل جمبك وأوعدك مش هتدخل تانى فى حياتك الشخصيه ولا هزعل أدهم منى أبدا
علشان خطرى ياريماس متبعدنيش عنك
ادهم / يالا بينا ياريماس كده هنتاخر على الملاهى
وتسيبه ريماس وتمشى مع ادهم وامير فى حاله زهول مش مصدق الكلام اللى قالته ريماس
00000000000000000000000000000
يمشى امير على بيت نور الدين صحبه وهو مش شايف غير صوره لريماس ومش سامع غير صوتها وهى بتقوله ابعد عنى وإنسانى
واول ما يشوفه نور الدين يقوله
00000000000000000000000000000
نور الدين / بص بقه ياامير طول ما انت بتجرى وراء البنت اللى اسمها ريماس دى مش عايز اعرفك ولا اشوف وشك
دى هتوديك وتودينى فى ستين داهيه
امير / خلاص يانور ريماس مش عايزة تشوفنى تانى
نور الدين / بجد طيب احمد ربك بقه دى كانت هتوديك فى داهيه ياإبنى وبعدين اللى بيحب حد بيحس بيه من غير ما يتكلم وهى عمرها ماحست بيك ولا بمشاعرك
كلنا من اول يوم عرفنا وحسينا انك بتحبها ومتنيل لشوشتك فى حبها الا هى إعتبرتك مجرد صديق ليها وراحت حبت ادهم اللى كلنا عارفين انه واد بتاع بنات وانه بيلعب بيها
امير / خلاص بقه يانور الموضوع إنتهى بس انا عايز منك خدمه
نور الدين / خدمه تانى والنبى ياامير إرحمنى شويه من خدماتك اللى بتودى فى داهيه دى د أنا صحبك ياجدع مش عدوك
امير / اخر خدمه هطلبها منك
نور الدين / ما انت كل مرة بتقولى كده
المهم أطلب وربنا يستر
امير / انا عايز اعرف بنات !!
نور الدين / هههههههه هههههههه ههههههه
امير / ايه ياابنى فى ايه هو انا قولتلك نكته
نور الدين / لاء ابدا بس طلبك ده غريب قوى
بقه امير اللى عمرة مابص على اى بنت فى اى مكان جاى دلوقتى عايز يعرف بنات وكمان مش بنت واحده
امير / اصلى سمعت مرة واحد بيقول انك لو عايز تنسى اى حب قديم لازم تحب جديد
نور الدين / والله فكرة يعنى لما تعرف بنات كده هتنسى ريماس
امير / اهو هحاول على الاقل
من النهارده مفيش ريماس
نور الدين / كده انت صحبى وحبيبى
قولى صحيح ايه شريحه الموبيل اللى معاك دى
انت لسه شاريها ولا ايه ؟؟
امير / اه لسه شاريها وانا جايلك
استنى صحيح اما اجربه كده
ويبدل امير شريحه الموبيل بتاعه بالشريحه الجديده ويتصل برقم
ويرد عليه الرقم التانى بصوت ملائكى ويقوله الووو الووووو الووووو
ويقفل امير الخط بسرعه
نور الدين / انت رنيت على مين يابنى وليه مش رديت عليه
امير / انا رنيت على ريماس نفسى اسمع صوتها ولو من غير كلام
نور الدين / اه يااما إلحقينى
انت عايز تشلنى يابنى احنا قولنا خلاص من النهارده مفيش ريماس ورينى الخط ده كده
امير / ليه بس هتعمل ايه
نور الدين / ياخد الخط من امير ويقوله هعمل اللى لازم يتعمل علشان تنساها خالص ويرمى الخط من الشباك
امير / ايه ده يانور امال انا هسمع صوتها ازى بس
نور الدين / من النهارده مش هتسمع صوتها نهائى ولا هتشوفها علشان تنساها ياحمار

امير / انا حاسس انى مش هقدر انساها يانور
نور الدين / معايه هتنسا الدنيا كلها ،، يالا بينا
امير / على فين ؟؟
نور الدين / معايه متسألش كتير يالا قوم

