اللهم أتنا فى الدنيا حسنة وفى الأخرة حسنة....الجروب

[ضياء الدين سعيد]

مع ضيفنا الخامس
نختار
>
>
>
>
الراجعون الى الله

ليجيبنا على أسئلتنا

كيف تستقبل شهرنا الكريم
أكيد رمضان ليه إستقبال غير أى شهر وعندى هو عيدى لأنى بجد بحس فيه بالراحه وبالأخص وأنا فى صلاة التراويح .طبعاً ببدأ أجهز نفسى بجد لغسل كل همومى وأحزانى والتصالح مع الله لعل وعسى أن تصيبنا نفحه من نفحات رمضان

كيف تقضى يومك الرمضانى
بصحى الصبح حوالى الساعه عشرة أنزل شغلى وأرجع كدا على الساعه 12 أصلى الظهر وأنام ساعه وأقوم أقعد فى غرفتى الخاصه بيا أمسك المصحف شويه أقرأ ما تيسر لى مش بحدد كميه بس بحاول إنى أفهم كل حرف وبعدين أقوم أصلى العصر وأركب سيارتى وأرجع تانى أتابع شغلى أرجع قبل المغرب بساعه طبعاً أكون شارى الفطار لأنى عازب وفى غربه وربنا ما يوعدكم بإحساس أن الواحد يفطر لوحده دا أرجع أغير لبسى وأقعد على الكمبيوتر شويه أشوف منتدايا الحبيب والدنيا وصلت فيه لإيه وبالأخص القسم اللى أنا مشرف فيه إبداعات الأعضاء يبقى باقى خمس دقائق على الإفطار أقوم اتوضأ وأجرى على المسجد أصلى وأرجع أفطر وأقعد تانى على النت قبل صلاه العشاء بدخل المنتدى وأكلم أصحابى على الميل ببقى سعيد جداً شويه وأجهز نفسى لصلاه العشاء أخرج وأصلى صلاه التراويح وأحلى حاجه خلف الشيخ أحمد العجمى الله على صوته ووالله أحلى حاجه فى الغربه انى صليت وراه وبعدين أخرج من المسجد أجى أكلم ست الحبايب امى وطبعاً أعز إنسانه ليا وكمان خطيبتى طبعاً وبعدين أكون متواجد على المنتدى ممكن أقوم أصلى ركتين مع نفسى وأرجع تانى للمنتدى طبعاً فى ساعه خاصه بيا مع روحى بكتب فيها كل مذكرات حياتى وبكتب قصيده شعرية عن اللى حاسه فى اليوم دا وخلاص الساعه تيجى 3 صباحاً باقى على الفجر نص ساعه أقوم جرى أتسحر وبعدين اروح المسجد أصلى الفجر وأرجع أنام على فكرا انا مش بعرف انام كتير أكتر شىء 6 ساعات تعود بقى

وهكذا دا يعتبر برنامج يومى

مظاهر احتفال حضرتك برمضان
والله بحس فى رمضان إن أنا إنسان تانى غير اللى أعرفه وبقول يارب اخلينى كدا دايماً بس فى مصر كنت بعمل فانوس كبير بإيدى وشويه زينه وأعلقهم فى الشارع أحلى حاجه انى كنت بحط فيه سماعه وأشغله على إذاعة القرأن الكريم . لكن هنا الظروف أتغيرت فالغربه ليها متطلبتها بقى يعنى الشغل وكدا بس بجد رمضان فى مصر روعه عن هنا أحلى حاجه هنا ان الواحد منين ما يحب ينزل الحرم بينزل يعمل عمرة ويرجع فااااااااااااااايق ومن برنامجى بإذن الله انى هعمل عمرة فى أخر يومين فى رمضان لأنى عندى أجازه من يوم 28 رمضان حتى بعد العيد فبحلم باليوم دا لأنها هتبقى أول عمره ليا وأنا صايم وكفايه أنى هقضى يومين فى بيت الله الحرام وبجانب الكعبه الشريفه .

مظاهر احتفال محافظتك برمضان
وانا فى مصر كان رمضان بالنسبه للقريه اللى انا فيها طبعاً بأفخر أنى ابن الريف وهى إحدى قرى محافظه كفر الشيخ بيبقى إستقبال زينه فى كل الشوارع وفوانيس وود وتراحم بين الناس يعنى يعتبر فى مائده كبيرة جدا بيعملها أهل الخير وكمان بعشق الدورة الرمضانية اللى بيكون فيها فرق كتير وطبعاً بكون فى فريق بس دلوقت نسيت شكل الكورة إيه

هتفطرنا ايه؟؟؟؟
أنا بقى بما أنى هنا فى السعوديه فهعزمكم كلكم كدا ونروح مطعم البيك أعزمكم على أحلى أكله بروست وهى عباره عن دجاج مقلى بفيجيتار حااااااااااااااار بس بجد أكله جامده ويلا نستلف قد المرتب مرتين علشان الفلوس تقضى بس تعالوا ووالله هتلاقوا الخير كتير
هستناكم

وعادة حضرتك بتفطر مع مين؟
فى مصر كنت بفطر طبعاً أنا والعائله الكريمه ماما وبابا وأخواتى وأولادهم بتبقى أحلى لمه لأحلى أهل
لكن هنا ففطرت أول يوم ما أخويا وأسرته واليوم التانى مع ابن عمى والثالث مع أخويا التانى وأسرته
واليومين التانيين مع نفسى

يارب ما أكون طولت عليكم
وكل سنه وأنتم طيبين