وياخد نور امير ويمشى بيه وقدام السينما يقف نور ويبص حوليه كأنه بيدور على شخص معين ف يسأله امير بإستغراب
امير / فى ايه يانور انت ليه جايبنا السينما ،، وبتدور على مين
نور الدين / ثوانى بس وانت هتعرف كل حاجه
وشويه ويقرب مننا بنتين ويسلموا علينا ويعرفنى نور عليهم ويقولى
نور الدين / دى سعاد ودى نجوى
وده بقه يابنات صديق عمرى امير ولسه مجروح طازة وعايز ينسى
نجوى / ياحرام مجروح ومين بقه اللى جرحك يابيضا
امير / بيضا ليه شايفانى كتكوت
سعاد / صحبك جميل قوى يانور كنت مخبيه عننا فين
امير / على فكرة ياانسه انا مش بحب طريقه الكلام بتعتك دى
نجوى / انسه ايه ياحبيبى ده كان زمان
سعاد / مش هندخل السينما بقه ولا هنقضيها فى الشارع
نور الدين / اتفضل ياجميل قدامى
غزال ياخواتى
امير / يبص لنور ويقوله بصوت واطى
ياابن الكدابه بقه دى غزال ده انت طلعت مابتشوفش خالص
ويدخلوا كلهم السينما ويقعد امير جمب نجوى ونور الدين جمب سعاد وشويه والنور يطفى والفيلم يشتغل واول ما يشتغل الفيلم تمسك نجوى ايد امير فيقولها
امير / فى ايه ياانسه ماتسيبى ايديا
نجوى / اصل الفيلم ده مؤاثر جدا وديما بيبكينى وانا عايزة احس باالامان
امير / بقه فيلم اللمبى مؤاثر غريبه ،، دول قلولى انه كوميدى
نجوى / انت قمر كده ليه يخرب بيت جمالك
امير / فى ايه ياانسه انتى شيفانى مزة ولا ايه ما تحترمى نفسك
نجوى / الله وكمان حمش اموت انا فى النوع ده
امير / روحى موتى بعيد عنى ( الله يخرب بيتك يانور )
نجوى / ماتدينى رقمك
امير / انا بطلت اشيل موبيل من ساعه ماشوفتك
نجوى / وانا حبيتك من ساعه ماشوفتك
امير / حبك بورص ياشيخه بقولك ايه انا مش ناقصك خلينا نسمع النيله الفيلم وسيبى اديا احسن اصوت وافضحك
نجوى / ياحمش انت ياحمش
امير / ده ادهم رحمه عنك إتكتمى بقه
00000000000000000000000000
وعلى الجانب التانى فى الكرسى اللى جمب امير قاعد نور الدين وسعاد ويدور بينهم الحوار ده
00000000000000000000000000

سعاد / ماله صحبك ده يانور بيعامل نجوى كده ليه
دة عمر مافى حد عملها بالشكل ده وإستحملته شكلها حبته
هو مجنون ولا ايه ؟؟
نور الدين / ايوة ياستى مجنون ريماس
سعاد / ومين بقه ريماس دى
نور الدين / دى البنت اللى جرحته وانا بحاول أنسيها ليه
المهم سيبك منه ياقمر انت مافيش بوسه للغلبان
سعاد / عيب يانور مش انا لسه مدياك من شويه 8
نور الدين / أنا عمرى ما أشبع منك ياجميل
سعاد / خلاص خد كمان واحده
نور الدين / اموت انا واعيد السنه
سعاد / ههههههههههههه
0000000000000000000000000
ويخرج امير ونور ونجوى وسعاد من السينما وبره يدور الحوار ده
0000000000000000000000000
نور الدين / هنكمل سهرتنا فين بقه ياجماعه
نجوى / عندى فى البيت
امير / نعم يااختى ليه حد قالك اننا معندناش بيوت ولا عيال كوركات
نور الدين / ياامير ياجامد ايوة كده ياريس ،، إنسى وعيش
امير / امال إيه يانور فكرانا معندناش بيوت
يالا بينا يانور على شقتى
نور الدين / يالا بينا ياكبير وانا اللى فاكرك مش عارف حاجه طلعت واد فتك
امير / ايه ياأنسه انتى وهى رايحين على فين
نجوى / رايحين على فين !! رايحين معاكم
امير / رايحين معانه فين ؟؟
سعاد / انت عايز تجننى ياضى انت!!
مش انت قولت هنروح نكمل سهرتنا فى شقتك
امير / انا قولت انا ونور انتوا كملوها فى بيوتكم
نور الدين / ايه ياامير اعقل انا لسه قايل عليك واد فتك
امير / هتيجى معايه ولا اتصل بخطبتك
سعاد / خطبته ،، ليه هو نور خاطب ؟؟
امير / هو ماقلكيش ولا ايه دة خاطب بنت عمه وفراحهم كمان 4 شهور
نور الدين / ماتصدقهوش ياحبيبتى امير ديما كده بيحب يهزر
سعاد / بيحب يهزر وحياه امى لأوريك ايام سوده
وتمسكه من هدومه وتقلع الجزمه بتعتها ساعتها بس امير يجرى ونجوى تجرى وراه وتقوله
نجوى / استنى ياحبيبى خدنى معاك
امير / ربنا موجود
00000000000000000000000000000000
ويمشى امير يروح على بيته وكل اللى شاغل باله وتفكيرة ،، ريماس
وازى يخليها ترجع تكلمه وتفضل جمبه تانى
ويوصل امير على البيت وعلى السرير ويرمى نفسه ويروح فى نوم عميق
00000000000000000000000000000000
امير / ريماس حبيبتى انتى فعلا قدامى ولا انا بحلم
ريماس / امير سامحنى ياامير انا عرفت ادهم على حقيقته طلع يعرف بنات كتير وكان بيلعب ب قلبى سمحنى ياامير انا ظلمت وجرحتك كتير
امير / انا مسمحك ياقلبى وعمرى ما اقدر ازعل منك
عارفه ليه ؟؟
ريماس / لان قلبك ابيض وعمرة ما يقدر يزعل من اى حد
امير / لاء مش علشان كده وبس
انا مقدرش ازعل منك لانى …. لانى
ريماس / لانك ايه يا امير
امير / انا ،، انا
ريماس / انت ايه ياامير ما تتكلم
امير / انا ب
00000000000000000000000000000
وساعتها بس يرن جرس الموبيل واصحى من النوم مفزوع ومدايق من الرخم اللى خرجنى من اجمل حلم عشته وشوفته وحسيته
ارد على الموبيل القيه نور الدين صحبى وبيقولى ببرود
00000000000000000000000000000

نور الدين / بقه كده برضو ياامير تسبنى فى ادين البنت المجنونه سعاد وتخلع امبارح د أنا اخدت ضرب لحد مقفايه ورم المفتريه ماسبتنيش غير لما الناس إتلمت عليا وإفتكروها مراتى وخلصونى من اديها
امير / انت هتحكيلى قصه حياتك منك لله يامفترى خرجتنى من اجمل حلم ،، كنت لسه هقولها بحبك
نور الدين / هى مين دى ؟؟
امير / هى فى غيرها سحرانى ريماس طبعا
نور الدين / اما عندى خبر بس ايه بمليون جنيه يامعلم
امير / خبر بمليون جنيه ليه فاكرنى احمد عز انا اخرى 10 جنيه وكمان هدهالك تقسيط
بس غريبه د إنتى من يوم ما عرفتك وإنت فقرى وديما بتجبلى الاخبار السوده
نور الدين / المرة دى الخبر هيخليك تقوم وترقص
امير / للدرجادى ليه مصر دخلت كاس العالم
نور الدين / انت اهبل مصر تدخل كاس العالم أهو ده المستحيل بعينه
امير / متحيرنيش معاك يانور وقولى خبر ايه ده
نور الدين / بعد ما اخدت امبارح الطريحه التمام روحت وانا فى الطريق لقيت ريماس والواد ادهم وريماس بتزوقه وبتزعق معاه ولما قربت منهم عرفت إن ريماس إكتشفت ان ادهم يعرف بنات كتير
اصلهم لما كانوا فى الملاهى قبلت ريماس واحده من اللى يعرفهم ادهم
امير / انت بتتكلم بجد يعنى ريماس سابت ادهم خلاص
اوع تكون بتهزر يانور
نور الدين / هو ده وقت هزار ياامير كلمها وانت تتأكد بنفسك
امير / اكلمها مين انا جرى على بيتها يامعلم والمرة دى هقولها انى بحبها وش مش هضيعها من إديا تانى سلام يانور
00000000000000000000000000000
ويجرى امير يلبس ويتزوق وجرى على بيت ريماس ولما يوصل للشقه بتعتها يخبط على الباب تفتحله ريماس وتقوله
00000000000000000000000000000
ريماس / والله ابن حلال يا امير انا كنت لسه هكلمك حالا
انا عيزاك فى موضوع مهم هيفرحك قوى
امير / أنا إللى عايزك فى موضوع مهم جدا ومش ممكن يتأجل اكتر من كده
كنت مخبيه عليكى من زمان وكنت خايف أصرحك تصدمينى بس النهارده ودلوقتى وحالا هقولك كل إللى فى قلبى

ريماس / فى قلبك وأصدمك!! ،، قولى ياامير مالك ؟؟
امير / انا ،، انا ،، انا
أنا كنت عايز أقولك إنى ،، إنى
قوليلى إنتى الاول ياريماس كنتى عيزانى فى إيه ؟؟
ريماس / كنت عايزة أقولك إنى إتخطبت
ادهم جه النهارده وفاتح ولدى و ولدتى وخطبنى منهم وهو معاهم دلوقتى جوة مع ولده و ولدته وكنت عيزاك تحضر الخطوبه لانك صديقى الوحيد ومش ينفع أتخطب وإنت مش موجود
قولى بقه كنت عايز تقولى إيه ؟؟
يقف امير مش حاسس ب اى حاجه حوليه ولاحاسس بنفسه
واقف بيتمنى يكون كابوس وهيفوق منه
الدنيا بتلف بيه وشريط ذكرياته مع ريماس بيدور وبيشوفه ودموعه مسكها ومش عايزها تخونه وتنزل
تفوقه ريماس من زهوله وتقوله
ريماس / ايه ياابنى روحت فين ؟؟
امير / هروح فين يعنى ،، انا هنا وهفضل طول عمرى هنا
إظاهر مكتوب عليا أعيش ديما من غير قلب من غير إحساس
ريماس / ههههههه ايه ياعم انت بتقول اشعار من ورايه قولى كنت عايز تقولى ايه
امير / كنت عايز اقولك انك هتفضلى ديما اجمل وارق صديقه وأخت ليا هعيش ديما جمبك احميكى واحافظ عليكى حتى لو من غير قلب او احساس
لانك لما هتبعدى عنى هتخديهم معاكى
هعيش ديما اتمنى ليكى السعاده وافرح لما اشوفك بتضحكى وبتهزرى هعيش ليكى وبس
هفضل ديما ياريماس امير صحبك اللى عمرة ما فرقك ولا صرحك ب اللى جواه
هفضل ديما عايش على امل اننا فى يوم من الايام نكون ……..
ما بقاش ينفع نكون
بس هفضل عايش قريب منك لانى لازم اعيش طول ما انتى موجوده

ولما يحس امير إن دموعه هتخونه وهتنزل يجرى من قصاد ريماس

ريماس / مالك ياامير سيبنى ورايح فين وايه الكلام الغريب إللى بتقوله ده انا مش فاهمه حاجه منك
رود عليا ياامير
طيب استنى مش هتحضر الخطوبه
فى ايه ياابنى بس ؟؟
ياامير 000 يا امير
0000000000000000000000000000
وتدخل ريماس شقتها ولما يشوفها ادهم ودموعها على خدها يقولها
ادهم / ليه عملتى كده ياريماس ؟؟
ليه مثلتى قدام امير انك بتحبينى وخلتينى أشترك معاكى فى التمثليه دى ؟؟
مع إنى متأكد إنك بتحبيه !!
بجد انا مش فاهم حاجه ولاعارف ليه عملتى كده !!
تبصله ريماس ودموعها على خدها وتقوله
ريماس / مكنش ينفع ياادهم أخلى أمير إللى حبيته من كل قلبى
يكون ليا وأنا مريضه بمرض خطير وأيامى فى الدنيا معدوده
كان غبى وإفتكر إنى عمرى ما حبيته ،، مع انه لو كان بص فى عيونى فى كل مرة كان بيكون قصادى فيها ،،
كان عرف انا قد ايه بحبه وقد ايه كنت بنجرح من جوايه كل أما أشوفه حاسس إنى مش بحبه وبحب واحد غيرة
ليه أخليه يرتبط بواحده زيئ ياادهم
أمير قدامه حياته ،، أما أنا حياتى خلصت خلاص
وصدقنى هيعيش من غيرى ،، وأكيد هينسانى وهيحب غيرى
صدقنى ياادهم على قد ما أمير بيتعذب دلوقتى لانه فاكر انى عمرى ما حسيت بحبه ولا حبيته
على قد ما كان هيتعذب طول حياته لو كنا إرتبطنا ببعض وكان فقدنى
أنا كل إللى بتمناه دلوقتى من ربنا إن أمير يقدر ينسانى ويفضل فاكر إنى عمرى ماحسيته ولا حبيته

النهايه

27 / 5/ 2011

بقلم

تامر على الطويل

امير الجروح

[*sondos*]

يااااااااااااااااااااااااه بجد أجمل قصة قرأتها ليك لحد دلوقتي يا تامر
إحساس جميل أوي ومشاعر صادقة .. لكن أنا لو مكانها هصارحه أفضل بالحقيقة
تسلم إيدك يا تامر ويارب يدوم لنا قلمك ويدوم لنا وجودك بينا

[تامر الطويل]

المشاركة الأصلية كتبت بواسطة *sondos*

يااااااااااااااااااااااااه بجد أجمل قصة قرأتها ليك لحد دلوقتي يا تامر
إحساس جميل أوي ومشاعر صادقة .. لكن أنا لو مكانها هصارحه أفضل بالحقيقة
تسلم إيدك يا تامر ويارب يدوم لنا قلمك ويدوم لنا وجودك بينا

ربنا يخليكى ياسندس يارب بجد كلامك الجميل ده وسام على صدرى